Mateyu 14

Nyifwa yaku Yohane Mbatizi

(Marko 6.14-29; Luka 9.7-9)

1Pa nyengo iyi Herode, wachinaikiru#14.1 wachinaikiru: ndiku kuti yo wawusa chigaŵa cha chinayi cha charu. yo, wanguvwa thenthe laku yesu, 2Ndipo wanguŵanene ŵateŵeti ŵake, “Mwenuyu ndi Yohane Mbatizi yo; wayuka ku ŵakufwa; ndipo chifukwa chenicho vyanthazi ivi vichitika mwake.” 3Chifukwa Herode, wati wamuko Yohane, wangumumanga ndi kumutaya mu ulinda pa chifukwa chaku Herodiya muwoli waku Filipu, mhurwa wake. 4Chifukwa Yohane wamukanizganga, “Kuti kuyamu cha kuti uŵe nayo.” 5Ndipo pakukhumba kumubaya, wangopa mzinda wo, pakuti ŵangumpimiya nge ndi mchimi. 6Kweni lati lafika zuŵa la kawi kaku Herode, mwana munthukazi waku Herodiya wanguvina mukati, ndipo wangukondweska Herode, 7viyo kuti wangurapa rapu kumpaska chenicho chose wangapempha. 8Ndipo msungwana yo, pakusambizgika ndi anyina, wanguti, “Ndipaskeni panu pa mbale mutu waku Yohane Mbatizi yo.”

9Karonga wanguchita chitima; kweni chifukwa cha marapu gho, ndi chifukwa cha ŵakutekapo pamoza nayo, wangulangula kuti upaskike; 10ndipo wangutuma ndi wangudumuwa mutu waku Yohane mu nyumba ya ulinda, 11ndipo mutu wake ungutoleka pa mbale, ungupaskika ku msungwana yo: ndipo wanguwutole ku anyina. 12Sono ŵanguza ŵasambizi ŵake, ŵangutuzga thupi lo, ndi ŵangumuŵika; ndipo ŵanguza chimtauliya Yesu.

Yesu waliska ŵanthu vikwi vinkhonde (5,000)

(Marko 6.30-44; Luka 9.10-17; Yohane 6.1-14)

13Ndipo wachivwa Yesu wangutuwako kweniko mu ngaraŵa wanguza ku malo ghabozwa ku udeke; kweni yati yavwa mizinda yo, yingumrondo pa mtunda pasi kutuwa ku mizi. 14Ndipo wachituwa mu ngaraŵa wanguwona mzinda ukuru, ndipo wanguŵafwiya lisungu, wanguŵachizga ŵarwali ŵawo. 15Ndipo kwati kwaŵa mazulo, ŵasambizi ŵangumziya ŵakuti, “Malo ngabozwa, ndipo ora laruta mbwenu; tumani mizinda yo. Alinga ŵarutenge ku mizi, ŵajiguliye vyaukurgha.” 16Kweni Yesu wanguŵanene kuti, “Ŵangaruta cha; ŵapaskeni kurgha.” 17Kweni ŵangumunene, “Tendi viŵande vinkhonde pe panu ndi somba ziŵi.” 18Iyo wanguti, “Vitoleni kuno kwangu.” 19Ndipo wati walanguliya mizinda kuteka pasi pa uteka, ndipo wati waronde viŵande vyo vinkhonde ndi somba zo ziŵi, wakulereska kuchanya wangutumbika, ndipo wati wamenya wangupaska viŵande ku ŵasambizi, ndi ŵasambizi wo ku mizinda. 20Ndipo ŵangurgha wose, ndi ŵanguguta: ndipo ŵanguyora ghakujapo gha marivuvu sokora zakuzaza chumi ndi ziŵi. 21Ndipo wo ŵangurgha ŵenga ankhumba ŵanthurumi vikwi vinkhonde pade pa ŵanthukazi ndi ŵana.

Yesu watenda pa maji

(Marko 6.45-52; Yohane 6.15-21)

22Ndipo pavuli wanguŵachichizga ŵasambizi kusere mungaraŵa, ndi kumudanjiriya kusirgha po iyo waneniyanga mizinda yo kuti yirutenge. 23Ndipo wati wayituzgapo mizinda, wangukwere mu phiri ku udeke kwachiromba. Ndipo kwati kwaŵa mazulo, wenga yija kwenikuwa. 24Kweni ngaraŵa yo panyengo iyi yenga mukati mu nyanja, yakuvutika ndi mayigha; chifukwa mphepu yenga ku musu. 25Ndipo mu lindu lachinayi la usiku wanguza kwaku wo, wakwenda pa nyanja. 26Ndipo ŵasambizi pakumwona wakwenda pa nyanja ŵangumbwambwanthiya ŵakuti, “Ndi muzghuka!” Ndipo ŵangukambura chifukwa cha mantha. 27Kweni ruŵi Yesu wangurongoro nawo, wakuti, “Chinthani mtima; ndine; mungopanga cha.”

28Ndipo Petro, wakwamuka, wanguti, “Ambuya, asani ndimwe, ndilanguliyeni kuza kwinu pa maji.” 29Ndipo wanguti, “Zanga!” Ndipo wati wasika kutuwa mu ngaraŵa, Petro wangwenda pa maji gho kuya kwaku Yesu. 30Kweni wachiwona mphepu, wangopa; ndipo, wangwamba kubira, wangukambura, wakuti, “Ambuya, nditaskeni.” 31Kweni sosonukweni Yesu, wakutambaruwa janja lake, wangumuko, ndipo watiti kwaku iyo, “Wa chivwanu chimana we, chifukwa chine ukangang'a.” 32Ndipo wati wakwera so mu ngaraŵa, mphepu yingugowoka. 33Ndipo ŵamu ngaraŵa ŵangumlambiya, ŵakuti, “Ndimwe nadi Mwana waku Chiuta.”

Yesu wachizga ŵakutama mu Genesarete

(Marko 6.53-56)

34Ndipo ŵati ŵambuka ŵanguza ku mtunda, ku Genesarete. 35Ndipo ŵanthu ŵa malo ghenigho pakumziŵa ŵangutumiya mu charu chose chakuzunguliya, ndipo ŵangumtole wose ŵakutama, 36ndipo ŵampempha ngakuti ŵakwaske mphonji pe za munjirira wake: ndipo wo wose ŵanguzikwaska ŵanguchizgika.

Currently Selected:

Mateyu 14: TongaMw

Highlight

Compare

Copy