Jon 11
11
Le Na Lazarus
1Kameka valeke vitoṉona Lazarus i mokoso. Karua vavanina to Maria mana Mata, mana komala ria Betani. 2Maria dena to, i zele ze go makena Jesu tala nonoli meno ne, mana iqusa vakadala ze uguruna go. Mana vavani qiru to Lazarus ni mokoso go. 3Tamakena Mata iru vazao seko ne Jesu, iru go de, “Batu! vakitaka aro Lazarus i mokoso.”
4Ṉalu Jesu i gata tarama nae, igo dena, “Lazarus i mokoso, do mokoso nae tiniki vae vale kaega ia, do go tina vasadaka me karaputa mazala ia God, go basoero ne tarina mia napua, era Tuna ia, i ko napu nava so karaputa mazala igogo ne.”
5Jesu i lete mamaligara ne Mata, Maria mana Lazarus. 6Do ṉalu i gata tarama na Lazarus i mokoso go, Jesu i ko napu torana karua musaqara. 7Gonae i sine ne qira disipoloro ia, “Ita mata ule za Judia.”
8Do disipoloro ia iri go de, “Valeke vari vatatana, ara aqe so basoero na Judia iri soko vana goe ipaka, mana avigo tane qo nanao go tatana ule napu za go?”
9Jesu i vataule ne qira igo, “Kameka musaqara i koe manoga karua aoa i tatavata, iago ka basoe i zaza go musaqara nae, i makuru tina tupara ne makena, tanego i zaza e loborona tatavata. 10Do ṉalu i zaza kuse, ia tina tupara bana neso makena, tanego i rodoko, iki tatavata kaega.” 11Taramuzina i sine lupo qira sekoro dena, i vane napu qira de, “Vakitaka ita Lazarus i kamuku bana to, do era tuna za va dogare ia.”
12Disipoloro ia iri vataule, “Batu, ṉalu go Lazarus i kamuku, ia tinara tavoisi.”
13Jesu ivatalupasa ze Lazarus i le bana, do disipoloro ia iri nanao Jesu i vatalupasa ze Lazarus i kamuku ogoto. 14Iago Jesu i sine velaka ne qira, “Lazarus i le bana to, 15mana, qa kula qaki ko tavise kaega ia, go ramu tamuna vaogoto. Lama mata garetue de ikoego ia.”
16Tomasi, iri vitoṉo ze ia Pabaka, ivane qira de, kero ne disipoloro ne iri go, “Osiqita mata lulua Batu ne, go mata le tavise ia!”
Jesu I Tuna God
17Ṉalu Jesu i vele dokae Betani, i rove basoero ne iri vou bana Lazarus, mana i sapu neto kavasi musaqara go. 18Reqe Jerusalema za dokae Betani gogo ne, i torana kapisa kilomita. 19Iago topu ria vano Jiu iri lama va momotono qiru Mata mana Maria, go tiruniki lete nanao maqata ne vavaniqiru ni le go.
20Ṉalu Mata i gata soba Jesu i lama, i za go tina za soba, do Maria i koeso pade ne. 21Mata i vane de Jesu, “Batu, ṉalu go to ko bana go aro, vavaniqu taraki le bana kaega! 22Do qa rove, God tina mazala teke nigo aro pata tono pene go.”
23-24Jesu i sine ne ia, igo, “Vavanimu tina too ule napu me.” Mata i vataule ne, igo, “Qa rove, ia tina too napu me musaqara muzimuzi, ṉalu osiqira vano le tarina too napu go.”
25Do Jesu i sine ne ia, igo, “Era to qa mazala go vatoo na basoe mana teke ne too go. Ka basoe i vaogoto ava go era, patavolomo i le, ia tina pala too i ko sivala go, 26mana basoe too i vaogoto ava go era, tiniki ara le kaega. Avigo qo vaogote seko dena?”
27Mata ivataule, igo, “Oveto Batu, qa vaogote aro qo Kristo mana Tuna go God, iato tina lamae go vudu pua dena.”
Jesu I Dae
28Taramuzina i sine lupo ne Jesu sekoro dena, Mata i ule za pade ne. I koru mikia Maria mana i sine ne ia, “Valeke vari vatatana ne i lama, mana i tana nigo aro go.” 29Ṉalu Maria i gata seko i sine go Mata, ia i degere mana i katikili za de ikoego Jesu. 30Torana nae Jesu iara kaebo dokae na komala ne, iara koeso de i seko tabe ze Mata. 31Vano Jiu iri va momotoṉe go Maria, go tiniki lete poro maqata go kaega ne, iri mia Maria i degere katikili mana i siporo, iri kale muzi ne ia, tanego iri nanao Maria i vele za dae kukubo ne.
32Gonae Maria i za dokae de ikoego Jesu, mana ṉalu i mia soba ia, i sorue makena Jesu mana igo, “Batu ṉalu go to ko bana go aro, vavaniqu taraki le bana kaega!”
33Ṉalu Jesu i mia Maria i dae go, mana basoero iri kotavise go ia iri dae napu, Jesu i lete maqata napu go. 34Iago i tana ne qira, “Adepa tane qamu vou ze go na?” Iri vataule ne, iri go, “Batu, lama go mo mia.”
35Jesu i dae. 36Vano Jiu iri go dena, “Mia, Jesu i lete mamaligara ne Lazarus, 37do kakiaro ria iri go, valeke dena i vamimia bana valeke kodo ne, avigo iki vanoto bana go kaega le i doka go Lazarus?”
Jesu I Vatoo Me Lazarus
38Ṉalu Jesu i za dokae leṉa ne, i lete nanao to Lazarus. Lena ne iri kokoqu ze ipaka siporaṉa na go. 39Jesu i sine ne qira, “Ikolo vakuziki ne ipaka ne.” Do Mata, vavanina Lazarus igo de, “Batu, pasi dena i noli bana to, tanego i sapu bana neto kavasi musaqara.”
40Jesu i vane de Mata, “Era qa sine bana nigo, ṉalu go qo vaogoto, qo mazala to mia na karaputa mazala ia God.” 41Iri ikolo vakuziki ne ipaka ne. Jesu i reṉa qe rani ne mana igo, “Qa seko velaka nigo Mamae, tanego qo gata pene era, 42Era qa rove, osina ṉalu aro qo gata pene ro era, do qa sine iadena, go basoero iri degere go dena tarina vaogote aro qo turi nava go era.” 43Taramuzina i sine lupo go seko igogo ne, i koru valavata igo, “Lazarus, siporo me!” 44Goso nae Lazarus ni le bana go i za siporo me! I osi neso poga iri kade ze go karisina ro, makena mana tarakenaqana go. Gonae Jesu i sine ne qira, “Vakuziki ne poga ro nae, go mara zaza.”
Vano Kenakenaqa Ria Vano Jiu Iri Vato Ne Vae Vale Na Jesu
(Matiu 26.1-5; Maka 14.1-2; Luka 22.1-2)
45Topu ria vano Jiu iri lama tove bana qiru go tamakena Maria, ṉalu iri mia go pata i zazu ne go Jesu, iri vaogote ia. 46Do kakia ro ria iri zae de iri koego vano Parisio, mana iri za sine ne qira, pataro i zazu ne go Jesu. 47Iago vano Parisio, batu ro ria patere ro, iri kameka pepeu mana iri go, “Avana to tatana zazu ne ze go? Valeke dena i zazu ne topuna zazu mazala ro! 48Ṉalu tatana koso mana ki vanoto kaega gogo ne, osiqira basoero ne tarina vaogote ia, ṉalu nae vano batubatu na Rom tarina lama pabale Pade Lotu ita, mana basoero na vudu ita go!”
49Kaki kameka ria, vitoṉona Kaipas, iato i batu lavata ria patere ro ave nae igo, “Qamuki rove so kaega kaki pata! 50Qamuki mia rove kaega, i velaka so kameka basoe tara le ne sauqira basoero topu mana vudu ria go tina za kavele go.” 51Kaipas iki pala nanao ne kaega tanuna seko dena, ia i Batu lavata ria patere ro ave nae, iago i seko ne pataro tinara sadaka me, sauna Jesu tina le go tina tavisi qira vano Jiu. 52Tiniki le ne qira so kaega vano Jiu, do sau napu qira salesalero ia God iri repe go soso dia ro, Jesu tina le, go osiqira basoero tarina kameka qoqoṉo mana kameka basoe so go.
53Pasi to ṉalu nae, batubatu ro ria vano Jiu, iri vato taru neso vae vale na Jesu. 54Iago Jesu iki poro teloe kaega de iri koego batubatu ria vano Jiu, i kasi ne nae, ilulu qira disipoloro ia, mana iri koe kaki komala lavata i garogaro go ulaṉa ne, vitoṉona Epiremu.
55I garogaro to musaqara kelo na Pasova, topu sasakata basoero iri zae Jerusalema, go tarina za vadalo tokama qira de ikoego God. 56Basoero ne iri taqia Jesu, pasi iri za teṉo ego pade lotu ne, iri vari vatanatana iri go, “Avana to qamu nanao go? Valeke dena, tina lama, ba kaega?” 57Torana to ṉalu nae, Batu lavata ro ria patere ro mana vano Parisio go iri vazazao seko igo, “Ka basoe irove kade ikoego Jesu, ia tina sine ne qira, go tarina za pala ia.”
Currently Selected:
Jon 11: VRSNT
Highlight
Share
Copy
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.
Jon 11
11
Le Na Lazarus
1Kameka valeke vitoṉona Lazarus i mokoso. Karua vavanina to Maria mana Mata, mana komala ria Betani. 2Maria dena to, i zele ze go makena Jesu tala nonoli meno ne, mana iqusa vakadala ze uguruna go. Mana vavani qiru to Lazarus ni mokoso go. 3Tamakena Mata iru vazao seko ne Jesu, iru go de, “Batu! vakitaka aro Lazarus i mokoso.”
4Ṉalu Jesu i gata tarama nae, igo dena, “Lazarus i mokoso, do mokoso nae tiniki vae vale kaega ia, do go tina vasadaka me karaputa mazala ia God, go basoero ne tarina mia napua, era Tuna ia, i ko napu nava so karaputa mazala igogo ne.”
5Jesu i lete mamaligara ne Mata, Maria mana Lazarus. 6Do ṉalu i gata tarama na Lazarus i mokoso go, Jesu i ko napu torana karua musaqara. 7Gonae i sine ne qira disipoloro ia, “Ita mata ule za Judia.”
8Do disipoloro ia iri go de, “Valeke vari vatatana, ara aqe so basoero na Judia iri soko vana goe ipaka, mana avigo tane qo nanao go tatana ule napu za go?”
9Jesu i vataule ne qira igo, “Kameka musaqara i koe manoga karua aoa i tatavata, iago ka basoe i zaza go musaqara nae, i makuru tina tupara ne makena, tanego i zaza e loborona tatavata. 10Do ṉalu i zaza kuse, ia tina tupara bana neso makena, tanego i rodoko, iki tatavata kaega.” 11Taramuzina i sine lupo qira sekoro dena, i vane napu qira de, “Vakitaka ita Lazarus i kamuku bana to, do era tuna za va dogare ia.”
12Disipoloro ia iri vataule, “Batu, ṉalu go Lazarus i kamuku, ia tinara tavoisi.”
13Jesu ivatalupasa ze Lazarus i le bana, do disipoloro ia iri nanao Jesu i vatalupasa ze Lazarus i kamuku ogoto. 14Iago Jesu i sine velaka ne qira, “Lazarus i le bana to, 15mana, qa kula qaki ko tavise kaega ia, go ramu tamuna vaogoto. Lama mata garetue de ikoego ia.”
16Tomasi, iri vitoṉo ze ia Pabaka, ivane qira de, kero ne disipoloro ne iri go, “Osiqita mata lulua Batu ne, go mata le tavise ia!”
Jesu I Tuna God
17Ṉalu Jesu i vele dokae Betani, i rove basoero ne iri vou bana Lazarus, mana i sapu neto kavasi musaqara go. 18Reqe Jerusalema za dokae Betani gogo ne, i torana kapisa kilomita. 19Iago topu ria vano Jiu iri lama va momotono qiru Mata mana Maria, go tiruniki lete nanao maqata ne vavaniqiru ni le go.
20Ṉalu Mata i gata soba Jesu i lama, i za go tina za soba, do Maria i koeso pade ne. 21Mata i vane de Jesu, “Batu, ṉalu go to ko bana go aro, vavaniqu taraki le bana kaega! 22Do qa rove, God tina mazala teke nigo aro pata tono pene go.”
23-24Jesu i sine ne ia, igo, “Vavanimu tina too ule napu me.” Mata i vataule ne, igo, “Qa rove, ia tina too napu me musaqara muzimuzi, ṉalu osiqira vano le tarina too napu go.”
25Do Jesu i sine ne ia, igo, “Era to qa mazala go vatoo na basoe mana teke ne too go. Ka basoe i vaogoto ava go era, patavolomo i le, ia tina pala too i ko sivala go, 26mana basoe too i vaogoto ava go era, tiniki ara le kaega. Avigo qo vaogote seko dena?”
27Mata ivataule, igo, “Oveto Batu, qa vaogote aro qo Kristo mana Tuna go God, iato tina lamae go vudu pua dena.”
Jesu I Dae
28Taramuzina i sine lupo ne Jesu sekoro dena, Mata i ule za pade ne. I koru mikia Maria mana i sine ne ia, “Valeke vari vatatana ne i lama, mana i tana nigo aro go.” 29Ṉalu Maria i gata seko i sine go Mata, ia i degere mana i katikili za de ikoego Jesu. 30Torana nae Jesu iara kaebo dokae na komala ne, iara koeso de i seko tabe ze Mata. 31Vano Jiu iri va momotoṉe go Maria, go tiniki lete poro maqata go kaega ne, iri mia Maria i degere katikili mana i siporo, iri kale muzi ne ia, tanego iri nanao Maria i vele za dae kukubo ne.
32Gonae Maria i za dokae de ikoego Jesu, mana ṉalu i mia soba ia, i sorue makena Jesu mana igo, “Batu ṉalu go to ko bana go aro, vavaniqu taraki le bana kaega!”
33Ṉalu Jesu i mia Maria i dae go, mana basoero iri kotavise go ia iri dae napu, Jesu i lete maqata napu go. 34Iago i tana ne qira, “Adepa tane qamu vou ze go na?” Iri vataule ne, iri go, “Batu, lama go mo mia.”
35Jesu i dae. 36Vano Jiu iri go dena, “Mia, Jesu i lete mamaligara ne Lazarus, 37do kakiaro ria iri go, valeke dena i vamimia bana valeke kodo ne, avigo iki vanoto bana go kaega le i doka go Lazarus?”
Jesu I Vatoo Me Lazarus
38Ṉalu Jesu i za dokae leṉa ne, i lete nanao to Lazarus. Lena ne iri kokoqu ze ipaka siporaṉa na go. 39Jesu i sine ne qira, “Ikolo vakuziki ne ipaka ne.” Do Mata, vavanina Lazarus igo de, “Batu, pasi dena i noli bana to, tanego i sapu bana neto kavasi musaqara.”
40Jesu i vane de Mata, “Era qa sine bana nigo, ṉalu go qo vaogoto, qo mazala to mia na karaputa mazala ia God.” 41Iri ikolo vakuziki ne ipaka ne. Jesu i reṉa qe rani ne mana igo, “Qa seko velaka nigo Mamae, tanego qo gata pene era, 42Era qa rove, osina ṉalu aro qo gata pene ro era, do qa sine iadena, go basoero iri degere go dena tarina vaogote aro qo turi nava go era.” 43Taramuzina i sine lupo go seko igogo ne, i koru valavata igo, “Lazarus, siporo me!” 44Goso nae Lazarus ni le bana go i za siporo me! I osi neso poga iri kade ze go karisina ro, makena mana tarakenaqana go. Gonae Jesu i sine ne qira, “Vakuziki ne poga ro nae, go mara zaza.”
Vano Kenakenaqa Ria Vano Jiu Iri Vato Ne Vae Vale Na Jesu
(Matiu 26.1-5; Maka 14.1-2; Luka 22.1-2)
45Topu ria vano Jiu iri lama tove bana qiru go tamakena Maria, ṉalu iri mia go pata i zazu ne go Jesu, iri vaogote ia. 46Do kakia ro ria iri zae de iri koego vano Parisio, mana iri za sine ne qira, pataro i zazu ne go Jesu. 47Iago vano Parisio, batu ro ria patere ro, iri kameka pepeu mana iri go, “Avana to tatana zazu ne ze go? Valeke dena i zazu ne topuna zazu mazala ro! 48Ṉalu tatana koso mana ki vanoto kaega gogo ne, osiqira basoero ne tarina vaogote ia, ṉalu nae vano batubatu na Rom tarina lama pabale Pade Lotu ita, mana basoero na vudu ita go!”
49Kaki kameka ria, vitoṉona Kaipas, iato i batu lavata ria patere ro ave nae igo, “Qamuki rove so kaega kaki pata! 50Qamuki mia rove kaega, i velaka so kameka basoe tara le ne sauqira basoero topu mana vudu ria go tina za kavele go.” 51Kaipas iki pala nanao ne kaega tanuna seko dena, ia i Batu lavata ria patere ro ave nae, iago i seko ne pataro tinara sadaka me, sauna Jesu tina le go tina tavisi qira vano Jiu. 52Tiniki le ne qira so kaega vano Jiu, do sau napu qira salesalero ia God iri repe go soso dia ro, Jesu tina le, go osiqira basoero tarina kameka qoqoṉo mana kameka basoe so go.
53Pasi to ṉalu nae, batubatu ro ria vano Jiu, iri vato taru neso vae vale na Jesu. 54Iago Jesu iki poro teloe kaega de iri koego batubatu ria vano Jiu, i kasi ne nae, ilulu qira disipoloro ia, mana iri koe kaki komala lavata i garogaro go ulaṉa ne, vitoṉona Epiremu.
55I garogaro to musaqara kelo na Pasova, topu sasakata basoero iri zae Jerusalema, go tarina za vadalo tokama qira de ikoego God. 56Basoero ne iri taqia Jesu, pasi iri za teṉo ego pade lotu ne, iri vari vatanatana iri go, “Avana to qamu nanao go? Valeke dena, tina lama, ba kaega?” 57Torana to ṉalu nae, Batu lavata ro ria patere ro mana vano Parisio go iri vazazao seko igo, “Ka basoe irove kade ikoego Jesu, ia tina sine ne qira, go tarina za pala ia.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.