Banɔkpɛkpɛ Axɔ̃ɛ 24
24
Kɛmadi Ekusi Felike Kebhu Kukulu Nɛ̀ Paulo
1Ewui teti edeɛ, banɔlũazazã gbagbla Anania nɛ̀ Besheshèɛ teli abavɛ Kaisarea ɔplɛnɔ ɔshaetinɛ teli gɛ bezekulu yɛasɛ Tertulo, kɛlɛ balɔkɔ ebuiɛ gɛ bebhui Paulo ulũɔ nɔ amana kɛmadi ekusiɛ. 2Gɛ bedi kulu Paulo amanaa, Tertulo aɖɔ yɛulũ bhui bhui ebuiɛ etseɖe Felike asɛ, “Kibè dzololo nɛ ɛlɛ gɛ bɔkpasɛ wɔ esi nɛ ishu yɔyɔ mɛ, kɛlɛ gɛ ɔmɔ otugbàa mɛ sɛsɛ soɔ, ɔkɔsɛ bɔmɔ tìtsyitsyina gelee nɛ bɔlɔ kɛmadi ɛlɛ mɛ. 3Nɛ ɔkɔ nyia ɔkɔ nɛ̀ kidzo ka nyia ka abha, Felike anɔ gɛ adzã kiwuhũ, bɔmɔ ebuiɛ gɛ alɛ wɔbhɛtɛ kɛlɛ buhu wɔahɔɛ nɛ ɛlɛ takpu popopo. 4Pɔ tɛ ɛtɛ kpɛ wɔluhũ vɛnɔ otugbàa, ɛba bisi odenɔ wɔkɔ ɔsɛ tɛ̀ ɔlɔkɔ ɛyamɛ gbangbã tɛ̀ ɔtaatɔ̃ nɛ̀ bɔlɔ kibui ɖɔɖɔ gulũi.
5“Bɔbamɔ anyɛ alɛ asɛ enu anɔ gɛ akpɛ banɔ buluhũ, amana kititì lɔlɔ ebui nɛ Yudanɛ ishi nɛ kanɔ nɔ̀ mɛ petee. Enu Nazaretianɛ batɔ̃mɛ gagalĩ otugbà zazã anɔ teli 6kɛlɛ apɛ tsyɛ asɛ tɛ̀ akpɛ Akaavũɔ nɔtsɔ̃, kliso buvũi kɛlɛ bɔpɛ sɛ tɛ̀ bukulu kebhu niyɛ nɛ ɔsha nulũ. 7Pɔ keyuiza anɔ gbagbla Lisia alɔkɔ tɛgagalĩ awlɔakɛ yɛ ayɛkɛ nɛ bɔlɔ ahɔɛ mɛ, 8pɛ akɔ ɔsha sɛ̀ bagɛ bebhui yɛulũɔ aba wɔkɔ. Onupɛ ɔnyɔ̃ yɛishuɔɔ, ɔbɔmɔ kibui gbã gɛ kpasɛ ebui alɛ nyɔ̃ɔ gɛ bɔlɔkɔ nɛishuɔ mɛ.”
9Yudanɛ akpɛ olugbũ nɛ ebuiɛ gɛ balɔkɔ ebhui yɛulũɔ mɛ, kɛlɛ beetuilɛ akpɛ asɛ ebuiɛ alɛ enu ebui gbã.
10Kibeɛ gɛ kɛmadi ekusiɛ akasɛ Paulo ahɔɛ asɛ aɖɔaɖɔɔ, ebuiliulũ asɛ, “Inyi ɔsɛ agɔ kpekpè nɛ alɛ gɛ okulu kebhu nɛ kɛmadi ɛlɛ mɛ, kliso pɛ ɛlɔkɔ same babu mɛishu ulũ. 11Asɛ gɛ olũ nɛ kibui ɛlɛ shuɔ, aka fala ewui lɔfɔ nɛ̀ taabha, gɛ ɛvɛ Yerusalem tɛ̀ mɛ dɛkpɛ kɛtakpu esi ɔkɔ Akaa. 12Bagɛ ebhui mɛulũɔ agɛ bamɔ asɛ̀ ili wlɔãkɛ kibui nɛ̀ anana nɛ Akaavũɔ mɛ, alo sɛ ɛɛkpɛ ebelà nɛ banɔɛza nɛishi nɛ ɛtsyɔakɔ, alo ɔmamɛ ɔkɔ nanà tsyɛ. 13Kɛlɛ batɛ balà ebù ebuiɛ gɛ alɛ balɔkɔ ebhui mɛulũ otsiɛ nɔ akɔwɔ. 14Pɔ, ɛdɛmɛ tɔɖɔ kɛlɛ abha asɛ ɛɛkpɛ kɛtakpu esi ɔkɔ bɔlɔ akaalɛ Owusoso Akaa asɛ anɔ gɛ etsiɖi Kidzo ɛlɛ gɛ bekulu otsiɛ sɛ̀ Nazaretianɛ batɔ̃mɛ gagalĩ otugbà zazã kidzoɔ. Ɛdɛmɛ tɔɖɔ kɛka nyia ka gɛ ɔsha ɖɔɔ nabha, gɛ kɛlɛ bafɔnɔ elú nɛ ebuiɖɔluanɛ keplukpa mɛ, 15kɛlɛ kidzo tinikpo ɛlɛ mɛ mɛtsyɛ iɖi ɔkɔ Owusoso Akaa asɛ banɔ alɛ ana, asɛ tɛlɔlɔ odenɔ bekpùmɛ alɛ akɔ banɔ dadalɛ nɛ̀ atakpu mɛ gagalĩ eleteɛ. 16Kliso ɛwlɔãkɛ kibe nyia be ɔsɛ tɛ mɛ ekpeɖekpeɖe mɛ adalɛ nɛ Owusoso Akaa namɛ nɛ̀ anɔdzyrame shu.
17“Gɛ agɔ kpekpè teli abafalaa, ɛba Yerusalem ɔsɛ tɛ ɛbakɔ betsyuitsyuiɛ bɔdɔ̃, nɛ̀ tɛ ɛlɔkɔ tuli tsyɛ kpɛ ahɔɛ asɛ bɔdɔ̃ kɔkɔ. 18Mɛishu dalɛ nɛ ɔsha nulũ kibeɛ gɛ bamɔ mɛ nɛ Akaavũɔ shu pɛ ɛbhɛtɛ kibui ɛlɛ. Banɔɛza nanà agɛzã mɛɔbha, pɛ ebedzi asɛ ɛmana ebelà ebui tsyɛ. 19Pɔ Yudanɛ teli ede Asia bɔdɔ̃ mɛ aba, gɛ kɛlɛ ɔsɛ bazã ɛkɛlɛ tɛ̀ bebhui mɛulũ nɛ wɔamɛ, gɛ onupɛ kibui tili lɛ balɛ ahɔɛ nɛ mɛishu flogo. 20Pɛnɔsɛ bagɛ balɛ alɛ ɛkɛlɛ, baɖɔ kibui kpa nɔnɔ gɛ bamɔ nɛ mɛishuɔ kibèɛ gɛ ɛlɔɛtití nɛ ɔhamɛ besheshèɛ amɛ- 21kibui nanà ma ɔdɛ kibui tinikpo ɛlɛ gɛ ɛzɛkpɛ ozĩ ɖɔ nɛ kibèɛ gɛ ɛlɔɛtití nɛ balɛ amɛ ɔsɛ, ‘Tɛlɔlɔ odenɔ bekpuɔ mɛ shu ibui sopɛ bekulù kebhu nimɛ nɛ wɔamɛ obuɔ.’ ”
22Kɛlɛ Felike anɔ gɛenyi Kidzo ɛlɛ piapii nɔ, alɔkɔ kebhuɔ atɔɖɔ kiwui bhlatɔ abha. Aɖɔ asɛ, “Onupɛ Lisia gɛenu agɛ yɛagbanà buyuadɛdɛ aba edenɔ Yerusalemuɔ tsyɛ, ɛbàɖi kibhuiɛ gɛ ɛbabhui wɔɛbuiɛ mɛ.” 23Akpɛ keyuadɛdɛ anɔ gbagbla ɔsha asɛ tɛ̀ akɔ bazã epó Paulo piapii, pɔ akɔ yɛazã yɛishu ahɔɛ mɛ tɛ̀ akɔ yɛbhia alɛ ebeɖi yɛabha nɛ̀ kɛgɛ yɛapɛɛ nɔ.
24Ewui gelee edeɛ, Felike nɛ̀ yɛedzinì Drusila gɛenu Yudadziɛ aba. Akpɛ banɔ nɛ Paulo ɔkɔ kɛlɛ azataatɔ̃ niyɛ kibeɛ gɛ azaɖɔaɖɔ nɛ tɛyɛyɛkɛŋã gɛlɛ Yesu Kristoɔ mɛ shuɔ. 25Kibeɛ gɛ Paulo azaɖɔaɖɔ nɛ ishu dadalɛ, ishu abha ŋaŋã nɛ̀ kebhu kukuluɔ gɛ abaa, kifù yi Felike kɛlɛ abaɖɔ asɛ, “Abɔ otsiɛ gbɔ! Ɔbɔlà ɔshɛ. Onupɛ ɛbamɔ kibè tsyɛ ɛbà kpɛ banɔ nɛ wɔkɔ.” 26Kibè ɛlɛ tsyɛ ezeɖi kidzo mɛ asɛ Paulo abakɔɛ kɛdɔ̃ tili nɛ tikpukpũ mɛ asɛ tɛ ashɛnɛ ahɔɛ nɛishu, kliso azakpɛ banɔ nɛ yɛɔkɔ ziazia pɛ azaɖɔaɖɔ niyɛ.
27Gɛ agɔ taabha abafalaa, Porkio Festo ebedzì kɛmadì ekusi nɛ Felike ede, pɔ gɛ Felike apɛ asɛ tɛ̀ ekù Yudanɛ awɔ̃ soɔ, ashɛnɛ ahɔɛ nɛ Paulo shu asɛ azã ɔɖavũɔ mɛ.
Currently Selected:
Banɔkpɛkpɛ Axɔ̃ɛ 24: nyb
Highlight
Share
Copy
Want to have your highlights saved across all your devices? Sign up or sign in
© (Active), Ghana Institute of Linguistics, Literacy and Bible Translation. All rights reserved.
