Matio 18
18
Àwɔ̌ aa pɛ́’ɛ ńgwɔ́ nyìŋ ndÿò tsɛ̀ɛ lefùɔ Ssé
(Malékuse 9.33-37; Lukase 9.46-48)
1Á gwɔ́ fʉ̀’ó, *ngàŋa kwò Yěsô tó ńzɛ́te yé ngie: Àwɔ̌ aa nyìŋ ndÿò tsɛ̀ɛ nò *lefùɔ Ssé. 2Yěsô tóŋo mùɔ memúɔ, ńtÿɔ́gɔ yé mvfò pɔ́b, 3ńgɔɔn ngie: Tà mèŋ shwóŋó gẅí, kwà’ nénʉ́, pi lɔɔn tè kúbe mà gẅí, tà ńcʉ́’ ńgwɔ́ pɔ́ pá’ gubé wɔ́, mbà pi tě ndá’a ńkúu tsɛ̀ɛ nò *lefùɔ Ssé wɔ́. 4Nyìŋ gẅie à sẅe’é mbùm yé ńnáa ssé tà ńcʉ́’ pá’ cʉ̀cʉ̀ŋ yɔɔn la, aa nyìŋ gẅie aa ndÿò tsɛ̀ɛ *lefùɔ Ssé. 5Nyìŋ lɔg lezíŋ sɔ́ɔn ńkúe mùɔ memúɔ pá’ wɔɔn lɔɔn, mbà ngàŋ kúe pɔ́ wɔ̀ɔn.
Nyìŋ laga twó yé légÿo tsɔ̌ nyìŋ fʉa mánzsè
(Malékuse 9.42-48; Lukase 17.1-2)
6Tá nyìŋ gẅie à kě ńtsóte tsɔ̌ tà’ nà mecʉ̀cʉ̀ŋ pɔɔn pie pɔ́ záb ntʉ́m ná mèŋ, ńtsóte wɔ́b légwɔ́ gie pɔ́ ge fʉa nò, mbà mvfò áa pá’ ngwɔ́ me cʉŋé máamáa tóon lóŋ ngàŋ, ńtsó yé, ḿma’a tsɛ̀ɛ mí á jʉ’ʉ zème. 7Ndoon ee two pʉa pie pɔ ee tsɛ yɔɔn njÿo, ńgÿo pʉa fʉate meno! Aa nenʉ meno mie é lɔɔn ńgwɔ́ é gÿo nyìŋ fʉa manzse, ée tsɛ̀ɛ njÿó tà ńgyɔ́ɔn. Mɛ̌ menò téen ndá’a ńzága wɔ́. Tá’ àshÿó tepòŋ ké ńgwɔ́ nyìŋ gẅie a ge gÿo nyìŋ fʉa manzse!
8Á lɔɔn ńcʉ́’ gie apwó ɔ́ ka kwò ɔ́ wɔ́, à tsóte ɔ́, ɔ̀ fʉ́a nò, ɔ̀ zá’ ńgwá’ á taataa ngʉ́a shʉ̀shʉ̀a. Mvfò aa gú légwɔ́ kème pwó ka kème kwò wɔ́, ndá’ ńgwɔ́ wó, ńcʉa pá’ à lɔɔn ńgwɔ́, ɔ̀ gẅiin mbwó mú mémbʉ́a ka mekwò mú mémbʉ́a wɔ́, ndá’ ńkúu tsɛ̀ɛ mmɔ̌g gẅie e tě ndá’a ḿbyé wɔ́. 9Á lɔɔn ńcʉ́’ gie lejÿɔ́g shú tsóte ɔ́, ɔ̀ fʉa nò, ɔ̀ tsɔ́’ ńgwá’ á ngʉa shʉ̀shʉ̀a. Mvfò aa gú légwɔ́ pyé lejÿɔ́g ndá’ ńgwɔ́ wó, ńcʉa gú légẅiin menÿɔ́g mémbʉ́a, ndá’ ńkúu tsɛ̀ɛ mmɔ̌g.
Nyìŋ gẅiin léfa’a fɛ́ we gẅie à fʉ̌a mánzsè
(Lukase 15.1-7)
10Pi laga twó gí légwága tsɔ̌ tà’ ná gígyé penkʉ́ pɔɔn. Tà mèŋ shwóŋó gẅí, *mecÿɔ́’ Ssé pie é lie wɔ́b tyé mvfo Ssé fʉ’ ntsem. [ 11Á nue *Míŋ Nyìŋ la tó pɔ́ léfa’ pʉ̀a pie pɔ́ la kúu pyé é gÿo pɔ́ tsẅɛ́]
12Pi cʉ́’ m bíge gẅi yɔɔn nò: Nyìŋ lɔɔn ngwe’e ńgẅiin *menjʉ̀njÿò mé nkÿo, tà’ pyé, mbà à ge gaa? Mbà à tè nyé metsɔ́ ntsɔ́b lepfwɔ’ɔ́ lê móm lepfwɔ’ɔ́ ndùm lekwɔ’ɔ́, é gʉa fa’ gie pyě wɔ́? 13Tà mèŋ shwóŋó gẅí, kwà’ nénʉ́, à fa’ yɛ̌ tà ńgyá, mbà à ge pú kága ná yɛ̌, é cʉa petsɔ́ ntsɔ̀b lepfwɔ’ɔ́ lê móm lepfwɔ’ɔ́ pie é kaa pyé. 14Áa mmó gie á gÿo tá, Tá gẅi gẅie aa tÿǒ lepwó tè kwoŋ ngie tsɔ̌ tà’ nà gubé yé pyé wɔ́.
Ntí lélɔg siŋte melɔ̌’ tsɛ̀ɛ cú’tè pʉ̀a Ssé
15Àfɛ́ gù lɔɔn gÿo no tepoŋ na gù, ɔ̀ gʉa ńgyá yé, pi yé tyé jʉ’ mépʉ́a, ɔ̀ shwóŋó yé. Á jú’, tà ńzẅíŋe mefʉa, mbà ɔ̀ kẅilé yé ná mánzsè tepòŋ 16Tá’ ńké tè jù’ ɔ̀ fa’a tà’ nyìŋ ka pʉ̀a mépʉ́a wɔ́, ńzsé «ngie mé ge gwɔ shwóŋó yɔɔn nò pànjÿò ngyá é gwɔ́ ssé mépʉ́a ka métá wɔ́». 17Tá’ á ké ńdʉ’ʉ lé jú’u nò gie pɔ́ gɔ̌ɔn, ɔ̀ lɔgɔ yɔɔn nò ńgʉa *ndá cú’tè pʉ̀a Ssé. Á piŋ ńdʉ’ʉ lé jú’u nò gie cú’tè á gɔ̌ɔn, ɔ̀ cʉ́’ ńdíe yé pɔ́ pá’ nyìŋ gẅie à tè Ssé zsé, ka pɔ́ pá’ mé líe nkẅè ncùb pà *Roma wɔ́.
18Mèŋ n ge shwóŋó gẅí, kwà’ nénʉ́, ngie: Pi lɔɔn ńgyá nò tà ńdʉ’ʉ yɛ̌ nò ndùmo ssé tsétsa’, mbà mé ge gíŋe lʉ’ʉ tÿǒ lepwó. Pi ké ńgyá nò tà ńzẅíŋe ndùmo ssé tsetsá’, mbà mé ge gíŋe zẅíŋe yɛ̌ nò tÿǒ lepwó 19Kwà’ nénʉ́, mèŋ n giŋé shwóŋó gẅi ngie: Epʉ̀a mépʉ́a tsetsɛ̀ɛ pi lɔɔn ńgwɔ́ tà’ ncwò á ndùmo ssé tsetsá’ jʉ’ɔɔn, ńdúɔ pɔ́ kɔ́ wɔ́ mbwó Tá wɔ̀ɔn gẅie aa tÿǒ lepwó wɔ́, mbà à ge ná á mbwó pɔ́b. 20Àjʉ’ gie pʉ̀a mépʉ́a ka pʉ̀a métá wɔ́, cu’té wó nà lezíŋ sɔ́ɔn, mbà mèŋ n ge gwɔ́ tsetsɛ̀ɛ pɔ́b.
Esagá nò nà nkʉa njǔ tè tsɔ̌ɔn mezìŋe
21Piɛ leen ńké ńtó ńzɛ́te Yěsô ngie: À Nde, àfɛ́ wɔ̀ɔn lɔɔn fʉa nò mbwó mèŋ, mèŋ n dege ńnáa mbwó yé ngʉ̀a shÿɔ́’ɔ? Ngʉ̀a sɔɔn mbʉ́a kêen 22Yěsô gɔɔn ngie ngǎŋ, mèŋ tè gɔɔn ngie ngʉ̀a sɔɔn mbʉ́a ndà’ wɔ́, mèŋ n ge gɔɔn ngie ngʉ̀a móm sɔɔn mbʉ́a ngʉ̀a sɔɔn mbʉ́a.
23Áa yɛ̌ tá nò *lefùɔ Ssé sẅé nò tsɔ̌ fùɔ gẅie, à la ne ńkwoŋo ngie pafa’a fa’ yé tó pâ pɔ́ sáŋ shúm sé sie ée mbwó pɔ́b pɔ́ tsɔ́’ ńná, 24ńgwɔ́ tà ńzye, mé lɔgɔ tsɔ̌ tà’ ńtóo mvfò yé, pɔ́ yé gẅiin nkáb ta é gwɔ́ memileyoŋ#18.24 Memileyoŋ lɔgɔ ńgwɔ́ 10.000 talents. . 25À tè gẅiin nkáb lélɔg ńtoŋ njǔ yé wɔ́, àfùɔ tsẅi ngie mé sẅiŋe yé, ésẅiŋe nzwě we, pâ penkʉ́ pé, tà mbɔɔ kɔ́ɔkɔ́ gie à gẅiin, ńdɔg ńtoŋ njǔ ye. 26Tá ngàŋ jú’ ńgwe ssé mvfò fùɔ, ńgɔɔn ngie: Ànkwɔbɔ́, mé ná’a shÿɔg ńzẅi’te wɔ̀ɔn, mèŋ n ge gÿo toŋ tà e mag! 27Mezìŋe mé kúu fùɔ, á nyé nkab ye mbwo, ńnyé ye á gʉa.
28Tá ngàŋa fà’ wa fó mvfò fùɔ ńgʉa ńkúu mánzsè, ḿbumte tsɔ̌ shǔ we ngàŋa fà’, mbà wɛ̌ ngàŋa fà’ la tó ńkẅé nkáb yé ta é gwɔ́ mmo ntsá’ sɔɔn mbʉ́a. Á pumte yé pú’u, ńgwoon yé, ńtÿɔ́g ngàg lóŋ yé, ńgɔɔn ngie: Ná nkáb yɔ̀ɔn ma pɔ́ fʉ̀’ɔɔn. 29Nyìŋ wa gwe mvfò yé, ésẅíŋte yé ńgɔɔn ngie: Ná’a shÿɔg ńzẅí’te wɔ̀ɔn, mèŋ n ge gÿo ná nkáb jù. 30A te lʉ’ lʉ’ nda’ wɔ́, efó ngiŋe ńdɔgɔ ye ngʉa ma’a nda tsǎŋ. 31Petsɔ́ megàŋa fà’ fùɔ gyá, á pÿɔ́gɔ wɔ́b, tà pɔ́ gʉa ḿbú ḿbíte mmó gie á cʉ̌a éshwóŋó fùɔ. 32Àfùɔ tsẅi mé gʉa ńgwoon wɛ̌ nyìŋ ndɔg ńtó, á gɔɔn né yé ngie: Tè tsɔ̌ɔn mezìŋe, mèŋ n ně ńtsɔ́ɔn mezìŋe mú, ńnyé nkáb yɔ̀ɔn mbwó gù, mélà’mie ɔ̀ ně sẅíŋte wɔ̀ɔn. 33Mélà’a kɔ́ ɔ̀ kaa tsɔ́ɔn mezìŋe shǔ gù, pá’ n ně ńtsɔ́ɔn mú jú wɔ́? 34Yɔɔn nò pú ńgyáŋa fùɔ, á túm mé gʉa ńnéŋe yé tsǎŋ, lényɛɛ yé ngɔ́’ tà ńkú fʉ̀’ gie à pǔ ńtoŋ ye njǔ.
35Yěsô cʉ́me ńgɔɔn ngie: Áa ndʉŋ ndʉŋ pá’ Tá wɔ̀ɔn gẅie aa tÿǒ lepwó, à ge gÿo nà wɔ̌wɔɔ tsetsɛ̀ɛ pi, pá’ à lɔɔn tè lege mefʉa fɛ́ we nê ngwòŋ ntʉ́m we ntsèm wɔ́.
Currently Selected:
Matio 18: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.
Matio 18
18
Àwɔ̌ aa pɛ́’ɛ ńgwɔ́ nyìŋ ndÿò tsɛ̀ɛ lefùɔ Ssé
(Malékuse 9.33-37; Lukase 9.46-48)
1Á gwɔ́ fʉ̀’ó, *ngàŋa kwò Yěsô tó ńzɛ́te yé ngie: Àwɔ̌ aa nyìŋ ndÿò tsɛ̀ɛ nò *lefùɔ Ssé. 2Yěsô tóŋo mùɔ memúɔ, ńtÿɔ́gɔ yé mvfò pɔ́b, 3ńgɔɔn ngie: Tà mèŋ shwóŋó gẅí, kwà’ nénʉ́, pi lɔɔn tè kúbe mà gẅí, tà ńcʉ́’ ńgwɔ́ pɔ́ pá’ gubé wɔ́, mbà pi tě ndá’a ńkúu tsɛ̀ɛ nò *lefùɔ Ssé wɔ́. 4Nyìŋ gẅie à sẅe’é mbùm yé ńnáa ssé tà ńcʉ́’ pá’ cʉ̀cʉ̀ŋ yɔɔn la, aa nyìŋ gẅie aa ndÿò tsɛ̀ɛ *lefùɔ Ssé. 5Nyìŋ lɔg lezíŋ sɔ́ɔn ńkúe mùɔ memúɔ pá’ wɔɔn lɔɔn, mbà ngàŋ kúe pɔ́ wɔ̀ɔn.
Nyìŋ laga twó yé légÿo tsɔ̌ nyìŋ fʉa mánzsè
(Malékuse 9.42-48; Lukase 17.1-2)
6Tá nyìŋ gẅie à kě ńtsóte tsɔ̌ tà’ nà mecʉ̀cʉ̀ŋ pɔɔn pie pɔ́ záb ntʉ́m ná mèŋ, ńtsóte wɔ́b légwɔ́ gie pɔ́ ge fʉa nò, mbà mvfò áa pá’ ngwɔ́ me cʉŋé máamáa tóon lóŋ ngàŋ, ńtsó yé, ḿma’a tsɛ̀ɛ mí á jʉ’ʉ zème. 7Ndoon ee two pʉa pie pɔ ee tsɛ yɔɔn njÿo, ńgÿo pʉa fʉate meno! Aa nenʉ meno mie é lɔɔn ńgwɔ́ é gÿo nyìŋ fʉa manzse, ée tsɛ̀ɛ njÿó tà ńgyɔ́ɔn. Mɛ̌ menò téen ndá’a ńzága wɔ́. Tá’ àshÿó tepòŋ ké ńgwɔ́ nyìŋ gẅie a ge gÿo nyìŋ fʉa manzse!
8Á lɔɔn ńcʉ́’ gie apwó ɔ́ ka kwò ɔ́ wɔ́, à tsóte ɔ́, ɔ̀ fʉ́a nò, ɔ̀ zá’ ńgwá’ á taataa ngʉ́a shʉ̀shʉ̀a. Mvfò aa gú légwɔ́ kème pwó ka kème kwò wɔ́, ndá’ ńgwɔ́ wó, ńcʉa pá’ à lɔɔn ńgwɔ́, ɔ̀ gẅiin mbwó mú mémbʉ́a ka mekwò mú mémbʉ́a wɔ́, ndá’ ńkúu tsɛ̀ɛ mmɔ̌g gẅie e tě ndá’a ḿbyé wɔ́. 9Á lɔɔn ńcʉ́’ gie lejÿɔ́g shú tsóte ɔ́, ɔ̀ fʉa nò, ɔ̀ tsɔ́’ ńgwá’ á ngʉa shʉ̀shʉ̀a. Mvfò aa gú légwɔ́ pyé lejÿɔ́g ndá’ ńgwɔ́ wó, ńcʉa gú légẅiin menÿɔ́g mémbʉ́a, ndá’ ńkúu tsɛ̀ɛ mmɔ̌g.
Nyìŋ gẅiin léfa’a fɛ́ we gẅie à fʉ̌a mánzsè
(Lukase 15.1-7)
10Pi laga twó gí légwága tsɔ̌ tà’ ná gígyé penkʉ́ pɔɔn. Tà mèŋ shwóŋó gẅí, *mecÿɔ́’ Ssé pie é lie wɔ́b tyé mvfo Ssé fʉ’ ntsem. [ 11Á nue *Míŋ Nyìŋ la tó pɔ́ léfa’ pʉ̀a pie pɔ́ la kúu pyé é gÿo pɔ́ tsẅɛ́]
12Pi cʉ́’ m bíge gẅi yɔɔn nò: Nyìŋ lɔɔn ngwe’e ńgẅiin *menjʉ̀njÿò mé nkÿo, tà’ pyé, mbà à ge gaa? Mbà à tè nyé metsɔ́ ntsɔ́b lepfwɔ’ɔ́ lê móm lepfwɔ’ɔ́ ndùm lekwɔ’ɔ́, é gʉa fa’ gie pyě wɔ́? 13Tà mèŋ shwóŋó gẅí, kwà’ nénʉ́, à fa’ yɛ̌ tà ńgyá, mbà à ge pú kága ná yɛ̌, é cʉa petsɔ́ ntsɔ̀b lepfwɔ’ɔ́ lê móm lepfwɔ’ɔ́ pie é kaa pyé. 14Áa mmó gie á gÿo tá, Tá gẅi gẅie aa tÿǒ lepwó tè kwoŋ ngie tsɔ̌ tà’ nà gubé yé pyé wɔ́.
Ntí lélɔg siŋte melɔ̌’ tsɛ̀ɛ cú’tè pʉ̀a Ssé
15Àfɛ́ gù lɔɔn gÿo no tepoŋ na gù, ɔ̀ gʉa ńgyá yé, pi yé tyé jʉ’ mépʉ́a, ɔ̀ shwóŋó yé. Á jú’, tà ńzẅíŋe mefʉa, mbà ɔ̀ kẅilé yé ná mánzsè tepòŋ 16Tá’ ńké tè jù’ ɔ̀ fa’a tà’ nyìŋ ka pʉ̀a mépʉ́a wɔ́, ńzsé «ngie mé ge gwɔ shwóŋó yɔɔn nò pànjÿò ngyá é gwɔ́ ssé mépʉ́a ka métá wɔ́». 17Tá’ á ké ńdʉ’ʉ lé jú’u nò gie pɔ́ gɔ̌ɔn, ɔ̀ lɔgɔ yɔɔn nò ńgʉa *ndá cú’tè pʉ̀a Ssé. Á piŋ ńdʉ’ʉ lé jú’u nò gie cú’tè á gɔ̌ɔn, ɔ̀ cʉ́’ ńdíe yé pɔ́ pá’ nyìŋ gẅie à tè Ssé zsé, ka pɔ́ pá’ mé líe nkẅè ncùb pà *Roma wɔ́.
18Mèŋ n ge shwóŋó gẅí, kwà’ nénʉ́, ngie: Pi lɔɔn ńgyá nò tà ńdʉ’ʉ yɛ̌ nò ndùmo ssé tsétsa’, mbà mé ge gíŋe lʉ’ʉ tÿǒ lepwó. Pi ké ńgyá nò tà ńzẅíŋe ndùmo ssé tsetsá’, mbà mé ge gíŋe zẅíŋe yɛ̌ nò tÿǒ lepwó 19Kwà’ nénʉ́, mèŋ n giŋé shwóŋó gẅi ngie: Epʉ̀a mépʉ́a tsetsɛ̀ɛ pi lɔɔn ńgwɔ́ tà’ ncwò á ndùmo ssé tsetsá’ jʉ’ɔɔn, ńdúɔ pɔ́ kɔ́ wɔ́ mbwó Tá wɔ̀ɔn gẅie aa tÿǒ lepwó wɔ́, mbà à ge ná á mbwó pɔ́b. 20Àjʉ’ gie pʉ̀a mépʉ́a ka pʉ̀a métá wɔ́, cu’té wó nà lezíŋ sɔ́ɔn, mbà mèŋ n ge gwɔ́ tsetsɛ̀ɛ pɔ́b.
Esagá nò nà nkʉa njǔ tè tsɔ̌ɔn mezìŋe
21Piɛ leen ńké ńtó ńzɛ́te Yěsô ngie: À Nde, àfɛ́ wɔ̀ɔn lɔɔn fʉa nò mbwó mèŋ, mèŋ n dege ńnáa mbwó yé ngʉ̀a shÿɔ́’ɔ? Ngʉ̀a sɔɔn mbʉ́a kêen 22Yěsô gɔɔn ngie ngǎŋ, mèŋ tè gɔɔn ngie ngʉ̀a sɔɔn mbʉ́a ndà’ wɔ́, mèŋ n ge gɔɔn ngie ngʉ̀a móm sɔɔn mbʉ́a ngʉ̀a sɔɔn mbʉ́a.
23Áa yɛ̌ tá nò *lefùɔ Ssé sẅé nò tsɔ̌ fùɔ gẅie, à la ne ńkwoŋo ngie pafa’a fa’ yé tó pâ pɔ́ sáŋ shúm sé sie ée mbwó pɔ́b pɔ́ tsɔ́’ ńná, 24ńgwɔ́ tà ńzye, mé lɔgɔ tsɔ̌ tà’ ńtóo mvfò yé, pɔ́ yé gẅiin nkáb ta é gwɔ́ memileyoŋ#18.24 Memileyoŋ lɔgɔ ńgwɔ́ 10.000 talents. . 25À tè gẅiin nkáb lélɔg ńtoŋ njǔ yé wɔ́, àfùɔ tsẅi ngie mé sẅiŋe yé, ésẅiŋe nzwě we, pâ penkʉ́ pé, tà mbɔɔ kɔ́ɔkɔ́ gie à gẅiin, ńdɔg ńtoŋ njǔ ye. 26Tá ngàŋ jú’ ńgwe ssé mvfò fùɔ, ńgɔɔn ngie: Ànkwɔbɔ́, mé ná’a shÿɔg ńzẅi’te wɔ̀ɔn, mèŋ n ge gÿo toŋ tà e mag! 27Mezìŋe mé kúu fùɔ, á nyé nkab ye mbwo, ńnyé ye á gʉa.
28Tá ngàŋa fà’ wa fó mvfò fùɔ ńgʉa ńkúu mánzsè, ḿbumte tsɔ̌ shǔ we ngàŋa fà’, mbà wɛ̌ ngàŋa fà’ la tó ńkẅé nkáb yé ta é gwɔ́ mmo ntsá’ sɔɔn mbʉ́a. Á pumte yé pú’u, ńgwoon yé, ńtÿɔ́g ngàg lóŋ yé, ńgɔɔn ngie: Ná nkáb yɔ̀ɔn ma pɔ́ fʉ̀’ɔɔn. 29Nyìŋ wa gwe mvfò yé, ésẅíŋte yé ńgɔɔn ngie: Ná’a shÿɔg ńzẅí’te wɔ̀ɔn, mèŋ n ge gÿo ná nkáb jù. 30A te lʉ’ lʉ’ nda’ wɔ́, efó ngiŋe ńdɔgɔ ye ngʉa ma’a nda tsǎŋ. 31Petsɔ́ megàŋa fà’ fùɔ gyá, á pÿɔ́gɔ wɔ́b, tà pɔ́ gʉa ḿbú ḿbíte mmó gie á cʉ̌a éshwóŋó fùɔ. 32Àfùɔ tsẅi mé gʉa ńgwoon wɛ̌ nyìŋ ndɔg ńtó, á gɔɔn né yé ngie: Tè tsɔ̌ɔn mezìŋe, mèŋ n ně ńtsɔ́ɔn mezìŋe mú, ńnyé nkáb yɔ̀ɔn mbwó gù, mélà’mie ɔ̀ ně sẅíŋte wɔ̀ɔn. 33Mélà’a kɔ́ ɔ̀ kaa tsɔ́ɔn mezìŋe shǔ gù, pá’ n ně ńtsɔ́ɔn mú jú wɔ́? 34Yɔɔn nò pú ńgyáŋa fùɔ, á túm mé gʉa ńnéŋe yé tsǎŋ, lényɛɛ yé ngɔ́’ tà ńkú fʉ̀’ gie à pǔ ńtoŋ ye njǔ.
35Yěsô cʉ́me ńgɔɔn ngie: Áa ndʉŋ ndʉŋ pá’ Tá wɔ̀ɔn gẅie aa tÿǒ lepwó, à ge gÿo nà wɔ̌wɔɔ tsetsɛ̀ɛ pi, pá’ à lɔɔn tè lege mefʉa fɛ́ we nê ngwòŋ ntʉ́m we ntsèm wɔ́.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.