Juan 8

Jibëa̧ üi̧ pio ju̧i̧ a̧dë oëadëri̧ cjiayi̧ ji̧ darëreji̧ri̧diro̧jȩ pumȩ judiro̧

1Ado pumȩ judiro̧ ütëbodärärë jibëa̧ bëräpȩ baäa̧ ji̧, Jechu judi järëremȩde Orivo quȩmȩ ya̧mi̧räpȩ. 2Ado dopea̧rä peadai̧rä, ado chjereno̧ jäa̧de Ütë tjamo̧ ja̧ bëräpȩ. Ado ju̧ri̧pȩ go̧düdäräa̧mȩ oa, chjaodëri̧ tjoro tänȩa̧diro̧jo̧ȩ pumȩ judiro̧. Ado chamȩrȩ taruparëremȩde Jechu judi pio ji̧ri̧iäpȩmo̧ a̧ra̧ano̧pea̧ ji̧.

3Ado ja̧dëa ji̧ Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧, ado pjaricheo judiro̧borë go̧düdärärëreji̧ri̧dirȩ Jechurë a̧ra̧ano̧mȩräpȩ. Ado iei̧ ji̧ ëba go̧düdäräa̧diro̧jȩ chjai̧dëri̧ japea̧yi̧ pio ji̧, jibëa̧ üi̧dë oa baë ëba mo̧a̧yi̧ pio ji̧. Jabechji̧ goadirea̧ dadëyi̧ oa mitëa̧diro̧jȩ. Ado chjaodëri̧ ëba jäa̧diro̧jȩ Jechurë a̧ra̧ano̧mȩräpȩ. Ado pumȩ ütëbo ja̧ dëbëräpȩ ju̧ri̧ cjia tänȩa̧diro̧jȩ.

4Ado Jechu pio ju̧i̧iäpȩmo̧ yo̧a̧diro̧jo̧ȩ:

—Danȩ a̧ra̧ano̧mȩ, a̧ro̧rȩ pio yi̧a iei̧ ji̧ pea dadäräa̧rea̧ro̧jȩ jibëa̧ üi̧dë pio ju̧i̧ baë ëba mo̧a̧yi̧ ji̧. 5Ado ja̧di dari̧ japayi̧ ji̧ ta̧dëra̧ pio ju̧ri̧ra̧ ae ja̧bo tänȩpea̧de yo̧diibe Moicherë go̧ȩparërea̧ ma̧ȩ üdë. ¿Jabo yö̧ta dari̧ jo̧rȩtarenȩ? ¿Yö̧ta japatäreji̧ri̧rea̧ro̧jȩ? —yo̧ji̧ri̧rȩ iëno̧ë ta̧rëa̧diro̧jo̧ȩ Jechu ju̧i̧.

6Aja̧, ja̧di ta̧rëri̧ yo̧rëreji̧ri̧dirȩ Jechu pio ju̧i̧ u̧i̧papea̧ oa, judi oëra̧ yo̧pea̧ oa, judiro̧ pio ju̧i̧iäpȩmo̧ aechide ni̧bäpea̧ oa. Jabo Jechu judi uëdai̧ chjere chamȩrȩ go̧ȩparëremȩde jibëa̧ ichira̧ daburo. 7Ado judi daburo go̧ȩpea̧ nö̧ta, iëno̧ë iëno̧ ta̧rë chjaorëreji̧ri̧diro̧jo̧ȩ. Ja̧dëa̧ ji̧ ado chjereno̧ cjitë ëte, dëbë yo̧a̧dejȩrȩ:

—Danȩrȩ, ji̧ra̧nȩrȩ mȩnȩro̧. Jabo üi̧ üdë, cja̧rȩmȩ co chjai̧dëri̧ japadëa̧mȩ pio judi tarupatäde iei̧ pio ji̧iäpȩmo̧ ta̧dëra̧ ae ja̧bo tänȩpea̧ ji̧ —yo̧a̧dejȩrȩ.

8Ado ja̧di ta̧rëri̧ ni̧bä ëte, uëdai̧ chjere chamȩrȩ, daburo go̧ȩpamȩpea̧de ado chjereno̧. 9Ado judiro̧ pio ju̧i̧ ta̧rëa̧ oaiä, taruparëreji̧ri̧dirȩ baäpea̧ oa. Jaerira̧ chjarapë baächäa̧dirȩ, jënȩro̧ chjai̧dëri̧ japea̧ pio ju̧i̧ ana̧ri̧ jo̧rȩtaji̧ri̧rȩ. Ji̧mo̧ baädëa̧dirȩ, jabo cja̧rȩmȩri̧ chjarapë baächäa̧dirȩ, ji̧dë u̧i̧ ütama̧i̧ pio judiro̧ yabochja baäji̧ri̧rȩ. Jechu judi jibëa̧ma̧i̧ cjiadiäri̧ a̧dë baärëreji̧ri̧diro̧jo̧ȩ. Ado iei̧ jini̧, jabechji̧ jabë dae cjiareyi̧nȩ jënȩ cjiamȩräpȩ. 10Ado Jechu judi cjitëmȩrȩ yo̧a̧dejȩ:

—¿Tjana̧räpȩdiro̧ pio mȩa aechide yo̧ji̧ri̧ judiro̧? —iëno̧ë ta̧rëa̧dejȩ—. ¿Cja̧rȩmȩrȩ cjiadiädëa̧di mȩa bape chjaopamȩ judi? —iëno̧ë ta̧rëa̧dejȩ.

11Ado iei̧ jini̧ dëbë yo̧a̧nȩjȩ:

—Cjäri̧ madirȩ ca̧ Ano̧mȩ, cja̧rȩmȩrȩ cjiadiädëa̧de coa bape chjaopamȩ üdë.

Ado ja̧dëa ji̧ Jechu judi yo̧a̧dejȩ:

—Damȩ, pio cüdëborë bape chjaodëpacama̧. Jabechji̧ baäje. Jabo pio yaba̧ domȩri ja̧ chjai̧dë oa japadëje —yo̧mȩrȩ yo̧rëremȩdejȩ iei̧ ji̧.

Jechu judi tatami̧ darä cjo̧ro̧rea̧ yürümȩ pio judide

12Ado Jechu judi yo̧mȩrȩ ni̧bärëremȩdejȩrȩ pjaricheo pio ji̧ri̧iäpȩmo̧.

—Danȩrȩ, chiri nö̧tai̧ oa cjo̧ro̧ji̧ri̧ pio ji̧ri̧ tatami̧ darä jo̧rȩta tänȩmȩrequede —yo̧a̧dejȩrȩ—. Jabechji̧ pio coa nö̧ta ëba tai̧mȩ judi bagönȩmi̧ darä cjo̧ro̧dëpade, jabo tatami̧ darä jo̧rȩtamȩrȩ cjo̧ro̧pade, goae tarari̧ cjo̧ro̧rea̧ chiape järi̧ —yo̧a̧dejȩrȩ.

13Ado pjaricheo judiro̧ pio ju̧i̧ ta̧rëa̧ oaiä ja̧di ta̧rëri̧ dëbë yo̧a̧diro̧jo̧ȩ:

—Jabo cjäri̧ marenȩ —yo̧a̧diro̧jo̧ȩ—. Pio mȩa chjiari yo̧rea̧mi̧dërenȩ. Badëde mȩnȩ yo̧a̧ üdë. Pio mȩnȩmo̧rȩ ni̧bäa̧ oaiä, ta̧rë ja̧borea̧mi̧dërenȩ —yo̧a̧diro̧jo̧ȩ.

14Jabo Jechu judi dëbë yo̧a̧dejȩrȩ:

—Danȩrȩ, cüdë ni̧bä chjaoa̧ üdë, jabechji̧ ba chiade. Tjamo̧ davä. Cüdë pio coa chjiari ni̧bä chjaoa̧räbo, jabechji̧ ba chia tjamo̧de. Jabechji̧ pio coa chjiari tjamo̧ri̧ dabarequede. 'Aja̧, pio judirimȩquëda, ado japamitë chjätä ëte ja̧dira̧ baäpaquëda’ quëna̧ dabarequede. Jabo mȩnȩro̧, cjäri̧ marenȩro̧coe, pio coa chjiari tjamo̧ri̧ dabadë manȩrȩ —yo̧a̧dejȩrȩ—. 15Danȩrȩ, mȩnȩro̧ pumȩ ji̧ri̧ ütara ëte bape chjaoro, jabechji̧ dai chirirä ja̧ jo̧rȩtarea̧ maeara̧ ütara ëte bape chjaorenȩro̧jȩrȩ, pumȩrȩ jo̧rȩtarea̧ maeara̧. Jabo cüdë pumȩ ji̧ri̧ ütara ëte bape chjaodë marequedejȩrȩ. 16Jabo cüdë eami̧ pumȩ oa tjamo̧ri̧ bape chjaorä judi, jabechji̧ tjamo̧i̧ cjiari̧ ütara ëte bape chjaotäremȩrequede cüdë ca̧ea̧ma̧i̧ cjiadë tara. Jabechji̧ coa chjadüa̧mȩ judi pio coadimȩde. Aja̧, Ama̧i̧ tjamo̧ pio coadimȩde —yo̧a̧dejȩrȩ—. 17Danȩrȩ, tüdüa̧mi̧ darä cjo̧ro̧pea̧ ma̧ȩrä cjo̧ro̧nȩrȩ. Ado ja̧di ta̧rëri̧ yo̧diibe dibëa̧ ma̧ȩ üdë: “Aja̧, pumȩ judiro̧ yo̧a̧ri̧rȩ, ado cja̧rȩmo̧ pumȩ pio ju̧i̧ chjiari cja̧rȩmȩ jo̧rȩtarea̧ oa ni̧bä chjaorä judi, jabechji̧ chjadëde. Coëma cjiade.” Aja̧, ja̧di ta̧rëri̧ yo̧diibe dibëa̧ ma̧ȩ üdë. 18Ado danȩrȩ, yo̧a̧ri̧rea̧rȩ a̧ro̧rȩ. Dëdë, pio cüdë ni̧bärequede pio coa chjiari, jabo ca̧ea̧ma̧i̧dërequede. Ca̧ Ama̧i̧ tjamo̧ judi, pio coa chjadüa̧mȩ pio judiborë ni̧bäde pio coa chjiari. Cja̧rȩmȩ jo̧rȩtarea̧ maeara̧ jo̧rȩtaji̧ri̧rȩ ni̧bärea̧rȩ. Pio ju̧i̧iä yo̧requededibe. Ca̧ea̧ma̧i̧ ni̧bädërequede pio coa chjiari jabo yo̧a̧ri̧rea̧rȩ —yo̧mȩrȩ yo̧rëremȩdejȩrȩ pjaricheo ji̧ri̧ Jechu judi.

19Jabo ja̧dëa ji̧ ado iëno̧ë ta̧rëa̧diro̧jo̧ȩ Jechu ju̧i̧:

—¿Jabo tjana̧räpȩde na̧ Ama̧i̧ judi?

Ado Jechu judi dëbë yo̧a̧dejȩrȩ:

—Danȩrȩ, mȩnȩro̧ pio coa tjamo̧ri̧ dabadërenȩro̧coe. Ado ca̧ Ama̧i̧ pio ju̧i̧bo dabadërenȩro̧jo̧ȩ. Jabechji̧ pio coa tjamo̧ri̧ dabarä judi, peaja̧di dabatäreji̧ri̧renȩro̧jo̧ȩ ca̧ Ama̧i̧ pio ju̧i̧ —yo̧a̧dejȩrȩ.

20Ja̧di ta̧rëri̧ yo̧mȩrȩ ni̧bä chjaorëremȩde Jechu judi Ütë tjamo̧ ja̧ bëräpȩ ju̧ri̧, pumȩ judiro̧ jibëa̧ chëre yürürea̧ jo̧ tjoräpȩ ju̧ri̧. Jabo Jechu pio ju̧i̧ mitëtärea̧ ji̧, ta̧rë chaji̧ri̧ pio judiro̧ pio ju̧i̧ chaäpea̧ oa chjaodëri̧ mitëtärea̧ ji̧, jabechji̧ mitërea̧ dadëa̧diro̧jo̧ȩ pio jȩa mitëpea̧ do üdë jabë ma̧na̧dëa̧ tara.

Pjaricheo judiro̧ ji̧dë ma jiadarëreji̧ri̧diro̧jo̧ȩ Jechu ju̧i̧

21Ado Jechu judi ado yo̧rëremȩdejȩrȩ pjaricheo pio ji̧ri̧iäpȩmo̧:

—Danȩrȩ, a̧dë baäparequededibe —yo̧a̧dejȩrȩ—. Na̧taparenȩro̧coe, jabo cho̧rë järea̧ dadëparenȩro̧coe. Jabechji̧ mȩnȩro̧ chjai̧dëri̧ japea̧ pio ju̧i̧ ja̧ chja̧oerä ja̧bopanȩrȩ, dibëa̧ chjai̧dë pio ju̧i̧ araji̧ri̧rȩ. Ado pio ju̧i̧iä cüdë baäpea̧räpȩ cho̧rë baäreami̧dë manȩrȩ —yo̧a̧dejȩrȩ.

22Ado pio ju̧i̧ ta̧rëa̧ oaiä, ja̧di ta̧rëri̧ ni̧bä chjaoji̧ri̧pea̧dirȩ tjamo̧ yo̧ji̧ri̧ judio judiro̧ jibëa̧ dëbëti̧ra̧ chia:

—¿Tjana̧ yo̧de? Judi yo̧a̧ ji̧, “Aja̧, cüdë baäpea̧räpȩ cho̧rë baäreami̧dë manȩrȩ” yo̧a̧ ji̧, ¿tjana̧ yo̧de? ¿Jibëa̧ ma̧na̧ri̧ japa ëte ja̧bopade ibë a̧dë baäpea̧ oa? ¿Pio ju̧i̧ yo̧de? —yo̧a̧dirȩ.

23Jabo Jechu judi yo̧a̧dejȩrȩ:

—Danȩrȩ, pio yoa chiriräji̧ri̧nȩrȩ mȩnȩro̧, jabo uërimȩrequede cüdë. Pio yoa chirirä cjo̧ro̧ji̧ri̧nȩrȩ jabo cüdë pio yoa chirirädëmȩrequede. 24Ado pio ju̧i̧iä yo̧a̧requededibe pio yabo —yo̧a̧dejȩrȩ—. Mȩnȩro̧ chjai̧dëri̧ japea̧ pio ju̧i̧ ja̧ chja̧oerä ja̧bopanȩrȩ, dibëa̧ chjai̧dë pio ju̧i̧ araji̧ri̧rȩ, pio coa cho̧rë baärea̧mi̧dëri̧. Tjamo̧ davä. Mȩnȩro̧ quëna̧dërä judi, mȩnȩro̧, ‘Aja̧, pio ibëiäpȩmo̧ ni̧bä chjaomȩ üdë ‘Cüdërequede’ quȩmȩ pio judi tjamo̧dida’ quëna̧dërä judi, jabechji̧ mȩnȩro̧ chjai̧dëri̧ japea̧ chja̧oerä ja̧bopanȩrȩ, dibëa̧ chjai̧dë pio ju̧i̧ araji̧ri̧rȩ —yo̧mȩrȩ yo̧rëremȩdejȩrȩ Jechu judi.

25Ja̧dëa ji̧ ado iëno̧ë ta̧rëa̧diro̧jo̧ȩ:

—¿Jabo chjia tjamo̧nȩ mȩnȩ? Chjadëri̧ yo̧ibe.

Jabo Jechu judi dëbë yo̧a̧dejȩrȩ:

—Chjia tjamo̧dërequede, jabechji̧ cüdë peadëri ja̧ yo̧rërea̧ pio judi tjamo̧requede. 26Ado pio cüdë tara, jabechji̧ mȩnȩro̧ chjai̧dëri̧ jape chjaoa̧ pio ju̧i̧ ütara ëte bape chjaorea̧ ma̧ȩ ji̧ra̧ tjamo̧ oa yo̧pai̧ darequede davä pio dibë chjiari. Jabo cjäri̧ marequede, cüdë pio yoa chirirä cjo̧ro̧a̧ nö̧ta, jabechji̧ coa chjadüa̧mȩ pio judi yo̧a̧ duri maea oa ni̧bärequede, ca̧ ma̧ȩdë maea oa. Ado judi coa yo̧a̧ üdë, jabechji̧ coëma cjia maeade —yo̧a̧dejȩrȩ.

27Jabo pjaricheo judiro̧ chjadëri̧ ta̧rëdëa̧diro̧jo̧ȩ Jechu ju̧i̧. ‘Aja̧, Ama̧i̧ tjamo̧ pio ju̧i̧ chjiari ni̧bä chjaodiibëda’ quëna̧dëa̧diro̧jo̧ȩ. 28Ado pio ju̧i̧iä ji̧dë u̧i̧ ni̧bä chjaorëremȩdejȩrȩ Jechu judi:

—Danȩrȩ, mȩnȩro̧ pio coa toro uëräpȩmo̧ cjitë tänȩrä, mȩnȩro̧ Pumȩrȩ Ara̧ Tjamo̧ pio ju̧i̧ uëräpȩmo̧ cjitë tänȩrä, chjadëri̧ dabapanȩrȩ pio coa chjiari —yo̧a̧dejȩrȩ—. ‘Aja̧, Pumȩ Ara̧ Tjamo̧ pio judidida, Cüdërequede quȩmȩ pio judidida, ado jibëa̧ ma̧na̧ri̧ jo̧rȩtamȩrȩ japadë madida, jabo jäjäarë yo̧a̧ pio ju̧i̧mo̧i̧ japadida, jäjäarë yo̧a̧ duri pio ju̧i̧mo̧i̧ yo̧dida’ quëna̧ dabarea̧ dapanȩrȩ —yo̧a̧dejȩrȩ—. 29Ado danȩrȩ, pio coa chjadüa̧mȩ judi, jabechji̧ pio coadimȩde. A̧dë baädë madique. Jabechji̧ pio ju̧i̧iä goae tjamo̧ pio ju̧i̧mo̧i̧ japamȩrȩ cjo̧ro̧requede —yo̧mȩrȩ ni̧bä chjaorëremȩdejȩrȩ pjaricheo ji̧ri̧iäpȩmo̧ Jechu judi.

30Ado Jechu judi ja̧di ta̧rëri̧ ni̧bä chjaomȩ oa ta̧rërëreji̧ri̧ judiro̧, no̧i̧dërë quëna̧ji̧ri̧pea̧diro̧jo̧ȩ.

Chjai̧dë pio judi tabümi̧ dari̧ japadidibe

31Ado pio jȩaiäpȩmo̧ quëna̧ji̧ri̧ judio pio ji̧ri̧iäpȩmo̧ yo̧mȩrȩ ni̧bärëremȩdejȩrȩ Jechu judi:

—Danȩrȩ mȩnȩro̧, cüdë a̧ra̧ano̧a̧ ma̧ȩrä ji̧dë ma ta̧rëdiärä judi, ca̧ jadü tjamo̧parenȩrȩ —yo̧a̧dejȩrȩ—. 32Ado ta̧rëdiäa̧ oaiä, jabechji̧ Ütë tjamo̧ pio judiri ma̧na̧mȩ ma̧ȩ coëma oa dabarea̧ dapanȩrȩ. Ado pio jiro ma̧ȩ oa urëdi oa jo̧rȩtaji̧ri̧rȩ cjo̧ro̧ro, jabechji̧ jare chjadüa̧ oa cjiami̧ dari̧ cjiapanȩrȩ, mu̧i̧tjoi̧dëpe bagari̧ —yo̧a̧dejȩrȩ.

33Jabo Jechu judi ja̧di ta̧rëri̧ yo̧a̧ oaiä, goae tjamo̧dërëremȩdejȩrȩ. Ado ja̧di ta̧rëri̧ dëbë yo̧a̧diro̧jo̧ȩ:

—Jabo cjäri̧ marea̧rȩ —dëbë yo̧a̧diro̧jo̧ȩ—. Abaraa̧ pio judiri ja̧ marea̧rȩ. A̧ro̧rȩ cja̧rȩmȩ co mu̧i̧tjoi̧dë marëreji̧ri̧rea̧rȩ. ¿Tjana̧ ju̧i̧iä ja̧di ta̧rëri̧ yo̧renȩibe. ¿Tjana̧ ju̧i̧iä mu̧i̧tjoi̧ pio ju̧i̧ chjiari yo̧renȩibe? —yo̧ji̧ri̧rȩ iëno̧ë ta̧rëa̧diro̧jo̧ȩ.

34Jabo Jechu judi dëbë yo̧a̧dejȩrȩ:

—Danȩrȩ, tjamo̧i̧ cjiari̧ yo̧requededibe. Eami̧ pumȩ üdë chjai̧dë oa japamȩ judi, jabechji̧ chjai̧dë ja̧ mu̧i̧tjoi̧de —yo̧a̧dejȩrȩ—. 35Danȩrȩ, mu̧i̧tjoi̧ üdë jibëa̧ ana̧mȩ ja̧ bëräpȩ ji̧dë ma cjo̧ro̧dëpade. Jabomo̧ mu̧i̧tjoi̧de. Ano̧mȩ ja̧ pumȩdëde. Jabo joja üdë, bë ano̧mȩ üdë nö̧ria̧ pio judi, jabechji̧ bucho ana̧ ëba cjo̧ro̧padejȩ bë ano̧mȩ pio ju̧i̧ nö̧ta. Jabechji̧ jojadëpe bagarea̧ decjiari̧ cjiapade bucho ana̧. 36Ado pio ju̧i̧iä yo̧requededibe —yo̧a̧dejȩrȩ—. Ja tjamo̧ judi dibë jare chjadüa̧ oa cjiami̧ dari̧ japarä judi, jabechji̧ tjamo̧ri̧ jare chjadüa̧ oa cjiami̧ dari̧ cjiadiäpanȩrȩ bucho ana̧, bë ano̧mȩ ja̧ u̧ri̧ maearë cjiadiäri̧. 37Danȩrȩ, dabarequede pio dibë chjiari. ‘Abaraa̧ pio judiri ja̧ maeadiro̧da’ quëna̧ dabarequededibe. Jabo pio judiri ja̧ji̧ri̧borë, pio coa ja̧bo tänȩpea̧ ji̧ järitanȩrȩ. Cüdë a̧ra̧ano̧a̧ pio ju̧i̧ ta̧rë ja̧bodëri̧ cjia̧ oaiä ja̧bo tänȩtämi̧ cjiarenȩro̧coe. Jabechji̧ Abaraa̧ pio judiri ja̧dëji̧ri̧mi̧ dari̧ cjiarenȩrȩ. 38Danȩrȩ, cüdë ca̧ Ama̧i̧ pio ju̧i̧iä dabapea̧ pio ju̧i̧ ni̧bärequede. Jabo mȩnȩro̧ ado cja̧rȩmo̧ ama̧i̧ ëbanȩrȩ —yo̧a̧dejȩrȩ—. Ado pio ju̧i̧iä dabapea̧ pio ju̧i̧ japarenȩrȩ mȩnȩro̧ —yo̧a̧dejȩrȩ Jechu judi.

39Jabo yo̧a̧diro̧jo̧ȩ:

—Ibëa̧ taru judi, ibëa̧ ama̧i̧mi̧ da judi, jabechji̧ Abaraa̧ pio judide. Pio judiri ja̧ maearea̧rȩ —yo̧a̧diro̧jo̧ȩ.

Jabo Jechu judi dëbë yo̧a̧dejȩrȩ:

—Cjäri̧ manȩrȩ, mȩnȩro̧ Abaraa̧ pio ju̧i̧ ja̧ u̧ri̧ tjamo̧rä judi, pio ju̧i̧ cho̧rëdiätäreji̧ri̧renȩro̧jo̧ȩ. Pio judi japarërea̧mi̧ japatäreji̧ri̧nȩrȩ —yo̧a̧dejȩrȩ—. 40Jabo cjäri̧ manȩrȩ, judi japarërea̧mi̧ japadë manȩrȩ, jabo coa ja̧bo tänȩpea̧ pio ju̧i̧ järitanȩrȩ. Ütë tjamo̧ judi coa yo̧a̧ pio ju̧i̧ ni̧bä chjaomȩ oa ja̧bo tänȩtämi̧ cjiarenȩro̧coe. Ja̧di dari̧ japadëa̧täremȩdique Abaraa̧ judi. 41Jabo mȩnȩro̧, jabechji̧ dibëa̧ ama̧i̧ pio judi japarërea̧mi̧ japatanȩrȩ —yo̧a̧dejȩrȩ Jechu judi.

Jabo dëbë yo̧a̧diro̧jo̧ȩ:

—Jabo cjäri̧ marea̧rȩ, teracabari̧ ara̧ oa cjiadë marea̧rȩ. Üi̧ ëbadëyi̧ pio jini̧ ara̧ oa cjo̧ro̧dë maearea̧rȩ. Jabechji̧ cja̧rȩmȩde ibëa̧ Ama̧i̧ judi. Ütë tjamo̧ pio judimo̧de —yo̧a̧diro̧jo̧ȩ.

42Jabo Jechu judi dëbë yo̧a̧dejȩrȩ:

—Danȩrȩ, Ütë tjamo̧ judi dibëa̧ Ama̧i̧rä judi, ea tjamo̧täreji̧ri̧renȩro̧coe —yo̧a̧dejȩrȩ—. Jabechji̧ pio judiri ma̧na̧requede. Ütë tjamo̧ pio judiri ma̧na̧requede. Ca̧ea̧ ma̧na̧ri̧ jo̧rȩtamȩrȩ ma̧na̧dëa̧requede, jabo pio judi chjadüa̧ oa ma̧na̧requede —yo̧a̧dejȩrȩ—. 43¿Tjana̧ ju̧i̧iä bapë ta̧rëdërenȩro̧coe? Tjana̧ ju̧i̧iädë, jabechji̧ pio coa ta̧rë ja̧bodëri̧ cjia oaiä bapë ta̧rërea̧mi̧dënȩrȩ. 44Jabechji̧ Ichiae pio ju̧i̧ ja̧ pumȩ manȩrȩ. Pio ju̧i̧ ja̧ u̧ri̧ tjamo̧nȩrȩ. Ado pio judi eami̧ japatämi̧ cjianȩrȩ mȩnȩro̧. Pio ju̧i̧ ja̧ chji̧ra̧ jo̧rȩtami̧ dari̧ jo̧rȩtanȩrȩ —yo̧a̧dejȩrȩ—. Danȩrȩ, pearäri ja̧ pumȩ pio ji̧ri̧ ja̧bo tänȩmȩde Ichiae judi. Jabechji̧ tjamo̧i̧ cjiari̧ yo̧dë made. Coëma cjiari̧ japadë made. Ma̧ȩ chjádë yürümȩde. Jabechji̧ teracabari̧ jo̧rȩtarea̧ maearë cjitë chjaode jibëa̧ chji̧ri pio judiri. Ado pio ju̧i̧iä taruparëremȩde ma̧ȩ chjádë oa yürüpea̧ üdë —yo̧a̧dejȩrȩ—. 45Jabo ma̧ȩ chjádë yürüdërequededibe cüdë. Jabechji̧ tjamo̧i̧ cjiari̧ baämȩ ma̧ȩ pio ju̧i̧mo̧i̧ ni̧bä chjaorequededibe. Ado pio ju̧i̧iä quëna̧dë marenȩro̧coe. 46Cüdë chjai̧dë oa japea̧rä judi, jabechji̧ yo̧chji̧coe —yo̧a̧dejȩrȩ—. Jabo cjäri̧ manȩrȩ, eami̧ oa yo̧rea̧mi̧dënȩrȩ cüdë cja̧rȩmȩ co chjai̧dëri̧ japadëa̧ oaiä. Jabechji̧ chjai̧dëri̧ japadëa̧mȩrȩ ni̧bä chjaorequededibe coëma cjiari̧ baämȩ ma̧ȩ maea oa. Jabo mȩnȩro̧ quëna̧tärea̧ ji̧, cjäri̧ manȩrȩ, quëna̧dë marenȩro̧coe. 47Danȩrȩ, Ütë tjamo̧ ja̧ u̧ri̧ pio judiro̧ ta̧rë ja̧bodiro̧jo̧ȩ Ütë tjamo̧ ja̧ ma̧ȩ oa, jiadarea̧ decjiari̧. Jabo mȩnȩro̧ ta̧rë ja̧bodë manȩrȩ. Jabechji̧ Ütë tjamo̧ ja̧ u̧ri̧dë tara ta̧rë ja̧bodë manȩrȩ —yo̧mȩrȩ yo̧rëremȩdejȩrȩ Jechu judi.

Abaraa̧ judi jabë cjo̧ro̧dërä cjiarëremȩde Ütërë mitëa̧ Chjätä Tänȩmȩ judi

48Ja̧dëa ji̧ judio judiro̧ aenȩ ni̧bäa̧diro̧jo̧ȩ Jechu ju̧i̧:

—A̧ro̧rȩ pio mȩa chjiari yo̧a̧ ji̧, oëra̧ yo̧dëa̧rea̧rȩ jabo coëma cjiari̧ yo̧a̧rea̧rȩ. Aja̧, a̧ro̧rȩ yo̧a̧ pio judirenȩ. Chamaria quȩmȩ chiririmȩ pio judirenȩ. Ado yaröcarë ira̧diä cjaeäa̧ oa cjiamȩrenȩ —aenȩ ni̧bäji̧ri̧rȩ yo̧a̧diro̧jo̧ȩ Jechu ju̧i̧.

49Jabo Jechu judi cjiadiädëmȩrȩ dëbë yo̧rëremȩdejȩrȩ.

—Cjäri̧ marequede, yaröca chiadërequede —yo̧a̧dejȩrȩ—. Jabechji̧ ca̧ Ama̧i̧ pio ju̧i̧ ba chia jo̧rȩtamȩrȩ cjo̧ro̧requede. Jabo ja̧di dari̧ jo̧rȩtadërenȩro̧coe. Jabomo̧ badë jo̧rȩtarenȩro̧coe. 50Jabo jabechji̧de coaiä. Pio coaiäpȩmo̧ ba chia jo̧rȩtaji̧ri̧ pio ji̧ri̧ na̧tami̧ dari̧ cjo̧ro̧dërequede —yo̧a̧dejȩrȩ—. Jabo pio ju̧i̧ na̧tami̧ dari̧ cjo̧ro̧dëräbo, jabechji̧ cja̧rȩmȩ üdë ana̧ri̧ ja̧bepade pumȩ judiro̧ pio coaiäpȩmo̧ ba chia jo̧rȩtapea̧ oa. Tjamo̧ davä. Pio coaiäpȩmo̧ ba chia jo̧rȩtatä ea tjamo̧dejȩrȩ pumȩ ji̧ri̧. Ado coaiäpȩmo̧ ba chia jo̧rȩtadëmȩ pio ju̧i̧, jabechji̧ bape chjaopadejȩ. 51Tjamo̧i̧ cjiari̧ yo̧rerequededibe. Eami̧ pumȩ üdë cüdë a̧ra̧ano̧a̧ pio ju̧i̧ ta̧rëdiärä judi, bucho ana̧ cjo̧ro̧pade ja̧borea̧ decjiari̧ —yo̧mȩrȩ yo̧rëremȩdejȩrȩ.

52Ado ju̧i̧ ta̧rëji̧ri̧rȩ dëbë yo̧a̧diro̧jo̧ȩ Jechu ju̧i̧:

—¿Yö̧ta yo̧renȩ? Eami̧ pumȩ üdë pio mȩa ta̧rëdiärä judi, ¿ja̧bodëpade? Cjäri̧ marenȩ, oëra̧ yo̧renȩ. Ado pio ju̧i̧iä tjamo̧i̧ cjiari̧ dabarea̧rȩ yaba̧ pio mȩa chjiari —yo̧a̧diro̧jo̧ȩ—. Jabechji̧ yaröcarë ira̧diä cjaeäa̧ oa cjia tjamo̧renȩ. Danȩ, oëra̧ yo̧renȩ. Jabechji̧ Abaraa̧ judi ja̧boa̧de. Ado Ütërë ea jana̧ chjadüa̧ oa ni̧bäji̧ri̧ pio judiro̧borë ja̧boa̧dirȩ. Ado eami̧ pumȩ üdë mȩnȩ a̧ra̧ano̧a̧ pio ju̧i̧ ta̧rëdiärä judi, ¿ja̧bodëpade? —iëno̧ë ta̧rëa̧diro̧jo̧ȩ—. 53Danȩ, ibëa̧ taru judi, Abaraa̧ pio judi, ja̧boa̧de. Ado Ütërë ea jana̧ chjadüa̧ oa ni̧bäji̧ri̧ pio judiro̧borë ja̧boa̧ maeadirȩ. Jabo ¿yö̧ta jo̧rȩtarenȩ mȩnȩ? ‘Abaraa̧ ju̧i̧ u̧i̧ ba chiaquëda’ ¿quëna̧nȩ? ‘Ütërë ea jana̧ chjadüa̧ oa ni̧bäji̧ri̧ pio ji̧ri̧ u̧i̧ ba chiaquëda’ ¿quëna̧nȩ? Cjäri̧ marenȩ, oëra̧ jo̧rȩtarenȩ davä pio mȩa chjiari —yo̧a̧diro̧jo̧ȩ.

54Jabo Jechu judi cjiadiädëmȩrȩ dëbë yo̧a̧dejȩrȩ:

—Danȩrȩ, cüdë pio coa chjiari ba chia jo̧rȩtarä judi, badëde. Ado cüdë pio coa chjiari goaeri̧ yo̧rä judi, peaja̧di badëde. Jabo danȩrȩ, ca̧ Ama̧i̧ pio judide coaiäpȩmo̧ ba chia jo̧rȩtamȩ judi. Jabechji̧ ji̧dë ma chjacjiamȩri̧ ni̧bäde pio coa chjiari. Ado mȩnȩro̧ pio yabo yo̧a̧ ji̧, jabechji̧ "Ütë tjamo̧ judi ibëa̧ ütëde" yo̧a̧nȩrȩ. Jabo danȩrȩ, mȩnȩro̧ yo̧a̧ Ütë pio judi ji̧dë ma chjacjiamȩri̧ ni̧bäde pio coa chjiari, pio coa ba chia jo̧rȩtamȩrȩ. 55Jabo mȩnȩro̧, cjäri̧ marenȩro̧jo̧ȩ, dabadërenȩro̧jo̧ȩ. Tjamo̧ davä. Mȩnȩro̧ dabadërenȩro̧jo̧ȩ, jabo pio cüdë, jabechji̧ dabareconȩ. Jabo danȩrȩ, cüdë yo̧rä judi, “Aja̧, dabadëreconȩ” yo̧a̧rä judi, jabechji̧ ma̧ȩ chjádë yürütäremȩrequede pio mȩnȩro̧mi̧ dari̧ —yo̧a̧dejȩrȩ—. Jabo dëdë, dabareconȩ Ütë tjamo̧ ju̧i̧, ado pio ju̧i̧ ja̧ ma̧ȩrä cjo̧ro̧requede. 56Dibëa̧ taru üdë, Abaraa̧ pio judi a̧dë chjäte ma̧ chiadëri̧ cjiari̧ jo̧rȩtamȩrȩ dabarëremȩde cüdë pio yoa chirirä ma̧na̧pea̧ pio ju̧i̧ chjiari. Aja̧, jabërä jidatarëremȩdique, ado japamitë ana̧ tjamo̧ chjätä ëte, jabechji̧ ma̧na̧mȩ oa darëremȩdique. Pio ju̧i̧iäbo ma̧ chiadëri̧ cjia tjamo̧mȩrȩ cjiadiärëremȩde —yo̧a̧dejȩrȩ.

57Jabo yo̧a̧diro̧jo̧ȩ:

—Cjäri̧ marenȩ, oëra̧ yo̧renȩ. Jabë ütama̧i̧padärädëa̧renȩ. Jabë 50 ui goadëmȩrenȩ. Ado ¿yö̧ta jo̧rȩtarenȩ? Abaraa̧ pio ju̧i̧ da̧rämi̧ cjiarenȩ? —iëno̧ë ta̧rëa̧diro̧jo̧ȩ.

58Ado Jechu judi dëbë yo̧a̧dejȩrȩ:

—Tjamo̧i̧ cjiari̧ yo̧requededibe. Abaraa̧ judi jabë ara̧ oa cjiadëa̧rä, cjiarëremȩrequede jabërä. Jabechji̧ Cüdërequede quȩmȩ pio judirequede —yo̧mȩrȩ yo̧a̧dejȩrȩ Jechu judi.

59Pio ju̧i̧ ta̧rëa̧ oaiä, chjaodëri̧ a̧doparëreji̧ri̧diro̧jo̧ȩ ta̧dë oa Jechu pio ju̧i̧iäpȩmo̧ ae chjaopea̧ oa. Jabo Jechu judi chjaodëri̧ goadi go̧düeno̧rëremȩde Ütë tjamo̧ ja̧ bëri pio judiri.

Currently Selected:

Juan 8: Pume

Highlight

Copy