Mateu 6
6
Maye yamunya arama puranga
1Pemaa pesui yawaite pemunya puranga Deus supe uyukuawasawa upe panye miraita umaa arama, yawaite maa peputari aintaumbeu peresewara puranga, peputari rame aintaumbeu perese puranga timaa kuri pepaya iwaka kitiwara upagari penye.
Mayetaa yamee prezenti
2Ape remee rame kuri prezenti pirasuawaita supe terexari yepe upeyu trumbeta nerunde kiti miraita umaa arama kuaye aintaumunyawaa yawe sinaguga upe ukara kiti yuiri kuaita retentuwaita. Supiwa hambeu penye arama:
—Aintaurikuana sikuyara kua aintaumunyawaa.
3Maa inde remunya rame puranga pirasuawaita supe terexari nekanyuntu ukuawa maa umunyawaa kua nekatusawa.
4Remunya uyumimisawa upe puranga ainta supe kuaita pirasuawaita asuiwana kuri nepaya Deus umaawaa inde arama uyumimisawa upe upagari kuri inde.
Maitaa yambeu Deus
5Repurandu rame Deus irumu teremunya aintayawe kuaita retentuwaita nyãse suuri aintaupuamu aintaumbeu Deus sinaguga upe ukara kiti yuiri miraita umaa arama ainta. Hambeu penye arama supiwa aintaurikuana sikuyara kua aintaumunyawaa.
6Maa inde repurandu rame Deus irumu rewike nerukapi kiti resikindawa asui repurandu nepaya irumu uyumimisawa upe, asuiwana kuri nepaya umaawaa inde uyumimisawa upe uxari kuri inde arama kua repuranduwaa irumu.
7Asui pepurandu rame Deus irumu tepemuyumuyuiri penyenga aintayawe kuaita tiwaita ukuawa Deus inyenga, aintaumaite Deus usendu ainta supe aintaumbeu resewara siya viaji aintanyenga.
8Ape kuri tepemunya aintayawe, nyãse pepaya Deus ukuawate kua watariwaa penye arama senundere pepurandu irumu.
Yapurandu arama Deus irumu
9Ape kuri pepurandu Deus irumu kuaye hambeuwaa yawe:
—Inde yanepaya iwaka kiti, purangawaa nerera,
10Reyuiriana yanepiri yaneruixawa arama inde, rexari yamunya kuaye reputariwaa yawe ike kua mundu upe aintayawe kuaita iwaka kitiwaraita.
11Remee yande arama yambau arama muiri ara.
12Reperduari yande neirumu isui kua yamunyawaa inde arama puxuwera kuaye yaperduariwaa yawe yaneirumu kuaita umunyawaita yande arama puxuwera.
13Terexari amu uganani yande yamunya arama puxuwera maa reyuka yande isui kua puxuwerawa. Nyãse indete yaneruixawa kirimbawawaa purangawaa yawewarawate, amem.
14Peperduari rame peirumu kuaita umunyawaita puxi penye arama ape kuri pepaya iwaka kiti uperduari kuri penye.
15Tirame peperduari peirumu kuaita umunyawaita penye arama puxi, yawete yuiri kuri pepaya tiuperduari penye pemunyawaa puxi.
Uyukuaku rese
16Asui peyukuaku rame peiku Deus rese penye tepemunya aintayawe kuaita retentuwaita, sasiyara aintauyumaa miraita ukuawa arama aintauyukuaku Deus rese. Supiwa hambeu penye, aintaurikuana sikuyara kua aintaumunyawaa.
17Maa inde reyukuaku rame reiku remukaturu neawa uleu irumu remuyasuka neruwa.
18Tiarama miraita ukuawa reyukuaku reiku inde maa nepaya umaa inde yumimisawa upe asui kua nepaya umaawaa inde yumimisawa upe uxari kuri inde arama kua repuranduwaa irumu.
Yanemaa iwaka kiti
19Tepesikari pemuatiri peyara arama turusu ike mundu upe yawaite kupiĩ umbau ae, yawaite feruju ae, yawaite mundawasuita upirari siru aintaumunda arama pesui ae.
20Maa pesikari pemuatiri peyara arama iwaka kiti akiti kuri timaa kupiĩ umbau ae, tiyuiri feruju ae, timaa yuiri mundawasuita umunda pesui ae.
21Mame remuatiriwaa neyara arama apete yuiri rexari nepia.
Turi pitunawasu yuiri
22Yaneresa aete yanepira turi, purangawaa rame neresa umuturi kuri puranga panye nepira upe.
23Maa puxuwerawa rame uiku kuri pitunawasu upe. Yawete yuiri pitunawasu rame kua neturi pitunawasu kuri ae turusu.
Mukuĩ yaneruixawa
24Tiawa upuderi upuraki mukuĩ patrão supe, ugustari rame yepe amu sui puxi kuri umaa ixupe, uruyari rame amu inyenga timaa kuri usendu amu supe. Tipepuderi pepuraki Deus supe pesikari rame peganyari mundu iyara.
Tiarama yayuka yanepia mundu rese
25Ape hambeu penye:
—Tepeyuka pepia kua mundu rese, tepembeu penye arama, maataa kuri yambau yau yuiri? Tepembeu, maataa kuri yanerupa arama? Maitaa pemanduari timaa arama kua yanerikuesawa timbiu sui? Maitaa pemanduari timaa arama kua yanepira yanerupa sui?
26Pemaa kuaita wiraita timaa nungara aintauyutima, timaa yuiri aintaupuu, tiaintaumukaturu aintaumbau arama aintaruka upe, maa yanepaya iwaka kitiwara uxari aintaumbau arama. Maitaa pemanduari tipuranga penye wiraita sui?
27Awataa pesuiwara upuderi uyukiriari ipuku xinga uyuka resewara ipia sese?
28Asui marantaa peyuka pepia perupa rese? Pemaa maye aintauyukiriari kuaita putira kampu upe timaa aintaupuraki tiyuiri aintaumunya fazenda.
29Maa hambeu penye, puranga piri putira purangasawa irupa sui kua Salumão rikuwaa kuera.
30Deus uxari putiraita supe aintapurangasawa kampu upe, kuaita aintausapi aramawaa, uxari yuiri puranga piri perupa aramawaa, yawe hambeu penye arama penye kuairawaita uruyari.
31Ape kuri tepeyuka pepia tepembeu:
—Maataa kuri yambau? Maataa kuri yau arama? Maataa kuri yamundeu?
32Nyãse kuaita tiwaita ukuawa Deus inyenga aintausikari panye maa, maa kua pepaya iwaka kitiwara ukuawate panye maa peputariwaa.
33Perikute pesikari panye sui peruixawa arama kua Deus pesikari yuiri kirimbawa umanduarisawa pepia upe, asui uxari kuri penye arama panye maa ae.
34Ape kuri tepeyuka pepia wirande rese, nẽ pemanduari sese kua pesikariwaa wirande nyãse usikana pemanduari uyi ara rese.
Currently Selected:
Mateu 6: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
