Kutoma 19

Kudawa kwa Sodomu

1Pidadza angelo awiri ale ku Sodomu mawulo a nsiku yeneyo, Loti akhali khale pamsuwo wa mzindawo. Sindzidzi pidaaona iye, adalamuka mbaenda kagumanikana nawo. Iye adalamba pamaso pawo 2mbalonga mbati, “Ambuya ine ndili pano kukutumikirani. Natenepo tendeni kumusa kwanga. Munakwanisa kutsuka manyalo anu mbamugona mosiku uno. Mangwana na machibese munakwanisa kwenda pyanu ulendo wanu.”

Mbwenye iwo adatawira mbati, “Tayu, ife tinagona pyathu pachitalo cha mumzinda muno.”

3Iye adaakhakhamiza basi. Pakumalisira pache iwo adatawira mbaenda naye kumusa kwache. Loti adaaphikira mikate yakusowa chakufufumisira, pontho adaasasanyira pyakudya alendowo, tenepo iwo adadya.

4Alendo ale mbadzati kwenda kagona, amuna a mu Sodomu adazungulira nyumba ya Loti. Amuna onsene a mumzindamo, aphale na akulu ene, akhali penepo. 5Iwo adachemera Loti mbamvunza mbati, “Amuna adadza kuno mawulo ale, ali kupi? Abuluse kunja kuno!” Amuna a mu Sodomu akhafuna kuchita nawo pyauputa.#Ato. 19.22-24.

6Loti adabuluka panja mbapifungirika kunja. 7Iye adalonga kuna iwo mbati, “Anzanga, ndikukupemphani kuti muleke chita pinthu pyakudawika ninga penepi. 8Ngayang'anani, ine ndina amiyali awiri okhonda dziwa amuna. Nditawiriseni kuti ndidze nawo enewo kuna imwe, pontho muchite nawo pinafuna imwe pyonsene. Mbwenye lekani chita chinthu na chibodzi chene kuna amunawa. Iwo mbalendo m'nyumba mwangamu, tenepo ndathema kuatchinjiriza.”

9Mbwenye iwo adalonga mbati, “Buluka uko nyakudza iwe! Ndiwe animbo kuti unakwanisa kutipanga chakuti tiphate? Buluka uko, gopa tinakuchitira chinthu chakuipa chikulu piringana chikhafuna ife chitira alendowo.” Iwo adamgwinyira Loti m'nduli mbaenda kuti aswe msuwo. 10Mbwenye amuna awiri akhali m'nyumba ale adabulusa mkono awo panja mbamkwekwetera m'nyumba Loti mbafunga msuwowo. 11Tenepo amuna awiri akhali m'nyumba ale adachitisa aphale na akulu onsene akhali panja ale kukhala maboli-boli, towera akhonde ona msuwo wa nyumba ile.#2Maf. 6.18.

Loti abuluka mu Sodomu

12Amuna awiri ale adalonga kuna Loti mbati, “Ngakhala una anthu anango pano; ana achimuna, ana achikazi, akamwini, penu abale anango ambakhala na iwe mumzinda muno, uapange kuti mubuluke muno. 13Thangwi tinafuna kuvunga mbuto ino. MBUYA ava kulira kwa anthu anango pya kuipa kwachita anthu enewa, tenepo atituma kuti tivunge Sodomu.”

14Natenepo Loti adenda kuna amuna akhafuna kusemba anache ale mbaapanga mbati, “Chimbizani mubuluke muno; MBUYA anafuna kuvunga mbuto ino.” Mbwenye iwo akhanyerezera kuti Loti akhalonga msobwe.

15M'makalakwecha angelo ale adayesa-yesa kumchitisa Loti kuchimbiza. Iwo adalonga kuna Loti mbati, “Chimbiza, kwata mkazako na anako achikazi awiriwo mubuluke, towera muleke taya moyo wanu, mzindawu ungavungwa.” 16Loti akhachita nthontho, kwache MBUYA adava naye nsisi. Natenepo amuna awiri ale adaphata pamkono Loti, mkazache na anache awiri mbaaperekera kubuluka mumzinda mule.#2Pet. 2.7. 17Tenepo mbodzi mwa angelo ale adalonga mbati, “Thawani, mupulumuse moyo wanu! Nkhabe yang'ana m'nduli, pontho nkhabe imira paphedi tayu. Thawirani kumapiriko, towera muleke phiwa.”

18Mbwenye Loti adatawira mbati, “Ambuya ndaphata miyendo, lekani kutichita tenepo. 19Imwe mwandichitira kale pyadidi, pontho mwapulumusa moyo wanga. Mbwenye kumapiri kwalonga imweko kwalapha pyakwanga; chakuvungacho chinati chindigumane, tenepo ndinati ndife ndidzati fika kweneko. 20Ngayang'anani, apa pana luwani chifupiletu kuti ndinakwanisa kuthawira kweneko, pontho njing'ono. Nditawiriseni kuti ndithawire pyanga kweneko. Luwaniyo njing'ono pyakwanga, si tenepo tayu? Tenepo moyo wanga unapulumuka.”

21Iye adatawira mbati, “Ande, ndatawira. Ine sinaivunga tayu luwani yeneyo. 22Chimbiza! Thamanga, thangwi ine nkhabe chita chinthu na chibodzi chene tayu iwe mbudzati fika kweneko.” Luwani ile idathulwa Zoari.#19.22 Zoari: Dzina yeneyi ikuveka ninga ya Chiheberi kulonga kuti, “ing'ono.”

Kuvungika kwa Sodomu na Gomora

23Pikhafika Loti mu Zoari dzuwa ikhadabuluka kale. 24Tenepo MBUYA adagwisa miyala ya moto ya sulufule kubulukira kudzulu pana Sodomu na Gomora#Mt. 10.15; 11.23, 24; Lk. 10.12; 17.29; 2Pet. 2.6; Yud. 7. 25mbavunga phedi yonsene pabodzi pene na anthu onsene, pontho na pinthu pyonsene pyakumera. 26Mbwenye mkazi Loti adayang'ana m'nduli mbasanduka chulu cha munyu.#Lk. 17.32.

27Bzobzo mangwana mwache Abrahamu adachimbiza kwenda pambuto ile ikhadaimira iye pamaso pa MBUYA. 28Iye adayang'ana pana Sodomu na Gomora, pontho na phedi yonsene mbaona utsi okhokha tolo-tolo m'dzikomo ninga dzenje yakunyungulusiramo utale. 29Natenepo pidavunga Mulungu mizinda ya phedi, kule kukhakhala Loti, adamkumbuka Abrahamu, pontho adapulumusa Loti kuti aleke vungika.

Phata ya madzinza a Moabu na Amoni

30Na thangwi yakuti Loti akhali na mantha kuti akhale mu Zoari, iye pabodzi na anache achikazi awiri ale adafedzera kumapiri mbakakhala m'nkhwimba. 31Mwanache wamkazi wautombo ule adalonga kuna mphwache mbati, “Babathuyi akwenda mbakalamba, pontho nkhabe mamuna na mbodzi ene m'dziko yonseneyi#19.31 m'dziko yonseneyi: penu m'dziko yonsene yapansi. wakuti anakwanisa kutisemba, towera tibale ana. 32Tendeni timuledzerese babathuyi, towera angaledzera ife tikwanise kugona naye towera tiinjipise dzinzathuyi kudzera muna babathu.” 33Mosiku wenewo iwo adampasa vinyu babawo kuti amwe. Tenepo wautombo ule adagona naye. Mbwenye Lotiyo akhadaledzera pyakwanga mwakuti hakhadziwa pikhachitikapyo tayu.

34Mangwana mwache mwana wautombo ule adalonga kuna mphwache mbati, “Ndagona naye baba dzulo; tenepo tende timuledzerese pontho mosiku uno kuti iwe ugone nayembo. Natenepo tonsene tinabala ana na babathuyi.” 35Natenepo mosiku wenewo iwo adamwesa pontho babawoyo, tenepo wamng'onoyi adagona nayembo babawoyo. Ndzidzi wenewo pontho iye akhadaledzera pyakwanga mwakuti hakhadziwa pikhachitikapyo tayu. 36Na njira yeneyi ana achikazi onsene adakwata mimba na babawo.

37Mtombo ule adabala mwana wamamuna dzinache Moabu.#19.37 Moabu: Dzina yeneyi ikuveka ninga ya Chiheberi kulonga kuti, “Kubulukira kuna Babanga.” Iye akhali kholo ya anthu ambachemerwa Amoabu lerowa.

38Mng'onomboyi adabala mwana wamamuna dzinache Benami.#19.38 Benami: Dzina yeneyi m'Chiheberi nkhulonga kuti “Mwana wamamuna wa mbaleanga,” pontho ikuveka ninga ya Chiheberi kulonga kuti, “Muamoni.” Iye akhali kholo ya anthu ambachemerwa Aamoni lerowa.

Currently Selected:

Kutoma 19: SenaMw

Highlight

Copy