Jon 12

Maria I Alu Ze Tala Voli Makuru Ne Makena Jesu

(Matiu 26.6-13; Maka 14.3-9)

1Kaonomo musaqara i ko tinara doka go musaqara kelo na Pasova, Jesu i ule napu za Betani, komala ia Lazarus, valeke i vatoo ule mego tepa le ne. 2Iri vanama ne pata gege Jesu, iago Mata i tavisi ne qira ria kena na pata gege ne. Lazarus i kakia to ria basoero i koloku mana ṉaṉa tavise go Jesu. 3Gonae Maria i pala me kameka botolo tala i lete nonoli meno sivala, mana i lete voli makuru go. Maria i zele ze makena Jesu mana i qusa vakadala ze uguruna go. Pade iri koego ipurake to nonoli na tala igogo ne. 4Kaki kameka ria disipoloro ia Jesu, Jiudas Iskariot, ia tina vabesa ne Jesu, igo dena, 5“Tala nae i tora pisavasa kesa siliva, ṉalu tara volivoli nego, mana kesa na ne, mara teke ne qira vano situ go.” 6Jiudas i sine seko ro dena, do iki nanao qira so kaega vano situ, ia i valeke sikosiko. Jiudas to i miasoka go kesa ro ria disipoloro ne, mana i vazazua kakiaro ṉalu sauna so tavisi ne na tanuna go.

7Do Jesu i sine ne ia, “Kasi va noto na ia. Ia i sotia tala ia go tina alu ze tokamaqu era, ṉalu tarina vovu ava go. 8Basoero situ, tarina koe deqamu koego osina ṉalu, do era tuniki ko tavisi qamu kaega osina ṉalu.”

Batu Ria Patere Ro Iri Vato Ne Vae Vale Na Lazarus

9Topu sasakata vano Jiu, iri gata soba Jesu i koe Betani, iago iri za, iki sauna so kaega Jesu, do iri soko mia na Lazarus, ivatoo ule go Jesu. 10Iago batu ro ria patere ro, iri vato ne vae vale na Lazarus go, 11tanego ṉalu vano Jiu iri za miasoba Lazarus i too ule go, iri vaogote Jesu, mana iri sila qira batubatu ro ria go.

Basoero Ne Iri Vazaka Jesu, Ṉalu I Zaego Jerusalema

(Matiu 21.1-11; Maka 11.1-11; Luka 19.28-40)

12Bakubaku na ne, topu sasakata basoero iri teṉo nego kelona Pasova ne, iri gata Jesu i vele lama doka to Jerusalema. 13Iago iri pala uguruna palema, mana iri za soba ia, iri koru iri go, “Vazaka God, God va makaole valeke dena i lamae go loborona vitoṉomu aro, God va makaole Batu lavata na Izirel!”

14Jesu i soba kameka donki mana i kolokue popokona, gere na so de i sine bana go Buka tabo ne, igo,

15“Basoero na komala lavata, Zaion, muniki sareki!

Mia, Batu lavata ramu i lama, i age me donki ne.”

16Disipoloro ia Jesu iriki nanao rove kaega pataro dena, do taramuzina Jesu i too napu me tepa le mana i popoka ule za rani ne, iri ara nanao ule zaqe Buka tabo ne i sine bana sekoro igogo ne sauna Jesu, mana basoero ne iri va voto go.

17Basoero iri ko tavisi go ṉalu, Jesu i koru vasiporo ze kukubo ne Lazarus mana ivatoo ze ia, tepa le ne, iri za pepeu vasadake tarama igogo ne. 18Sauna to tarama na zazu mazala ia Jesu, basoero ne iri za soba ia. 19Gonae vano Parisio ne iri vari goe dena, “Qamu mia, pata qata vato nego mana qata va kolokua go ne, iki voto so kaega! tanego topu sasakata basoero iri ara lulua so ia!”

Kakiaro Vano Qrik Iri Taqia Jesu

20Kakiaro vano Qrik go, iri zae Jerusalema sauna pepene ṉalu na kelo de. 21Iri za mia Pilipi, disipolo ia Jesu, i reqe mego Betsaida tepa Qalili, mana iri go, “Batu remu qi soko mia na Jesu.”

22Iago Pilipi i za sine ne Aduru, mana iru za sine ne Jesu. 23Do Jesu ivataule ne qiru, igo, “I dokae to ṉalu, basoero ne tarina mia rove Tuna basoe ne i kone karaputa mazala. 24Ma sine ne qamu pata ogoto, ṉalu paturu na sila i ṉara mana i sorue pua gogo ne paturu nae, tina podo me mana urena na ne tina lete topu go. Do ṉalu paturu nae ki leqese kaega, paturu nae tina koso tanuna. 25Ka basoe i mamaligara ne so too ia tanuna, tina patavolomo so, do ka basoe iki mamaligara ne kaega too ia tanuna tepa pua dena, basoe nae tina toṉove too iki rove go kaega lupo. 26Ka basoe i osaka nava era tina lulua va era, ria iri osaka nava, tarina koe de qa koego. Mana ka basoe i osaka nava era, Mamae tina nanao vamazale iago.”

Jesu I Sine De Tina Gogo Le Ia

27Gonae Jesu igo dena, “Torana dena nanao qu i sakata to, avana to tuna sine go? Mamae vakavele ve vokara tina dokava? Kaega era tuna pala bana so vokara igogo ne, tanego iato go qa lama nego era. 28Mamae, vasadaka me karaputa mazala na vitoṉomu!” Gonae kameka ovaṉa i reqe me rani ne igo, “Qa vasadaka bana karaputa mazala na vitoṉoqu, mana tuna vasadaka napua go.”

29Basoero iri degere go de gogo ne, iri gata ovaṉa ne, kakiaro ria iri go, qumara na pakala, do kakiaro iri go, “Aqelo i seko tabe ia!”

30Do Jesu i vane qira dena, “Ovaṉa qata gata go nae, iki sauqu era kaega, do i sauqamu ramu. 31Torana to ṉalu dena, God ina zazu ne vivine ia dekoe kolabana pua dena, mana karaputa ia Satana ni kenaqa ne zego kolabana pua dena, tina vanaqe. 32Ṉalu basoero ne tarina vaidoko vazakazaka va, era tuna pala valame qirae basoero ne, de qa koego.” 33Jesu i sine sekoro dena, go nava sadaka de tina gogo le ia.

34Basoero ne, iri go de, “Do Tamana remu igo, Kristo tiniki rove kaega le. Iago avigo tane qo sine go Tuna basoe tarina vaidoko ne go? Akena tane i Tuna go basoe ne?”

35Jesu i vataule, ne qira igo, “Tiniki lete umata kaega tatavata dena tina ko tavisi qamu, iago zaza e loborona tatavata nae torana iara ko tavisi qamu go, go rodoko tiniki pala qamu kaega. Tanego ka basoe i zaza ego loborona rodoko ne, iki rove kaega de i vele zae go. 36Muna vaogote tatavata nae, torana iara ko tavisi qamu go, go tamuna basobasoero na tatavata.”

Vano Jiu Iriki Vaogote So Kaega Jesu

Taramuzina i sine lupo seko ro dena, Jesu i za pipika tanuna de iri koego basoero ne. 37Patavolomo tane Jesu i za i vasadake topuna ro zazu mazala ro de iri koego, do iriki vaogote so kaega ia. 38Iago seko i sine bana go propeta Isaia tina lama voto, igo,

“Batu akena to tina vaogote go tarama ro qi seseko ne go?

Akena to i miarove go karaputa ia Batu ne, i vasadake go?”

39Iato go basoero ne iriki vaogote kaega, iago Isaia i sine napua, igo,

40“God i va kodo mata qira

mana i kokoqua nanao qira,

go mata qira tiniki mimia kaega,

mana tariniki nanao rove kaega go,

go tariniki tabali me kaega, de qa koego era,

go tuna va velaka qira.”

41Isaia i sine go pataro dena, tanego i mia bana karaputa mazala ia Jesu, ia ta go i pepeua go.

42Topu vano batubatu ria vano Jiu iri vaogote Jesu, do iri ki sine vasadake kaega, tanego iri sareki ne qira vano Parisio, niki go va mamanava qirae zae na Pade Lotu ne iri go.

43Iri soko so basoero ne tarina nanao vamazala qira, do iriki nanao rove kaega, nanao va mazala ia God i lete velaka go.

Vivine I Koe Loborona Seko Ia Jesu

44Gonae Jesu i seko va lavata igo de, “Ka basoe i vaogoto ava era, basoe nae iki vaogoto miki ava so kaega era, do i vaogoto napua Mamae ni turinava go era. 45Ka basoe i miasoba va era, i miasoba napua so Mamae ni turinava go era. 46Era qa lamae kolobana pua dena gerena tatavata, go osiqira basoero iri vaogoto ava era, tariniki koe kaega rodoko. 47Ṉalu ka basoe igata taramaqu era, do iki vaogote go kaega, era tuniki taru ze kaega vivine too ia. Tanego era qaki lama ne kaega vivine, do qa lama ne, vakavele na kolabana pua dena. 48Ṉalu ka basoe i sila va era, mana iki toqe ne kaega taramaqu era gogo ne, kaki kameka pata so tina zazu ne ze go vivine ia basoe nae, iato sekoro qa seko nego dena, tina za vivine nego musaqara muzimuzi! 49Iadena i pata ogoto, tanego qaki seko ne kaega nanao era tanuqu, do Mamae ni turi nava mego i teke nava Tamana, iato qa seko ne go. 50Mana qa rove, Tamana dena, i valame too iki rove go kaega lupo. Iago pataro qa sine go ne, Mamae so i sine nava go.”

Currently Selected:

Jon 12: VRSNT

Highlight

Copy