Juão 7
7
Imuita tiaintauruyari
1Yawewaa rire Jesus uwata Galileya upe nyãse tiuputari uwata Judeya upe nyãse kuaita judewita aintauputari aintauyuká ae.
2Asui kuayentuana sangawa kuaita judewita festa sera tabernakulu.
3Asui kuaita imuita aintaunyee ixupe:
—Purangate resu kua sui Judeya kiti rembuewaita irumu aintaumaa arama kuaita remunyawaita.
4Nyãse tiawa upuderi upuraki uyumimisawa upe uputari rame aintaukuawa sese uyukuawasawa. Reputari rame remunya kuaita remunyawaita rexari aintaukuawa nerese kuaita mundu puraita.
5Nyãse imuita tiaintauxari aintapia sese.
6Asui Jesus unyee ainta supe arama:
—Umbaare serangawa usika, maa perangawa yawewarawate ae.
7Kuaita mundu puraita tiaintaupuderi aintaipiaiwa aintaumaa penye arama, maa ixe arama aintaipiaiwa aintaumaa hambeu resewara puxuwera aintaumunyawaita.
8Penyete pesu pemaa festa kiti, maa ixe tihasu nyãse tire usika serangawa puranga.
9Yawe Jesus unyee ainta supe arama:
—Asui upita Galileya upe.
Jesus usu umaa festa
10Asui imuita aintausu rire festa kiti asui Jesus yuiri usu maa tiusu uyukuawawaa upe maa uyumimisawa upe.
11Asui kuaita judewita aintausikari ae festa upe, aintaunyee:
—Mametaa ae?
12Asui turusu aintaupurungita sese kuaita miraita siyawaita, amuita umbeu:
—Purangawaa ae, amuita aintaumbeu:
—Tipuranga ae nyãse uganani kuaita miraita.
13Maa tiawa upurungita sese uyukuawasawa upe nyãse aintausikie judewita sui.
Judewita aintaumuruanyana Jesus
14Asui festa piterupi Jesus usu templu kiti umbue ainta.
15Asui kuaita judewita aintaakayemu aintausendu asui aintaunyee:
—Maitaa ukuawa arama uleri kua tiwa uyumbue?
16Asui Jesus usuaxara ainta unyee:
—Timaa senyenga kua hambuewaa maa inyenga kua umunduwaa ixe.
17Awa uputari umunya kuaye Deus uputariwaa yawe ukuawa kuri maa suiwarataa kua senyenga u Deus suiwara u hapurungita ixepawantu.
18Awa uputari upurungita simutara uputari aintaumee ixupe arama purangawaa, maa kua uputariwaa aintaumee ixupe purangawaa kua umunduwaa ae aete kua supiwa tiwa uganani.
19Maitaa tiserá Muize uxari penye arama Deus nyenga kuximawara? Maa tiawa pesuiwara uputari uruyari ae. Marantaa peputari peyuká ixe.
20Asui kuaita miraita siyawaita aintaunyee ixupe arama:
—Inde reriku demuniu nepia upe. Awataa uputari uyuká inde?
21Asui Jesus usuaxara ainta, unyee ainta supe:
—Yepenyu kua hamunyawaa asui panye penye peakayemu pemaa.
22Muize uxari pesirkunsidari, maa tiuxariwaa penye arama ae maa peramunyaita uxariwaa penye arama ae, asui penye pesirkunsidari apigawaita sauru rame.
23Asui pesirkunsidari rame yepe apigawa sauru rame peruyari arama Muize nyenga, marantaa pepiaiwa pemaa ixe arama hamukaturu resewara yepe apigawa ipira sauru rame?
24Tepembeu amuita rese sesewara kua pemaawaa, maa pembeu aintarese nyenga supiwa irumu.
Aintaumundu aintaumprezu Jesus
25Asui yepeyepe Jeruzalẽ suiwaraita aintaunyee:
—Maitaa tiserá aete kua aintauputariwaa aintauyuká?
26Asui upurungita uyukuawasawa upe maa timaa nungara aintaumbeu ixupe:
—Maitaa aintaukuawate Kristu ae supiwa kuaita serakuenawaita?
27Maa yakuawate maa suiwarataa ae, uri rame kuri kua Kristu tikuri awa ukuawa maa suiwara ae.
28Asui Jesus umbue irumu ainta templu upe unyee ainta supe:
—Pekunyeserite ixe pekuawate yuiri maa suiwara ixe, timaa hayuiri serimutara, supiwate kua umunduwaa ixe maa tipekunyeseri ae.
29Maa hakunyeserite ae nyãse hayuiri isui, asui aete umundu ixe.
30Asui aintauputari aintaumprezu ae maa tiawa upisika ae nyãse tire usika sangawa.
31Maa siya miraita aintauxari aintapia sese, aintaunyee:
—Uri rame kuri kua Kristu, maitaa kuri umunya turusu piri milagri isui kua apigawa?
32Asui kuaita farizewita aintausendu irumu aintauyupurungita sese kuaita miraita siyawaita asui kuaita saserdutita ruixawaita farizewita yuiri aintaumundu guardaita aintaumprezu arama Jesus.
33Asui Jesus unyee ainta supe:
—Haikure peirumu kutarantuana asui hasu arama kuri ipiri kua umunduwaa ixe.
34Pesikari kuri ixe maa tikuri pewasemu ixe, tipepuderi pesu sepiri haikuwaa kuri akiti.
35Asui aintauyupurungita aintapawa kuaita judewita, aintaunyee:
—Maa kititaa kuri usu tiarama yawasemu ae? Maitaa kuri usu será aintapiri kuaita yaneanamaita uyusaĩwaita greguita piterupi umbue arama ainta?
36Mayesawataa umbeuwaa:
—Pesikari kuri ixe maa tikuri pewasemu ixe? Mayesawataa umbeuwaa yuiri:
—Tipepuderi pesu haikuwaa kuri akiti.
Jesus kua ii upakawaa
37Asui anyu aramawaa purangawaa ara festa upe Jesus upuamu umbeu:
—Awa iisi pexari uri sepiri uu arama.
38Awa uxari ipia serese ii upakawaa usemu kuri ipia sui maye Deus nyenga umbeuwaa yawe.
39Yawe unyee sese kua Espiritu umeewaa kuri ainta supe arama kuaita uxariwaita aintapia sese, tire uxari ainta supe arama ae nyãse tire Jesus uyuiri purangawaa kiti.
40Asui yepeyepe usenduwaita umbeuwaa aintaunyee:
—Supiwa aete kua utitikawaa.
41Amuita umbeu:
—Kristu ae. Maa amuita aintaupurandu:
—Maitaa Kristu uri Galileya sui?
42Maitaa tiserá aintaumpinimawaa umbeu, Davi rimiariru kua Kristu, uri tetama sui serawaa Belẽ Davi uikuwaa ape.
43Asui mukuĩ aintaumanduariwaa kuaita miraita Jesus resewara.
44Asui yepeyepe aintasuiwara aintauputari aintaumprezu ae maa tiawa upisika ae.
Tire guardaita umprezu Jesus
45Asui kuaita guardaita aintauyuiri aintapiri kuaita saserdutita ruixawaita farizewita yuiri, asui aintaunyee ainta supe:
—Marantaa tiperuri ae?
46Asui kuaita guardaita aintausuaxara ainta aintaunyee:
—Tire yawasemu yepe apigawa upurungitawaa maye iyawe.
47Asui kuaita farizewita aintaunyee ainta supe:
—Maitaa uganani penye yuiri?
48Maitaa yepe aintasuiwara kuaita serakuenawaita farizewita yuiri uxari ipia sese?
49Maa puxuwerawaita kuaita miraita tiwaita uruyari Muize nyenga.
50Asui Nikudemu yepe aintasuiwara usuwaa kuera umaa Jesus piri unyee ainta supe:
51—Maitaa Muize nyenga uxari yambeu amu rese senundere yakuawa kua umunyawaa.
52Asui aintaunyee ixupe:
—Maitaa indete yuiri Galileya suiwara? Remaa puranga rekuawa arama tiyamaa yepe utitikawaa uriwaa Galileya sui.
53Asui aintauyuiri aintaruka kiti muiri ainta aintayaweyawe.
Currently Selected:
Juão 7: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
