Romanɛ 5
5
Ishu Yɔyɔ Nɛ̀ Same
1Kliso gɛ balɔkɔ ɔlɔ asɛ bunu banɔ gbangbã ɔgana tɛyɛyɛkɛŋã mɛɛ, ishu yɔyɔ lɛ ɔlɔ nɛ̀ Owusoso Akaa nɛishi, ɔgana bɔlɔ Apalete Yesu Kristo abha, 2anɔ gɛ yɛabha bɔgã pɛ bɔmɔ tɛyɛyɛkɛŋã nɛ̀ tibhui bhuibu ulɛ mɛ gɛ bɔlɛ otsiɛ. Kɛlɛ samɛ eku ulɔ gɛ buulu awɔ̃ nɛ Owusoso Akaa yɛishu dadalɛ nabha. 3Anɛ kɛlɛ ete ko, pɔ bɔmɔ same tsyɛ nɛ bɔlɔ ɔtɔ mɛ, ɔmɔsɛ bunyi sɛ bɔtɔ kɔ sɛ anɔ akpɛemi, 4kɛlɛ kemi kpɛkpɛ akɔ asɛ anɔ azã nɛ ɛkpã gbangbã, kɛlɛ ɛkpã gbangbã ɔkɔ ɔsɛ tɛ anɔ ezelu awɔ̃. 5Kɛlɛ awɔ̃luluɔ atɛwɔɛ anɔ, ɔmɔsɛ Owusoso Akaa yɛtɛdɛdɛmɛ nɔ̀ɔ yɛalɔkɔ eyuku bɔlɔ etúɔ mɛ nɔ, ɔgana Ɔfɔfuĩa Gbangbã gɛ akɔ ɔlɔ mɛ.
6Nɛ kibe gbangbã mɛ gɛ kibui bhɛbhɛtɛ nanà gazã bɔlɔ ahɔɛɛ, Kristo ebetsí nɛ bagɛ betinyi Owusoso Akaa nɛ̀ ɛtakpu. 7Abagagalĩ ɔsɛ tɛ anɔ teli etsí nɛ anɔ gbangbã ɛtakpu, pɔ nɛ eyamɛ gbangbãelete teli itakpu xɔnɔɔ, anɔ teli abadɛmɛ asɛ tɛ etsí. 8Pɔ Owusoso Akaa ebu kɛdɛmɛ gɛ adɛmɛ nɛ̀ ɔlɔ akasɛ nɛidzo ɛlɛ nabha asɛ, gɛ buwlui zã ɔlɔ ebui kpa bhɛbhɛtɛ abhaa, Kristo etsí nɛ ɔlɔ ɛtakpu.
9Otsi alɛ gɛ bebhui utsyɔa akɔ ɔlɔ ɔgana yɛdzyosu nɔ mɛɛ, kidzo ɛlɛ nabha ke yɛebebu ɔlɔ, odenɔ Owusoso Akaa yɛɔmɔpɔɛ nɔ mɛ. 10Ɔmɔsɛ nɛ kibeɛ gɛ bɔgɛ dɛmɛ nɛ Owusoso Akaa, Yɛeyiɛ ebevũ iboe nɛ bɔlɔɛishi, ɔgana yɛutsíɛ mɛ. Gɛ evũ iboe ɛlɛ anaa, kɛlɛ́ pɛ atɛ balà ɔlɔ ebu ɔgana yɛkpã gɛ alɔkɔ eluɔ mɛɛ dza? 11Anɛ kɛlɛ ete ko, pɔ bɔmɔ same tsyɛ nɛ Owusoso Akaa mɛ ɔgana bɔlɔ Apalete Yesu Kristo abha, anunɔ gɛ yɛabhaa bɔgã, pɛ bɔmɔ tenikpo bhɛbhɛtɛ.
Kɛgɛ Kɔ Ɔsɛ Adam Nɛ̀ Kristo Bagɛ Shɔ̃
12Kliso asɛ gana anɔ tenikpo abha pɛ kibui kpa ku kanɔ nɔ̀ nyɔ̃ɔ mɛ, kɛlɛ gana kibui kpa bhɛbhɛtɛ mɛ butsí ba banɔ nyɔ̃ɔ abha, ɔmɔsɛ balɛ nyɔ̃ɔ abhɛtɛ ibui kpa- 13ɔmɔsɛ flogo pɛ bakɔ ɔshaa, kibui kpa zã kanɔ nɔ̀ mɛ kukuku. Pɔ gɛ ɔsha gɛzã soɔ bagɛ lɔkɔ kɛlɛ akɔ ananà asɛ abhɛtɛ ibui kpa. 14Klisoɔ butsí zɛŋã ukusi odenɔ Adam ibe ɔmana Mose abha, gɛ bagɛta esi asɛ Adam yɛibui kpa bhɛbhɛtɛ ana tsyɛ flogo. Anunɔ gɛ yɛtɛzazã mɛ lɛ asɛ anunɔ gɛ ababaa.
15Pɔ kɛdɔ̃ kɔkɔ ɛlɛ gã ɔtɔ nɛ Adam esitata shu. Onupɛ banɔ gelee betsí aganà anɔ tenikpo alɛ gɛ ata esi soɔ, kiɖeso pɛ Owusoso Akaa yɛtibhui bhuibu nɛ̀ kɛdɔ̃ kɔkɔ gikoeyi odenɔ tibhui bhuibu odenɔ anyɛ tenikpo alɛ, gɛ enu Yesu Kristo, gɛ atsakɛ afala nɛ banunɔ nyɔ̃ɔ mɛ. 16Kɛdɔ̃ gɛ Owusoso Akaa akɔɔ, tinu anɔ tenikpo alɛ ete esi tatá shu ibui. Kebhu kukulu ɔkɔ kibui kpa tinikpo nɔ mana kɛpɔ bubu, pɔ kɛdɔ̃ kɔkɔ xɔnɔ kɔ ɔsɛ banɔ gelee gɛ atá esiɛ, bebhui bɔtsyɔa akɔ alɛ. 17Onupɛ gana anɔ tenikpo alɛ esi tatá mɛ butsí ŋã bukusi ɔgana yɛtakpuɔ, kɛlɛ́ kɛbazã ɔkɔ bagɛ ayɛkɛ Owusoso Akaa tibhui bhuibu gelee nɔ nɛ̀ ɛlɛ ɔdɔ̃ kɔkɔ ginu ishu dadalɛ ɛkpã ukusi ŋaŋã ɔgana anɔ tenikpo alɛ gɛenu Yesu Kristoɔ abha dza?
18Gɛ gana anɔ tenikpo yɛesi tatá ɛtakpu so bebu banunɔ petee ɛpɔɔ, kidzo ɛlɛ nabhaa, gana anɔ tenikpo yɛibui gbangbã bhɛbhɛtɛ ɛtakpu soɔ, bebu bɔtsyɔa akɔ banunɔ nyɔ̃ɔ. 19Ɔmɔ asɛ gana anɔ tenikpo alɛ batɔ̃ malũ malu mɛɛ, banɔ petee edzi ebui kpa bhɛbhɛtɛeleteɛ, kidzo ɛlɛ nabha ke gana anɔ tenikpo alɛ batɔ̃ lulũ mɛɛ, babàbhɛtɛ banɔ gele tɛ bedzi banɔ gbangbã.
20Bakɔ ɔsha aplɛnɔ, gɛ kɛkɔ ɔsɛ ɔshaa esi tatá tsyɛ iziwu abha. Pɔ ɛkɛlɛ gɛ ebui kpa bhɛbhɛtɛ ekpè atɔɖɔɔ, tibhui bhuibuɔ tsyɛ ikpè tɔɖɔ gelee ɔdɛ. 21Asɛ kɛŋã gɛ kibui kpa ŋã bukusi nɛ bekpu mɛɛ, kidzo ɛlɛ nabha tibhui bhuibu tsyɛ baŋã bukusi ɔgana kɛgbangbã mɛ, sɛ tɛ banɔ amɔ ɛkpã tihɔɔ ɔgana Yesu Kristo bɔlɔ Apalete nabha.
Currently Selected:
Romanɛ 5: nyb
Highlight
Share
Compare
Copy
Want to have your highlights saved across all your devices? Sign up or sign in
© (Active), Ghana Institute of Linguistics, Literacy and Bible Translation. All rights reserved.
