Habakuku 3
3
Kurombe lisungu
1Rombo laku Habakuku mchimi, kwakuyana ndi Siginoto.
2Ambuya, ndavwa mbiri yinu,
ndipo mlimu winu, Ambuya nthopa nade.
Yuskani mlimu winu mukati mu virimika;
mukati mu virimika uziŵikwe;
mu ukari kumbukani lisungu.
3Chiuta waturiya ku Temani,
mutuwa ku phiri la Parana,
Unkhankhu waku ubenekere machanya,
ndi charu chapasi chinguzaza ndi marumbu ghake.
4Kujeduka kwake kwenga nge nkhungweruka,
sasiya zamwetukanga mu janja lake;
mwenimo mungubisika nthazi zake.
5Paurongo pake panguka nthenda ya chideru,
nthenda yo yamrondonga mvuli.
6Wanguma ndi kupima charu chose chapasi;
wangulereska, ndi wangusukung'a mitundu ya ŵanthu;
viyo mapiri ghamwaka ghanguparghanika,
mapiri ghachijaliye ghangubwanthuka.
Nthowa zake zenga nge ndi kale.
7Ndinguwona mahema ghaku Kusana mu suzgu
vyakuchinga vya charu chaku Midiani vingusukunika.
8Kumbi kandundu kinu kenga pa misinji, Ambuya?
Kumbi ukari winu wenga pa misinji,
pamwenga kutundiya kwinu pa nyanja,
pa gareta linu la upundi?
9Uta winu mungupinda,
ndipo mungusomeka mivwi ku chingwi.
Munguparuwa charu chapasi ndi msinji.
10Mapiri ghangumuwonani, ndi kuvivira;
maji ghanthazi ghangusapatiya;
ndimba yingutuzga mazu,
yingutumphuskiya manja ghake pachanya.
11Dazi ndi mwezi vinguma chete mu malo ghawo ghakujamo
pa ukweru wa mivwi yinu mo yingwende,
pa kuŵara kwa mkondo winu wakugadima.
12Munguja pachanya pa charu mu kandundu,
mungukandiya pasi mitundu ya ŵanthu mu ukari.
13Mungutuwa chifukwa cha kutaska ŵanthu ŵinu,
chifukwa cha kutaska wakupakika winu.
Munguphwanya mutu wa muheni,
ndi kumlarika wankhuli kwamba ku chigha kufika ku khosi.
14Mungurasa mutu wa ŵankhondo ŵake ndi mikondo yinu,
wo ŵanguza nge ndi kavuruvuru kundiparghang'a,
wakukondwa, kusere kwako kwenga nge nkhudoso ŵakavu ku ubendi.
15Mungudyakadyaka nyanja ndi ŵakavalo ŵinu,
mu mayigha gha maji ghanandi.
16Ndituvwa, ndi liŵavu langu litenthema,
mlomo wangu umbwambwantha pa mazu ghinu;
chiwozga chisere mu viwanga vyangu, nditenthema mukati mwangu.
Ndirindizgenge kwa chisisi zuŵa la suzgu
lo liziya wo ŵasere kwaku ifwe ndi nkhondo.
17Chingana mkuyu ureke kubuska,
pamwenga vipasi ku ulevi ku
mphereska, maolivi gha tondeke kupasa,
ndi minda yitondeke vyakurgha, mskambu umare mu khola,
ndi ng'ombe muulevi mu khola,
18ndipuuli ndikondwenge mu Ambuya,
ndi kusekere mwaku Chiuta, mtaski wangu.
19Ambuya Chiuta, ndiyo nthazi zangu;
wasanduska marundi ghangu nge ndi marundi gha mbaŵa,
watindendeska mu malo gha pachanya.
Ku wakumbiska sumu: ndi
ŵabangwi ŵakupindika ndi ukosi.
Currently Selected:
Habakuku 3: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi