Mateyu 16

ŴaFarisi ndi ŵaSaduki ŵakhumba visimikizgu

(Marko 8.11-13; Luka 12.54-56)

1Ndipo ŵanguza ŵaFarisi ndi ŵaSaduki, ndipo pakumwesa ŵangufumba kuŵarongo chisimikizgu chakutuwa kuchanya. 2Ndipo iyo wakwamuka wanguŵanene, “Kwati kwaŵa mazulo mutiti, ‘Kuchenge umampha; chifukwa mitambo yacheŵara.’ 3Ndipo ndi mlenji, mutiti, ‘Le kuŵenge mphepu, chifukwa kuchanya kuŵisuka.’ Chisku cha kuchanya muziŵa kuteska, kweni visimikizgu vya zinyengo kuti muziŵa kuteska cha. 4Mphapu yiheni ndi yireŵi yipenja chisimikizgu, ndipo kuti chisimikizgu chipaskikenge kwaku yo cha, kweni chisimikizgu cho chaku Yona.” Ndipo wanguŵareka wangutuwapo.

Mtupu wa ŵaFarisi ndi ŵaSaduki

(Marko 8.14-21)

5Ndipo ŵasambizi, ŵachiza kusirgha, ŵanguruwa kupinga chiŵande. 6Ndipo Yesu wanguŵanene, “Cheŵani ndi chenjeni pa mtupu wa ŵaFarisi ndi ŵaSaduki.” 7Kweni iwo ŵapimanga mwaku ŵija, kuti, “Nchifukwa tirive kupinga chiŵande.” 8Kweni Yesu, pakuziŵa, wanguti, “Mwaŵachivwanu chimana, chifukwa chine murongoro mwaku mwija, kuti mulive kupinga chiŵande? 9Kumbi mundawemo, chingana nkhuti mukumbuka cha viŵande vinkhonde vyo vya vikwi vinkhonde ndi masokora gharinga gho munguwunjika? 10Pamwenga viŵande vinkhonde ndi viŵi vyo vya vikwi vinayi ndi masokora gharinga gho munguwunjika. 11Uli mureka kuwamo kuti ndengavi kukukambiyanivya viŵande? Kweni chenjeni ndi mtupu wa ŵaFarisi ndi ŵaSaduki.” 12Sono ŵanguwamo kuti, kuti waŵachenjezganga ndi mtupu wa chiŵande cha, kweni pa chisambizgu cha ŵaFarisi ndi ŵaSaduki.

Petro wasimika kuti Yesu ndi Kristu mwana waku Chiuta

(Marko 8.27-30; Luka 9.18-21)

13Ndipo Yesu, wati waza mu vigaŵa vyaku Kaesarea Filipi wangufumba ŵasambizi ŵake, wakuti, “Ŵanthu ŵatiti Mwana wa munthu ndi yani?” 14Wanguti iwo, “Ŵanyake ŵatiti, Yohane Mbatizi, ŵanyake ŵatiti Eliya; ndi ŵamwenga, Yeremiya, pamwenga yumoza wa ŵamchimi.” 15Watiti kwaku iwo, “Kweni imwe mutiti ine ndine yani?” 16Ndipo Simoni Petro wakwamuka, wanguti, “Imwe ndimwe Kristu, Mwana waku Chiuta wamoyo.” 17Ndipo Yesu wanguti, “Wakutumbikika ndiwe, Simoni mwana waku Yona, pakuti vinjeru vya munthu kuti vingukuvumbuliya ichi cha kweni Ada wakuchanya. 18Ndipo ine nane ndinene iwe, kuti ndiwe Petro, ndipo pa jarawe lenili nkhazenganga eklesiya langu; ndipo nthazi za nyifwa kuti zingalipunda cha. 19Ndikupaskenge mipiringizgu ya ufumu wakuchanya; ndipo chose cho ungamanga panupasi chiŵenge chakumangika kuchanya; ndipo chose cho ungafwatuwa panupasi chiŵenge chakufwatulika kuchanya.” 20Sono wangulanguliya ŵasambizi ŵake kuti ŵangamunene yumoza cha kuti iyo ndi Kristu.

Yesu wakamba vya masuzgu ndi nyifwa yake

(Marko 8.31—9.1; Luka 9.22-27)

21Kwanda pa nyengo yeniyiya Yesu wangwamba kurongo ŵasambizi ŵake kuti kutenere iyo kuruta ku Yerusalemu, ndi kuvwiyapo vinandi ku ŵara ndi ŵazukuru ŵara ndi ŵalembi kubayika, ndipo pa zuŵa lachitatu kuyuskika so. 22Ndipo Petro wangumto, ndi wangwamba kumsuska, wakuti, “Kuŵe kutari kwinu, Ambuya: chingamuŵiyani ichi cha.” 23Kweni wati wang'anamuka, wangumunene Petro, “Kanga kuvuli kwangu, Satana; ndiwe guŵisku kwaku ine chifukwa kuti we kuchiri kwaku Chiuta cha kweni ku ŵanthu.” 24Yesu wanguŵanene ŵasambizi ŵake, “Asani yumoza wakhumba kuza kuvuli kwangu, wajikanizge, wato mphinjika yake, ndi wandirondo. 25Chifukwa yose yo wangakhumba kutaska umoyo wake, wawutayenge: kweni yose yo wangataya umoyo wake pa chifwa chaku ine, wawusaniyenge. 26Chifukwa kumovyengenji munthu, asani wanganduwa charu chose, kweni wataye umoyo wake? Pamwenga munthu wapaskenge chine nge ndi maronda gha umoyo wake? 27Chifukwa Mwana wa munthu wakazanga mu unkhankhu wa Awiske pamoza ndi ŵangelo ŵake; ndipo penipo wapaskenge yumoza ndi yumoza kwakulingana ndi mlimu wake. 28Ndikuneneskiyani, Alipo ŵanyake ŵaku wo ŵatuma panu, wo kuti ŵesenge nyifwa cha, mpaka po ŵawona Mwana wa munthu wachiza mu ufumu wake.”

Currently Selected:

Mateyu 16: TongaMw

Highlight

Compare

Copy