Markus 2
2
Yesus kase sembu orang lumpu satu
(Mat. 9:1-8; Luk. 5:17-26)
1Dia pe lewat barapa hari, Yesus bale ulang di kota Kapernaum. Kong orang-orang di sana dapa dengar Yesus ada di ruma. 2Kong banya skali orang yang datang bakumpul sampe so tara tampa lagi, kong di muka pintu me so sasa deng orang-orang. Di situ, Yesus kase tau pa dorang tentang Tuhan Allah pe firman.
3Waktu itu, ada ampa orang datang. Dorang bawa satu orang lumpu pa Yesus. 4Tapi karna so talalu banya orang, dorang tara bisa bawa orang itu pa Yesus. Jadi dorang bongkar ruma pe bagian atas, pas pa Yesus pe di atas kapala. Bagitu so tabuka, dorang kase turung orang lumpu itu, satu kali deng dia pe tikar yang dia pake tidor. 5Waktu Yesus lia apa yang dorang biking, Yesus tau dorang percaya pa Dia. Kong Dia bilang pa orang lumpu itu, “Sudara, ngana pe dosa so dapa ampun.”
6Tapi ada lagi babarapa guru agama yang ahli lima kitab Musa ada dudu di situ, kong dorang bilang dalam hati bagini, 7“Dia tara bole bilang bagitu. Dia so biking diri sama deng Tuhan Allah. Barang, tarada orang yang bisa kase ampun orang pe dosa, yang bisa itu cuma Tuhan Allah.”
8Tapi Yesus langsung tau dorang pe pikiran, kong Dia bilang pa dorang bagini, “Bikiapa kong ngoni bapikir bagitu? 9Waktu Kita bilang pa orang lumpu ini, ‘Ngana pe dosa so dapa ampun’, ngoni ragu kalu orang ini pe dosa so dapa ampun. Tapi kalu Kita bilang, ‘Bangun, angka ngana pe tikar kong bajalang suda’, ngoni bisa tau Kita ada kuasa karna nanti ngoni lia dia bajalang. 10Jadi skarang Kita mo kase sembu pa dia supaya ngoni tau, di dunia ini Anak Manusia yang dari sorga ada kuasa lagi untuk kase ampun orang pe dosa.” Turus Yesus bilang pa orang yang lumpu itu, 11“Kita bilang pa ngana, bangun suda, angka ngana pe tikar, kong pulang suda pa ngana pe ruma!”
12Turus orang lumpu itu bangun, dia langsung angka dia pe tikar kong bajalang kaluar iko orang banya pe muka. Samua orang herang, kong dorang puji deng hormat pa Tuhan Allah deng bilang bagini, “Bukang maeng, bolong perna torang lia yang bagini.”
Yesus pangge pa Lewi iko pa Dia
(Mat. 9:9-13; Luk. 5:27-32)
13Yesus pigi ulang di talaga Galilea pe pinggir. Di sana me ada orang banya datang pa Dia, kong Dia mangajar pa dorang.
14Abis itu, Yesus bajalang lagi kong Dia dapa lia satu orang yang pe nama Lewi.#2:14: Lewi ini pe nama laeng, Matius. Dia itu, Alfeus pe ana. Lewi ini tukang tagi pajak. Dia ada dudu di dia pe tampa karja, tampa untuk tarima pajak. Yesus bilang pa dia, “Mari iko pa Kita!” Pe dengar itu, Lewi turus badiri kong iko pa Yesus.
15Kong Yesus deng Dia pe murit-murit pigi makang di Lewi pe ruma. Di situ me ada banya tukang tagi pajak deng orang laeng yang orang anggap dong itu orang-orang berdosa. Dorang dudu makang sama-sama deng Yesus deng Dia pe murit-murit, barang waktu itu ada banya orang iko pa Yesus. 16Waktu itu me, ada guru-guru agama Yahudi yang ahli lima kitab Musa, kong dorang itu lagi dari aliran fanatik yang pe nama Farisi. Dorang dapa lia Yesus ada makang sama-sama deng tukang-tukang tagi pajak deng orang-orang laeng yang dorang anggap berdosa itu. Kong dorang bilang pa Yesus pe murit-murit, “Cis, bikiapa kong Dia makang sama-sama deng tukang-tukang tagi pajak deng orang-orang berdosa yang laeng?”
17Yesus dengar dorang bilang bagitu, turus Dia bilang pa dorang bagini, “Bukang orang sehat yang perlu dokter, tapi orang saki. Kita datang bukang untuk pangge pa orang yang anggap dong pe diri butul, tapi Kita datang untuk pangge pa orang yang berdosa iko pa Kita.”
Yesus pe murit-murit tara bapuasa waktu Yesus masi ada sama-sama deng dorang
(Mat. 9:14-17; Luk. 5:33-39)
18Satu kali bagini, Yohanes Pembaptis pe murit-murit deng orang-orang Yahudi dari aliran Farisi ada bapuasa. Kong babarapa orang datang tanya pa Yesus, “Bikiapa kong Yohanes pe murit-murit deng orang Farisi pe murit-murit bapuasa, tapi Bapa pe murit-murit tarada?”
19Kong Yesus jawab pa dorang pake umpama, “Kita ini sama deng pengantin laki-laki. Kalu pengantin laki-laki masi ada di pesta kawing, bole dia pe tamang-tamang bapuasa? Tara mungkin dia pe tamang-tamang mo bapuasa kalu dia masi sama-sama deng dorang. 20Tapi nanti ada dia pe waktu, orang laeng mo ambe pa pengantin laki-laki itu dari dorang. Waktu itu baru dorang bapuasa.”
Jang campur Tuhan Yesus pe ajaran deng aturan agama yang manusia biking
21Turus Yesus bilang lagi pake umpama#2:21-22: Yesus bilang dua umpama ini supaya torang tau, Dia pe ajaran jang kase tamba deng aturan agama yang manusia biking sandiri. bagini, “Tarada satu orang yang tampal kaeng baru pa dia pe baju yang so tua, karna kalu mo cuci baju itu, kaeng baru yang kase tampal itu mo takondor, kong baju tua itu tarobe lebe basar lagi. 22Bagitu lagi, tarada orang yang isi anggur baru di tampa anggur yang so tua. Karna kalu tampa anggur yang dari binatang pe kuli itu so tua, dia pe kuli so jadi karas. Jadi, kalu orang isi anggur baru di tampa anggur yang so tua, kong anggur baru itu nae, anggur baru itu akan kase pica tampa anggur lama, kong anggur itu me iko tabuang. Jadi, anggur yang baru musti simpang di tampa anggur yang baru lagi.”
Yesus ada kuasa untuk ator apa yang manusia bisa biking di hari Sabat
(Mat. 12:1-8; Luk. 6:1-5)
23 #
Ul. 23:25
Satu kali, pas hari Sabat, hari yang orang agama Yahudi tara bole bakarja, Yesus deng Dia pe murit-murit bajalang iko di kobong gandum. Sementara dorang bajalang, Yesus pe murit-murit pete gandum sadiki. 24Di situ, ada orang-orang Yahudi dari aliran fanatik yang pe nama Farisi. Dorang bilang pa Yesus, “Coba lia itu! Bikiapa kong dorang bakarja bapete gandum di hari Sabat? Itu dorang so langgar torang pe aturan agama!”
25 #
1Sam. 21:1-6
Kong Yesus bilang pa dorang, “Pasti ngoni so perna baca carita di Kitab Suci tentang raja Daud, waktu dia deng orang-orang yang iko pa dia so tarada makanang kong so lapar. 26#Im. 24:5-9 Raja Daud maso di dalam Tuhan Allah pe Tenda Ibada, kong makang roti yang so jadi persembahan pa Tuhan Allah. Padahal roti itu, kalu iko torang pe aturan agama, cuma imam-imam saja yang bole makang. Dia me kase roti itu pa orang-orang yang iko pa dia. Waktu kejadian itu, Abyatar yang jadi imam basar.” 27Yesus bicara lagi pa dorang, “Hari Sabat itu, Tuhan Allah biking supaya manusia bole istrahat, bukang supaya jadi beban untuk manusia iko. 28Jadi, Anak Manusia yang dari sorga ada kuasa untuk ator apa yang manusia bisa biking di hari Sabat.”
Currently Selected:
Markus 2: PB MMU
Highlight
Share
Copy
Want to have your highlights saved across all your devices? Sign up or sign in
Perjanjian Baru Bahasa Melayu Maluku Utara @ Lembaga Alkitab Indonesia 2020
