Kisah Para Rasul Kitab ini pe keterangan
Kitab ini pe keterangan
Orang yang tulis kitab ini: Kitab Kisah Para Rasul ini Lukas yang tulis. Lukas ini orang yang sama yang tulis kitab Lukas. Lukas tulis kitab ini, untuk kase lanjut dia pe carita yang dia so tulis di kitab Lukas. Lukas ini yang mulai iko pa Paulus di kota Troas waktu Paulus bajalang jao kase tau Kabar Bae tentang Yesus Kristus di mana-mana (Kis. 16:10-17, 20:5–21:18, 27:1–28:16). Keterangan laeng tentang sapa ini Lukas, bisa lia di kitab Lukas pe keterangan.
Kitab ini untuk sapa: Kitab Kisah Para Rasul ini ada tulis untuk orang yang Lukas sebut ‘bapa Teofilus’ (Kis. 1:1). Teofilus ini, menurut ahli Alkitab, tara jelas sapa dia sebenarnya, tapi mangkali dia itu orang Roma yang punya jabatan tinggi, deng dia lagi Lukas pe tamang bae. Biar bagitu, Lukas tulis kitab ini untuk samua orang, lebe kusus untuk orang-orang Yunani atau yang biasa orang sebut orang-orang yang bukang Yahudi.
Ajaran-ajaran di kitab ini: Di kitab Kisah Para Rasul ini, Lukas carita tentang Yesus pe murit-murit yang kase turus Yesus pe pelayanan mulai waktu Yesus taangka di sorga (Kis. 1:1-2). Di kitab ini, Lukas carita tentang Yesus pe murit-murit yang jadi Yesus pe utusan-utusan yang orang sebut rasul-rasul. Ada dua rasul yang paling banya Lukas carita, dorang dua itu Petrus (Kis. 1–12) deng Paulus (Kis. 13–28). Di kitab ini, Lukas me carita tentang tugas yang Yesus kase untuk bawa Kabar Bae tentang Dia di samua tampa, deng bagimana Roh Kudus tolong pa rasul-rasul untuk biking dong pe tugas itu (Kis. 1:6-8). Lukas carita tentang orang Yahudi yang jadi percaya pa Yesus Kristus (Kis. 2:40–11:19), abis itu orang yang bukang dari bangsa Yahudi me jadi percaya (Kis. 11:20, 13:45-46, 18:6, 28:28).
Lukas carita, waktu orang percaya so mulai banya, dorang itu mulai dapa siksa dari orang-orang yang tara percaya, turus orang-orang percaya itu musti lari kase tinggal dong pe tampa tinggal kong pigi merantau. Tapi biar dorang dapa siksa bagitu, dorang tetap bawa Kabar Bae tentang Yesus Kristus kong dorang kase tau Kabar Bae itu pa orang-orang di tampa yang dorang ada merantau itu.
Waktu orang-orang bukang Yahudi mulai percaya pa Yesus, ada yang batanya bagini, “Apa orang bukang Yahudi yang so percaya pa Yesus itu perlu dapa sunat iko aturan-aturan di lima kitab Musa ka tarada?” Pertanyaan ini yang biking sampe dorang biking rapat basar (Kis. 15). Di rapat itu, samua pemimpin dari orang yang percaya pa Yesus bakumpul kong dorang ambe keputusan bagini: orang yang bukang Yahudi yang so percaya pa Yesus, dorang itu so tara perlu iko aturan-aturan di lima kitab Musa, macam deng sunat. Hasil rapat itu, dorang tulis di surat kong kirim di jemaat-jemaat.
Turus di kitab ini, Lukas banya kase tau tentang Roh Kudus bantu orang-orang percaya kase tau Kabar Bae tentang Yesus Kristus, sampe ada mujizat-mujizat kong banya orang jadi percaya pa Yesus. Dulu, waktu Yesus Kristus bolong datang, Roh Kudus itu cuma kuasai pa orang-orang tertentu saja, tapi waktu Yesus Kristus datang deng bale ka sorga, Roh Kudus datang la bantu pa orang percaya supaya bole biking Tuhan Allah pe mau. Samua yang jadi yang so tatulis di sini, itu samua ada kase tunju deng jelas, Roh Kudus salalu ada sama-sama deng orang-orang yang so percaya pa Yesus.
Currently Selected:
Kisah Para Rasul Kitab ini pe keterangan: PB MMU
Highlight
Share
Copy
Want to have your highlights saved across all your devices? Sign up or sign in
Perjanjian Baru Bahasa Melayu Maluku Utara @ Lembaga Alkitab Indonesia 2020