Juan 6

Jechu judi jurarea̧ oa yürürëremȩdejȩrȩ pumȩ ji̧ra̧ tjamo̧ oa

Mateo 14:13-21; Marco 6:30-44; Uruca 9:10-17

1Ja̧dëa ji̧ judio tjamo̧ yo̧ji̧ri̧ pio ji̧ri̧iäpȩmo̧ ni̧bä chjao ëte, Jechu judi Garirea tja oëräpȩ chjätärëremȩde. Ado Garirea tja oa, peaja̧di Tiberia tja yo̧rëreji̧ri̧diro̧jo̧ȩ. Aja̧, yo̧a̧ri̧ quȩ chiarëremȩde. 2Ado Jechu judi pio jiro tja oëräpȩ chjätämȩ oa, pumȩ no̧i̧dërë cho̧rë järëreji̧ri̧diro̧jo̧ȩ. Jënȩ jauëchja cjiari̧ na̧rȩmȩ oa daea̧ oaiä, gito ja̧boji̧ri̧ pio ji̧ri̧ chjaparȩmȩ oa daea̧ oaiä, jabechji̧ cho̧rë jäa̧diro̧jo̧ȩ. 3Ado Jechu judi tja oëräpȩ go̧düdäräa̧rä, ya̧mi̧rä bua ëte chadärärëremȩde jibëa̧ jadü pio ji̧ri̧ nö̧ta. 4Ado judiorë a̧dopapea̧ do üdë ma̧na̧pea̧ ji̧ querediä tjamo̧rëremȩde uëmo̧ a̧dë chjätärea̧ do pio judi.#6:4 Judio judiro̧ cja̧rȩmȩ co ui nö̧ta a̧doparëreji̧ri̧dirȩ jurapea̧ oa, jo̧rȩtapea̧ oa. Ütë tjamo̧ judi Ejitoräpȩ tuti japarërea̧ pio ju̧i̧ jo̧rȩtapea̧ oa, Ejitoräpȩ cjo̧ro̧ji̧ri̧ pio ji̧ri̧ bape chjaorërea̧ pio ju̧i̧ jo̧rȩtapea̧ oa, a̧doparëreji̧ri̧dirȩ uëmo̧ a̧dë chjätärea̧ doro. Jabechji̧ pio jiro doro Ütërë chjadüa̧ mu̧i̧tjoi̧ pio judi ja̧bo tänȩrëremȩdejȩrȩ yabo ara̧ji̧ri̧ pio ji̧ri̧. Jabechji̧ yu̧a̧rea̧ jo̧ë yarä oveja ja̧ goe oa dadëa̧ oaiä, ja̧bo tänȩrëremȩdejȩrȩ. Jabo goe oa daea̧ oaiä, uëmo̧ a̧dë chjätärëremȩde mu̧i̧tjoi̧ üdë, yabomȩ pio ju̧i̧ ja̧bo tänȩtärea̧ ji̧. Pio ju̧i̧iä uëmo̧ a̧dë chjätärea̧ do yo̧rëreji̧ri̧diro̧jo̧ȩ. Ado pio ju̧i̧iä Jerucharȩräpȩ a̧dopediäarëreji̧ri̧dirȩ judio judiro̧ ui nö̧ta pio jiro doro. 5Ado Jechu judi oëra̧ti̧ oa mire damȩrȩ pumȩ buba tjamo̧ oa darëremȩdejȩrȩ, pio jȩaiäpȩmo̧ jana̧ji̧ri̧ oa. Ado pio ju̧i̧iä iëno̧ë ta̧rëa̧dejȩ jibëa̧ jadü oa, Pjeripe quȩmȩ pio ju̧i̧:

—Danȩ, pio jiro pumȩ bubarë cha̧pe oa chjadëri̧ jurapea̧ oa, ¿tjana̧räpȩ gatërea̧ daparea̧rȩ? Chjadëri̧ yo̧coe —yo̧a̧dejȩ.

6Ado Jechu judi, ‘Aja̧, ja̧di dari̧ japajaquëda’ quëna̧ jo̧rȩtamȩborë jabechji̧ iënoë ta̧rëa̧dejȩ pio ju̧i̧ ütarë dapea̧ oa.

7Ado Pjeripe judi dëbë yo̧a̧dejȩ:

—Cjäri̧ marea̧rȩ, japarea̧ decjiade —yo̧a̧dejȩ—. Pumȩ ji̧ra̧ tjamo̧dirȩ. A̧ro̧rȩ 200 chëre ba chia oa goarä judibo, jabechji̧ nö̧tadëtäremȩde. Jabechji̧ pumȩ ütëborë piodai̧ maea oa jurapea̧ ji̧ nö̧tadëtäremȩde. Ado pio ju̧i̧iä jabechji̧, japarea̧ decjiade —dëbë yoa̧dejȩ.

8Ja̧dëa ji̧ Jechu ja̧ jadü üdë cja̧rȩmȩrȩ, A̧däre pio judi, Chimo̧ Pedro pio ju̧i̧ ja̧ omȩ pio judi yo̧a̧dejȩ Jechu ju̧i̧:

9—Danȩ, pio yodë üi̧ boi̧chji̧ üdë cja̧rȩichimo̧ cha̧pe goade, chebada quȩmȩ cho pjo̧no̧ra̧ japea̧ oa cjiamȩ chja̧pe oa. Ado pio ju̧i̧ uëri yo̧a̧ri̧ cho̧ goade. Jabo cjäri̧ made, pumȩ ji̧ra̧ tjamo̧ tara, nö̧tadë made —yo̧a̧dejȩ.

10Jabo Jechu judi yo̧a̧dejȩrȩ jibëa̧ jadü ji̧ri̧:

—Jabechji̧ cha tänȩchji̧jȩrȩ pumȩ ji̧ri̧.

Ado cärä ji̧ra̧ tjamo̧ oaiä, jabechji̧ charëreji̧ri̧dirȩ. Ado oari judiro̧ 5000rëreji̧ri̧dirȩ, ütararea̧mi̧dërë. 11Ja̧dëa ji̧ Jechu judi boi̧chji̧ pio ju̧i̧ ja̧remȩ chja̧pe oa mitëmȩrȩ chjacjiamȩri̧ ni̧bäa̧dejȩ Ütë ju̧i̧iäpȩmo̧. “Aja̧ Ama̧i̧, chjadëri̧ yürüa̧renȩibe pio yoa chja̧pe oa. Ja̧ditäde” yo̧mȩrȩ yo̧a̧dejȩ. Ado ja̧di dari̧ ni̧bä ëte, chjarapë yürürëremȩdejȩrȩ daburo chaji̧ri̧ pio ji̧ri̧iäpȩmo̧. Ado peaja̧di dari̧ japarëremȩde boi̧chji̧ ja̧remȩ cho̧ oa. Ado pumȩ judiro̧ ütëbodärärë juraji̧ri̧pea̧dirȩ, cja̧rȩmȩrȩ cjiadiädëri̧. Jabechji̧ chjadëri̧ jura̧dirȩ. Mairi̧ jura̧dirȩ. 12Ado ütëborë juradäräa̧rä, Jechu judi yo̧a̧dejȩrȩ jibëa̧ jadü ji̧ri̧:

—Jaechji̧vä, a̧dopachji̧vä cjiadiäa̧mȩ jurarea̧ pio ju̧i̧ badëri̧ cjiadiächea oa.

13Ado pio ju̧i̧iä tai̧ji̧ri̧rȩ a̧doparëreji̧ri̧dirȩ cjiadiäa̧mȩ jurarea̧ oa. Pumȩ judiro̧ chebada cho pjo̧no̧ra̧ japea̧ chja̧pe oa jura̧ pënȩ chjö̧na̧i̧ oa boadäräa̧diro̧jo̧ȩ cjiadiäa̧mȩ pio ju̧i̧. Ado 12 taio ma̧ri̧rä boa̧diro̧jo̧ȩ tjuri cjia maea oa.

14Ado pumȩ judiro̧ Jechurë jauëchja cjiari̧ japea̧mȩ oa daea̧ oaiä ja̧di ta̧rëri̧ yo̧rëreji̧ri̧dirȩ:

—A̧ro̧rȩ no̧mȩ tjamo̧ri ja̧ jidatarërea̧ pio judide yüdëje. Jabechji̧ Ütërë ea jana̧ chjadüa̧ oa ni̧bämȩ pio ju̧i̧ no̧mȩ tjamo̧ri ja̧ jidatärëreji̧ri̧rea̧ro̧jo̧ȩ jabo pio judide yüdëje —yo̧a̧dirȩ.

15Jabo Jechu judi pio jiro pumȩ pio ji̧ri̧ chjiari tjamo̧ri̧ dabarëremȩde. ‘A̧ja̧, mitëpadiro̧coada, jibëa̧ ma̧na̧ri̧ jo̧rȩtaji̧ri̧rȩ chiri ütë tänȩtämi̧ cjiadiro̧coada’ quëna̧ dabamȩrȩ a̧dë järëremȩdejȩrȩ jibëa̧ma̧i̧ cjiapea̧ oa ya̧mi̧räpȩ ju̧ri̧.

Jechu judi ui uëmo̧ tai̧rëremȩde chami̧rea̧ decjiari̧

Mateo 14:22-27; Marco 6:45-52

16Ado dodëpea̧rä Jechu ja̧ jadü judiro̧ bira̧dirȩ tjaräpȩ. 17Ado chara oa buaji̧ri̧rȩ taruparëreji̧ri̧dirȩ ado chjereno̧ cuchupë baäpea̧ ji̧ tja oëräpȩmo̧, Capanau̧ quȩmȩ bë ma̧ri̧räpȩmo̧. Ado gȩnȩpea̧räbo, jabechji̧ Jechu jabë decjiarëremȩde. Jabë nö̧tadiädëa̧dejȩrȩ. 18Ado chjaodëri̧ goae tarari̧ pjaepamȩpea̧de ma̧i̧ da gö̧ma̧pe bagari̧. 19Ado ja̧dëa ji̧ judiro̧ jibëa̧ tai̧tora̧ 6 kilometros jachi oa tai̧a̧ ji̧, jachi tjamo̧ oa tai̧a̧ ji̧, tja tjoräpȩ ju̧ri̧ go̧düdäräa̧ ji̧, chjaodëri̧ daea̧diro̧jo̧ȩ Jechu ju̧i̧, pio jibëiäpȩmo̧ jana̧mȩ oa. Ui uëmo̧i̧ tai̧mȩ oa daea̧diro̧jo̧ȩ chami̧dëmȩ oa. Jabo cjäri̧ madiro̧jo̧ȩ. ‘Jechu pio judidida’ quëna̧ jo̧rȩtaji̧ri̧rȩ dadëa̧diro̧jo̧ȩ. Jabechji̧ ¿chjiacjivadi? quëna̧ jo̧rȩtaji̧ri̧rȩ daea̧diro̧jo̧ȩ, a̧dë chjäte uapaji̧ri̧pea̧ji̧ri̧rȩ.

20Jabo Jechu judi chararë pjurëmȩräpȩ go̧düdäräa̧mȩrȩ yo̧a̧dejȩrȩ:

—Uapadëchji̧vä. Pio cüdërequede —yo̧a̧dejȩrȩ.

21Ado ju̧i̧ ta̧rëa̧ oaiä, ‘Jechu pio judidida’ quëna̧ji̧ri̧rȩ ma̧ chiadëri̧ cjiari̧ a̧doa̧diro̧jo̧ȩ chararä buatä. Ado ja̧dëa ji̧ chjaodëri̧ go̧düdäreno̧rëreji̧ri̧dirȩ jënȩro̧ go̧düdärätämi̧ cjia̧räpȩ.

Jechu pio ju̧i̧iä jurarëreji̧ri̧ judiro̧ na̧tarëreji̧ri̧diro̧jo̧ȩ

22Ado dopea̧rä Jechu pio ju̧i̧iä jurarëreji̧ri̧ pumȩ buba judiro̧ tja oëräpȩ cjiadiäa̧ji̧ri̧rȩ jo̧rȩtaji̧ri̧pea̧dirȩ. ‘Aja̧, jabo cja̧rȩmȩ chara maearë pjurëremȩdida, ado Jechu ja̧ jadü judiro̧ pio ju̧ri̧ra̧ baäa̧diro̧da, Jechu pio ju̧i̧ a̧dë baäa̧ jirodiro̧ju̧i̧da’ quëna̧ jo̧rȩtaji̧ri̧pea̧dirȩ. 23Ado Tiberia quȩmȩ bë ma̧ri̧ri pio judiriji̧ri̧ judiro̧ go̧düdärärëreji̧ri̧dirȩ jibëa̧ charara̧ pumȩ judiro̧ cjiadiäa̧räpȩ ju̧ri̧. Aja̧, Jechurë pumȩ ji̧ri̧ chja̧pe oa ëba jura̧räpȩ ju̧ri̧, Jechurë Ütë tjamo̧ pio ju̧i̧iäpȩmo̧ chjacjiamȩri̧ ni̧bäa̧räpȩ ju̧ri̧ go̧düdäräa̧dirȩ. 24Ado cjiadiäa̧ji̧ri̧ pumȩ judiro̧, ‘Aja̧, Jechu decjiadida, ado Jechu ja̧ jadü judiro̧ decjiadiro̧da’ quëna̧ji̧ri̧pea̧ oaiä, jabechji̧ chjaodëri̧ bua̧diro̧jo̧ȩ chara oa tja oëräpȩ chjätäpea̧ oa, Capanau̧ quȩmȩ bë ma̧ri̧räpȩ baäpea̧ oa. Jabechji̧ Jechu ju̧i̧ ado chjereno̧ dadäräpea̧ oa pio ju̧ri̧pȩ järëreji̧ri̧dirȩ.

Jechu judi bucho ana̧ cjo̧ro̧rea̧ yürümȩ chja̧pede

25Ado ja̧dëa ji̧ japamitë chjätä ëte, pumȩ judiro̧ Jechu pio ju̧i̧ na̧ea̧ duri oa dadäräa̧rä, iëno̧ë ta̧rëa̧diro̧jo̧ȩ:

—A̧ra̧ano̧mȩ —yo̧a̧diro̧jo̧ȩ—. ¿Naparä go̧düna̧ra̧nȩ pio yi?

26Ado Jechu judi cjacjarë damȩrȩ dëbë yo̧a̧dejȩrȩ:

—Jabo cjäri̧ manȩrȩ. Cüdë jauëchja cjiari̧ na̧rȩa̧ pio ju̧i̧ chjiari coëma cjiari̧ jo̧rȩtatärea̧ ji̧, badë maea oa jo̧rȩtanȩrȩ —yo̧a̧dejȩrȩ—. Jabechji̧ pio coa ea tjamo̧ji̧ri̧rȩ na̧tadë marenȩro̧coe, jabo cüdë tja oëräpȩ ju̧ri̧ chja̧pe oa mairi̧ jura tänȩa̧ pio ju̧i̧iämo̧i̧ jo̧rȩtaji̧ri̧rȩ na̧tarenȩro̧coe —yo̧a̧dejȩrȩ—. Tjamo̧dë yo̧dërequededibe jabo tjamo̧i̧ cjiari̧ yo̧requededibe. 27Jabo danȩrȩ, bücjüri̧ cjiadë machji̧vä badëmȩ jurarea̧ pio ju̧i̧ boapea̧ ji̧. Jurucjü chiapai̧damȩ jurarea̧ pio ju̧i̧, chjuadëpe bagapai̧damȩ jurarea̧ pio ju̧i̧ boapea̧ ji̧ bücjüri̧ cjiadë ma̧chji̧vä. Jabo jabechji̧, ji̧dë ma bücjüri̧ cjiatäreji̧ri̧nȩrȩ jurarea̧ chjadëi̧ pio ju̧i̧ boami̧ dari̧ jo̧rȩtapea̧ ji̧, bucho ana̧ cjo̧ro̧rea̧ yürümȩ jurarea̧mi̧ damȩ pio ju̧i̧. Danȩrȩ, Pumȩrȩ Ara̧ Tjamo̧ pio judirequede. Ado pio jiro jurarea̧mi̧ da oa yürüparequededibe. Jabechji̧ pio dibëiäpȩmo̧ yürüpea̧ oa chjadürëremȩdique Ama̧i̧ Ütë judi —yo̧mȩrȩ yo̧a̧dejȩrȩ Jechu judi.

28Ado pumȩ judiro̧ pio ju̧i̧ ta̧rëa̧ oaiä, ja̧di ta̧rëri̧ ano̧ mire iëno̧ë ta̧rëa̧diro̧jo̧ȩ:

—¿Jabo tjana̧ japatäreji̧ri̧rea̧rȩ? Ütë tjamo̧ ja̧ ja̧beparea̧ pio ju̧i̧ chjadëri̧ ja̧bepapea̧ oa, ¿tjana̧ japatäreji̧ri̧ea̧rȩ? —iëno̧ë ta̧rëa̧diro̧jo̧ȩ.

29Ado Jechu judi:

—Tjana̧ japadë, jabechji̧ Ütë tjamo̧ judi chjadüa̧ pio ju̧i̧ quëna̧täreji̧ri̧renȩro̧jo̧ȩ. Aja̧, ja̧di dari̧ japatä eadidibe Ütë tjamo̧ judi —yo̧a̧dejȩrȩ.

30Ja̧dëa ji̧ pumȩ judiro̧ ado yo̧a̧diro̧jo̧ȩ:

—Jabo chjadëri̧ na̧rȩtäremȩrenȩibe jauëchja cjiari̧ na̧rȩrea̧ oaiä. ¿Tjana̧ na̧rȩrea̧ra̧ na̧rȩparenȩibe a̧ro̧rȩ na̧e chiape jäpea̧ oa? 31Danȩrȩ, na̧rȩrëremȩdejȩrȩ ibëa̧ ütëti̧rea̧ ji̧ri̧ Moiche judi. Jabechji̧ a̧dërimȩ chja̧pe pio ju̧i̧ yürürëremȩdejȩrȩ chiri tjo maräpȩji̧ri̧ oa. Peaja̧di ta̧rëri̧ yo̧diibe ma̧ȩ üdë. “A̧dërimȩ chja̧pe oa yürürëremȩdejȩrȩ Moiche judi” yo̧diibe —yo̧a̧diro̧jo̧ȩ.

32Jabo Jechu judi dëbë yo̧a̧dejȩrȩ:

—Jabo danȩrȩ, Moiche pio judi tjamo̧dërëremȩde a̧dëri pio judiri ja̧ chja̧pe oa yürümȩ judi. Jabechji̧ Ütë tjamo̧ pio judirëremȩde. Jabechji̧ pio judide a̧dëri ma̧na̧mȩ chja̧pe tjamo̧ oa yürümȩ judi. Tjamo̧dë yo̧dërequede, jabo tjamo̧i̧ cjiari̧ yo̧requededibe. 33Danȩrȩ, Ütë tjamo̧ judi yürüa̧ chja̧pe judi a̧dëri pio judiri biramȩ pio judide. Dai chirirä cjo̧ro̧ji̧ri̧ pio ji̧ri̧iäpȩmo̧ bucho ana̧ cjo̧ro̧rea̧ yürüpea̧ oa birarëremȩde —yo̧a̧dejȩrȩ.

34Ado ju̧i̧ ta̧rëa̧ oaiä, yo̧a̧diro̧jo̧ȩ:

—Danȩ, pio jiro chja̧pe oa ji̧dë ma yürüibe.

35Jabo Jechu judi dëbë yo̧a̧dejȩrȩ:

—Danȩrȩ, bucho ana̧ cjo̧ro̧rea̧ yürümȩ chja̧pe pio judirequede —yo̧a̧dejȩrȩ—. Ado pio coaiäpȩmo̧ ma̧na̧mi̧ dari̧ quëna̧ji̧ri̧ pio judiro̧ ado chjereno̧ ta̧mȩcho̧ ja̧boji̧ri̧mi̧ dari̧ cjiadiädëpadirȩ. Pio coaiäpȩmo̧ quëna̧ji̧ri̧ pio judiro̧ ado chjereno̧ ui ja̧boji̧ri̧mi̧ dari̧ cjiadiädëpadirȩ peaja̧di. 36Jabo cjäri̧ manȩrȩ —yo̧a̧dejȩrȩ—, cüdë pio dibë pearä yo̧a̧mi̧ cjianȩrȩ. Jabechji̧ pio coa irä daea̧räbo quëna̧dë marenȩro̧coe. 37Jabo ca̧ Ama̧i̧ judi pio coaiäpȩmo̧ yürüa̧ pumȩ pio judiro̧ chjadëri̧ ma̧na̧mi̧ dari̧ quëna̧padiro̧coe. Ado eami̧ pumȩ judiro̧ pio coaiäpȩmo̧ ma̧na̧mi̧ dari̧ quëna̧ji̧ri̧ pio ji̧ri̧, jabechji̧ ba chia daparequedejȩrȩ, baä tänȩrea̧ decjiari̧ —yo̧a̧dejȩrȩ—. 38Jabechji̧ a̧dëri pio judiri birë ma̧na̧requede coa chjadüa̧mȩ pio judi ütarë jo̧rȩta̧mi̧ japapea̧ oa, pio ju̧i̧ ja̧ jo̧rȩtarea̧ maeara̧ jo̧rȩtariä cjo̧ro̧pea̧ oa. Jabechji̧ ca̧ea̧ ma̧na̧ri̧ jo̧rȩtamȩrȩ japapea̧ oa biradëa̧requede 39jabo pio coa chjadüa̧mȩ pio judi eami̧ japatämi̧ cjiarequede. Ado judi coa yürüa̧ pumȩ pio ji̧ri̧ chjadëri̧ jidatä ea tara, jabechji̧ pio ji̧ri̧ chjadëri̧ jidaparequedejȩrȩ, cja̧rȩmȩrȩ dabadëpe bagarea̧ decjiari̧ —yo̧a̧dejȩrȩ—. Ado ca̧ Ama̧i̧ judi, cüdë jida̧ pumȩ ütëbo oa bëdü tänȩtä ea tara, cüdë pio ji̧ri̧ cjiadiäa̧ doro bëdü tänȩtä ea tara, peaja̧di bëdü tänȩparequedejȩrȩ judiro̧ bucho ana̧ cjo̧ro̧rea̧ dapea̧ oa. 40Jabechji̧ ja̧di dari̧ eade ca̧ Ama̧i̧ judi. Pio coa da ëte quëna̧ji̧ri̧ pio judiro̧ ütëborë bucho ana̧ cjo̧ro̧rea̧ datä ea madejȩrȩ. Pio ju̧i̧iä quëna̧ji̧ri̧ pio ji̧ri̧, dëdë, bëdü tänȩparequedejȩrȩ cjiadiäa̧ japamitërä, judiro̧ tjamo̧ri̧ bucho ana̧ cjo̧ro̧rea̧ dapea̧ oa —yo̧mȩrȩ yo̧rëremȩdejȩrȩ Jechu judi pio jȩa na̧tarëreji̧ri̧ pumȩ pio ji̧ri̧iäpȩmo̧.

41Jabo ja̧dëa ji̧ judio judiro̧ ma̧ȩ goaedëra̧ ni̧bäji̧ri̧pea̧dirȩ. Jabechji̧ Jechu judi yo̧a̧ oaiä, “Aja̧, a̧dëri biramȩ chja̧pe pio judirequede” yo̧a̧ pio oaiä, jabechji̧ ma̧ȩ goaedëra̧ ni̧bäji̧ri̧pea̧dirȩ. 42Ado jibëa̧ dëbëti̧ra̧ chia yo̧rëreji̧ri̧dirȩ:

—Cjäri̧ made, oëra̧ yo̧diibe pio yüdëje. Jabechji̧ dabarea̧ro̧jo̧ȩ. Jechu pio judide. Joche joja pio judide. ‘Pio judiro̧ nö̧ria̧diro̧ju̧i̧da’ quëna̧ dabarea̧ro̧jo̧ȩ. Jabomo̧ pumȩde. Pio ju̧i̧iä ja̧di dari̧ yo̧rea̧mi̧dëde. Aja̧, “A̧dëri biramȩ pio judirequede” yo̧rea̧mi̧dëde —yo̧a̧dirȩ.

43Jabo Jechu judi tuti yo̧a̧dejȩrȩ:

—Cjapiri̧ cjiachji̧vä. Jabechji̧ dibëa̧ dëbëti̧ra̧ chia ma̧ȩ goaedëra̧ yo̧dëchji̧vä —yo̧a̧dejȩrȩ—. 44Danȩrȩ, pio coa chjadüa̧mȩ Ama̧i̧ pio judi pumȩ ji̧ri̧ jo̧rȩta tänȩa̧rämo̧ quëna̧rea̧ dapadiro̧coe. Tjamo̧ davä. Pio judi jo̧rȩta tänȩa̧rämo̧ quëna̧rea̧ dapadiro̧coe. Ado coa quëna̧ji̧ri̧ pio ji̧ri̧ cjiadiäa̧ japamitërä, jabechji̧ bëdü tänȩparequedejȩrȩ bucho ana̧ cjo̧ro̧rea̧ dapea̧ oa —yo̧a̧dejȩrȩ—. 45Peaja̧di ta̧rëri̧ go̧ȩpea̧ oa cjiade Ütërë ea jana̧ chjadüa̧ oa ni̧bäji̧ri̧ judiro̧ yo̧rërea̧ ma̧ȩ üdë. “Aja̧, pumȩ judiro̧ ütëborë Ama̧i̧ tjamo̧ pio ju̧i̧iä dabaparea̧ dapadirȩ” yo̧diibe ma̧ȩ üdë. Ado pio ju̧i̧iä yo̧requededibe. Eami̧ pumȩ üdë Ama̧i̧ tjamo̧ pio ju̧i̧iä dabaparä judi, jabechji̧ pio coa cho̧rë ma̧na̧mi̧ dari̧ quëna̧rea̧ dapadique. 46Jabo oëra̧ jo̧rȩtadëchji̧vä jabo. Pio jiro pumȩ judi Ütë tjamo̧ pio ju̧i̧iä dabapea̧räbo, jabechji̧ irä dadë madejȩ. Jabechji̧ Ütë tjamo̧ judi chjadüa̧ pio judimo̧rȩ irä darëremȩdejȩ Ama̧i̧ ju̧i̧, cüdëmo̧rȩ. 47Ado pio ju̧i̧iä tjamo̧i̧ cjiari̧ yo̧requededibe. Pio coa quëna̧mȩ pio judi, jabechji̧ bucho ana̧ cjo̧ro̧rea̧ chiade. 48Jabechji̧ bucho ana̧ cjo̧ro̧rea̧ yürümȩ chja̧pe pio judirequede —yo̧a̧dejȩrȩ—. 49Danȩrȩ, dibëa̧ ütëti̧rea̧ judiro̧ ma̧na̧ quȩmȩ jurarea̧ oa chiri tjoräpȩ juraji̧ri̧borë ja̧boa̧ maeadirȩ. 50Jabo a̧dëri pio judiri biramȩ chja̧pe pio judi, tjaoëde. Pio jiro chja̧pe oa juramȩ judi, jabechji̧ ja̧bodëpade. 51Ado pio jiro chja̧pe pio judirequede cüdë. Tjamo̧ davä. A̧dëri ja̧ chja̧pe pio judirequede. Bucho ana̧ cjo̧ro̧rea̧ yürümȩ chja̧pe pio judirequede. Ado eami̧rȩ pio yoa chja̧pe oa jurarä judi, jabechji̧ bucho ana̧ cjo̧ro̧pade —yo̧a̧dejȩrȩ—. Ado danȩrȩ, pio jiro chja̧pe üdë ca̧ go̧a̧ pio judide. Ado ca̧ go̧a̧ pio ju̧i̧ yürürequededibe mȩnȩro̧ jurapea̧ oa. Jabechji̧ yürürequede ca̧ icjara oa pumȩ judiro̧ ütëbodärärë bucho ana̧ cjo̧ro̧rea̧ dapea̧ oa —yo̧mȩrȩ ni̧bä chjaorëremȩdejȩrȩ Jechu judi ma̧ȩ go̧a̧ti̧ oa.

52Jabo judio judiro̧ pio ju̧i̧ ta̧rëa̧ oaiä, ana̧ri̧ jo̧rȩtaji̧ri̧pea̧dirȩ, Jechu pio ju̧i̧iäpȩmo̧ goëdëri̧ cjiape bagaji̧ri̧rȩ. Ado jibëa̧ dëbëti̧ra̧ chia ni̧bäji̧ri̧pea̧dirȩ.

—¿Jabo tjana̧ yo̧cjivadi? —yo̧a̧dirȩ—. ¿Yö̧ta dari̧ yürüpai̧ dadiibe jibëa̧ go̧a̧ oa jurapea̧ ji̧? —yo̧a̧dirȩ.

53Jabo Jechu judi cjiadiädëmȩrȩ ado yo̧rëremȩdejȩrȩ ja̧di ta̧rëri̧ a̧de yo̧mȩrȩ:

—Danȩrȩ, mȩnȩro̧ ca̧ go̧a̧ oa juradërä judi, Pumȩrȩ Ara̧ Tjamo̧ pio ju̧i̧ ja̧ go̧a̧ oa juradërä judi, ado pio ju̧i̧ ja̧ goe oa jaradërä judi, jabechji̧ bucho ana̧ cjo̧ro̧rea̧ dadëpanȩrȩ. Tjamo̧dë yo̧dërequede, jabo tjamo̧i̧ cjiari̧ yo̧requededibe —yo̧a̧dejȩrȩ—. 54Danȩrȩ, ca̧ go̧a̧ oa juraji̧ri̧ judiro̧, ca̧ goe oa jaraji̧ri̧ judiro̧ bucho ana̧ cjo̧ro̧rea̧ chiadirȩ. Ado cjiadiäa̧ japamitërä bëdü tänȩparequedejȩrȩ bucho ana̧ cjo̧ro̧pea̧ oa. 55Jabechji̧ ca̧ go̧a̧ üdë jurarea̧ tjamo̧de. Ado ca̧ goe üdë jararea̧ tjamo̧de. 56Ado pio ju̧i̧iä yo̧requededibe. Ca̧ go̧a̧ oa juraji̧ri̧ judiro̧, ado ca̧ goe oa jaraji̧ri̧ judiro̧, jabechji̧ cja̧rȩmȩpe bagadirȩ pio coa nö̧ta. Ado ca̧ea̧ri ja̧ maearë cjo̧ro̧padirȩ pio coaiä. Ado pio judiriji̧ri̧ ja̧mȩrȩ cjo̧ro̧parequede pio ji̧ri̧iä. Tjamo̧ davä. Pio ji̧ri̧iä cjo̧ro̧parequede, pio judiriji̧ri̧ ja̧mȩrȩ —yo̧a̧dejȩrȩ—. 57Danȩrȩ, coa chjadüa̧mȩ judi, ca̧ Ama̧i̧ pio judi cjo̧ro̧de. Ado pio ju̧i̧iä tarupade cjo̧ro̧rea̧ üdë. Jabechji̧ ca̧ Ama̧i̧ pio ju̧i̧iä cjo̧ro̧requede cüdë. Ado pio coa juraji̧ri̧ judiro̧ cjo̧ro̧padirȩ pio coaiä. Jabechji̧ Ama̧i̧ tjamo̧ pio judiri ma̧na̧mȩ cjo̧ro̧rea̧ra̧ pio ju̧ri̧ra̧ cjo̧ro̧ tänȩparequedejȩrȩ —yo̧a̧dejȩrȩ—. 58Aja̧, a̧dëri pio judiri biramȩ jurarea̧ pio ju̧i̧ chjiari ni̧bä chjaorequededibe. Jabo danȩrȩ, oëra̧ jo̧rȩtadëchji̧vä. Dibëa̧ ütëti̧rea̧ judiro̧ chiri tjo maräpȩ jura̧ pio jiro jurarea̧dërequede. Danȩrȩ, judiro̧ pio jiro jurarea̧ oa jura ëte, jabechji̧ ja̧boa̧dirȩ. Jabo pio yoa jurarea̧ oa juraji̧ri̧ pio judiro̧, jabechji̧ bucho ana̧ cjo̧ro̧padirȩ.

59Ja̧di ta̧rëri̧ yo̧mȩrȩ a̧ra̧ano̧rëremȩde Jechu judi Capanau̧ quȩmȩ bë mari̧räpȩ, judiorë a̧doparea̧ bëräpȩ.

Jechu judi ni̧bä chjaoa̧ üdë ibëa̧ tjo ja̧de

60Jabo Jechu judi ja̧di ta̧rëri̧ yo̧mȩrȩ a̧ra̧ano̧rërea̧ ji̧ goae tjamo̧dërëremȩdejȩrȩ pio jȩa cho̧rë jädiäji̧ri̧ pio ji̧ri̧iä.

Ado pio ju̧i̧iä ja̧di ta̧rëri̧ yo̧rëreji̧ri̧dirȩ:

—Jabo cjäri̧ made, pio jiro a̧ra̧ano̧rea̧ üdë jamȩpai̧ ta̧rëde —yo̧a̧dirȩ—. Ta̧rërea̧mi̧dëde.

61Jabo pio ji̧ri̧ chjiari dabarëremȩde Jechu judi. Judiro̧ ma̧ȩ goaedëra̧ ni̧bäa̧ pio ju̧i̧ chjiari dabarëremȩde. Jabechji̧ pumȩ ju̧i̧iä ta̧rëdëa̧räbo dabarëremȩde. Ado pio ju̧i̧iä yo̧a̧dejȩrȩ:

—Danȩrȩ, cüdë a̧ra̧ano̧a̧ ma̧ȩ üdë ¿ta ano̧ë china̧därä tänȩmi̧ dari̧ jo̧rȩta tänȩdidibe? 62Ado ja̧dirä judi, ¿yö̧ta dari̧ jo̧rȩtapanȩrȩ cüdë pearä cjiarërea̧räpȩ ado chjereno̧ cjitëmȩrȩ baärä judi? ¿Yö̧ta dari̧ jo̧rȩtapanȩrȩ Pumȩrȩ Ara̧ Tjamo̧ pio judi, jënȩ pearä cjiarërea̧räpȩ ado chjereno̧ uëräpȩmo̧ baärä judi? 63Danȩrȩ —yo̧a̧dejȩrȩ—, Ütë tjamo̧ ja̧ Tjo pio judide cjo̧ro̧rea̧ yürümȩ judi. Pio judide cjo̧ro̧ tänȩmȩ judi. Jabo pumȩ judiro̧ cjo̧ro̧ tänȩrea̧ chiadë madirȩ. Jibëa̧ra̧ pio ju̧ri̧ra̧ japarea̧mi̧dëdirȩ. Jabo cüdë dibë ni̧bä chjaoa̧ üdë dibëa̧ tjo ja̧de. Ado ca̧ ma̧ȩ pio judi cjo̧ro̧ tänȩrea̧ chiade. Aja̧, cjo̧ro̧ tänȩrea̧ chiade Tjo tjamo̧ pio ju̧i̧iä. Jabechji̧ cüdë a̧ra̧ano̧a̧ üdë dibëa̧ tjo ja̧de. 64Jabo mȩnȩro̧ orë quëna̧dërenȩro̧coe —yo̧mȩrȩ yo̧rëremȩdejȩrȩ Jechu judi.

Jabechji̧ peadëri ja̧ chjadëri̧ dabarëremȩde Jechu judi pio jȩa cho̧rë jädiäji̧ri̧ pio ji̧ri̧ chjiari. ‘Aja̧, o judiro̧ tjamo̧ri̧ quëna̧dëpadiro̧coada, pio coa cho̧rë jäji̧ri̧borë quëna̧dëpadiro̧coada, ado pio üdëje chjai̧dëri̧ japajadicoada, jabechji̧ pio coa ja̧bo tänȩtämi̧ cjiaji̧ri̧ pio ji̧ri̧iäpȩmo̧ u̧i̧pë gatë tänȩpadicoada’ quëna̧ dabarëremȩde Jechu judi jabërä.

65Ado pio ju̧i̧iä yo̧rëremȩde Jechu judi:

—Danȩrȩ, mȩnȩro̧ orë tjamo̧ri̧ quëna̧dërenȩro̧coe. Ado pio ju̧i̧iä yo̧a̧requededibe pio yabo. “Aja̧, Ama̧i̧ tjamo̧ judi pumȩ oa jo̧rȩta tänȩa̧rämo̧ cho̧rë ma̧na̧mi̧ dari̧ quëna̧rea̧ dapadique” yo̧a̧requededibe. Ado tjamo̧ri̧ yo̧a̧requededibe. Aja̧, pio judi dibë a̧doa̧rämo̧ quëna̧rea̧ daparenȩro̧coe —yo̧mȩrȩ a̧de yo̧a̧dejȩrȩ.

66Ado Jechu judi pio jȩa chjiari yo̧a̧ oaiä, jibëa̧ go̧a̧ oa juratä yo̧a̧ oaiä, jibëa̧ goe oa jaratä a̧ra̧ano̧a̧ oaiä, jabechji̧ no̧i̧dërë a̧dë baärëreji̧ri̧diro̧jo̧ȩ. Aja̧, pio ju̧i̧ cho̧rë jädiärërea̧ ji̧ a̧dë baärëreji̧ri̧diro̧jo̧ȩ. Pio ju̧i̧ nö̧ta ëba tai̧rërea̧ ji̧, putu jura̧ a̧dë chami̧ dari̧ a̧dë baäa̧diro̧jo̧ȩ.

67Ado pio ju̧i̧iä Jechu judi iëno̧ë ta̧rëa̧dejȩrȩ jibëa̧ jadü ji̧ri̧, 12 oa:

—Ado pio mȩnȩro̧borë a̧dë baätämi̧ cjiarenȩro̧coe? —iëno̧ë ta̧rëa̧dejȩrȩ.

68Ado Chimo̧ Pedro judi dëbë yo̧a̧dejȩ:

—Cjäri̧ marea̧rȩ ca̧ Ano̧mȩ, pio mȩa a̧dë baärea̧mi̧dëde. Jabechji̧ bucho ana̧ cjo̧ro̧rea̧ yürümȩ ma̧ȩ pio ju̧i̧ chiamȩrenȩ pio mȩnȩ. Ado pio ju̧i̧iä pio mȩa a̧dë baärea̧mi̧dëde. 69Jabechji̧ tjamo̧ri̧ na̧e chiapea̧rea̧rȩ pio mȩa chjiari. ‘Aja̧, Ütërë chjadüa̧ oa ma̧name pio judi tjamo̧dida, Ütërë mitëa̧ pio judi tjamo̧dida’ quëna̧ dabaji̧ri̧pea̧rea̧rȩ, tjamo̧ri̧ dabaji̧ri̧rȩ. Pio ju̧i̧iä mȩa a̧dë baärea̧mi̧dëde —dëbë yo̧a̧dejȩ Jechu ju̧i̧ Pedro judi.

70Ado ja̧dëa ji̧ Jechu judi yo̧a̧dejȩrȩ:

—Danȩrȩ, 12 oa mitëa̧requededibe. Jabo mȩnȩro̧ cja̧rȩmȩrȩ Ichiaerë ira̧diä cjaeäa̧ oa cjiade —yo̧a̧dejȩrȩ.

71Jabechji̧ Juda quȩmȩ pio ju̧i̧ chjiari jabërä ni̧bärëremȩde Jechu judi, Chimo̧ Icariote quȩmȩ pio ju̧i̧ ja̧ joja pio ju̧i̧ chjiari. Jabo dëdë, pio judiborë mitëa̧ oa cjiarëremȩde 11 pio ji̧ri̧ nö̧ta. Jabo pio ji̧ri̧ nö̧ta mitëa̧ oa cjiamȩborë Jechu pio ju̧i̧ u̧i̧pë gatë tänȩtämi̧ cjiarëremȩde.

Currently Selected:

Juan 6: Pume

Highlight

Copy