1 ŴaKorinte 1
1
1Kalata wakutuwa kwaku Paulo, wakudanikiya kuŵa wakutumika waku Yesu Kristu mu khumbu laku Chiuta, ndi Sosthene mbali widu, 2ku mpingu waku Chiuta wamu Korinte, ku ŵakupaturika mwaku Kristu Yesu, wakudanikiya kuŵa wakupaturuka, pamoza ndi wose mu malo ghose wo ŵadana pa zina laku Yesu Kristu Mbuyafwe, tose pamoza Mbuya wawo ndi widu.
3Wezi kwaku imwe ndi chimangu kutuwa kwaku Chiuta Auskefwe ndi ku Ambuya Yesu Kristu.
Vitumbiku vyakutuwa kwaku Kristu
4Ndiwonga Chiuta nyengo zose paku imwe, pa chifukwa cha wezi wo waku Chiuta weniwo ungupaskika kwaku imwe mwaku Kristu Yesu; 5kuti mwaku vyose mwasakatiskika mwaku iyo, mu kakambidu kose ndi mziŵiru wose, 6uli ndimo chisimisimi ndi uneneska wa mwaku Kristu wakhozgeke mwaku imwe: 7viyo kuti mupereŵe mu chawezi cha mzimu che chose so cha pakulindizga uvumbuzi wa Ambuyafwe Yesu Kristu; 8mweniyo nayo wakakhozganga imwe mpaka ku umari, wambura masumulika mu zuŵa la Ambuyafwe Yesu Kristu. 9Ngwamagomekezgeka Chiuta, mwaku mweniyo mungudanikiya ku wanase wa Mwana wake Yesu Kristu Ambuyafwe.
Mu mpingu mureke kuŵa mupambanu
10Kweni ndikuŵeyereni, mwa ŵabali, mu zina la Ambuyafwe Yesu Kristu, kuti mose mukambe chakuyanayana, ndi kuti mwinu muŵevi magaukanu; kweni kuti muŵe ŵakumangana pamoza mu chinjeru chakuyana ndi mu cheruzgu chakuyana. 11Chifukwa ndi wo ŵaku Kloe kwandivumbulikiya vya paku imwe, mwa ŵabali, kuti suskanu ziripo mukati mwinu. 12Cho ndikamba nchakuti yumoza ndi yumoza waku imwe watiti, “Ine nde waku Paulo”; munyake watiti, “Ine nde waku Apolo”; munyake watiti, “Ine nde waku Kefa”; munyake watiti, “Ine ndi waku Kristu.” 13Kumbi Kristu iyo wapandukana? Kumbi Paulo wangupayikikiya pa chifukwa chinu? Pamwenga kumbi mungubatizikiya mu zina laku Paulo? 14Ndimuwonga Chiuta pakuti ndirivi kubatizapo yumoza waku imwe, kweni Krispu ndi Gayo pe; 15vinu munthu wanganena kuti mungubatizikiya mu zina langu. 16(Kweni ndingubatiza wa nyumba so yaku Stefano. Pade paku wo, kuti ndiziŵa cha kuti ndingubatiza munyake so.) 17Chifukwa Kristu kuti wangundituma kwachibatiza cha, kweni kwachigozga evangeli: mu zeru ya mazu cha, vinu yingawayuka nthazi ya mphinjika yaku Kristu.
Kristu nthazi ndi zeru zaku Chiuta
18Chifukwa kwaku wo mbakuyowa mazu gha mphinjika nkhupusa; kweni kwaku ifwe taŵakutaskika ndi nthazi yaku Chiuta. 19Pakuti kwalembeka,
“Nkhapasuwanga zeru ya ŵazeru,
ndi uchenjezi wa ŵakuchenje nkhawayuwanga.”
20We pani wazeru? We pani mlembi? We pani wasuskano wa mgonezi uno? Asi Chiuta wayipusiska zeru ya charu? 21Chifukwa kwakulingana ndi zeru yaku Chiuta charu cho mu zeru yake chengavi kumziŵa Chiuta, kungukondweska Chiuta mu kupusa kwa chitaula kwachitaskiya ŵakuvwana. 22Pakuti ŵaYuda ŵafumbiriya visimikizgu, ŵaGriki ŵapenja zeru, 23kweni ifwe titaula Kristu wakupayikika, ku ŵaYuda nchiguŵisku, ku ŵaMitundu nkhupusa; 24kweni kwaku ŵeniwo ŵadanika, ŵaYuda ndi so ŵaGriki, Kristu ndi nthazi yaku Chiuta ndi zeru yaku Chiuta. 25Pakuti chakupusa chaku Chiuta nchazeru kwakuruska ŵanthu; ndi chaunthomboru chaku Chiuta nchalikongonu kwakuruska ŵanthu.
26Chifukwa thoŵani kudanika kwinu, mwa ŵabali, ŵalive kudanika ŵanandi ŵazeru uli nkhu liŵavu, ŵanthazi ŵanadi cha, ŵanangwa ŵanandi cha; 27kweni Chiuta wasankha vyakupusa vya charu, alinga kuti waŵalengeske ŵazeru; ndi vyakutomboroka vya charu wasankha Chiuta, alinga walengeske vyanthazi, 28wasankha Chiuta vyawakawaka vya charu, ndi vyakuyeyeka, ndi vinthu vyakuŵapo cha, alinga wawayuwe vyakuŵapo. 29Viyo kuti wareke munthu yose kutumbwa paurongo paku Chiuta. 30Mweniyo ndi funda ya umoyo winu mwaku Kristu Yesu, mweniyo Chiuta wamuchita kuŵa vinjeru vidu, urunji widu, utozi widu ndi uwombozi widu; 31alinga kuti, uli ndimo kwalembeke, “Wakutumbwa watumbwiye mu Ambuya.”
Currently Selected:
1 ŴaKorinte 1: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi