Lukase 11
11
Yěsô ne ńzí’i ngàŋa kwò yé lésẅíŋte Ssé
(Matio 6.9-13)
1Yěsô gwɔ́ tsɔ́ lyɛ̌’, ńgwɔ́ tsɔ́ jʉ’ ne sẅíŋte Ssé, ésẅíŋte Ssé tà ńtsẅé jʉ’, atsɔ̌ *ngàŋa kwò we tó ńgɔɔn né yé ngie: Tá weg, Jâŋ la zí’i *ngàŋa kwò yé lésẅíŋte Ssé, zí’i wég yég lésẅíŋte Ssé. 2Yěsô lêen ńké ńgɔɔn mbwo *ngàŋa kwò yé ngie: Pi lɔɔn ne sẅíŋte Ssé, pi gɔɔn ngie:
Tá weg, gÿǒ ngie pʉ̀a mesoŋ gu’te lezíŋ shú,
ḿbiŋ ńgÿo *lefùɔ shú tó
3ńgwɔ́ lyɛ̌’ ntsèm, ńnáa yég mmó léjÿó gie á ge ku’u ná peg á nà lyɛ̌’ɔɔn
4lege menò tepòŋ még ńná né peg,
Mélà’mie peg ne ńdege yég ńnáa mbwo pʉ̀a pie pɔ́ fʉ̌a nò mbwo peg.
Tè zẅíŋ ngie peg kúu tsɛ̀ɛ nkwà’te.
5Yěsô gíŋe ńgɔɔn ngie: Pege lɔgɔ yɔɔn ḿbí fʉ̀’: Ɔ̀ gẅiin shǔ ɔ̀, ńgʉa mbʉ̀a ye tsɛ̀ɛ tsẅɛ́’, ńgɔɔn né yé ngie: Ashǔ, tsétsɔ’ leen ńnáa wɔ̀ɔn mbelég ntá’ tá. 6Mèŋ n tyě pá’ɔɔn, mbà tsɔ̌ shǔ wɔ̀ɔn fǒ legìŋ, ńtó ńkẅɛ́te wɔ̀ɔn ndá pɔ́ fʉ̀’ɔɔn, m biŋ tè gẅiin tsɔ́ mmó gie ngwɔ́ n dɔg ńdye yé wɔ́. 7Tsɔ́ nò shǔ ɔ̀ fóo ndá ńtsɔ́’ ngie: Tè gíŋe ḿbége wɔ̀ɔn, n ně ńdá’ ńjÿɔ́’ ncwò ndá, peg lâ pènkʉ́ pɔ́ɔn ně ńdá’ ńnuŋe kǔ. Tà à lɔɔn ńgwɔ́ n de gíŋ ngie n ge lu ssé ná mbelég né gù wɔ́. 8Yěsô gɔɔn ngie, pi zsé mboŋó ngie, ashǔ ɔ̀ lɔɔn ńdu ssé ńná mbelég né gù, mbà à tě ńdu ssé ńnáa ńtí pɔ́ ndà’ pá’ ɔɔ shǔ we wɔ́. Mbà à cʉ’ʉ́ ńnáa ńtí pɔ́, mélà’mie ɔ̀ neŋé twó ḿbége yé pɔ́ tè kʉ́a.
9Áa pú’u, tá mèŋ shwóŋó gẅi ngie: Pi lúɔ, e Ssé ge náa mbwo pi. Pi fa’, e Ssé ge gÿo pi gyá. Pi kwá’te ncwò ndá à ge tsɔ́’ ná né pi. 10Nyìŋ lúɔ mmó, mbà mé ge náa mbwó yé, éfa’, mbà à ge gyá, ḿbiŋ ńkwá’te ncwò ndá, mbà mé ge tsɔ́’ ná né yé. 11Pi pɛ̂ ńgwɔ́ metá pènkʉ́, míŋ wɔ̌ tsetsɛ̀ɛ pi lɔɔn ńdúɔ mbàb ssó, mbà à ge gwoon nnú náa mbwó yé? 12Míŋ wɔ̌ piŋ ńdúɔ lepùm ngáb, mbà à ge gwoon ngɔ́ɔn ssé, é ńnéŋe mbwó yé? 13Pi pie pi fʉ’ nò tɛ’ zsě léná shúm mbòŋo mbwo gubé gí. Tà ngʉ̀a shÿɔ́’ɔ ná Tá gẅi gẅie aa tÿǒ lepwó? À ge náa Zẅìge Ndʉalʉ̌a mbwo pʉ̀a pie pɔ́ lǔɔ?
Yěsô ne fóo ná pʉ̀a ńjwoŋo messé tepòŋ
(Matio 12.22-30; Malékuse 3.20-27)
14Á gwɔ́ tsɔ́ lyɛ̌’, Yěsô jwoŋ *ssé tepòŋ gie e léen ńkúu ná tsɔ̌ nyìŋ, ńdɔgɔ yé ńgÿo tántsá’ mbǔ’. E *ssé tepòŋ gwɔ́ tà fó ná ngàŋ ńkẅɛ, tà á zye légɔɔn nò, alá’ pú ńgyá ḿmɔɔn tɛ’. 15Tá’ etsɔ́ pʉ̀a tsetsɛ̀ɛ pɔ́b ne shwóŋte ńgɔɔn ngie: Bɛlzebùl, á tá ndá *messé tepòŋ zɔ gÿo tá Yěsô ku’u léjwoŋ *messé tepòŋ. 16Petsɔ́ pʉ̀a ne ńtsóte Yěsô tsotě, ńne fa’a liŋé gie á la’te ngie Ssé zɔ tumó yé. 17Tá’, Yěsô zsé nkwaŋá wɔ́b, ńgɔɔn né pɔ́b ngie: Epʉ̀a tà’a lá’ lɔɔn sele ńdÿɔ́’ ncù tsetsɛ̀ɛ pɔ́b, mbà yɛ̌ lá’ ge pyé. Mendá keme ḿbʉle nà metsɔ́. 18Lefùɔ se Sátà gíŋ ńgwɔ́ pɔ́ kwà’ pú’u. Epʉ̀a pé lɔ́ɔn fagte, ńzye lésele ńdÿɔ́’ ncù tsetsɛ̀ɛ pɔ́b, mbà lefùɔ sé ge pyé. Pi gɔ̌ɔn ngie n dɔgɔ pɔ́ metʉ̀ Bɛlzebùl tá ńjwoŋo *messé tepòŋ. 19Tà pá’ pí pʉ̀a gíŋe ńjwoŋo yɔ́b *messé tepòŋ li, pɔ́ piŋe ńdɔgɔ yɔ́b metʉ̀ nzɔ̌ tá ńjwoŋo? Kwà’ pʉ̀a pí ŋwɛ́ nyɛɛ gẅi ngie pi gɔɔn pɛ́’ɛ éfʉa fʉa. 20Tá á gʉa ná mèŋ, mbà mèŋ n dɔgɔ pɔ́ metʉ̀ Ssé ńjwoŋo, yɔɔn lɔgɔ nyɛɛ gẅi ngie Ssé ně ńdá’ ńtó tà ńgwɔ́ fùɔ á tsɛ̀ɛ yɔɔn njÿó.
21Pi zsě gí ngie nyìŋ lɔɔn ńgẅiin shúm ncù, ńgíŋe ńgẅiin metʉ̀ lélɔg ḿbyɛ́b mbʉ̀a ye, mbà à lɔɔn ńgwɔ́ ammó yé le pyé. 22Tá tsɔ̌ nyìŋ gẅie à piŋ ńtʉ ńcʉa yé gÿo ńtó, mbà tsɔ̌ légÿo tè gíŋe ńgwɔ́ wó fʉ̀’ó wɔ́. Mbà wɛ̌ ngàŋ ge tó gwoon yé, é kẅé shúm ncù sé sie á ke ńdɔgɔ ńtʉʉ. E pú tú’ shúm sé, pâ pé pʉ̀a gabte. 23Nyìŋ lɔɔn ńdʉ’ pá’ peg yé ge gwɔ́ lê nò, mbà à lɔgɔ ńcʉŋe nò yɔ́ɔn. Nyìŋ piŋ ńdʉ’ʉ lékẅéte wɔ̀ɔn, peg yé cú’te pʉ̀a pɔ́ɔn, mbà à cʉ’ʉ́ ńtága wɔ́b saa sa.
À lɔɔn ńgwɔ́ ssé tepòŋ kẅɛɛ ná nyìŋ, ḿbiŋ ńgÿo ńgíŋe ḿbiŋ nzèm
(Matio 12.43-45)
24E *ssé tepòŋ ńnéŋe ná nyìŋ tà ńgÿo ńkẅɛ, ńgwá ńgwó nà jʉ’ sie é júbe jubé, éfa’a jʉ’ gie à ge pʉ́le ńnéŋe wó, ḿbiŋ ńké tè gyá, ńdêen ńké ńgɔɔn ngie: Á poŋ ngie m biŋ nzèm á tsɛ̀ɛ ndá yɔ̀ɔn mie n ka zɔɔn ńgwɔ́ wó. 25A lɔɔn ḿbiŋ nzèm, ńgyá, mbà mé kéen ńjÿɔg ndá ńtáŋte, 26mbà à ge gʉa gú tsɔ́ *messé tepòŋ sɔɔn mbʉ́a, e gwɔ́ pie é pú ńgyɔ́ɔn sóon tà ńcʉa yé, pâ pɔ̌ piŋ nzèm ńkúu ná nyìŋ wá, ńgíŋe ńdɔgɔ yé ńgÿo ndá yɔb. Ngɔ́’ ngàŋ pú ńgyɔ́ɔn ńcʉa pà’ e ka zɔɔn ńgwɔ́.
Pàshÿó mbòŋo ée pé’e ńgwɔ́ pà wɔ̌?
27Yěsô la ne ńgɔɔn pú’u, atsɔ̌ manzwě, fóo nùɔ lá’ ńkwé’e ngyè ye, ńnáa tÿǒ, ńgɔɔn ngie: Manzwě gẅie à la ńnéŋe ssé ńzyé ɔ́, ńnóŋe gú, aa shÿó mbòŋo. 28Yěsô pʉŋe ńgɔɔn né yé ngie: Ɔ̀ kɔ’ɔ́ gɔɔn pɔ́ ngie: Pàshÿó mbòŋo ée pʉ̀a pie pɔ́ jú’u shwóŋè Ssé, ńgÿo pá’ á ne ńzɛ́te.
Mé zɛté Yěsô ngie à gÿo nò mmɔɔn mmɔɔn, mé gyá
(Matio 12.38-42)
29Yěsô ne shwóŋó pú’u, alá’ ne ńkẅi’i ńkwɔ́’ɔ kwɔ̌’, á lêen ńké ńgɔɔn né pɔ́b ngie: Pʉ̀a pie ée tsɛ̀ɛ njÿó fʉ̀’ɔɔn é pú tepòŋ. Pɔ́ ně ńzɛ́te wɔ̀ɔn ngie n nyɛɛ liŋé, tá mé téen ńgee nyɛɛ wɔ́b tsɔ́ mmó wɔ́, tà ńdí’ ndà’ nò gie á la gÿo Jonase. 30Pi zsě pá’ Ssé la lɔgɔ Jonase ńnyɛɛ liŋé mbwo pʉ̀a Ninive, Ssé ge gíŋe gÿo ndʉŋ ndʉŋ pú’u, é lɔgɔ *Míŋ Nyìŋ nyɛɛ nò mmɔɔn mmɔɔn á mvfò pʉ̀a pie ée tsɛ̀ɛ njÿó fʉ̀’ɔɔn. 31-32Epʉ̀a Ninive la jú’u shwóŋè Jonase, ńkúbe mà wɔb, nyìŋ gẅie à piŋe shwóŋó gẅi nò lyɛ̌’ɔɔn pi tě ńjú’u wɔ́, à cʉa Jonase. Áa pú’u, tá mèŋ shwóŋó gẅi ngie Ssé ge lá’ gwɔ́ tà ně ŋaga pʉ̀a mesoŋ, epʉ̀a Ninive apɛ̌ tó ńtyé ńzába nò twó pʉ̀a pie ée tsɛ̀ɛ njÿó fʉ̀’ɔɔn. Anò Mafùɔ pʉ̀a Shéba gíŋe ńgwɔ́ pɔ́ pú’u. À la jú’ ngie legyè fùɔ Salomo pú ńcʉa se mânyìŋ ntsèm, éfóo tàa lá’ yé, ńdu ssé ńtó, ńdɔg nÿɔ́g mé ńgyá yé. Nyìŋ gẅie à piŋe shwóŋó gẅi nò lyɛ̌’ɔɔn pi tě ńzẅíŋe wɔ́, esé legyè cʉ́a se fùɔ Salomo. Áa pú’u, tá mèŋ shwóŋó gẅi ngie, e Ssé ge lá’ gwɔ́ tà ne ŋaga pʉ̀a mesoŋ, mafùɔ pʉ̀a lá’a Sheba ŋwɛ́ tó ńtyé ńzába nò twó pʉ̀a pie ée tsɛ̀ɛ njÿó fʉ̀’ɔɔn.
Yěsô aa nkà’ mmɔ̌g gẅie é kyɛ’ɛ jʉ’
(Matio 5.15; Malékuse 4.4-21)
33Mé té lyɛɛ lâm pá’a légʉa ńtÿɔ́gɔ jʉ’ʉ lelyěen wɔ́, ḿbiŋ ńké tè lyɛ tà á ku’ mé kaa loŋgá ńdɔg ńkábte wɔ́. Mé lyɛɛ lâm, ńkaa ńtÿɔ́g pɔ́ ná tápele, á jʉ’ gie á ŋá’te lê tÿǒ, légwɔ́ gie pʉ̀a é ge gwɔ kúu ndá, é gyá à ne ńkyɛ’ɛ jʉ’. 34Menÿɔ́g mú ée mbwo gù ńgwɔ́ pá’ lâm gẅie ɔ̀ lɔgɔ ńgyá jʉ’, menÿɔ́g mú lɔɔn tè síŋ, mbà ɔ̀ ge gyá jʉ’ mboŋó. Tá menÿɔ́g mú piŋ ńgwɔ́ tà síŋ, mbà ɔ̀ ge cʉ́’ gwɔ́ pɔ́ tsɛ̀ɛ nzěm. 35Á lɔgɔ ńzɛ́te ngie ɔ̀ laga twó ɔ́, ḿbɔ́ɔn nÿɔ́g mú lélɔgɔ gú ńgee tsɛ̀ɛ nzěm. 36Ɔ̀ lɔɔn ńtÿɔ́gɔ kwò ɔ́ ńdiŋe, ḿbiŋe ne ńkÿo menò mie é gwɔ́ pɔ́ menò nzěm mboŋó, mbà ɔ̀ ge giŋe nà nò nénʉ́ kwà’ pá’ nyìŋ gẅiin lâm ńdɔgɔ ńgyá mánzsé mboŋó la.
Yěsô ne ńkaga pà farisay pâ pàkyàgte lepʉ̌ Mǒsê
37Yěsô gɔɔn nò tà ńtsẅé jʉ’, atsɔ̌ nyìŋ nà nùɔ pà *farisay tóŋo yé mbʉ̀a ye, pá’ pɔ́ yé ge jÿó mmó. Pɔ́ yé gwɔ́ tà ne ńjÿó mmó, 38nyìŋ *farisay gyá pá’ à kaa sɔg mbwó mé pá’ *lepʉ̌ lá’ sɔ́b ée ssé ńne ńzɛ́te wɔ́, á pú ńkʉ’ʉ yé tɛ’. 39Yěsô zsé, ńtsɔ́’ɔ mbwo yé ngie: Pi pà *farisay, pi nyé tsɛ̀ɛ ntú’, pɔ́ tsɛ̀ɛ káŋ, ésɔg gí pɔ́ mbùm. Á gíŋ ńgwɔ́ pɔ́ ndʉŋ ndʉŋ pá’ pi tè sɔg sóon gie ee ntʉ́m pi wɔ́, ḿbiŋ ńnéŋe ńkwaŋ pɔ́ légwoon shúm pʉ̀a ńkẅé ńjÿó. 40Pi ee megʉ̀gʉ̀! Né ngie Ssé gẅie à la nyɛte nzème pǐ zɔ la gíŋ ńnyɛte tsɛ̀ɛ wó lá? 41Ammó gie á ke ḿboŋ ngie pi gÿo gwɔ́ pɔ́ lépí shúm mbòŋo sie ée tsɛ̀ɛ mekáŋ mí, ńnáa mbwo pàtèmmó, pɔ́ jÿó yɔ́b. Pi ge gÿo pú’u, tá ntʉ́m gẅi lêen ńké ńdʉ́a mvfò Ssé.
42Pà *farisay, ndòon ee twó pi! Pi gabte shúm nná’ sí tà mbɔɔ nzàb gi nzsè legém, ńnáa tà’ nzsè mbwo Ssé. Tá’, ńké ńdege légÿo nò mbòŋo mbwo pʉ̀a mesoŋ, ńgíŋe ńdege lékwoŋ Ssé. Pú’u, tá yɛ̌ zɔ̌ gwɔ́ mmó gie á ke ne ńzɛ́te ngie pi gÿo. Pi gÿo pú’u, tá ńké le wetsɔ́ gígyé shúm lege
43Ndòon ee twó pi pà *farisay! Pi kúu *ndá cú’tè, ńkaŋa gí jʉ’ pɔ́ mvfò, ńkwoŋ ngie mé tó ńtsyɛ’te gẅi ndùmo gyɛ̌.
44Ndòon ee twó pi, pi leen ńgwá’a lesyé té liŋé sie nyìŋ lɔɔn ńgiŋe mǒ, mbà à ge zyɛ́’ nzsè té zsé, é kaa *lɔ̌’#11.44 é kaa lɔ̌’: Nyìŋ lɔ̌ɔn ńzyɛ’ɛ nzsè lá’ pɔ́b Israel, à tě ńgíŋe ńcʉa jʉ’ʉ Ssé wɔ́, tà mé lá’a sẅága yé, tá á gíŋe ńgee wó. .
45Atsɔ̌ tà’ nyìŋ ná pàkyàgte *lepʉ̌ Mǒsê jú’ tà ńgɔɔn né Yěsô ngie: Tsítsà, tà ɔ̀ zsě ngie ɔ̀ gɔɔn pɛ́’ɛ̀ ńdɔgɔ ńnéŋe shʉ́ twó peg yég? 46Yěsô pʉŋe ngie: Tà mbɔɔ pi gí pàkyàgte *lepʉ̌ Mǒsê, pi tè mboŋó wɔ́. Ndòon ee twó pi, á nue pi kaa pì’, ńzába twó pʉ̀a mesoŋ á ne ńcʉa wɔ́b, pi fó tè lɔgɔ méntsě tepwó ńdɔg ńtsẅí’te, ńkẅéte wɔ́b gwɔ́. 47Mèŋ shwóŋó gẅí, kwà’ nénʉ́, ndòon ee twó pi. Metá pi léen ńzẅéte *pàntsẅì nkʉ̀ Ssé, pi cʉ́’ nzèm ḿbwóon mesyè mɔ́b, pi ee ńzɔ́gɔ ńkẅiŋe, ḿbiŋe ntě ńkímte nò gie pɔ́ la gɔɔn wɔ́, 48ńgÿo pú’u, ńdɔgɔ nyɛɛ ngie ammó gie metá pi la gÿo, á laa mbòŋ. Mé zẅéte *pàntsẅì nkʉ̀ Ssé, pi cʉ́’ nzèm ḿbwóon mesyè mɔ́b, ńzɔ́gɔ ńkẅiŋe. 49Mbà Ssé la tʉ́ njÿó ńdɔg legyè sé ńgɔɔn ngie: «Mèŋ n ge túm pàntsẅì nkʉ̀ pɔ́ɔn tà mbɔɔ megàŋ ntúm pɔ́ɔn á mbwo pɔ́b, pɔ́ tó ńgwoon petsɔ́ ńzẅéte, ńnyɛ petsɔ́ ngɔ́’». 50Tà fó pá’ Ssé la nyɛte njÿó yɔɔn, pɔ́ zẅě *pàntsẅì nkʉ̀ Ssé tà é gyɔ́ɔn tɛ’, metse mɔ́b métsèm ge ké pfɛte pɔ́ twó pʉ̀a pie ee tsɛ̀ɛ njÿo fʉ’ɔɔn. 51Epʉ̀a pie Ssé ge lá’ zɛ́te metse mɔ́b mbwo pʉ̀a pie ee tsɛ̀ɛ ngÿo fʉ’ɔɔn zɔɔn ńgyɔ́ɔn tɛ’. Tà fó ná me Abe gẅie mé la vɔgɔ ná yé lézẅé, ńgʉa ńkúu ná me Sakarîɛ gẅie mé la fó ńzẅé yé pɔ́ ncwò *jʉ’ʉ Ssé, á ngʉ̀ŋe jʉ’ gie mé nuŋe pwɔ́’ wó. E Ssé ge lá’ pú zɛ́te wɔ́b métsèm pɔ́ mbwo pʉ̀a pie ée tsɛ̀ɛ njÿó fʉ̀’ɔɔn.
52Ndòon ee twó pi pàkyàgte *lepʉ̌ Mǒsê, pi léen ńkíle mánzsé gẅie pʉ̀a mesoŋ pfó mǒ tá ńzsé mmó gie Ssé gɔɔn, ńdʉ’ʉ kwà’ gẅi méŋwɛ́ lepfo mǒ, ńgíŋe ńtáte pʉ̀a pie é ne ńtsɔ́ɔn lepfo pú’u.
53Yěsô gwaa fó ndá kẅɛ, lóŋ pàkyàgte *lepʉ̌ Mǒsê là we pà *farisay ne ffó, pɔ́ cʉ́’ʉ ńzɛ́te yé menò pɔ́ ntsote tsotě, 54ńgÿo pú’u, éfa’a létsíŋe yé tà gwɔ á gɔɔn nò éfʉa tsɔ́, pɔ́ zẅɛ́’ ḿbii yɛ̌ ńdɔg sẅiŋe yé.
Currently Selected:
Lukase 11: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.
Lukase 11
11
Yěsô ne ńzí’i ngàŋa kwò yé lésẅíŋte Ssé
(Matio 6.9-13)
1Yěsô gwɔ́ tsɔ́ lyɛ̌’, ńgwɔ́ tsɔ́ jʉ’ ne sẅíŋte Ssé, ésẅíŋte Ssé tà ńtsẅé jʉ’, atsɔ̌ *ngàŋa kwò we tó ńgɔɔn né yé ngie: Tá weg, Jâŋ la zí’i *ngàŋa kwò yé lésẅíŋte Ssé, zí’i wég yég lésẅíŋte Ssé. 2Yěsô lêen ńké ńgɔɔn mbwo *ngàŋa kwò yé ngie: Pi lɔɔn ne sẅíŋte Ssé, pi gɔɔn ngie:
Tá weg, gÿǒ ngie pʉ̀a mesoŋ gu’te lezíŋ shú,
ḿbiŋ ńgÿo *lefùɔ shú tó
3ńgwɔ́ lyɛ̌’ ntsèm, ńnáa yég mmó léjÿó gie á ge ku’u ná peg á nà lyɛ̌’ɔɔn
4lege menò tepòŋ még ńná né peg,
Mélà’mie peg ne ńdege yég ńnáa mbwo pʉ̀a pie pɔ́ fʉ̌a nò mbwo peg.
Tè zẅíŋ ngie peg kúu tsɛ̀ɛ nkwà’te.
5Yěsô gíŋe ńgɔɔn ngie: Pege lɔgɔ yɔɔn ḿbí fʉ̀’: Ɔ̀ gẅiin shǔ ɔ̀, ńgʉa mbʉ̀a ye tsɛ̀ɛ tsẅɛ́’, ńgɔɔn né yé ngie: Ashǔ, tsétsɔ’ leen ńnáa wɔ̀ɔn mbelég ntá’ tá. 6Mèŋ n tyě pá’ɔɔn, mbà tsɔ̌ shǔ wɔ̀ɔn fǒ legìŋ, ńtó ńkẅɛ́te wɔ̀ɔn ndá pɔ́ fʉ̀’ɔɔn, m biŋ tè gẅiin tsɔ́ mmó gie ngwɔ́ n dɔg ńdye yé wɔ́. 7Tsɔ́ nò shǔ ɔ̀ fóo ndá ńtsɔ́’ ngie: Tè gíŋe ḿbége wɔ̀ɔn, n ně ńdá’ ńjÿɔ́’ ncwò ndá, peg lâ pènkʉ́ pɔ́ɔn ně ńdá’ ńnuŋe kǔ. Tà à lɔɔn ńgwɔ́ n de gíŋ ngie n ge lu ssé ná mbelég né gù wɔ́. 8Yěsô gɔɔn ngie, pi zsé mboŋó ngie, ashǔ ɔ̀ lɔɔn ńdu ssé ńná mbelég né gù, mbà à tě ńdu ssé ńnáa ńtí pɔ́ ndà’ pá’ ɔɔ shǔ we wɔ́. Mbà à cʉ’ʉ́ ńnáa ńtí pɔ́, mélà’mie ɔ̀ neŋé twó ḿbége yé pɔ́ tè kʉ́a.
9Áa pú’u, tá mèŋ shwóŋó gẅi ngie: Pi lúɔ, e Ssé ge náa mbwo pi. Pi fa’, e Ssé ge gÿo pi gyá. Pi kwá’te ncwò ndá à ge tsɔ́’ ná né pi. 10Nyìŋ lúɔ mmó, mbà mé ge náa mbwó yé, éfa’, mbà à ge gyá, ḿbiŋ ńkwá’te ncwò ndá, mbà mé ge tsɔ́’ ná né yé. 11Pi pɛ̂ ńgwɔ́ metá pènkʉ́, míŋ wɔ̌ tsetsɛ̀ɛ pi lɔɔn ńdúɔ mbàb ssó, mbà à ge gwoon nnú náa mbwó yé? 12Míŋ wɔ̌ piŋ ńdúɔ lepùm ngáb, mbà à ge gwoon ngɔ́ɔn ssé, é ńnéŋe mbwó yé? 13Pi pie pi fʉ’ nò tɛ’ zsě léná shúm mbòŋo mbwo gubé gí. Tà ngʉ̀a shÿɔ́’ɔ ná Tá gẅi gẅie aa tÿǒ lepwó? À ge náa Zẅìge Ndʉalʉ̌a mbwo pʉ̀a pie pɔ́ lǔɔ?
Yěsô ne fóo ná pʉ̀a ńjwoŋo messé tepòŋ
(Matio 12.22-30; Malékuse 3.20-27)
14Á gwɔ́ tsɔ́ lyɛ̌’, Yěsô jwoŋ *ssé tepòŋ gie e léen ńkúu ná tsɔ̌ nyìŋ, ńdɔgɔ yé ńgÿo tántsá’ mbǔ’. E *ssé tepòŋ gwɔ́ tà fó ná ngàŋ ńkẅɛ, tà á zye légɔɔn nò, alá’ pú ńgyá ḿmɔɔn tɛ’. 15Tá’ etsɔ́ pʉ̀a tsetsɛ̀ɛ pɔ́b ne shwóŋte ńgɔɔn ngie: Bɛlzebùl, á tá ndá *messé tepòŋ zɔ gÿo tá Yěsô ku’u léjwoŋ *messé tepòŋ. 16Petsɔ́ pʉ̀a ne ńtsóte Yěsô tsotě, ńne fa’a liŋé gie á la’te ngie Ssé zɔ tumó yé. 17Tá’, Yěsô zsé nkwaŋá wɔ́b, ńgɔɔn né pɔ́b ngie: Epʉ̀a tà’a lá’ lɔɔn sele ńdÿɔ́’ ncù tsetsɛ̀ɛ pɔ́b, mbà yɛ̌ lá’ ge pyé. Mendá keme ḿbʉle nà metsɔ́. 18Lefùɔ se Sátà gíŋ ńgwɔ́ pɔ́ kwà’ pú’u. Epʉ̀a pé lɔ́ɔn fagte, ńzye lésele ńdÿɔ́’ ncù tsetsɛ̀ɛ pɔ́b, mbà lefùɔ sé ge pyé. Pi gɔ̌ɔn ngie n dɔgɔ pɔ́ metʉ̀ Bɛlzebùl tá ńjwoŋo *messé tepòŋ. 19Tà pá’ pí pʉ̀a gíŋe ńjwoŋo yɔ́b *messé tepòŋ li, pɔ́ piŋe ńdɔgɔ yɔ́b metʉ̀ nzɔ̌ tá ńjwoŋo? Kwà’ pʉ̀a pí ŋwɛ́ nyɛɛ gẅi ngie pi gɔɔn pɛ́’ɛ éfʉa fʉa. 20Tá á gʉa ná mèŋ, mbà mèŋ n dɔgɔ pɔ́ metʉ̀ Ssé ńjwoŋo, yɔɔn lɔgɔ nyɛɛ gẅi ngie Ssé ně ńdá’ ńtó tà ńgwɔ́ fùɔ á tsɛ̀ɛ yɔɔn njÿó.
21Pi zsě gí ngie nyìŋ lɔɔn ńgẅiin shúm ncù, ńgíŋe ńgẅiin metʉ̀ lélɔg ḿbyɛ́b mbʉ̀a ye, mbà à lɔɔn ńgwɔ́ ammó yé le pyé. 22Tá tsɔ̌ nyìŋ gẅie à piŋ ńtʉ ńcʉa yé gÿo ńtó, mbà tsɔ̌ légÿo tè gíŋe ńgwɔ́ wó fʉ̀’ó wɔ́. Mbà wɛ̌ ngàŋ ge tó gwoon yé, é kẅé shúm ncù sé sie á ke ńdɔgɔ ńtʉʉ. E pú tú’ shúm sé, pâ pé pʉ̀a gabte. 23Nyìŋ lɔɔn ńdʉ’ pá’ peg yé ge gwɔ́ lê nò, mbà à lɔgɔ ńcʉŋe nò yɔ́ɔn. Nyìŋ piŋ ńdʉ’ʉ lékẅéte wɔ̀ɔn, peg yé cú’te pʉ̀a pɔ́ɔn, mbà à cʉ’ʉ́ ńtága wɔ́b saa sa.
À lɔɔn ńgwɔ́ ssé tepòŋ kẅɛɛ ná nyìŋ, ḿbiŋ ńgÿo ńgíŋe ḿbiŋ nzèm
(Matio 12.43-45)
24E *ssé tepòŋ ńnéŋe ná nyìŋ tà ńgÿo ńkẅɛ, ńgwá ńgwó nà jʉ’ sie é júbe jubé, éfa’a jʉ’ gie à ge pʉ́le ńnéŋe wó, ḿbiŋ ńké tè gyá, ńdêen ńké ńgɔɔn ngie: Á poŋ ngie m biŋ nzèm á tsɛ̀ɛ ndá yɔ̀ɔn mie n ka zɔɔn ńgwɔ́ wó. 25A lɔɔn ḿbiŋ nzèm, ńgyá, mbà mé kéen ńjÿɔg ndá ńtáŋte, 26mbà à ge gʉa gú tsɔ́ *messé tepòŋ sɔɔn mbʉ́a, e gwɔ́ pie é pú ńgyɔ́ɔn sóon tà ńcʉa yé, pâ pɔ̌ piŋ nzèm ńkúu ná nyìŋ wá, ńgíŋe ńdɔgɔ yé ńgÿo ndá yɔb. Ngɔ́’ ngàŋ pú ńgyɔ́ɔn ńcʉa pà’ e ka zɔɔn ńgwɔ́.
Pàshÿó mbòŋo ée pé’e ńgwɔ́ pà wɔ̌?
27Yěsô la ne ńgɔɔn pú’u, atsɔ̌ manzwě, fóo nùɔ lá’ ńkwé’e ngyè ye, ńnáa tÿǒ, ńgɔɔn ngie: Manzwě gẅie à la ńnéŋe ssé ńzyé ɔ́, ńnóŋe gú, aa shÿó mbòŋo. 28Yěsô pʉŋe ńgɔɔn né yé ngie: Ɔ̀ kɔ’ɔ́ gɔɔn pɔ́ ngie: Pàshÿó mbòŋo ée pʉ̀a pie pɔ́ jú’u shwóŋè Ssé, ńgÿo pá’ á ne ńzɛ́te.
Mé zɛté Yěsô ngie à gÿo nò mmɔɔn mmɔɔn, mé gyá
(Matio 12.38-42)
29Yěsô ne shwóŋó pú’u, alá’ ne ńkẅi’i ńkwɔ́’ɔ kwɔ̌’, á lêen ńké ńgɔɔn né pɔ́b ngie: Pʉ̀a pie ée tsɛ̀ɛ njÿó fʉ̀’ɔɔn é pú tepòŋ. Pɔ́ ně ńzɛ́te wɔ̀ɔn ngie n nyɛɛ liŋé, tá mé téen ńgee nyɛɛ wɔ́b tsɔ́ mmó wɔ́, tà ńdí’ ndà’ nò gie á la gÿo Jonase. 30Pi zsě pá’ Ssé la lɔgɔ Jonase ńnyɛɛ liŋé mbwo pʉ̀a Ninive, Ssé ge gíŋe gÿo ndʉŋ ndʉŋ pú’u, é lɔgɔ *Míŋ Nyìŋ nyɛɛ nò mmɔɔn mmɔɔn á mvfò pʉ̀a pie ée tsɛ̀ɛ njÿó fʉ̀’ɔɔn. 31-32Epʉ̀a Ninive la jú’u shwóŋè Jonase, ńkúbe mà wɔb, nyìŋ gẅie à piŋe shwóŋó gẅi nò lyɛ̌’ɔɔn pi tě ńjú’u wɔ́, à cʉa Jonase. Áa pú’u, tá mèŋ shwóŋó gẅi ngie Ssé ge lá’ gwɔ́ tà ně ŋaga pʉ̀a mesoŋ, epʉ̀a Ninive apɛ̌ tó ńtyé ńzába nò twó pʉ̀a pie ée tsɛ̀ɛ njÿó fʉ̀’ɔɔn. Anò Mafùɔ pʉ̀a Shéba gíŋe ńgwɔ́ pɔ́ pú’u. À la jú’ ngie legyè fùɔ Salomo pú ńcʉa se mânyìŋ ntsèm, éfóo tàa lá’ yé, ńdu ssé ńtó, ńdɔg nÿɔ́g mé ńgyá yé. Nyìŋ gẅie à piŋe shwóŋó gẅi nò lyɛ̌’ɔɔn pi tě ńzẅíŋe wɔ́, esé legyè cʉ́a se fùɔ Salomo. Áa pú’u, tá mèŋ shwóŋó gẅi ngie, e Ssé ge lá’ gwɔ́ tà ne ŋaga pʉ̀a mesoŋ, mafùɔ pʉ̀a lá’a Sheba ŋwɛ́ tó ńtyé ńzába nò twó pʉ̀a pie ée tsɛ̀ɛ njÿó fʉ̀’ɔɔn.
Yěsô aa nkà’ mmɔ̌g gẅie é kyɛ’ɛ jʉ’
(Matio 5.15; Malékuse 4.4-21)
33Mé té lyɛɛ lâm pá’a légʉa ńtÿɔ́gɔ jʉ’ʉ lelyěen wɔ́, ḿbiŋ ńké tè lyɛ tà á ku’ mé kaa loŋgá ńdɔg ńkábte wɔ́. Mé lyɛɛ lâm, ńkaa ńtÿɔ́g pɔ́ ná tápele, á jʉ’ gie á ŋá’te lê tÿǒ, légwɔ́ gie pʉ̀a é ge gwɔ kúu ndá, é gyá à ne ńkyɛ’ɛ jʉ’. 34Menÿɔ́g mú ée mbwo gù ńgwɔ́ pá’ lâm gẅie ɔ̀ lɔgɔ ńgyá jʉ’, menÿɔ́g mú lɔɔn tè síŋ, mbà ɔ̀ ge gyá jʉ’ mboŋó. Tá menÿɔ́g mú piŋ ńgwɔ́ tà síŋ, mbà ɔ̀ ge cʉ́’ gwɔ́ pɔ́ tsɛ̀ɛ nzěm. 35Á lɔgɔ ńzɛ́te ngie ɔ̀ laga twó ɔ́, ḿbɔ́ɔn nÿɔ́g mú lélɔgɔ gú ńgee tsɛ̀ɛ nzěm. 36Ɔ̀ lɔɔn ńtÿɔ́gɔ kwò ɔ́ ńdiŋe, ḿbiŋe ne ńkÿo menò mie é gwɔ́ pɔ́ menò nzěm mboŋó, mbà ɔ̀ ge giŋe nà nò nénʉ́ kwà’ pá’ nyìŋ gẅiin lâm ńdɔgɔ ńgyá mánzsé mboŋó la.
Yěsô ne ńkaga pà farisay pâ pàkyàgte lepʉ̌ Mǒsê
37Yěsô gɔɔn nò tà ńtsẅé jʉ’, atsɔ̌ nyìŋ nà nùɔ pà *farisay tóŋo yé mbʉ̀a ye, pá’ pɔ́ yé ge jÿó mmó. Pɔ́ yé gwɔ́ tà ne ńjÿó mmó, 38nyìŋ *farisay gyá pá’ à kaa sɔg mbwó mé pá’ *lepʉ̌ lá’ sɔ́b ée ssé ńne ńzɛ́te wɔ́, á pú ńkʉ’ʉ yé tɛ’. 39Yěsô zsé, ńtsɔ́’ɔ mbwo yé ngie: Pi pà *farisay, pi nyé tsɛ̀ɛ ntú’, pɔ́ tsɛ̀ɛ káŋ, ésɔg gí pɔ́ mbùm. Á gíŋ ńgwɔ́ pɔ́ ndʉŋ ndʉŋ pá’ pi tè sɔg sóon gie ee ntʉ́m pi wɔ́, ḿbiŋ ńnéŋe ńkwaŋ pɔ́ légwoon shúm pʉ̀a ńkẅé ńjÿó. 40Pi ee megʉ̀gʉ̀! Né ngie Ssé gẅie à la nyɛte nzème pǐ zɔ la gíŋ ńnyɛte tsɛ̀ɛ wó lá? 41Ammó gie á ke ḿboŋ ngie pi gÿo gwɔ́ pɔ́ lépí shúm mbòŋo sie ée tsɛ̀ɛ mekáŋ mí, ńnáa mbwo pàtèmmó, pɔ́ jÿó yɔ́b. Pi ge gÿo pú’u, tá ntʉ́m gẅi lêen ńké ńdʉ́a mvfò Ssé.
42Pà *farisay, ndòon ee twó pi! Pi gabte shúm nná’ sí tà mbɔɔ nzàb gi nzsè legém, ńnáa tà’ nzsè mbwo Ssé. Tá’, ńké ńdege légÿo nò mbòŋo mbwo pʉ̀a mesoŋ, ńgíŋe ńdege lékwoŋ Ssé. Pú’u, tá yɛ̌ zɔ̌ gwɔ́ mmó gie á ke ne ńzɛ́te ngie pi gÿo. Pi gÿo pú’u, tá ńké le wetsɔ́ gígyé shúm lege
43Ndòon ee twó pi pà *farisay! Pi kúu *ndá cú’tè, ńkaŋa gí jʉ’ pɔ́ mvfò, ńkwoŋ ngie mé tó ńtsyɛ’te gẅi ndùmo gyɛ̌.
44Ndòon ee twó pi, pi leen ńgwá’a lesyé té liŋé sie nyìŋ lɔɔn ńgiŋe mǒ, mbà à ge zyɛ́’ nzsè té zsé, é kaa *lɔ̌’#11.44 é kaa lɔ̌’: Nyìŋ lɔ̌ɔn ńzyɛ’ɛ nzsè lá’ pɔ́b Israel, à tě ńgíŋe ńcʉa jʉ’ʉ Ssé wɔ́, tà mé lá’a sẅága yé, tá á gíŋe ńgee wó. .
45Atsɔ̌ tà’ nyìŋ ná pàkyàgte *lepʉ̌ Mǒsê jú’ tà ńgɔɔn né Yěsô ngie: Tsítsà, tà ɔ̀ zsě ngie ɔ̀ gɔɔn pɛ́’ɛ̀ ńdɔgɔ ńnéŋe shʉ́ twó peg yég? 46Yěsô pʉŋe ngie: Tà mbɔɔ pi gí pàkyàgte *lepʉ̌ Mǒsê, pi tè mboŋó wɔ́. Ndòon ee twó pi, á nue pi kaa pì’, ńzába twó pʉ̀a mesoŋ á ne ńcʉa wɔ́b, pi fó tè lɔgɔ méntsě tepwó ńdɔg ńtsẅí’te, ńkẅéte wɔ́b gwɔ́. 47Mèŋ shwóŋó gẅí, kwà’ nénʉ́, ndòon ee twó pi. Metá pi léen ńzẅéte *pàntsẅì nkʉ̀ Ssé, pi cʉ́’ nzèm ḿbwóon mesyè mɔ́b, pi ee ńzɔ́gɔ ńkẅiŋe, ḿbiŋe ntě ńkímte nò gie pɔ́ la gɔɔn wɔ́, 48ńgÿo pú’u, ńdɔgɔ nyɛɛ ngie ammó gie metá pi la gÿo, á laa mbòŋ. Mé zẅéte *pàntsẅì nkʉ̀ Ssé, pi cʉ́’ nzèm ḿbwóon mesyè mɔ́b, ńzɔ́gɔ ńkẅiŋe. 49Mbà Ssé la tʉ́ njÿó ńdɔg legyè sé ńgɔɔn ngie: «Mèŋ n ge túm pàntsẅì nkʉ̀ pɔ́ɔn tà mbɔɔ megàŋ ntúm pɔ́ɔn á mbwo pɔ́b, pɔ́ tó ńgwoon petsɔ́ ńzẅéte, ńnyɛ petsɔ́ ngɔ́’». 50Tà fó pá’ Ssé la nyɛte njÿó yɔɔn, pɔ́ zẅě *pàntsẅì nkʉ̀ Ssé tà é gyɔ́ɔn tɛ’, metse mɔ́b métsèm ge ké pfɛte pɔ́ twó pʉ̀a pie ee tsɛ̀ɛ njÿo fʉ’ɔɔn. 51Epʉ̀a pie Ssé ge lá’ zɛ́te metse mɔ́b mbwo pʉ̀a pie ee tsɛ̀ɛ ngÿo fʉ’ɔɔn zɔɔn ńgyɔ́ɔn tɛ’. Tà fó ná me Abe gẅie mé la vɔgɔ ná yé lézẅé, ńgʉa ńkúu ná me Sakarîɛ gẅie mé la fó ńzẅé yé pɔ́ ncwò *jʉ’ʉ Ssé, á ngʉ̀ŋe jʉ’ gie mé nuŋe pwɔ́’ wó. E Ssé ge lá’ pú zɛ́te wɔ́b métsèm pɔ́ mbwo pʉ̀a pie ée tsɛ̀ɛ njÿó fʉ̀’ɔɔn.
52Ndòon ee twó pi pàkyàgte *lepʉ̌ Mǒsê, pi léen ńkíle mánzsé gẅie pʉ̀a mesoŋ pfó mǒ tá ńzsé mmó gie Ssé gɔɔn, ńdʉ’ʉ kwà’ gẅi méŋwɛ́ lepfo mǒ, ńgíŋe ńtáte pʉ̀a pie é ne ńtsɔ́ɔn lepfo pú’u.
53Yěsô gwaa fó ndá kẅɛ, lóŋ pàkyàgte *lepʉ̌ Mǒsê là we pà *farisay ne ffó, pɔ́ cʉ́’ʉ ńzɛ́te yé menò pɔ́ ntsote tsotě, 54ńgÿo pú’u, éfa’a létsíŋe yé tà gwɔ á gɔɔn nò éfʉa tsɔ́, pɔ́ zẅɛ́’ ḿbii yɛ̌ ńdɔg sẅiŋe yé.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.