Marku 12
12
Usarusaraita kupixawa puxuwerawaita
1Asui Jesus uyupiru umbue ainta inyenga irumu umbue aramawaa ipupe:
—Yepe apigawa uyutima ikupixawa, asui umukurara ae, asui umunya mirawaka, asui umunya iture, asui uxari amuita usaru ikupixawa, asui usu apekatu kiti amu kiti.
2Asui sangawa upe aintaupuu arama iya umundu yepe upurakiwaa ixupe aintapiri kuaita usaruwaita ikupixawa ururi arama aintasuiwara kuaita aintaupuwaita.
3Asui aintaupisika aintaunupa ae asui aintaumundu uyuiri yawentu.
4Asui umundu yuiri yepe upurakiwaa ixupe aintapiri, asui aintaunupa ae iakanga rese aintaukasuari ae.
5Umundu yuiri aintapiri amu, asui aintauyuká ae, asui umundu aintapiri siya xingana, yepeyepe aintaunupa ainta yepeyepe aintauyuká ainta.
6Aikuere yepe irumu aete taira uputariwaa, asui anyu arama umundu aintapiri ae unyee:
—Aintaurespetari kuri seraira.
7Asui kuaita usaruwaita kupixawa aintaupurungita aintapawa:
—Aete kua upita arama ixupe iyara, yasu yayuká ae yaneyara arama kuri kua iyara.
8Asui aintaupisika aintauyuká ae, asui aintaumburi ipira ikupixawa sui.
9Maataa kuri umunya kua kupixawa iyara? Uri kuri uyuká arama usaruwaita ikupixawa uxari arama amuita usaru ikupixawa.
10Maitaa timaa peleri kua aintaumpinimawaa? Kua ita aintaumburiwaa aintasui kuaita umunyawaita uka, sesete aintaumunya arama uka santawaa kuiri.
11Aete Deus umunyawaa ape purangawaa yamaa ixupe.
12Ape aintauputari aintaupisika ae nyãse aintaukuawa umbeu aintarese irumu kua inyenga umbuewaa arama ipupe, maa aintausikie aintasui kuaita siyawaita asui aintauxari ae aintausuana isui.
Impustu rese
13Asui aintaumundu ipiri yepeyepe aintasuiwara kuaita farizewita erudianuita yuiri aintaupisika arama ae inyenga resewara.
14Asui aintauri ipiri aintaunyee ixupe:
—Inde umbuewaa yakuawate supiwa inde timaa reparawaka remaa kuaita miraita, yepewasute remaa ainta, supiwa rembue Deus rapee rese, maitaa puranga yapagari impustu Sezar supe u timaa puranga? Maitaa yarikute yapagari ae u tiyapagari?
15Maa ukuawate retentuwaa aintanyenga, ape umbeu ainta supe:
—Marantaa peputari pesaã ixe? Peruri ixe arama yepe prata hamaa arama ae.
16Asui aintaururi ixupe ae. Asui upurandu ainta:
—Maa rangawataa kua uyariwaa sese? Maataa sera kua aintaumpinimawaa sese? Aintaumbeu ixupe:
—Sezar.
17Asui Jesus unyee ainta supe:
—Pemee Sezar supe Sezar iyara pemee Deus supe Deus iyara. Asui turusu aintausikie aintausendu ixupe.
Sadusewita rese
18Asui aintauri ipiri kuaita sadusewita umbeuwaita tikuri yapaka manusawa sui aintaupurandu ae, aintaumbeu ixupe:
19—Inde umbuewaa, kuxima Muize umpinima yande arama, umanu rame yepe apigawa tirewaa uriku taira asui imu uyuka yuiri ximiriku sakakuera umukiriari arama taira irumu imu ambira rakakuera.
20Asui seti kuera kuaita imuita aintapawa, asui umendariana kua aintaimu tuyuwewaa asui tire uriku taira umanuana ae.
21Asui mukuĩsawa imu umendari irumu kua viuva, asui umanu isui tiuriku taira, asui yawete yuiri musapirisawa aintaimu.
22Asui yawepawa aintaumanu kuaita setiwaita tiaintauriku aintaraira. Asui anyu arama umanu kua kunya aintarakakuera.
23Asui aintausemu rame manusawa sui awa rimirikutaa kuri ae? Nyãse kuaita setiwaita kuera rimiriku ae.
24Jesus umbeu ainta supe:
—Maitaa apekatu será pembue tiresewara pekuawate aintaumpinimawaa tiyuiri pekuawa Deus kirimbawasawa?
25Aintausemu rire manusawa sui timaa kuri aintaumendari kuaita apigawaita kunyaita yuiri, maa aintauiku kuri anjuita yawe iwaka kiti.
26Peputari rame pekuawa aintausemu manusawa sui peleri pemaa kua Muize umpinimawaa upe umbeuwaa upe maye Deus upurungita mirá sui unyee:
—Ixete Abraão Deus, ixete Izaki Deus, ixete Jaku Deus yuiri.
27Timaa umanuwaita Deus ae maa upakawaita Deus ae. Turusu peyawi.
Umundusawa purangawaa
28Asui yepe umpinimawaa uri aintapiri usenduanate maye aintaupurungita asui umaa puranga Jesus usuaxara ainta, upurandu ae:
—Maataa kua Deus umunduwaa yamunya puranga piri panye sui?
29Jesus usuaxara ae:
—Pesendu penye Israelitaita yaneruixawa kua Deus, yepenyute yaneruixawa.
30Rerikute regustari neruixawa Deus panye nepia upe panye neanga irumu panye remanduarisawa irumu panye nekirimbawasawa irumu yuiri.
31Asui mukuĩsawa umundu, rerikute regustari nerumuaraita kuaye reyugustariwaa yawe indepawa. Tiyamaa puranga piriwaa Deus umunduwaa yamunya aintasui kua hambeuwaa.
32Asui kua umpinimawaa umbeu ixupe:
—Puranga, inde umbuewaa, supiwa rembeu yepenyute yaneDeus, tiyamaa amu isui.
33Asui puranga piri yagustari Deus panye yanepia sui panye yamanduarisawa irumu panye yanekirimbawasawa irumu, yagustari yuiri yanerumuaraita kuaye yayugustariwa yawe yandepawa isui kua yameewaa Deus supe arama yanerimbawa yasapi arama ae Deus supe prezenti yuiri.
34Asui Jesus umaa irumu sese ukuawawaa yawe usuaxara ae umbeu ixupe kua umpinimawaa:
—Kuairantuana nerunde neruixawa arama kua Deus yawe rire aintausikie aintaupurandu ae.
Davi rimiariru kua Kristu
35Asui Jesus umbuewaa upe uiku templu upe umbeu ainta supe:
—Maitaa aintaumbeu kuaita umpinimawaita Davi rimiariru kua Kristu?
36Davite umbeu Espiritu Santu irumu, yawe unyee:
—Yaneruixawa umbeu seruixawa supe, rewapikare reiku sekatusawa upe ate mairame kuri hamburi neruanyanaita neipi wira kiti.
37Davite useruka suixawa ae, ape maitaa maa ximiarirute ae? Asui kuaita miraita siyawaita suuri aintausendu ixupe.
Jesus umbeu umpinimawaita rese
38Asui Jesus umbue ainta, umbeu ainta supe:
—Pemaa katu pesui kuaita umpinimawaita ugustariwaita uwata aintasaya ipukuwaa upe aintaugustari miraita umukuema ainta ukara kiti.
39Aintaugustari aintauwapika serakuenawaita banku rese sinaguga upe aintaugustari aintauwapika purangawaita ibanku rese aintafesta upe.
40Asui aintauganani aintauyuka aintamaa aintasui kuaita viuvaita. Aintaupurara kuri turusu piri sikuyara kua aintaumunyawaa.
Viuva umeewaa uferta
41Asui Jesus uwapika uferta riru ruaki umaa kuaita miraita siyawaita aintauxari aintadinyeru kua uferta riru upe. Asui kuaita rikuwaita aintauxari turusu aintadinyeru.
42Asui uri yepe viuva pirasuawaa uxari mukuĩ dinyeru kubri uferta riru upe.
43Asui Jesus usenui ipiri kuaita umbuewaita umbeu ainta supe:
—Supiwa hambeu penye arama, kua viuva pirasuawaa uxariana turusu aintasui panye kuaita amuita uxariwaita dinyeru.
44Nyãse muiri kuaita amuita aintauxari kua tiwa uwatari ainta supe, maa kua viuva pirasuawaa uxari panye kua uwatariwaa ixupe upiripana aramawaa ipupe umbau arama.
Currently Selected:
Marku 12: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
