Kutoma 31

Yakobo athawa Labani

1Yakobo adava kuti ana achimuna a Labani akhalonga mbati, “Yakobo akwata pinthu pyonsene pya babathu. Mfuma yonsene ina iye ile, ikhali ya babathu.” 2Pontho iye ene Yakobo adaona kuti makhaliro a Labani kuna iye hakhali ninga mwakale tayu. 3Tenepo MBUYA adalonga kuna iye mbati, “Bwerera kudziko ya babako na abale ako. Ine ndinakhala nawe.”

4Natenepo Yakobo adatumira mphangwa Rakele na Lea kaapanga kuti agumanikane naye m'minda kukhali mikumbi yache kule. 5Iye adalonga kuna iwo mbati, “Ine ndaona kuti makhaliro a babanu kuna ine si ninga mwakale mule tayu. Mbwenye Mulungu wa babanga ambakhala na ine. 6Imwe monsene mukudziwa kuti babanu ndamphatira basa na mphamvu zanga zonsene. 7Mbwenye iye andinyengeza mbasanduza kupagalwi kwanga kakhumi. Kwache Mulungu hadanditawirise kuti andikuwaze tayu. 8Ndzidzi onsene ukhalonga Labani kuti, ‘Kupagalwi kwako kunakhala kukwata mbuzi zamathotho-mathotho,’ mikumbi yonsene idateya ana amathotho-mathotho. Pikhalonga iye kuti, ‘Kupagalwi kwako kunakhala kukwata mbuzi zamisilingi-misilingi,’ mikumbi yonsene idateya ana amisilingi-misilingi. 9Mulungu akwata pifuyo pyonsene kupibulusa kuna babanu mbapipereka kuna ine.

10“Pandzidzi wakuteya pifuyo, ndidalota ndoto zakuti mabokho akhabebesa ale akhali amisilingi-misilingi, amathotho-mathotho na amadamba-madamba. 11Mngelo wa Mulungu adalonga kuna ine kundoto mbati, ‘Yakobo.’ Ine ndidatawira kuti, ‘Ndili pano.’ 12Iye adathimiza kulonga kuti, ‘Ngayang'ana mabokho onsene anabebesana ngamisilingi-misilingi, mathotho-mathotho na amadamba-madamba. Ine ndachitisa penepi kuti pichitike thangwi ndaona pyonsene pinakuchitira Labani. 13Ine ndine Mulungu ule adakuonekera ku Betele, kule kudaimisa iwe mwala kukhala chikumbuso mbuupereka manja mwanga pakuukhuthulira mafuta aolivi padzulu pache, pontho kule kudadumbira iwe pamaso panga. Chinchino sasanyika ubwerere kudziko kudabalwa iwe.’ ”#Kut. 28.18-22.

14Rakele na Lea adatawira mbati, “Nkhabe pontho chinthu chasala chakuti tinakwata babathu angafa. 15Iye ambatichitira pinthu khala ninga ndife alendo. Iye adatisembesa pontho chinchino kobiri zonsene zidasembeswa na ife amala kuzidya. 16Mfuma yonsene yakwata Mulungu kubulukira kuna babathu kuipereka kuna ife, njathu na anathu. Chitani pyonsene pyakupangani Mulungu.” 17-18Natenepo Yakobo adasasanyika pyakwenda kuna babache m'dziko ya Kanani. Iye adakwizika anache na akazache pa ngamila mbazwinga pifuyo pyache pyonsene kwenda patsogolo pache, pontho na pyonsene pikhadagumana iye m'dziko ya Mesopotamia. 19Labani akhadenda kachingisa mabirache, natenepo Rakele adaba milungu ya m'nyumba mwa babache. 20Yakobo adanyengezambo Labani pakukhonda kumpanga kuti iye akhafuna kuthawa pyache. 21Yakobo adakwata pyonsene pikhali na iye mbabuluka mwakuchimbiza. Iye adawambuka mkulo wa Yufurate mbatoma kwenda kudziko ya mapiri ya Gileadi.

Labani asaka-saka Yakobo

22Pidagwanda nsiku zitatu Labani adava kuti Yakobo akhadathawa. 23Iye adakwata anthu ache mbatewera Yakobo. Iwo adamala nsiku zinomwe m'njira mpakana adamphatira m'dziko ya mapiri ya Gileadi. 24Mosiku wenewu Mulungu adalotesa Labani mbampanga mbati, “Chenjera, leka kamthuswa Yakobo na pang'ono pene.” 25Yakobo akhadamanga msasache paphiri, natenepo Labani adamangambo msasache pabodzi na amunache m'dziko ya mapiri ya Gileadi.

26Labani adalonga kuna Yakobo mbati, “Udandinyengezeranji tenepa kukwata ananga kwenda nawo pyako ninga akazi akuphatwa kunkhondo? 27Udandinyengezeranji tenepa kubuluka pyako mwakuzemba? Iwe mbudandipanga, ine mbidakugwinya mwadidi na kusekera pontho kuimba pakuphatisa basa pisekese na anyakatangale. 28Iwe hudanditawirise tayu kumpsompsona ananga pontho pidzukulu pyanga kugonekana nawo. Pinthu pidachita iwepyo mphyapezi-pezi. 29Ine ndina mphamvu zakukuwaza nazo, mbwenye mosiku wa dzulowu Mulungu wa babako andicheuza kuti ndileke kukuthuswa na pang'ono pene. 30Ndapidziwa kuti iwe udabuluka thangwi udatchuwa pyakwanga kwanu, apombo udaberanji milungu ya m'nyumba mwanga?”

31Yakobo adatawira mbati, “Ine ndikhagopa kuti munandipokosera ananuwa. 32Mbwenye ngakhala munamgumana unango pano kuti ana milungu yanu, weneyo aphiwe. Amunanga ali pano ninga mboni, sakani chinthu chonsene chanu, pontho chinthu chanucho mungachigumana chikwateni.” Yakobo hadapidziwe tayu kuti Rakele akhadaba milungu ya Labani.

33Labani adapita mbakayang'ana m'khumbi mwa Yakobo. Kubuluka penepo adapita mwa Lea, na mwa mabitchu ache awiri achikazi ale, kwache monsenemo hadagumanemo milungu yache ile tayu. Kubuluka penepo adapita m'khumbi mwa Rakele. 34Rakele akhadakwata milungu ile, mbaiikha m'thumba ya chakukhalira pa ngamila, tenepo iye adaikhalira. Labani adasaka-saka m'khumbi monsene, kwache hadaigumanemo tayu. 35Rakele adalonga kuna babache mbati, “Baba, lekani kundizhangalira, mbwenye ine sinakwanisa kuimira pamaso panu tayu thangwi ndili kumwezi.” Labani adasaka-saka, kwache milungu yache hadaigumane tayu.

36Natenepo Yakobo adazhangali pyakwanga mbavunza mbati, “Ndakudawiraninji? Ndaswa mwambo wanji wakuti wakupasani mphamvu zakundisaka-saka nazo? 37Chinchino mwasaka-saka monsene muna pinthu pyanga, apo ntchinthu chanji cha m'nyumba chagumana imwe kuti ntchanu? Chiikheni pakwechapa kuti abale anu na amunanga achione, pontho alekeni iwo apitonge kuti mbani pakati pa imwe na ine achita pyadidi. 38Ine ndakhala namwe pyaka makumawiri; mabiranu na mbuzi zanu hazidaleke kuteyana tayu. Pontho ine sidadye kamwana mbuzi penu biranu tayu. 39Ndzidzi onsene bira angaphatwa na nyama zam'tsanga, ndikhagula ndekha ene inango kubwezera penepo. Ine nee ndikhadza nayo kuna imwe tayu kukuonesani kuti si ine ndidachitisa penepi. Imwe mukhandipagalisa chinthu chonsene chakubiwa, penu chibiwe na masikati penu na mosiku. 40Ndzidzi uzinji ndikhaona nyatwa na kupisa kwa dzuwa masikati, pontho na kutonthola mosiku. Ine nee ndikhakwanisa kuona chitulobi. 41Penepi pikhali tenepa pyaka pyonsene makumawiri pikhakhala ine na imwe. Pyaka khumi na pinayi ndidakuphatirani basa towera ndisembe ananu awiriwa, pontho pyaka pitanthatu ndidaphata basa, towera mundipasembo pifuyo pyanupi, kwache imwe mwandipunza kupagalwi kwanga kakhumi. 42Ngakhala Mulungu wa babanga, Mulungu wa Abrahamu na Isake hakhali nane tayu, imwe mbamudandigwinya kale chimanja-manja. Mbwenye Mulungu adaona kusanyika kwanga na basa yaphata ine, pontho mosiku wa dzulowu adakusumululani.”

Chiverano pakati pa Yakobo na Labani

43Labani adatawira Yakobo mbati, “Akaziwa mbananga; anawa nganga, pontho pifuyopi mphyanga. Kulonga pyakuona pyonsene pinaona iwe panopi mphyanga. Podi ine sinakwanisa kuchita chinthu na chibodzi chene kuti ndigoswe anangawa na anawo ene tayu, 44ndasasanyika kuchita nawe chiverano. Tende tisasanye mulu wa miyala kuti ukhale chikumbuso cha chiverano chathu.”

45Natenepo Yakobo adakwata mwala mbauimisa kuti ukhale chikumbuso. 46Iye adapanga amunache kuti asasanye mulu unango wa miyala. Tenepo iwo adadya pyakudya pyawo m'khundu-khundu mwa mulu wa miyala ule. 47Labani adauthula mulu ule Yegara-Sahaduta,#31.47 Yegara-Sahaduta: Dzina yeneyi m'Chiaramu nkhulonga kuti “mulu wa chikumbuso.” mbwenye Yakobo adauthula Galedi.#31.47 Galedi: Dzina yeneyi m'Chiheberi nkhulonga kuti “mulu wa chikumbuso.” 48Labani adalonga kuna Yakobo mbati, “Mulu wa miyalawu ndiye unakhala chikumbuso kuna tonsenefe.” Ndi thangwi yache mbuto ile idathulwa Galedi. 49Labani adalonga pontho mbati, “MBUYA mbaone pinachita ife tonsene pinalekana ife unango na mwanzache.” Natenepo mbuto ile idathulwa pontho Mizipa.#31.49 Mizipa: Dzina yeneyi ikuveka ninga ya Chiheberi kulonga kuti, “Pambuto panakwanisa munthu kuona chinthu.” 50Labani adathimiza kulonga mbati, “Ngakhala unakavuya anangawa penu kusemba akazi anango, podi kwene kuti ine ndikhonde kupidziwa, mbwenye ukumbuke kuti Mulungu akutiona. 51Miyala yamuluka ine pakati pa iwe na ine njishi, pontho mwala wakuti ukhale chikumbuso ngufu. 52Pyonsene piwiri, mulu wa miyala na mwala wachikumbuso mphyakutikumbusa. Ine nkhabe gwanda kupiringana muluwu kukusosa tayu. Iwembo leka kugwanda kupiringana mulu wenewu, penu mwala wa chikumbuso kundisosa. 53Mulungu wa Abrahamu na Mulungu wa Nahori#31.53 Abrahamu…Nahori: Abrahamu akhali mbuyache Yakobo, Nahorimbo akhali babache Labani. ndiye anakhala mtongi pakati pathu.” Tenepo na dzina ya Mulungu, ambapembedza Isake babache ule, Yakobo adadumbira kuti anakoya chiverano chile. 54Iye adapha nyama mbaipereka nsembe paphiri. Natenepo adachemera amunache kadya. Pidamala iwo kudya adagona paphiri ponthopo. 55Bzobzo mangwana mwache, Labani adampsompsona ana achikazi ale, pontho na pidzukulu pyache kugonekana nawo. Kubuluka penepo adalamuka mbabwerera kwawo.

Currently Selected:

Kutoma 31: SenaMw

Highlight

Copy