1 ŴaKorinte 3
3
Wateŵete ŵaku Chiuta
1Ndipo ine, mwa ŵabali, kuti ndinguziŵa cha kukukambiyani nge nkhu ŵamzimu, kweni nge nkhu ŵaliŵavu, nge nkhu ŵamjedu ŵamwaku Kristu. 2Ndingumuhiŵiyani mkaka, ndi chakurgha chikhomi cha; pakuti mwengavi kuziŵa kuchironde: chingana ndi sono naku kuti muziŵa kuchironde cha; 3chifukwa mweche ŵaliŵavu. Pakuti po pe bina ndi ndeu mukati mwinu, asi mwe ŵaliŵavu, ndi mutenda ulaka mbanthu bweka? 4Chifukwa penipo yumoza watiti, “Nde waku Paulo ine,” ndi munyake, “Ndine waku Apolo,” asi mwe ŵanthu?
5Apolo nkhane? Ndipo Paulo nkhane? Mbateŵeti mwaku ŵeniwo munguvwaniya; uli ndimo Ambuya angupaskiya kwaku yose. 6Ine ndingupanda, Apolo wangudiriya maji; kweni Chiuta ndiyo wangumezga. 7Ndiviyo wakupanda yo kuti nkhanthu cha, chingana ngwakudiriya maji yo; kweni Chiuta wakumezga ndiyo. 8Ndipo wakupanda ndi wakudiriya maji mbamoza: kweni yose wajirondiyenge mphotu yaku yija kwakulingana ndi chitakataka chaku yija. 9Chifukwa te ŵanchitu-ŵanase ŵaku Chiuta; ulimi waku Chiuta, uzengi waku Chiuta ndimwe.
10Mwa wezi waku Chiuta wo ungupaskika kwaku ine, nge ndi mzengi mura wazeru ndinguŵika chiŵanja; ndipo munyake wazengapo. Kweni munthu yose walereske mo wazengiyapo. 11Chifukwa chiŵanja chinyake kuti waziŵa munthu kuŵika cha, kweni chenicho pe chararikika, ndicho Yesu Kristu. 12Kweni asani munthu wazenga pachiwanjacho ndi golide, siliva, myayamtengu, miti, uteka, mbuwa; 13nchitu yake yose yikawonekanga: chifukwa zuŵa lo yikayirongonga, pakuti yikavumbulikanga mu moto; ndipo nchitu yaku yose mo yiriri, moto ndiwo wesenge nchituyo. 14Asani nchitu ya munthuyo wazenga pa chiŵanja cho yijaririyenge, wakarondenga mphotu. 15Asani nchitu ya munthu yochekenge, chikamuŵiyanga chitayiku: chingana iyo mweneko nadi wapozomoskekenge; kweni viyo nge ndimu moto porotu. 16Asi muziŵa kuti mwe kasopi#3.16 kasopi: ndiku kuti tempile. waku Chiuta, ndikuti Mzimu waku Chiuta uja mwainu? 17Asani yumoza wananga kasopi waku Chiuta, Chiuta wamunangenge iyo; chifukwa kasopi yo waku Chiuta ngwakupaturika, ndipo kasopi yo wakupaturika ndimwe.
18Paŵevi wakujifuvya. Asani munthu mwaku imwe watijipima kuti ngwazeru mu mgonezi uwu ikuwaŵe wakupusa, alinga kuti waŵenge wazeru. 19Chifukwa kwaku Chiuta zeru ya charu chino nkhupusa. Chifukwa kwalembeka, “Ngwakuŵakole ŵazeru mu uchenjezi wawo,” 20ndipo so, “Mbuya waziŵa marunguruku gha ŵazeru wo, kuti ngaumbughuya.” 21Viyo wangatumbwanga yumoza cha mu ŵanthu. Chifukwa vyose vye vinu; 22manyi ndi Paulo, pamwe Apolo, pamwenga Kefa, pamwenga charu, pamwenga umoyo, pamwenga nyifwa, pamwenga vyasono, pamwenga vyamkucha; vyose vye vinu: 23imwe mwe ŵaku Kristu; ndipo Kristu ngwaku Chiuta.
Currently Selected:
1 ŴaKorinte 3: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi