Jon 9

Jesu Iva Mimia Kameka Valeke I Kodo Banaso Pasi I Podo Me

1Kameka ṉalu Jesu i goe zuka ne, mana i mia kameka valeke, i kodo, valeke dena i kodo bana so pasi i podo me. 2Ko disipoloro ia iri tana ne ia, “Valeke vari vatatana, ake vasakata pata ia tane i va kodo go valeke dona, tanuna ba vanovano ia?”

3Jesu i vataule ne qira igo, “Iki vasakata pata ia kaega tanuna ba vanovano ia iva kodo go ia. Valeke dena i kodo, go basoero ne tarina mia, karaputa ia God tina zazue go de ikoego ia. 4Pasi de iara musaqara go, ita mata zazu ne zazu ia God ni turi navae go era, tanego kuse i lama garogaro to, mana kaega ka basoe i mazala go zazu. 5Torana qara koego kolabana pua ne, era to qa tatavatana kolabana pua ne.”

6Taramuzina i sine go seko ro dena, Jesu i sue vaboma pua ne mana i va rapia, gonae i pala mana i alu ze matana valeke kodo ne, 7mana i sine ne ia igo, “Ono zae besi bolu Siloam mana ono za susumatanae.” Talupasana ‘Siloam’, turi ne zaqe. Gonae valeke ne i za susumatana mana i uleme, matana ne i velaka to mana iara mimia ne to go.

8Basoero na komala ia mana basoero iri rove velake go iato tane i valeke penepene kesa go, iri vari goe dena, “Avigo valeke dena to tane i koloku mana pene kesa ego zuka ne osina ṉalu ba?”

9Kakiaro iri go, “Iato valeke ne to nae”, do kakiaro iri go, “Iki ia kaega, do i gere so tatalina valeke ne,” du valeke kodo niara mimia go, iza go me de, “Era to dena.”

10Gonae iri tana ne ia, “Avigo tane qo ara mimia go na?”

11Valeke ne ivataule ne qira, igo, “Valeke iri vitoṉo ze go Jesu, i va rapia desuka pua mana i alu ze mataqu, gonae i sine nava naza susumatanae besi bolu Siloam. Iago qa za, mana pasi qa susumatana lupo, mataqu i velaka to mana qara mimia to go.”

12Iri tana ne ia, “Adepa tane ikoego valeke nae na?” Valeke ne i vataule ne qira, igo, “Qaki rove kaega.”

Vano Parisio Iri Tana Ne Valeke Kodo Ne

13Goto nae iri lulu vazao ze valeke kodo ne de iri koego vano Parisio ne. 14Tanego musaqara i va rapia go pua ne Jesu mana i va mimia ze valeke kodo ne Jesu, i musaqara Sabat. 15Iago vano Parisio ne iri tana napu ne ia, avigo tane iara mimia go. Valeke ne igo de, “Valeke dena i alu ze pua rapi mataqu, mana ṉalu qa susumatana, qa mimia go.”

16Gonae kakiaro vano Parisio iri go dena, “Valeke dena iki reqe me kaega de ikoego God, tanego iki vaogote kaega Tamana na Sabat.” Do kakiaro iri go, “Ṉalu go valeke dena, i valeke vasakata pata i makuru tina zazu ne zazu mazala dena.” Iago vano Parisio ne i tavota nanao qira de ikoego Jesu,

17Iago vano Parisio iri tana napu ne valeke ne, iri go, “Aro qo go, iva mimia go mana ninidena qo velaka qo go, akena tane valeke nae qo go na?” Valeke ne i vataule ne qira, igo de, “Valeke dena i kakia propeta.”

18Do batubatu ria vano Jiu, iriki soko kaega vaogote na valeke dena i kodo bana mana ninidena iara mimia go, iago iri vazao seko ne qiru tamana mana sinana valeke ne tiruna lama, 19gonae iri tana ne qiru, “Sale ra raburu tane dena? podo ivae go, ikodo bana so, do avigo tane iara mimia go na?”

20Vano vano ia iru vataule, “Pata qaru rove go raru ne, valeke dena i sale rararu, mana pasi i podo me, i kodo bana so go. 21Do qaruki rove kaega, avigo tane i mimia go, mana akena tane i vamimia go, tana ne tanuna, tanego i lavata to iago tanuna i mazala vataule ne qamu go!” 22Go iru seko gogo dena vanovano ia valeke ne, tanego iru sareki ne qira batubatu ria vano Jiu, tanego batubatu ria vano Jiu dena, iri varitoqe bana ne, “Ṉalu ka basoe ivaogote Jesu i Mesia go, ria tarina va mamanava ze ia zae na Pade Lotu ne.” 23Iato go vanovano ia iri go, tana ne tanuna, i lavata to, i mazala seko tanuna.

24Gonae iri koru vaule napua valeke kodo ne varuana zaza, mana iri sine ne ia, “Vanadu ze pui aro de ikoego God, aro tono sine pata ogoto! Remu qi rove valeke i vamimia go aro i valeke vatovato sakata.”

25Do valeke ne i vataule, igo, “Koro valeke vatovato sakata ba kaega, tanego pata qa rove go, kokosona era qa kodo bana, do ninidena qa mimia to.”

26Iri tana napu ne ia, “Avana tane i zazu nigoe aro valeke nae, go qo ara mimia go na?”

27Valeke ne i vataule ne qira, igo, “Qa sine lupo bana ne qamu to, do qamu kasi gatana, avigo qamu soko napua gata velaka na, go muna disipolo ia ba?”

28Do batubatu ria vano Jiu iri seko vasakate ia, iri go, “Aro to qo disipolo ia valeke nae, remu qi disipolo ia Mosese. 29Remu qi rove, God i seko tabe Mosese, do valeke nae, remu qiki rove kaega kade i reqe go!”

30Do valeke ne i vane qira dena, “Kaki pata vari vapoloso bana go, go ramu qamuki rove kaega de i reqe mego, do ia iva mimia va era! 31Osiqita qata rove, God i makuru na teke ne qira pata iri pene go vano i sakata go vatovato ria, do God i gata qira ria iri va mazale mana iri zazu ne pataro i soko go tarina zazu ne go. 32Tupi zari i vae go kolabana pua ne, kaega ka basoe qata gata iva mimia go basoe i kodo, podo i vaego. 33Do ṉalu go valeke dena iki reqe me kaega de ikoego God, i makuru tina zazu ne kaki pata.”

34Batubatu ria vano Jiu iri vane de ia, “Aro qo bulaṉoi, mana qo podo palua vasakata pata go, avigo tane qo soko go vatatana qemu remu na?” Gonae iri kakale vasiporo ze ia Pade Lotu ne.

Nanao Na Basoe I Gere Ṉalu I Kodo Go

35Ṉalu Jesu i gata soba, batubatu ria vano Jiu iri kale vasiporo ze ia Pade Lotu ne, i taqia mana ṉalu i soba ia, i tana ne, “Avigo qo vaogote Tuna basoe ne ba?”

36Valeke ne i vataule, “Batu sine nava, akena bana tane valeke nae, go era ma vaogote ia!”

37Jesu i vataule ne ia, igo, “Iato qo mia go de, mana iato i seko tabe go dena go.”

38Valeke ne i koloku tutuṉue tarakenaqana Jesu mana igo de, “Batu, qa vaogoti go.”

39Gonae Jesu igo de, “Qa lamae vudu pua dena, go tuna zazu ne vivine de iri koego basoero ne, go vano iri kodo go tarina mimia mana vano iri mimia bana go, tarina kodo go.”

40Kakiaro vano Parisio iri koego de go, iri gata seko ia Jesu iri vane de ia, “Oniki nanao aro remu qi kodo na!”

41Do Jesu i vataule ne qira, “Ṉalu go qamu kodo ogoto go, ramu qamuki kebu kaega, do ramu qamu go, qamu mimia, ianae to ivasadake ramu qamu ara kebu so.”

Currently Selected:

Jon 9: VRSNT

Highlight

Copy