Matio 15

Nùŋe ngwòŋ pà Israel

(Malékuse 7.1-23)

1Á gwɔ́ tsɔ́ lyɛ̌’, etsɔ́ pà *farisay pâ *pàkyagte lepʉ̌ Mǒsê fó Yerósalem ńtóo lejʉ́ŋ Yěsô, ńzɛ́te yé ngie: 2Mélà’a kɔ́ *ngàŋa kwò jú té giŋe ná nùŋe pà mvfò wɔ́ɔ? Pɔ́ gaa ḿpfɛ́ shúm té sɔg mbwó mɔ́b nà ntí gie mà là’ wege ne ńzɛ́te? 3Yěsô tsɔ́’ɔ mbwó pɔ́b ngie: Á gʉa ná pi, pi lɔgɔ tsẅé lá’ gí ńgwága Ssé mélà’a kɔ́? 4E Ssé la gɔɔn ngie: «Gÿo mekù’ tá gù pɔ́ má gù, ńgíŋe ńgɔɔn ngie: Nyìŋ lɔɔn ńzoonte tá we ka má we wɔ́, mé zẅé ngàŋ». 5Á gʉa ná pi, pi gɔɔn gí ngie: Ńgwɔ́ nyìŋ gɔɔn mbwó tá we ka má we wɔ́ ngie, á kɔ́ɔkɔ́ gie à lɔɔn ńgwɔ́ á lɔg ńkẅéte yé cʉ’ʉ́ ye Ssé. 6Nyìŋ vɔg tà ńgɔɔn pú’u, mbà mé tè gíŋe zɛ́te yé ngie: Tà ɔ̀ gÿǒ mekù’ tá gù wɔ́? Pú’u, pi lɔgɔ mà lá’ gẅi ńgwága shwóŋó Ssé. 7Pi ee pà nkwòŋ menÿɔ́g! Esǎya á *ntsẅì nkʉ̀ Ssé, lɔ̌ɔn fɔ́ɔn ńgɔɔn pá’a shwóŋó nò, pá’ à la gɔɔn ná mà lá’ gẅi ngie e Ssé gɔ̌ɔn ngie:

8«Pʉ̀a pɛ̂ lɔgɔ pɔ́ ndà’ ncwò wɔ́b ńgu’te wɔ̀ɔn,

ntʉ́m wɔ́b té ná mèŋ wɔ́.

9Pɔ́ ne ńgu’te wɔ̀ɔn tá ànò té mǒ wɔ́, ńtí nò gie pɔ́ ńnéŋe twó ńzí’i pʉ̀a mmó tɛ’ tá’, á gwɔ́ pɔ́ ye pʉ̀a mesoŋ».

Àmmó gie á cʉŋte nyìŋ mvfò Ssé

10Yěsô tóŋo lá’, ńgɔɔn né pɔ́b ngie: Pi zẅí’te, ńcwoŋo ńjú’, 11àmmó gie á fó ncwò nyìŋ ńkúu lepfòm yé, té cʉŋte yé wɔ́, àgie á kẅɛɛ ncwò yé zɔ̌ cʉŋte yé.

12 *Ngàŋa kwò Yěsô leen ńké sẅɛ’te nnɛ́ ńto ńzɛ́te yé ngie: Tà ɔ̀ ne ńzsé ngie: Ànò gie ɔ̀ gɔ̌ɔn la gegé pà *farisay tɛ’? 13Yěsô tsɔ́’ɔ mbwó pɔ́b ngie: Mé ge gÿo pú tsɔ́’ɔ kɔ́ɔkɔ́ gie Tá wɔ̀ɔn mie aa tÿǒ lepwó zɔ la tè pye. 14Pi nyé wɔ́b! Pɔ́ ée pàfʉ̀ menÿɔ́g pie é kíbe pwó petsɔ́. Àfʉ̀ menÿɔ́g lɔɔn ńkíbe pwó wetsɔ́, mbà pɔ́b yé mépʉ́a ge cʉ́me tsɛ̀ɛ gem. 15Piɛ leen ńké ńgɔɔn né Yěsô ngie: Kyagte sagá nò yɛ̂ shwóŋó wég. 16Yěsô tsɔ́’ɔ mbwó yé ngie: Ńzsé ngie sí legye nyé ḿvɔ́g vɔ́g pá’ se petsɔ́ pʉ̀a gwaa? 17Àmmó fó ncwò nyìŋ ńcʉa, ńkúu lepfòm yé, ḿbiŋ fó lepfòm yé ńkẅɛ, ńkúu tsɛ̀ɛ kwɛ. 18Tá’, àmmó gie á fó ncwò nyìŋ ńkẅɛ, a fóo tsɛ̀ɛ ntʉ́m yé, yɛ̌ zɔ̌ ńnéŋe *lɔ̌’ ná ngàŋ. 19Á nue menkwaŋá tepòŋ zɔɔn ńkẅɛ pɔ́ tsɛ̀ɛ ntʉ́m nyìŋ, mɛ̌ zɔ̌ tsóte nyìŋ á zẅé wetsɔ̌, á gÿo gÿɛ́, mbàŋa fa’ pànzwě, pànzwě fa’ mbàŋa, á jʉ, ńcÿɔ nò á jʉ’ gie mé ŋaga mentsaŋ wó, ńtÿɔ́g sóon twó nyìŋ. 20Gyá shúm sie é ńnéŋe *lɔ̌’ á ná nyìŋ, tá ńgwɔ́ gie nyìŋ lɔɔn ńjÿó shúm té sɔg mbwó pá’ mà lá’ wege ne ńzɛ́te, á le ńnéŋe *lɔ̌’ ná yé wɔ́.

Àtsɔ̌ manzwě we túm zǎb ntʉ́m ná Yěsô

(Malékuse 7.24-30)

21Yěsô gÿo fó jʉ’ó ńgʉa ná tsɔ́ pàga ngwòŋ, á shÿó tÿǒsoŋ Tir pɔ́ Sidoŋ, 22ńkúu wó, àtsɔ̌ manzwě Kanaan fó wó ńtó, ńzye léga’te, ńgɔɔn ngie: Cʉ̀apʉ̀a, nyìŋ na ngẅɛ fùɔ Ndavíd! E *Ssé tepòŋ pǔ ne ńgege míŋ wɔ̀ɔn we manzwě tɛ’. 23Tá’ Yěsô jú’, ḿbú tè pÿɛ. *Ngàŋa kwò yé tóo lejʉ́ŋ ye, ésẅíŋte yé, ḿbú’ mbwó ngie: Gÿo manzwě wɛ̂ gʉa, à ne ńcu’u twó yégè. 24Yěsô tsɔ́’ ngie: E Ssé la túmo wɔ̀ɔn pɔ́ ndà’ mbwó *menjʉ̀njÿò mie é la pyé tsɛ̀ɛ ngẅɛ̀ ndá pà Israel. 25Tá’ manzwě awɛ̌ tó, ńkẅí’te mvfò yé, ńgɔɔn ngie: Cʉ̀apʉ̀a kẅéte wɔ̀ɔn! 26Yěsô tsɔ́’ ngie: Á té poŋo lekẅé shúm léjÿó penkʉ́, ḿma’a mbwó ngwé wɔ́. 27Manzwě ŋwɛ́ tsɔ́’ ngie: À Nde, ɔ̀ gɔɔn shwóŋó nò tá’, ngwé ké ńdagte mesɔ́ɔn shúm mie éfóo ndùm tápele tá wɔb ńgwete ssé. 28Yěsô leen ńké ńtsɔ́’ ngie: Má wɔ̀ɔn! Ɔ̀ záb ntʉ́m ná mèŋ tɛ’. Á poŋ ngie àmmó gie ɔ̀ ne ńtsɔ́ɔn á pumte! Yěsô gɔɔn pú’u, míŋ manzwě wá gwóon ńzeŋe pɔ́ kwà’ fʉ̀’ó.

Yěsô gÿǒ megàŋa guɔ tà ńgyɔ́ɔn zeŋe

(Malékuse 7.31)

29Yěsô gÿo fó jʉ’ó, ńgʉa né ngʉ̀ŋe letʉŋ sie ée Galilea, ńkwɔ́’ tà ńkúu ndùm lekwɔ’ɔ́, ńnéŋe ssé. 30Menùɔ lá’ tó, ńgwaa tó, ńdɔg pàpwɔ́’te mekwò, pâ pàfʉ̀ menÿɔ́g, pâ megàŋ *melɔ̌’, pâ pàtámbǎ’, mbɔɔ tsɔ́ megàŋa guɔ tà ńgyɔ́ɔn. Pɔ́ lɔgɔ wɔ́b ńtóo mvfò Yěsô pú’u, á gÿo pɔ́ zeŋe metsèm. 31Pàtámbǎ’ gɔɔn nò, mekÿǒon zeŋe, pàpwɔ́’te mekwò giŋ mboŋó, pàfʉ̀ menÿɔ́g gyá jʉ’ mboŋó. Àlá’ gyá ḿmɔɔn tɛ’, ńgu’te Ssé pà Israel.

Yěsô giŋé ne ńjÿɔ́gɔ máamáa nùɔ lá’

(Malékuse 8.1-10)

32Yěsô tóŋ *ngàŋa kwò yé, ńgɔɔn né pɔ́b ngie: Mezìŋe lá’ yɔɔn pǔ ńkúu wɔ̀ɔn tɛ’, mélà’ mie ée fʉ̀’ɔɔn ńgwɔ́ lyɛ̌’ tá, pá’ pɔ́ ké ńgwɔ́ pɔ́ lejʉ́ŋ mèŋ, ńké tè nyé ńgẅiin tsɔ́ mmó gie à lɔɔn ńgwɔ́ pɔ́ pfɛ́ wɔ́, ńgwɔ́ gie n dɔɔn nyé wɔ́b pɔ́ gʉa nzyè, mbà pɔ́ té gẅiin metʉ̀ lélɔg ńgʉa tà ńkú wɔ́. 33*Ngàŋa kwò yé gɔɔn mbwó yé ngie: Ńgwɔ́ peg lɔg mbelég nzɔ̌, á nkwòŋo tsẅɛ wɔɔn, ńdɔg ńjÿɔ́g nzẅìŋ lá’ yɔɔn tà pɔ́ zẅɛ́? 34Yěsô zɛ́te wɔ́b ngie: Pi gẅiin mbelég jʉ’ɛ mbu’ú shÿɔ́’ɔ? Pɔ́ tsɔ́’ ngie: Peg gẅiin mbelég mbu’ú sɔɔn mbʉ́a, ńgíŋe ńgÿo mbɔɔ ntá’ membaŋ ssó. 35Yěsô tsẅi ngie àlá’ ńnéŋe ssé, 36ńdeen ńké ńkẅé mbelég ŋwɛ́ mbu’ú sɔɔn mbʉ́a lê messó má, ńná ndǎg mbwó Ssé, ḿbwɔ́’te ńnáa mbwó *ngàŋa kwò yé, pɔ́ gaba mbwó lá’. 37Mânyìŋ ntsèm pú ḿpfɛ́ tà ńzẅɛ́, mé piŋ ńcú’te pfwɔ’ á lúe metúŋ sɔɔn mbʉ́a. 38Pʉ̀a pie é la pfɛ́ɛ mmó lâ mbàŋa ntsá’ lekùɔ, té sáŋ penkʉ́ lâ pànzwě. 39Yěsô tsẅi lá’ gʉa, á kúu tsɛ̀ɛ kanú’, ńgʉa né tsɛ̀ɛ pàga ngwòŋ Magadaŋ.

Currently Selected:

Matio 15: NGBM

Highlight

Copy