Chiyambo 31

Yakobe wakhumba kwake, wathaŵa navyo vyake

1Ndipo Yakobe wanguvwa kuti ŵana ŵaku Labani ŵakambanga kuti, “Yakobe wato vyose vyo vyenga vya auskefwe; ndi kutuwa ku vya auskefwe ndimo wawone uromba wose.” 2Ndipo Yakobe wanguwona kuti Labani kuti wamuphwerenga uli ndi kali cha. 3Sono Ambuya anguti kwaku Yakobe, “Uwere ku charu cha ausu ndi ku ŵabali ŵako ndipo ine ndikaŵanga nawe.” 4Viyo Yakobe wangutuma kwachidana Rakelo ndi Leya ku munda kweniko kwenga viŵetu vyake, 5ndipo wanguti kwaku wo, “Ndiwona kuti auskemwe kuti ŵatindiphwere uli ndi kali cha. Kweni Chiuta wa ada waŵa nane pamoza. 6Muziŵa kuti ndatataliya auskemwe ndi nthazi zangu zose: 7ndipuuli auskemwe ŵandizgelera ndi ŵasintha mphoto yangu nyengo chumi, kweni Chiuta wengavi kuzomera kuti wandikomweske. 8Asani iyo wangukamba kuti, ‘Zamaŵanga ndizu zikaŵanga mphoto yako’, mbwenu viŵetu vyose vingupapa za maŵanga; ndipo asani wanguti, ‘Za mudyeka zikaŵanga mphoto yako’, mbwenu viŵetu vyose vingupapa za mudyeka, 9Viyo ndimu Chiuta wakwamphuliya ng'ombe za auskemwe, ndi wapaska ine. 10Mu nyengo ya kuzuwuka kwa Viŵetu ndinguyunuska maso ghangu ndi ndinguwona mu loto langu kuti mbuzi zinthukazi zo zachilipukanga pa viŵetu zenga za mudyeka, za maŵanga ndi za kuvurumutiya. 11Sono mungelo waku Chiuta wanguti kwaku ine mu loto, ‘Yakobe,’ ndipo ndinguti, ‘Nde pano!’ 12Ndi wanguti, ‘Yunuska maso ghako ndi wona mbuzi zose zenizo zichilipuka pa viŵetu vyo za mudyeka, zamaŵanga, ndi zakuvurumutiya; pakuti ndawona vyose vyenivyo Labani wachita kwaku iwe. 13Ndine Chiuta wa Betele, penipa ungutukutizga chiguŵa ndi mafuta ndi unguchita rapu kwangu. Sono usoke, urutenge utuwemo mu charu ichi; ndipo uwere ku charu cha kawi kako.’ ” 14Sono Rakelo ndi Leya ŵangumwamuka, “Kumbi mwe chigaŵa nanga nchimoza pamwenga chihara chakutijaliyako ifwe mu nyumba ya auskefwe? 15Kuti watitiwona nge te ŵalendo cha? Pakuti wakutiguliska ifwe ndipo wasakazanga ndrama za chimaru cha paku ifwe. 16Usambasi wose weniwo Chiuta wakukwamphuwa ku auskefwe ngwidu ndi ngwa ŵana ŵidu so; viyo sono, chenicho chose wakamba Chiuta kwaku iwe, chitanga.” 17Viyo Yakobe wangusoka, ndipo wangujalika ŵana ŵake ndi ŵawoli ŵake pa ŵagamila; 18ndipo wangukhwema ng'ombe zake zose, viŵetu vyake vyose vyo wangusakata, ng'ombe zo wenga nazo zo wangusakata mu Padani-aramu, warutanga ku charu cha Kanani ku awiske Yisaki. 19Labani wanguruta kwachisenga mberere zake, ndipo Rakelo wanguba ŵachiuta ŵamu nyumba ya awiske. 20Ndipo Yakobe wangumugwentha Labani pakuti wengavi kumunene kuti wakathaŵanga. 21Wanguthaŵa pamoza ndi vyose vyenivyo wenga navyo, wangusoka, ndi wangwambuka Afrate, ndipo wangulazga chisku chake ku charu cha mapiri cha Gileada.

Labani warondo wakuthaŵa yo

22Panipo ŵangumunene Labani pa zuŵa la chitatu kuti Yakobe wakuthaŵa, 23wanguto ŵabali ŵake pamoza nayo ndi wangumundondoloska kwa mazuŵa ghankhonde ndi ghaŵi wanguŵandika pafupi kuvuli kwake ku charu cha mapiri ghaku Gileada. 24Kweni Chiuta wanguza kwaku Labani mu Aramu yo mu loto ndi usiku, ndi wanguti kwaku iyo, “Chenje ungakamba cha mazu nanga ngamoza kwaku Yakobe, nanga ngamampha pamwenga ghaheni.” 25Ndipo Labani wangumusaniya Yakobe. Sono Yakobe wangujintha hema lake mu charu cha mapiri, ndipo Labani ndi ŵabali ŵake ŵangugoŵa mu charu cha mapiri chaku Gileada. 26Ndipo Labani wanguti kwaku Yakobe, “Nchine cho wachita, pakuti wandizgelera ndi wathaŵa ndi ŵana ŵangu ulaka ndi mikoli yaku nkhondo? 27Chifukwa chine ukuthaŵa kwakubisama, ndikundizgelera, ndi wengavi kundinene, mphanyi ndingukutuma ndi chimwemwe ndi ngoma, zisumu, kaligu ndi bangwe? 28Ndipo chifukwa nchine wengavi kundizomerezga kulaliskana ndi kufyofyontha ŵana ŵangu ŵanthurumi ndi ŵanthukazi? Awona ukuchita kwa kupusa. 29Nkhwangu kwaku ine kukuchitiya chiheni; kweni Chiuta wa ausu waŵereŵeta nane usiku waruta, kuti, ‘Chenje ungakamba kwaku Yakobe kamampha pamwenga kaheni cha.’ 30Ndipo sono iwe wathaŵa chifukwa ungunweka ukongwa nyumba ya ausu, kweni chifukwa chine ukuba ŵachiuta ŵangu?” 31Yakobe wangwamuka Labani, “Chifukwa ndingopa, pakuti ndingughanaghana kuti undikwamphuwenge ŵana ŵako kwanthazi. 32We yose yo umusaniyenge ndi ŵachiuta ŵako kuti wakajanga wamoyo cha. Paurongo pa ŵabali ŵako, rongo paku vyo nde navyo keniko nkhako, ndipo uto keniko.” Sono Yakobe wengavi kuziŵa kuti Rakelo ndiyo wanguba ŵachiuta wo. 33Viyo Labani wangusere mu hema laku Yakobe, ndi mu hema laku Leya, ndi mu hema la ŵaŵanda ŵanthukazi ŵaŵi, kweni kuti wangusaniya ŵachiuta ŵake cha. Ndipo wangutuwa mu hema laku Leya ndi wangusere mu hema laku Rakelo. 34Sono Rakelo wanguto ŵachiuta wo ndi wanguŵaŵika mu chakukwelapo cha gamila, ndipo wangujapo pachanya paku wo. Labani wangutoskatoska mu hema lose, kweni kuti wanguŵabowozga cha. 35Ndipo wanguti ku awiske, “Mbuya wangakalipa cha po ndatondeka kuma paurongo pako, pakuti vyo viŵiya tanthukazi vye paku ine.” Viyo wangupenja-penja, kweni kuti wanguŵasaniya cha ŵachiuta ŵamu nyumba yiya. 36Sono Yakobe wangukalipa, ndi wanguchenya Labani, Yakobe wanguti kwaku Labani, “Cho ndalakwa nchine? Mphurupuru yangu njine? Pakuti wandindondoloska ndi ukari? 37Chngana watoska mose muvinthu vyangu wasaniyamo kane kavinthu vya nyumba yako? Ukaŵike yapa paurongo pa ŵabali ŵako, alinga ŵeruzge pakati paku ifwe taŵaŵi. 38Virimika ivi miskambu yako. 39Yo yinguparurika ndi vikoko ndengavi kuza nayo kwaku iwe; ndingulipiyapo ine ndamweni; unguti ndilipiye po kutuwa mu janja langu, manyi zingubika ndi msana pamwenga yingubika ndi usiku. 40Viyo ndimo, ndinguŵiya; chifundizi chingundipweteka ndi msana, kuzizira kungundipweteka ndi usiku, ndipo tulo twangu tungukamuka mu maso ghangu. 41Virimika ivi machumi ghaŵi vyo ndajanga mu nyumba yako; ndingukutataliya virimika chumi ndi vinayi (14) chifukwa cha ŵana ŵako, ndipo virimika vinkhonde ndi chimoza chifukwa cha viŵetu vyako, ndipo nyengo chumi ungusintha-sintha mphoto yangu. 42Asani Chiuta wa ada, Chiuta waku Abrahamu ndi Chiuta waku Yisaki, wengavi kuŵa kuchiri kwangu, kwakuneneska sono mphanyi wandidika kwambura ndi kanthu mu manja. Chiuta wanguwona suzgu yangu ndi kutakataka kwa manja ghangu, ndipo wakuchenya iwe usiku waruta.”

Labani wapangana ndi Yakobe

43Sono Labani wangwamuka ndi wanguti kwaku Yakobe, “Ŵana ŵanthukazi yaŵa mbangu, ŵana wo mbana ŵangu, viŵetu ndi viŵetu vyangu, ndipo vyose vyenivyo uwona vyangu. Kweni cho ndingachita nchine msana wale ku ŵana ŵanthukazi yaŵa, pamwenga ku ŵana ŵawo ŵeniwo ŵapapa? 44Zanga sono tiye tichite phanganu iwe ndi ine; ndipo liŵe ukaboni pakati pako ndi ine.” 45Viyo Yakobe wanguto mwa, ndi wanguwumika uli nchichiri. 46Ndipo Yakobe wanguti ku ŵabali ŵake, “Unjikani mya.” Ndipo ŵanguto mya ŵanguwunjika ndundu; ndipo wangurgha pa pafupi ndi ndundu. 47Labani wangudanapo kuti Yegara-sahaduta,#31.47 Yegara-sahaduta: mu chiAramu ndi mu chiHebere ndiku kuti ndundu ya mya. kweni Yakobe wangudanapo kuti Galede. 48Labani wanguti, “Ndundu iyi mbukaboni pakati pako ndi ine, msana wale.” Chifukwa cho wangudanapo kuti Galede, 49ndi chiguŵa wanguti ndi Mizipa chifukwa wanguti “Ambuya akhazge pakati pako ndi ine, kuti tikaŵanga pamoza cha yumoza ndi munyake. 50Asani wamusuzga ŵana ŵangu, pamwenga wamutoliyapo ŵanthukazi ŵanyake pa ŵana ŵangu, chingana palivi munthu pamoza nafwe, kumbuka, Chiuta ndi kaboni pakati pako ndi ine.” 51Labani wanguti kwaku Yakobe, “Wona ndundu iyi ndi chiguŵa, vyeni vyo ndamika pakati pako ndi ine. 52Ndundu iyi mbukaboni, chiguŵa nacho mbukaboni, kuti ndazamujumpha ndundu iyi cha kuza kwaku iwe, ndipo iwe nawe kuti ukajumphanga ndundu iyi cha ndi chiguŵa ichi kuza kwangu ndi urwani. 53Chiuta waku Abrahamu ndi Chiuta waku Nahoro, Chiuta wa auskeu, weruzge pakati pidu.” Viyo Yakobe wangurapiya pa Chopu cha wiske Yisaki, 54ndipo Yakobe wangupereka mpasku pa phiri lo ndi wangudana ŵabali ŵake kurgha chiŵande; ndipo ŵangurgha chiŵande ndipo ŵangucherezga usiku wose pa phiri lo. 55Ndi mlenji-lenji Labani wangusoka, ndiwangufyofyontha ŵazuku ŵake ndi ŵana ŵake ŵanthukazi ndi wanguŵatumbika; pavuli wanguruta wanguwere kwake.

Currently Selected:

Chiyambo 31: TongaMw

Highlight

Copy