KUBULUKA 24

Chiverano chatsikimizirwa

1MBUYA adalonga kuna Mose mbati, “Kwira paphiri pano kuna ine, iwe na Aroni, Nadabu, Abihu pontho na akadamu a Aisraele makumanomwe, pontho ndzidzi una imwe kutali pang'ono na phiriyi mulambe pansi kundipembedza. 2Iwe wekha, nee na anango tayu, wathema kudza chifupi na ine. Anthu aleke na kukwira kwene paphiri pano.”

3Mose adenda kapanga anthu pyonsene pidalonga MBUYA na matongero onsene, tenepo anthu onsene adatawira pabodzi pene mbati, “Tinachita pyonsene pyalonga MBUYA.” 4Mose adalemba matongero onsene a MBUYA. Mangwana mwache na machibese iye adamanga guwa mbaimirisa miyala khumi na miwiri kuimirira madzinza khumi na awiri a Aisraele. 5Kubuluka penepo iye adatuma aphale, tenepo iwo adapereka nsembe zakupyerera kuna MBUYA mbapereka nsembe ng'ombe zinango kukhala nsembe yachiphatizano. 6Mose adakwata theka ya chiropa cha nyama mbachiikha m'ndilo mbakwata theka inango mbachiwazira paguwa yansembe. 7Tenepo iye adakwata bukhu ya chiverano, mudalembwa matongero a Mulungu mule mbaiwerenga mwakugaluza fala kuna anthu. Iwo adalonga mbati, “Tinamvera MBUYA pontho tinachita pyonsene pyatipanga iye.”

8Mose adakwata chiropa chikhali m'ndilo chile mbachiwazira pana anthu. Iye adalonga mbati, “Chenechi ntchiropa chakutsikimiza chiverano, chile chidachita MBUYA na imwe ndzidzi udakupasani iye matongero onsenewa.”#Mt. 26.28; Mk. 14.24; Lk. 22.20; 1Akor. 11.25; Aheb. 10.29; Aheb. 9.19, 20.

9Mose, Aroni, Nadabu, Abihu na akadamu makumanomwe a Aisraele ale adakwira paphiri 10mbaona Mulungu wa Israele. Pansi pa manyalo ache pakhaoneka ninga njira yamiyala yakudula ya safire yachoza ninga thambo. 11Mulungu hadathuswe akadamu enewa tayu; iwo adamuona Mulungu, natenepo adadya na kumwa.

Mose paphiri ya Sinai

12MBUYA adalonga kuna Mose mbati, “Kwira paphiri pano kuna ine. Ndzidzi una iwe pano, ndinakupasa pyakulemberapo piwiri pyamiyala pale palembwa mwambo na matongero onsene pyalembera ine anthu kuti uafunzise napyo.” 13Mose adalamuka mbaenda na Yoswa, nyakumphedzerache, tenepo Mose adatoma#24.13 Mose adatoma: Chakuthumbusula chinango chibodzi chakale chalonga iwo adatoma. kukwira paphiri ya Mulungu ile. 14Mose adalonga kuna akadamu ale mbati, “Tidikhireni pamsasa pano kufikirana ife tibwerere. Aroni na Huri ali namwe pabodzi pano; tenepo munthu ana mseruyo anakwanisa kwenda kuna iwo.”

15Mose adakwira paphiri ya Sinai, tenepo makole adaigudumira. 16-17Demelero ya MBUYA idadza paphiripo. Kuna Aisraele demelero ikhaoneka ninga moto wakugaka paphiri. Nsiku zitanthatu makole ale adabisa phiri ile, tenepo pansiku yachinomwe MBUYA adachemera Mose kubulukira m'makole mule. 18Mose adathimiza kukwira phiri m'makole mule kweneko iye adakhalako nsiku makumanayi mosiku na masikati.#Deut. 9.9.

Currently Selected:

KUBULUKA 24: SenaMw

Highlight

Copy