Mateyu 25

Ntharika ya ŵamwali chumi

1“Penipo ufumu wa kuchanya ulinganizgikenge ku mbeta chumi, zenizo zinguti zato nyali zawo, zingutuwa kwachikumana ndi mweni-nthengwa. 2Zinkhonde mwaku zo zenga zizereza, ndi zinkhonde zenga zazeru. 3Chifukwa zizereza, zichito nyali zawo, zengavi kutole pamoza nazo mafuta. 4Kweni zazeru zingutole mafuta mu viyaŵi vyawo pamoza ndi nyali zawo. 5Kweni wachiswera mweni-nthengwa yo, zose zingusiwa ndi zingura. 6Ndipo ndi usiku pakati kunguŵapo kudana, ‘Ehe, mweni-nthengwa yo! Tuwani kwachikumana nayo!’ 7Sono zinguyuka mbeta zo zose, ndi zingunozga nyali zawo. 8Ndipo zizereza zingunene zazeru, ‘Tipaskeniko mafuta ghinu, pakuti nyali zidu zizimwa.’ 9Kweni zazeru zo zingwamuka, zinguti, ‘Kokuli kuti ghangakwana ndi ifwe ndi imwe cha: ukongwa kaninga ku ŵakusaska, mujiguliye ghinu.’ 10Ndipo zichiruta kwachigula, wanguza mweni-nthengwa yo; ndipo zakurongosoleka zingusere pamoza nayo ku zowara, ndipo chingujarika chisasa. 11Kweni pavuli pake zinguza so mbeta zinyake zo, zakuti, ‘Ambuya, Ambuya, tijuriyeniko!’ 12Kweni wakwamuka wanguti, ‘Ndikuneniyani, kuti ndikuziŵani cha.’ 13Viyo khazgani, pakuti mulive kuliziŵa zuŵa chingana ndi ora.

Ntharika ya ŵaŵanda ŵatatu

(Luka 19.11-27)

14“Chifukwa kwe nge ndimo munthu, wachiruta kunyake, wangudana ŵaŵanda ŵake, ndipo wanguŵapazgiya usambasi wake. 15Ku yumoza wangupaska matalente ghakhonde, ku munyake ghaŵi, ndi ku munyake limoza; kwaku yose kwakulingana ndi nthazi yakuyija. Ndipo wangutuwako. 16Sono yo wanguronde matalente ghankhonde wanguruta ndi wangutataliya nagho, ndipo wangwanduwa matalente ghanyake so ghankhonde. 17Kwakulingana nako yo wa ghaŵi wangwanduwa ghanyake ghaŵi. 18Kweni mweniyo wanguronde limoza, wangukumbiya pasi, ndipo wangubisa ndrama ya mbuyake. 19Ndipo pavuli pa nyengo yitali wanguza mweneko wa ŵaŵanda yaŵa, ndipo wangukokoskana nawo makani. 20Ndipo yo wanguronde matalente ghankhonde wanguza, wangupinga matalente, ghanyake ghankhonde wakuti, ‘Ambuya, mungundipazgiya matalente ghankhonde; wonani, ndikwanduliyako matalente ghanyake ghankhonde!’ 21Mbuyake wangumnene. ‘Nchamampha muŵanda we wamampha ndi wamagomekezgeka; waŵa wamagomekezgeka pa vinthu vimanavi; pa vinandi ndikuŵikenge: sere muchimwemwe cha mbuyako.’ 22Ndipo yo nayo wa matalente ghaŵi wanguza, ndipo wangunena, ‘Ambuya, mungundipazgiya matalente ghaŵi: awonani, ndikwanduliyako matalente ghanyake ghaŵi.’ 23Wanguti kwaku iyo mbuyake, ‘Nchamampha, muŵanda wamampha ndi wamagomekezgeka we, pa vinthu vimanavi waŵa wamagomekezgeka ndikuŵikenge pa vinandi; sere mu chimwemwe cha mbuyako.’ 24Ndipo yo nayo wanguronde talente limoza, wachiza, wanguti, ‘Mbuya, ndingukuziŵa kuti we munthu mnononu, wakuvuna po wengavi kumija, ndi wakuyora po wengavi kuparghang'a, 25ndipo pakopa ndingwachibisa pasi talente lako, Awona, we nalo lako.’ 26Kweni Mbuyake wakwamuka wangumnene, ‘Muŵanda mheni ndi mlesi, unguziŵa kuti ndivuna po ndengavi kumija, ndiyora po ndengavi kuparghang'a? 27Viyo ungwenere kuŵika ndrama yangu ku ŵasintha-ndrama, ndipo ine, ndati ndaza, mphanyi ndaronde lo langu ndi chanduwu. 28Viyo mkwamphuweni talente lo, ndipo paskani kwaku yo we nagho matalente chumi. 29Chifukwa kwaku yose wakuŵa navyo kupaskikenge, ndipo waŵenge ndi uzari: kweni kwaku yo walive, chingana ndi lo we nalo lituzgikengeko kwake. 30Ndipo muŵanda yo mzira-upiripiri mtayeni ku mdima wakubwaro: ko kuŵenge kuliya ndi mkukutu wa minyu.’

Cheruzgu chapa mitundu

31“Kweni penipo wakazanga Mwana wa munthu mu unkhankhu wake, ndi ŵangelo wose pamoza nayo, penipo wajariyenge pasi pa chitengo cha ukhankhu wake. 32Ndipo yikawunjikikanga paurongo pake mitundu yose; ndipo wakaŵagawuwanga yumoza ku munyake, uli ndimo mliska wagawuliya mberere ku mbuzi; 33ndipo wakajarikanga mberere zo ku janja lake la marghe, kweni mbuzi zoku maze. 34Sono karonga yo wakaneniyanga ŵaku marghe, ‘Zaninge, mwaŵakutumbika ŵa Ada, harani ufumu wakurongosoleke imwe kutuwa ku mtendeku wa charu: 35chifukwa ndingufwa msara, ndipo mungundipaska kurgha: ndenga wa nyota, ndipo mungundimweska: ndenga mlendo ndipo mungundironde: 36wankhuli, ndipo mungundivwarika: ndingutama, ndipo munguchezga nane: ndenga mu ulinda, ndipo munguza kwaku ine.’ 37Sono ŵarunji wo ŵamukumwamuka ŵakuti, ‘Ambuya, tingukuwonani zuŵanjiwanja, ndipo tingukuhiŵani? Pamwenga wanyota, ndipo tingukumweskani? 38Ndipo zuŵanji tingumuwonani mlendo, ndipo tingumrondeni? Pamwenga wankhuli, ndipo tingumuvwarikani? 39Ndipo tingukuwonani zuŵanji wakutama, pamwenga mu ulinda ndipo tinguza kwinu?’ 40Ndipo karonga yo wakwamuka wanenenge kwaku wo, ‘Ndikuneneskiyani, mwenimo munguchitiya yumoza waku wo ŵabali ŵangu, ŵamanako wo, munguchitiya ine.’ 41Pavuli waneniyenge ŵaku maze, ‘Tuwaniko kwangu, mwaŵakutembeke, ku motu wamuyaya, wakurongosoleke diabolo yo ndi ŵangelo ŵake; 42chifukwa ndingufwa msara, ndipo kuti mungundipaska kurgha cha: ndinguŵa ndi nyota, ndipo kuti mungundimweska cha, 43ndenga mlendo, ndipo kuti mungundironde cha; wankhuli, ndipo kuti munguvwarika cha: wakutama, ndi mu ulinda, ndipo kuti munguchezga nane cha.’ 44Sono iwo nawo ŵamukenge, kuti, ‘Ambuya, tingukuwonani zuŵanji wanja, pamwenga wanyota, pamwenga mlendo, pamwenga wankhuli, pamwenga wakutama, pamwenga mu ulinda, ndipo tengavi kukuteŵetiyani?’ 45Sono waŵamukenge, wakuti, ‘Ndikuneneskiyani, mwakuti mwengavi kuchitiya yumoza waku wo ŵamanako kwakuruska, kuti munguchitiya ine cha.’ 46Ndipo yaŵa ŵarutenge ku chilanga chamuyaya: kweni ŵarunjiwo ku umoyo wamuyaya.”

Currently Selected:

Mateyu 25: TongaMw

Highlight

Compare

Copy