Mateyu 19

Yesu wasambizga ndi chipata cha nthengwa

(Marko 10.1-12)

1Ndipo kunguŵa, wati wamara Yesu mazu ghenigho, wangutuwako, ku Galile, wanguza mu mphaka zaku Yuda sirgha liya Yordane; 2ndipo yingumrondo mizinda yikuru; ndipo wanguŵachizga kweniko. 3Ndipo kunguza kwaku iyo ŵaFarisi, ŵakumwesa, ndi ŵakuti, “Kumbi kuyamu kuti munthu wampate muwoli wake pa chifukwa che chose?” 4Kweni wakumuka wanguti, “Asi mwaŵerenga kuti kutuwa ku mtendeku chata wanguŵachita munthurumi ndi munthukazi. 5Ndipo wanguti, ‘Chifukwa chenichi munthu wasiyenge wiske ndi nyina, ndipo wasunganenge ndi muwoli wake, ndipo wo ŵaŵi ŵaŵenge munthu yumoza.’? 6Viyo kuti mbaŵi so cha, kweni munthu yumoza. Viyo chenicho Chiuta wamangirizga pamoza munthu wangafwatuwanga cha.” 7Ŵangumfumba, “Viyo chifukwa chine Mosese wangulangula kupaska kalata wa chipata ndi kumpata?” 8Watiti kwaku wo, “Po chifukwa cha unononu winu wamtima Mosese wanguzomerezga imwe kupata ŵawoli ŵinu: kweni kutuwa ku mtendeku kuti kwaŵa viyo cha. 9Ndipo ndikuneniyani kuti yose yo wangapata muwoli wake, kwambura kuti mpha ureŵi ndi wato munyake, wachita ureŵi; ndipo wakuto wakupatika nayo wachita ureŵi.”

10Ŵasambizi ŵamunene, “Asani che viyo chifukwa cha munthu ndi muwoli wake; iku kuti nkhwamampha cha kuto.” 11Kweni iyo wanguŵanene, “Kuti wose ŵangaronde mazu yagha cha, kweni kwaku ŵeniwo pe kwapaskika. 12Chifukwa ŵalipo ŵamthenu, wo ŵanguŵa viyo ku chibali cha ŵanyinau: ndipo ŵalipo ŵamthenu wo ŵangutheneka ndi ŵanthu, ndipo ŵalipo ŵamthenu wo ŵangujithena pa chifukwa cha ufumu wa kuchanya; wakuŵa ndi nthazi kuronde, waronde.”

Yesu watumbika twana

(Marko 10.13-16; Luka 18.15-17)

13Sono kungumtoleke twana, alinga kuti waŵike paku to manja ghake, ndi watiombe: ndipo ŵasambizi wo ŵanguŵachenya. 14Kweni wanguti Yesu, “Tirekeni twana, mungatukanizganga cha kuza kwaku ine; chifukwa ngwa twaviyo ufumu wa kuchanya.” 15Ndipo wati waŵikapo manja paku to, wangutuwako.

Jaha lisambasi litondeka kulondo Yesu

(Marko 10.17-31; Luka 18.18-30)

16Ndipo yumoza wanguza, ndi wamunene, “Muwomba, ndichitenge chamampha chauli, mwakuti ndiŵe ndi umoyo wamuyaya?” 17Kweni iyo wanguti kwake, “Chifukwa chine mufumba ine pa chamampha cho? Walipo yumoza wamampha. Kweni asani ukhumba kusere mu umoyo, sunganga marangu.” 18Wali kwaku iyo, “Nagha?” Yesu wanguti, “Ungabaya, ungareŵa, ungaba, ungatiya ukaboni utesi, 19tumbika ausu ndi anyoko; ndipo wanjenge munyako uli ndiwe wamweni.” 20Jaha lo linguti kwaku iyo, “Ghose yagha ndikusungirizga: ndeche kupere chine?” 21Wangumnene Yesu. “Asani unkhumba kuŵa wakukongora, kanga, kasaske vyo we navyo, paska ku ŵakavu, ndipo uŵenge ndi mbiku kuchanya; ndipo zanga, rondo ine!” 22Kweni jaha lo, lati lavwa mazu gho linguruta lachisungu ukongwa; chifukwa lenga ndi usambasi unandi. 23Ndipo Yesu wanguŵanene ŵasambizi, “Nadidi ndikuneniyani, nkhwaunononu msambasi kusere mu ufumu wa kuchanya. 24Ndipo so ndinene imwe, nkhuyuyu ku gamila kuporota mu mphowozi ya zingani, kwakuruska ku msambasi kusere mu ufumu waku Chiuta.” 25Ndipo ŵachivwa ichi wasambizi ŵanguzizwa ukongwa, ŵakuti, “Ipo njani waziŵa kutaskika?” 26Kweni Yesu pakuŵalereska wanguti, “Ku ŵanthu kuti nchamachitika cha ichi, kweni kwaku Chiuta vyose vyamachitika.” 27Sono Petro wakwamuka wangumnene, “Awonani, ifwe tasiya vyose, ndipo takurondoni; na tiŵenge ndi chine ifwe?” 28Yesu wanguŵanene, “Nadidi ndikuneniyani, kuti imwe mwaŵakundirondo, mu charu chifya cho penipo Mwana wa munthu wajenge pa chitengo cha unkhankhu wake, namwe so mwazamuja pa vitengo chumi ndi viŵi, ŵakweruzga mafuku chumi ndi ghaŵi ghaku Yisraele. 29Ndipo yose yo wasiya zinyumba, pamwenga ŵabali, ŵazichi, wiske, nyina, ŵana pamwenga vyaru, pa chifukwa cha zina langu, wamronde mbwerezga ya machumi pe chumi, ndipo waharenge umoyo wamuyaya. 30Kweni ŵanandi ŵakudanga ŵaŵenge ŵakumariya, ndi ŵakumariya ŵakudanga.

Currently Selected:

Mateyu 19: TongaMw

Highlight

Compare

Copy