Chiyambo 18

Mathenga ghatatu ghamuwoneke Abrahamu

1Ndipo Ambuya angumuwoneke pafupi ndi miti ya msolo ya pa Mamre, wanguti waja pa khomo la hema lake mu chifundizi cha msana. 2Wangulereska ndipo wanguwona ŵanthu ŵatatu ŵanguma paurongo pake. Wanguti waŵawona wanguchimbiya kutuwa pa khomo la hema lake kwachikumana nawo, ndipo wangukotamiya pasi, 3ndi wanguto, “Ambuya asani ndasaniya wezi mu maso ghinu, rekani kumurutiriya cha muŵanda winu. 4Ghatoleke maji ghamanavi, ndi musambe marundi ghinu, ndipo mupumuwe mu sina mwa muti uwu, 5po ine ndamuto chiŵande kuti mujizikiske mtima, sono pavuli ndipo murutenge pakuti mwaza ku muŵanda winu.” Viyo iwo ŵanguti, “Chita uli ndimo wanene.” 6Ndipo Abrahamu wanguchimbiriya ku hema kwaku Sara, ndi wanguti, “To ruŵi myeso yitatu ya ufwa waraampha, ukasi, ndi uchiti viŵande.” 7Ndipo Abrahamu wanguchimbiriya ku mskambu, wanguto thole, ladututuŵa lamamphe, wangulipaska ku muŵanda, mweniyo wangulilongoso. 8Ndipo wanguto masa ndi mkaka, ndi thole lo wangulongoso wanguvijarika paurongo pawo; ndipo wanguma pafupi nawo penipo ŵarghanga. 9Ŵanguti kwaku iyo, “We pani Sara muwoli wako?” Iyo wanguti, “Wemu hema.” 10Ambuya anguti, “Ndazamuwere kwaku iwe pa nyengo ya liwondwe, ndipo Sara muwoli wako wakaŵanga ndi mwana munthurumi.” Ndipo Sara wategherezganga pa khomo la hema ku msana kwake. 11Kweni Abrahamu ndi Sara ŵangukota, ŵa virimika vinandi; Sara kungumumariya kuŵa nge ndimo ŵachitiya ŵanthukazi. 12Viyo Sara wanguseka mu mtima pe, wanguti, “Sono po ndakota, ndi mrumi wangu nayo wakota, ndiŵenge so ndi kukondwa?” 13Ambuya anguti kwaku Abrahamu, “Chifukwa chine waseka Sara ndi kunena kuti, ‘Ndingapapadi mwana ine, sono penipo nde khongwe?’ Kumbi chilipo cho nchinonono ku Ambuya? 14Pa nyengo yo ndanena ndikawerenga kwako, mu nyengo ya liwondwe, ndipo Sara wakaŵanga ndi mwana munthurumi.” 15Kweni Sara wangupandira wanguti, “Ndengavi kuseka,” pakuti wangopa. Iyo wanguti, “Awa, kweni unguseka.” 16Sono ŵanthu wo ŵangusokapo ŵanguruta, ndipo ŵanguruta ku Sodomu. Ndipo Abrahamu wanguruta nawo kwachiŵalinda ku nthowa. 17Ambuya anguti, “Kumbi ndikamubisanga Abrahamu cho ndikachitanga; 18pakuti Abrahamu wakaŵanga mtundu ukuru ndi wanthazi, ndipo mitundu yose ya pano pasi yikatumbikikiyanga mwaku iyo? 19Awa, pakuti ndamusankha, kuti warunguchizge ŵana ŵake ndi mbumba yake ya pavuli pake kusunga nthowa ya Ambuya pakuchita ukongorekwa ndi urunji: alinga kuti Ambuya ŵatole kwaku Abrahamu chenicho ŵapangana nayo.” 20Viyo Ambuya anguti, “Chifukwa chakuti nkhuta pa Sodomu ndi Gomora njikuru, ndipo mphurupuru yawo njizitu ukongwa, 21ndisikiyengeko kwachiwona vinu ŵachitadi kwakuyana ndi nkhuta yo yaza kwangu; ndipo asani ndi viyo cha, ndamuziŵa.”

Abrahamu warombe ŵaku Sodomu

22Viyo wo ŵangung'anamuka penipo ndi ŵanguruta ku Sodomu; kweni Abrahamu, wanguma mbwenu paurongo pa Ambuya. 23Sono Abrahamu wangundere pafupi, ndi wanguti, “Kumbi mukaparghang'anga nadi ŵarunji pamoza ndi ŵaheni? 24Nanga asani ŵalimo machumi ghankhonde ŵarunji mu msumba wo, kumbi muparghang'enge mbwenu malo gho, kuti mukagherekanga cha chifukwa cha ŵarunji wo machumi ghankhonde ŵe mwenimo? 25Chimuŵiyeni kutali kuchita cha viyo, kubaya ŵarunji pamoza ndi ŵaheni, kuti ŵarunji ŵayani ndi ŵaheni! Ichi chimuŵiyeni kutali! Kumbi Mweruzgi wa charu chose kuti wachitenge urunji cha?” 26Ndipo Ambuya anguti, “Asani pa Sodomu ndisaniyengepo arunji machumi ghankhonde mu msumba wo ndikagharekanga malo ghose chifukwa chawo.” 27Abrahamu wangwamuka, “Ehe, ndajigangiya kukamba ndi Ambuya, ine ndi fuvu ndi choto. 28Nanga asani papele ŵankhonde pakuwo machumi ghankhonde. Kumbi muparghang'enge msumba wose chifukwa chakupele ŵankhonde?” Ndipo wanguti. “Kuti ndiuparghang'enge cha asani ndisaniyengemo machumi ghanayi pachanya ŵankhonde rauwa.” 29Wanguwerezgapo kukamba nayo, ndi wanguti, “Nanga asani machumi ghanayi ghangasanirika muwa.” Wangwamuka, “Chifukwa cha machumi ghanayi kuti ndiuparghang'enge cha.” 30Viyo wanguti, “Ambuya areke kukaripa, ndipo ndirongoronge nawo. Nanga asani ŵamusanirikamo machumi ghatatu.” Angwamuka kuti, “Ndamuchita kanthu cha, asani ndamusaniyamo machumi ghatatu.” 31Wanguti, “Wonani ndajigangiya kurongoro ndi Ambuya. Nanga asani ŵamusanirikamo machumi ghaŵi.” Angwamuka, “Chifukwa chaku wo machumi ghaŵi, kuti mdakuuparghang'a cha.” 32Viyo wanguti, “Ambuya areke kukaripa, ndipo nkharongoronga ichi kamoza pe. Nanga asani ŵamusanirikamo chumi.” Angwamuka, “Chifukwa chaku wo chumi kuti mdakuuparghang'a cha.” 33Viyo Ambuya anguruta mu nthowa yawo ŵati ŵamara kurongoro ndi Abrahamu; ndipo Abrahamu nayo wanguwere ku malo ghake.

Currently Selected:

Chiyambo 18: TongaMw

Highlight

Copy