Mateyu 7

Kweruzga kwakwenere

(Luka 6.37-38, 41-42)

1“Mungeruzganga cha, alinga kuti mureke kweruzgika. 2Chifukwa ndi cheruzgu cho muteruzgiya, mweruzgikiyenge chenicho, ndipo ndi mweso wo mutese, kwesekiyenge imwe ndi weniwo. 3Ndipo ulereskiyanji kachipandi kamu jiso la mbali wako, kweni munthambi wamu jiso lako kuti utiwupima cha? 4Pamwenga ungamunene uli mbali wako, Aka, ndituzgemo kachipandi ko mu jiso lako; penipo munthambi we mu jiso lako? 5Wakufuvya iwe, tuzgamo danga munthambi wo we mu jiso lako, sono ndipo uwonenge umampha kutuzgamo kachipandi mu jiso la mbali wako.

6“Mungapaska cho nchikovu ku ŵagaru cha, chingana ndi ngare zinu mungaponga paurongo pa nguruŵi zo cha, vinu zingaphwatapo ndi marundi ghawo, ndipo, pakuweko, zingakuzwa-nduwani.

Pemphani, penjani ndi wodiyani

(Luka 11.9-13)

7“Pemphani, ndipo kupaskikenge kwaku imwe; lembeni, ndipo musaniyenge, gong'askani, ndipo kujurikiyenge imwe. 8Chifukwa yose wakupempha waronde; wakulembe wasaniya; ndipo ku wakugong'oska kujurikiyenge iyo. 9Pamwenga njani munthu mwaku imwe, yo asani mwana wake wamupemphenge chiŵande wangampaska mwa? 10Pamwenga asani wampemphenge somba, wangampaska njoka? 11Viyo asani imwe chingana mwe ŵaheni, muziŵa kupaska mipasku yamampha ku ŵana ŵinu, na uli ukongwa Auskemwe ŵakuchanya ŵapaskenge vyamampha ku ŵakuŵapempha? 12Viyo vyose vyo mungakhumba kuti ŵanthu ŵachitiye imwe, namwe so muchitiye iwo kwakulingana: chifukwa chenichi nchilangulu cho ndi ŵamchimiwo.

Chipata chifinyi

(Luka 13.24)

13“Sereni mu likomo lalifyakafyaka: chifukwa ndikuru likomo, ndipo njisani nthowa, yakurongozge ku wanangiku, ndipo mbanandi ŵakusere mwaku lo. 14Chifukwa ndalifyakafyaka likomo, ndipo njifinyi nthowa, yakurongozge ku umoyo, ndipo mbamanavi ŵakulibowozga.

Chimuti ndi vipasi vyake

(Luka 6.43-44)

15“Cheŵani ndi ŵamchimi ŵatesi, ŵeniwo ŵatuza kwaku imwe mu kavwaridu kamberere, kweni mukati ndi mphumphi zakufyonkhonyo. 16Pa vipasi vyawo muŵaziŵenge. Kumbi ku minga ŵanthu ŵapontho mphereska, pamwenga nkhuyu ku ŵakankhandi? 17Viyo chimuti chose chamampha chipasa vipasi vyeneko; kweni chimuti chakuwo chipasi vipasi viheni. 18Kuti chiziŵa cha chimuti chamampha kupasa vipasi viheni chingana nchimuti chakuwo kupasa vipasi vyeneko. 19Chimuti chose chakuwura kupasa chipasi cheneko chitemeka, ndipo mu moto chipong'eka. 20Viyo pa vipasi vyawo muŵaziŵenge.

Ndengavi kuziŵa

(Luka 13.25-27)

21“Kuti waserenge mu ufumu wakuchanya cha yose wakunditamula, ‘Ambuya, Ambuya’; kweni yo ngwakulichita khumbu la Ada ŵakuchanya. 22Ŵanandi ŵanenenge nane mu zuŵa liya, ‘Ambuya, Ambuya, asi tingutauliya mu zina linu, ndi mu zina linu tingutuzgiya ŵademone, ndi mu zina linu tinguchitiya vyanthazi vinandi?’ 23Ndipo penipo nkhakananga kwaku, wo, ‘Ndengavi kukuziŵani kose: tuwaniko kwangu, mwaŵakuchita uchikana marangu.’

Ŵazenge-nyumba ŵaŵi

(Luka 6.47-49)

24“Viyo yose yo watuvwa mazu ghangu ghenagha, ndi waghachita, walinganizgikenge ku munthu wazeru, mweniyo wanguzenga nyumba yake pa jarawe: 25ndipo yingung'a vuwa ŵazandi ŵanguza, zinguputa mphepu, ndipo zinguyigundizga nyumba yo; kweni kuti yinguwa cha: chifukwa yinguzengeka pa jarawe. 26Ndipo yose wakuvwa mazu ghangu ghenagha, ndi ngwakuwura kughachita, walinganizgikenge ku munthu wakupusa, mweniyo wanguzenga nyumba yake pa mchenga: 27ndipo yingung'a vuwa, ŵazandi ŵanguza, zinguputa mphepu, ndi zingubumiya pa nyumba yo; mpaka yinguwa: ndipo kwenga kukuru kupasuka kwake!”

28Ndipo kunguŵa kuti Yesu wati wamara kurongoro vinthu ivi; mizinda ya ŵanthu yazizwanga pa chisambizgu chake: 29chifukwa waŵasambizganga nge ngwakuŵa ndi mtufu, ndi nge mbalembi ŵawo cha.

Currently Selected:

Mateyu 7: TongaMw

Highlight

Compare

Copy