Romanɛ 16
16
Paulo Yɛɔsɛsɛnɔ Ɔsɛsɛ Romanɛ
1Ɛbaka bɔlɔ ada Foebe ibui kɔ ɔnɔ, gɛenu ɔha axɔ̃ɛdɛ gbangbã teli idi nɛ Kɛnxren ɔha mɛ. 2Ibisi denɔ wɔnɔ ahɔɛ sɛ tɛ nɔyɛkɛ yɛ nɛ Apalete nɛinye mɛ. Nɔyɛkɛ yɛ asɛ kɛyɛkɛ gɛ nɔyɛkɛ banɔ dadalɛɛ ana, kɛlɛ nɔkɔɛ tɛpɛplɛnɔ ka nyia ka gɛ apɛ edenɔ wɔnɔ ɔkɔ, ɔmɔsɛ axɔ̃ɛdɛ yɛenu akɔ banɔ gelee, gɛ mɛ tsyɛ inu balɛmɛ anɔ tenikpo.
3Nɔsɛnɔ Priskila nɛ̀ Akwila, mɛaxɔ̃ɛdɛ ɔhagbo alɛ nɛ Yesu Kristo mɛ. 4Bálɔkɔ balɛ ɛkpã akɔ nɛ mɛtakpu. Anɛ mɛ ete, pɔ bagɛ etinu Yudanɛ ɔhamɛanɛ pete tsyɛ ezehu alɛ ahɔɛ.
5Sɛnɔ bahá gɛ atsyɔa nɛ balɛ ɔpã mɛɛ tsyɛ. Ɛsɛnɔ Epaineto, anɔ gɛ ɛdɛmɛ nɔ. Yɛedzi anɔ nɛ Asia gɛ eputɔ etsyina edzi Kristoanɔ.
6Sɛnɔ Maria, gɛ edzi anunɔ gɛ azawɔa axɔ̃ɛ nɛ̀ kemikpɛkpɛ akɔ ɔnɔ.
7Sɛnɔ mɛeshopo alɛ Androniko nɛ̀ Yunio, balɛ nɛ̀ mɛ bɔzã ɔɖavũ. Banɔkpɛkpɛ enyi alɛ piapii gɛ bedzi Kristoelete akpɛ otugbà akɔ mɛ.
8Sɛnɔ Ampliatus, anunɔ gɛ ɛdɛmɛ nɔ nɛ Apaleteɛ mɛ.
9Sɛnɔ Urbano, anunɔ gɛ azadɛ Kristo axɔ̃ɛ nɛ̀ mɛ, nɛ̀ Staxis anunɔ gɛ ɛdɛmɛ nɔɔ.
10Sɛnɔ Apeles, anɔ gɛ eshè nɛ̀ ɔhakpɛkpɛ nɛ Kristo mɛ.
Sɛnɔ Aristobolo nɛ̀ yɛɔpãmɛanɛ tsyɛ piapii.
11Sɛnɔ mɛeshopo Herodion.
Sɛnɔ Narkiso nɛ̀ yɛɔpãmɛanɛ gɛ balɛ ɔha kpɛkpɛ mɛ nɛ̀ Apalete Kristoɔ.
12Sɛnɔ Trifaena nɛ̀ Trisofa gɛ benu banunɔ gɛ bazadɛ axɔ̃ɛ akɔ Apaleteɛ.
Sɛnɔ mɛɔbhia Persis, anɔ gɛ akpɛ emi nɛ Apalete nɛxɔ̃ɛ wɔawɔa mɛ.
13Sɛnɔ Rufo, anɔ gɛ bebu elu akɔ Apaleteɛ, nɛ̀ yɛelĩ gɛenu mɛ tsyɛ mɛelĩɛ.
14Sɛnɔ Asinkrito, Flego, Herme, Patroba, Herma nɛ̀ baadzya gɛ balɛ wɔbha nɛ ɛkɛlɛ.
15Sɛnɔ Filologo nɛ̀ Yulia, Nerea, yɛada nɛ̀ Olimpa ɔlɔkɔ plɛnɔ ɔhamɛeyi bhlatɔ pete gɛ balɛ alɛ ɔbha nɛ ɛkɛlɛ.
16Nɔsɛnɔ bagɔlɔ nɛ̀ same, nɛ ahɔɛ kpɛkpɛ nɛ bagɔlɔ mɛ.
Kristo yɛɔhamɛeyiɛ pete basɛnɛ wɔnɔ piapii.
17Mɛelɛ alɛ mɔ, ihu buluhũ kɔ ɔnɔ sɛ tɛ nolú awɔ̃ nɛ̀ bagɛ bamana kishi zizĩ nɛ banɔ ishi, pɛ babhɛtɛ ebui gɛ etsu awuhũ, pɛ lagã ɔtɔ nɛ ebuiɛ gɛ bɔkasɛ pɛ nɔkpasɛ shu. Nɔtɛkpɛ alɛ ɔha. 18Ɔmɔsɛ banɔ alɛ nɛidiɛ, anɛ bɔlɔ Apalete Kristo anɔkpɛkpɛ benu, balɛ evũ shu axɔ̃ɛ baadɛ. Balɔkɔ ebui dzyɛdzyɛ nɛ̀ banɔ balɛ enye kpɛkpɛ nɛitití, pɛ balɔkɔ awɔɛ banɔ gɛ batɛ abhɛtɛ ekpeɖekpeɖe mɛ nɛ kibuiɛ shuɔ nɔ. 19Anɔ nyia anɔ elũ kibui nɛ wɔnɔ batɔ̃ lulũ shu, kɛlɛ kinu kibui gɛ iku mɛ same nɛ wɔnɔ shu, kɛlɛ kɛgɛ̀ ɛpɛ kɔ wɔnɔ kɛlɛinu ɔsɛ tɛ nodzi bebutinɛ nɛ kibui gbangbã shu, kɛlɛ nɛ ebui kpa shu pɔɔ, nɔkɔ wɔnɔ ahɔɛ ladalɛ nɛ kɛka nyia ka shu.
20Ishu yɔyɔ Owusoso Akaa abayɛ Satana ohumi akpɛ wɔnɔ ɔtsɛɖɛkpɔ esi tsaitsai.
Apalete Yesu yɛtibhui bhuibuɔ zã ɔplɛnɔ wɔnɔ.
21Timoteo gɛ adɛ ɛxɔ̃ɛ ɛlɛ nɛ̀ mɛɛ, Lukio, Yawson nɛ̀ Sesipatro gɛ benu mɛeshopo alɛ tsyɛɛ, basɛnɛ wɔnɔ piapii.
22Mɛ, Tertio gɛfɔnɔ keplukpa alɛ tsyɛɛ, ɛsɛnɛ wɔnɔ nɛ Apaleteɛ nɛinye mɛ.
23Gayo gɛ yɛɔkɔ bɔzã pɛ edzi bɔlɔ nɛ̀ ɔha pete apaleteɛ asɛnɛ ɔnɔ.
Erasto, gɛ abalɛ ɔma ehoeyiɛ, nɛ̀ bɔlɔ adzya Kuarto basɛnɔ ɔnɔ piapii. 24Apalete Yesu Kristo tibhui bhuibuɔ zã ɔplɛnɔ ɔnɔ nyɔ̃ɔ. Amen.
25Anunɔ gɛ yɛalà ayɛkɛ wɔnɔ edzu nɛ ɛkpã ɔgana Kibui Gbangbã gɛ ɛkasɛ ɔnɔ mɛ nɛ Yesu Kristo shu, nɛ̀ kibu gɛ bebu ebui kpukpũɔ gɛ lalɛ alɛ ɔzãkɔ odenɔ kuku ibeɛ, 26pɔ otsi alɛ bebu alɛ akasɛ, kɛlɛ buti alɛ ɔgana ebuiɖɔluanɛ ebui fɔfɔnɔ luɔ mɛ, nɛ̀ ɔgana ɔsha gɛ Owusoso Akaa akɔɔ mɛ, sɛ tɛ ɛmadiɛ pete bayɛkɛ aŋã, kɛlɛ tɛ belũ batɔ̃ɔ akɔɛ, 27sɛ tɛ bɔkpɛ Owusoso Akaa gɛenu ebuitinɛ tenikpo nɔ nɛitití tihɔɔ nɛ Yesu Kristo yɛinye mɛ! Amen.
Currently Selected:
Romanɛ 16: nyb
Highlight
Share
Compare
Copy
Want to have your highlights saved across all your devices? Sign up or sign in
© (Active), Ghana Institute of Linguistics, Literacy and Bible Translation. All rights reserved.