MABASA Mafala akutoma nawo
Mafala akutoma nawo
Mabasa a Anyakutumwa nkhuthimizwa kwa Mphangwa Zadidi za Yesu Khristu zakulembwa na Luka. Thangwi yache ikulu njakufuna kulonga mule anyakufunza akutoma a Yesu, mwakutsogolerwa na Mzimu Wakuchena, adavekesa Mphangwa Zadidi zakulonga pya iye “mu Yerusalemu, mu Yudea monsene na mu Samaria na kufikirana madolomero a dziko yapansi.” (1.8) Bukhuyi ikulonga pya mbiri ya kufalikira kwa chikhristu mule mudatomera icho pakati pa Ayuda mbichithimiza kukhala chikhulupiro kuna anthu anango a padziko yapansi. Nyakulemba bukhuyi adafunisisa pontho kutsikimizira anyakuwerengache kuti akhristu hakhali gulu yakupandukira Boma ya Chiroma tayu, pontho kuti chikhulupiro chachikhristu chikhachitisa kuti chipembedzo cha Chiyuda chikwane-kwane.
Mabasa a Anyakutumwa anakwanisa kugawiwa m'mapindi matatu, kuonesa kukula kwa mbuto mule mudalalikwa Mphangwa Zadidi zakulonga pya Yesu, na kukhazikiswa kwa mpingo: (1) kutoma kwa chikhristu mu Yerusalemu pidamala ndzidzi udakwatwa Yesu kwenda kudzulu, (2) kufalikira kwa chikhristu kunthemba zinango za Palestina, na (3) kuthimiza kufalikira kwa chikhristu kunthemba zinango zakuzungulira Bara ya Mediterania mpakana kumzinda wa Roma.
Chakufunika m'bukhuyi ndi mabasa a Mzimu Wakuchena, ule adadza mwamphamvu kuna anyakukhulupira mu Yerusalemu pa Nsiku ya Pentekosti mbathimiza kutsogolera na kuwangisa mpingo na akadamu ache papyonsene pyakuchitika pidalongwa m'bukhumu. Mphangwa zakutoma zachikhristu zalongwa mwachigwandira m'maulaliki azinji, pontho pyakuchitika pidalembwa m'Mabasa a Anyakutumwa pikuonesa mphamvu za mphangwazi m'mitima ya anyakukhulupira pontho mukuphatizana kwa mpingo.
Pya m'bwalomu
Kusasanyika kachitira umboni 1.1-26
a. Utongi na kudumbira kwakumalisa kwa Yesu 1.1-14
b. Nyakupita m'mbuto mwa Yudasi 1.15-26
Kuchita umboni mu Yerusalemu 2.1—8.3
Kuchita umboni mu Yudea na Samaria 8.4—12.25
Basa ya Paulo 13.1—28.31
a. Ulendo wakutoma wakwenda kalalika 13.1—14.28
b. Mgumano mu Yerusalemu 15.1-36
c. Ulendo wachiwiri wakwenda kalalika 15.36—18.22
d. Ulendo wachitatu wakwenda kalalika 18.23—21.16
e. Paulo aikhwa m'perezo m'mizinda ya mu Yerusalemu, Kesarea na Roma 21.17—28.31
Currently Selected:
MABASA Mafala akutoma nawo: SenaMw
Highlight
Share
Copy
Want to have your highlights saved across all your devices? Sign up or sign in
© Bible Society of Malawi