Chiyambo 25

Nyifwa yaku Abrahamu

(1 Mikoka 1.32-33)

1Abrahamu wanguto munthukazi munyake yo zina lake lenga Ketura. 2Wangumupapiya Zimirana, Jokishana, Medana, Midiani, Ishibaka, ndi Shuna. 3Jokishana wenga wiske waku Sheba ndi Nedana. Ŵana ŵanthurumi ŵaku Dedana ŵenga Ashurimi, Letushimi ndi Leumimi. 4Ŵana ŵaku Midiyani ŵenga Efa. Efero, Hanoke, Abida, ndi Eledaya. Ŵose yaŵa ŵenga ŵana ŵaku Ketura. 5Abrahamu wangupaska vyose vyo wenga navyo kwaku Yisaki. 6Kweni ku ŵana ŵavidandanu vyake wangupaska vya ulera, ndipo wachalipo wamoyo wanguŵatuzgako ku mwana wake Yisaki, wanguŵatuma kuchiri ku vuma ku charu cha kuvuma. 7Yagha ndi mazuŵa gha virimika vya umoyo waku Abrahamu, virimika machumi pe chumi pachanya machumi ghankhonde ndi ghaŵi ndi vinkhonde (175). 8Abrahamu wangututa kwakumariya ndi wangufwa pa ukhongwe wakufikapo, wenga khongwe ndi wa virimika vinandi, ndipo wangusazgika ku ŵanthu ŵake. 9Yisaki ndi Yishumaele ŵana ŵake ŵangumuŵika mu mphanji ya Makipela mu munda waku Efroni mwana waku Zoara muHiti, ku vuma kwa Mamre, 10munda weniwo Abrahamu wangugula ku ŵaHiti. Muwa ndimu ŵanguŵika Abrahamu, ndi Sara muwoli wake. 11Pavuli pa nyifwa yaku Abrahamu, Chiuta wangutumbika Yisaki mwana wake, ndipo Yisaki wajanga mu Bere-lahai-roi.

Mbumba yaku Yishumaele

(1 Mikoka 1.28-31)

12Izi ndi mphapu zaku Yishumaele, mwana waku Abrahamu, mweniyo Hagara muEgipiti, muŵanda waku Sara, wangupapiya Abrahamu, 13yagha ndi mazina gha ŵana ŵanthurumi ŵaku Yishumaele ŵakuzumbulika mu mundondomeko wa kawi kawo. Nebiyoti wa umwali waku Yishumaele, ndi Kedara, Adibele, Mibishama, 14Misima, Duma, Masa, 15Hadada, Tema, Jeturu, Nafishi, ndi Kedema. 16Yaŵa ndi ŵana ŵanthurumi ŵaku Yishumaele, ndipo yagha ndi mazina ghawo, kwakulingana ndi mizi yawo, ndi kwakulingana ndi maugoŵi ghawo, mafumu chumi ndi ghaŵi kwakuyana ndi mitundu yawo. 17(Ivi ndi virimika vya umoyo waku Yishumaele, machumi pe chumi pachanya machumi ghatatu ndi vinkhonde ndi viŵi (137); wangufwa ndipo wangusazgika ku ŵabali ŵake.) 18Ŵana ŵaku Yishumaele ŵanguja kwamba ku Havila kwachifika ku Shuru, yo wathyana ndi Egipiti kukulazga ku Asiriya wanguja kwa kuthyana ndi ŵanthu ŵake wose.

Esau ndi Yakobe

19Izi ndi mphapu zaku Yisaki, mwana waku Abrahamu: 20Abrahamu wenga wiske waku Yisaki, ndipo Yisaki mu ura wenga wa virimika machumi ghanayi (40) po wangutole muwoli wake Rebeka, mwana munthukazi waku Betele muAramu yo waku Padani-aramu, mzichi waku Labani muAramu. 21Ndipo Yisaki wangurombe muwoli wake ku Ambuya, chifukwa wenga chumba; ndipo Ambuya angumupaska cho wanguromba, ndipo Rebeka muwoli wake wanguzuwuka. 22Ŵana ŵangulimbana mu moyo mwake, ndipo iyo wanguti, “Asani ndimu kulili, ndiŵiyanji wamoyo?” Viyo wanguruta kwachifumba Ambuya. 23Ndipo Ambuya ŵanguti kwaku iyo,

“Mwe mitundu yiŵi mu chibali chako;

Ndipo ŵanthu ŵaŵi wo ukapapanga ŵakagaukananga.

Yumoza wakaŵanga wakulimba kwakuruska munyake:

mura wakatataliyanga mumana.”

24Penipo mazuŵa gha kuchiriya kwake ghangukwana, mwenga ŵana ŵamuwoli mu chibali chake. 25Wakudanga wangusotopokamo wakuti jee, liŵavu lake uli nchirundu cha cheya; viyo wangumudana zina lake Esau. 26Pavuli mhurwa wake wangusotopoka, ndipo janja lake linguko rundi laku Esau; chifukwa ichi zina lake lingudanika Yakobe. Yisaki wenga wa virimika machumi ghankhonde ndi limoza (60) pa nyengo yeniyo nyinawo wanguŵapapa.

Esau waguliska ura wake

27Ŵanguti ŵakuwa ŵahurwa yaŵa, Esau wenga chiŵinda chakuziŵa kubaya nyama, munthu wamu dondo; kweni Yakobe wenga wakuzika phe, wajanga mu mahema. 28Yisaki wangwanja Esau, chifukwa warghanga nyama zake; kweni Rebeka wangwanja Yakobe. 29Nyengo yimoza penipo Yakobe wabikanga chipere; Esau wangusere wachituwa mu dondo, ndi wangulakatuka ndi nja. 30Ndipo Esau wanguti kwaku Yakobe, “Ndipaskeko chipere chiyera ndirghepo, pakuti ndalakatuka!” (Chifukwa ichi zina lake wangudanika Edomu.#25.30 Edomu: nkhuti chiyera chifukwa chipere cho Esau wangurgha chenga chiyera.) 31Yakobe wanguti, “Chakudanga undiguliski ura wako.” 32Esau wanguti, “Nde pafupi kufwa, ura wendi nchitu uli kwangu?” 33Yakobe wanguti, “Udange chandirapiya danga.” Viyo wangumurapiya ndi wanguguliska ura wake kwaku Yakobe. 34Sono Yakobe wangupaska Esau chiŵande ndi chipere, wangurgha ndi wangumwa, ndipo wangusoka ndi wangusere ku nthowa. Viyo ndimu Esau wanguyeye ura wake.

Currently Selected:

Chiyambo 25: TongaMw

Highlight

Copy