Mateyu 12

Fumbu ndi za Sabata

(Marko 2.23-28; Luka 6.1-5)

1Pa nyengo yeniyo waporotanga Yesu pa Sabata mu minda ya trigu; ndipo ŵasambizi ŵake ŵanguvwa nja, ndipo ŵangwamba kupontho masoyu, ndi kughargha. 2Ndipo ŵaFarisi ŵachiwona ŵanguti kwaku iyo, “Awonani, ŵasambizi ŵinu ŵachita cho nchambura kuyamu kuchita pa Sabata.” 3Ndipo iyo wanguti kwaku wo, “Asi mwaŵerenga cho wanguchita Davidi, po wanguvwa nja, ndi wo ŵapamoza nayo; 4mo wanguserere mu nyumba yaku Chiuta, ndi kurgha viŵandi vyakujarikika, vyenivyo kuti kungwenere iyo cha kurgha, chingana mbeniwo ŵenga nayo, kweni ŵazukuru pe ŵija? 5Pamwenga asi mwaŵerenga mu langulu lo kuti pa Sabata ŵazukuru mu kasopi ŵananga Sabata, ndipo mbazirakalema? 6Kweni ndikuneniyani kuti mura wakuruska kasopiyo we panu. 7Kweni asani munguziŵa mo chiriri chenichi, ‘Lisungu ndikhumba, ndi chisopu cha,’ mphanyi kuti mwaŵasuska cha wo mbambura kalema. 8Chifukwa Mwana wa munthu ndi mweni-sabata.”

Yesu wachizga munthu wajanja lakuphapha

(Marko 3.1-6; Luka 6.6-11)

9Ndipo wangutuwa kweniko, wangusere mu sinagoge lawo: 10ndipo, wonani, mwenga munthu wakuŵa ndi janja lakuphapa. Ndipo ŵangumfumba, “Kumbi kuyamu kuchizga pa zuŵa la Sabata?” alinga kuti ŵamsaniye kafukwa. 11Iyo wanguŵanene, “Njani mwaku imwe waŵenge ndi mberere yimoza, ndipo asani yingawa mu mbuna pa zuŵa la Sabata, asi wayikonge ndi kuyituzga? 12Na uli ukongwako asi munthu waruska mberere! Viyo kutenere kuchita umampha pa Sabata.” 13Sono watiti kwaku yo munthu, “Tambaruwajanja lako.” Ndipo wangulitambaruwa; ndipo linguweremu lanthazi nge ndi linyake. 14Kweni ŵafarisi, ŵangutuwamo, ŵangupangirana upu paku iyo, mo ŵamunangiyenge.

Mteŵeti wakusankhika waku Chiuta

15Kweni Yesu pakuchiziŵa ichi wangutuwako: ŵangumrondo ŵanandi; ndipo wose wanguŵachizga, 16ndipo wanguŵalanguliya kuti ŵareke kumumemeza, 17mwakuti ghafiskike mazu mwaku Yesaya mchimi ghakuti,

18“Awonani, Mwana wangu, yo ndasankha,

nkhwanjiwa wangu mwaku mweniyo mzimu wangu ukondwere:

ndiŵikenge paku iyo mzimu wangu,

ndipo watauliyenge mitundu cheruzgu.

19Kuti walimbalimbenge cha;

Chingana nkhukambura;

chingana nkhuti yumoza wavwenge mazu ghake mu miseu cha.

20Dete lakuphwanyika kuti wakafyonga cha,

ndipo chisunda chakusunkha kuti wazimwenge cha,

npaka po watoriyenge cheruzgu ku upundi.

21Ndipo mu zina lake ndimo mitundu yigomekezgenge.”

Yesu ndi Belzebule

(Marko 3.20-30; Luka 11.14-23)

22Penipo wangutoleke kwaku iyo wademone, wachiburumutiya ndi wambuwu: ndipo wangumchizga, viyo kuti wambuwu yo wangurongoro ndi wangulereska. 23Ndipo mzinda yose yarwitanga, ndi yatinge, “Kumbi mwenuyu ndi mwana waku Davidi?” 24Kweni ŵati ŵavwa ŵaFarisi ŵanguti, “Uyu kuti watuzga ŵademone ndi kanthu kanyake cha kweni ndi Belzebule, fumu ya ŵademone.” 25Kweni Yesu, pakuziŵa marunguruku ghawo, wanguti kwaku wo, “Ufumu wose wakugaŵikana paku wija upopeskeka; ndipo muzi wose pamwenga nyumba yakugaŵikana paku yija, kuti yingama cha, 26ndipo asani Satana wamtuzga Satana, wagaukana mwaku yija; na ufumu wake umenge uli? 27Ndipo asani ine ndituzgiya ŵademone ndi Belzebule, ŵana ŵinu ŵatiŵatuzgiya mwaku yani? Viyo ŵaŵenge yiwo ŵeruzgi ŵinu. 28Kweni asani ine ndituzgiya ŵademone wo mu Mzimu waku Chiuta, iku waza nadi paku imwe ufumu waku Chiuta. 29Pamwenga munthu wangaziŵa uli kusere mu nyumba ya wanthazi, ndi kuskoŵa vyuma vyake, kwambura kuti wadanga chamanga munthu wanthazi yo? Penipo ndipo waskoŵenge nyumba yake. 30Yo kuti we pamoza nane cha, wamikana nane; ndipo yo walive kuwunjika pamoza nane, waparghang'a. 31Viyo ndikuneniyani, kulakwa kose ndi kutuka kungagowokeleka ku ŵanthu, kweni kutuka kwapa Mzimu Wakupaturika kuti kugowokelekenge cha. 32Ndipo yose yo wanganena mazu ghaheni pa Mwana wa munthu, kugowokelekiyenge iyo; kweni yose yo wangakamba pa Mzimu Wakupaturika yo, kuti kugowokelekiyenge iyo cha, chingana ndi mu umoyo uno, chingana ndi mwaku wo utuza.

Chimuti ndi vipasi vyake

(Luka 6.43-45)

33“Kuŵa ndi chipasi chamampha, nkhuŵa ndi chimuti chamampha; pamwenga asani chimuti nchakuwo, chipasi chake chikaŵanga chakuwo; chifukwa chimuti chiziŵikwa ndi chipasi chake. 34Mphapu za vipiriŵiza, mwa ŵakuŵa ŵaheni mungaziŵa uli kurongoro vyamampha? Chifukwa kutuwa ku ufurwi wa mtima mlomo urongoro. 35Munthu wamampha kutuliya ku mbiku yake yamampha watuzga vyamampha: ndipo munthu muheni kutuliya ku mbiku yake yiheni watuzga viheni. 36Kweni ndikuneniyani, kuti pa mazu ghose ghawaka gho wangakamba ŵanthu, ŵazamukughakamba mu zuŵa la cheruzgu. 37Chifukwa ndi mazu ghako urunjiskikenge, ndipo ndi mazu ghako ususkikenge.”

Ŵapenja chisimikizgu

(Marko 8.11-12; Luka 11.29-32)

38Penipo ŵangwamuka ŵanyake ŵa ŵalembi ndi ŵaFarisi, ŵakuti, “Msambizgi, tikhumba kuwona chisimikizgu kwako.” 39Kweni wakwamuka wanguti kwaku wo, “Mgonezi uheni ndi ureŵi upenja chisimikizgu; ndipo kuti chisimikizgu chipaskikenge kwaku wo cha, kweni cho chaku Yona mchimi yo. 40Chifukwa uli ndimo Yona wanguŵiya mumoyu mwa chisomba cho mazuŵa ghatatu ndi mausiku ghatatu; viyo so ndimu Mwana wa munthu waŵiyenge mukati mu charu mazuŵa ghatatu ndi mausiku ghatatu. 41Ŵanthu ŵaku Nineve ŵayukenge mu cheruzgu pamoza ndi mgonezi uwu, ndipo ŵawususkenge: pakuti ŵangung'anamuka pa chitaula chaku Yona; ndipo awonani, wakuruska Yona we panu. 42Fumukazi yaku Maraŵi yiyukenge mu cheruzgu pamoza ndi mgonezi uwu, ndipo yiususkenge; pakuti yingutuwa ku vigoti vya charu kuvwa zeru yaku Solomone; ndipo ehe, wakuruska Solomone we panu.

Kuwe kwa mzimu wauyu

(Luka 6.43-45)

43“Kweni penipo mzimu wawiyu watuwa mu munthu, uporota mu malo ghambura maji, wakupenja chipumulu, ndipo kuti utichisaniya cha. 44Sono utiti, ‘Ndiwerenge mu nyumba yangu, mo ndingutuwa’; ndipo uchiza utiyisaniya yamwazi, yakupeyeka ndi yakutozgeka. 45Sono uruta ndi utole pamoza nawo mizimu yinkhonde ndi yiŵi yinyake yiheni ku kwakuruska iwo, ndipo yiseremo yijaririya mwenimo: ndipo vyaumari vya munthu yuwa vituŵa viheniku ku vyakudanga vyo. Viyo ndimu so kuŵiyenge ku mgonezi uheni uwu.”

Anyina ndi ŵabali ŵaku Yesu

(Marko 3.31-35; Luka 8.19-21)

46Wacharongoro iyo ku mizinda yo, anyina ndi ŵabali ŵake ŵanguma kubwaro ŵakupenja kurongoro nayo. 47Ndipo yumoza wa ŵanthu wangumunene, “Awona! Anyoko ndi ŵabali ŵako ŵama kubwaro, ŵakhumba kurongoro nawe.” 48Kweni iyo wakwamuka wanguti ku wakumunene, “Mbayani ama? Ndipo mbayani ŵabali ŵangu?” 49Ndipo wati watambaruliya janja lake kuchiri ku ŵasambizi ŵake, wanguti, “Onani, ama wo ndi ŵabali wo. 50Chifukwa yose yo wachita khumbo la Ada ŵakuchanya mweniyo ndi mbali wangu, ndi mzichi ndi ama.”

Currently Selected:

Mateyu 12: TongaMw

Highlight

Compare

Copy