Matio 27

Mé lɔgɔ́ Yěsô ńgee mvfò Pilato

(Malékuse 15.1; Lukase 23.1; Jâŋ 18.28)

1Njÿó gÿo ńdʉ́a, *mentándá pànùŋe pwɔ́’, pâ mekěme lá’ mʉ́ mba’ámba’, ńzáb ngie pɔ́ ge gÿo mé zẅé Yěsô, 2ńgÿo mé kwɛ́ɛ yé, ńdɔgɔ yé ńgʉa ńnáa mbwó ngúmnɔ́ɔn *Pilato.

Jẅidas cʉŋé

3Jẅidas gẅie à la sẅíŋe Yěsô jú’ pá’ mé zǎ’ ntsaŋ ngie mé ge zẅé Yěsô, ńdeen ńké ńzye lémÿɔgɔ mmó gie à ka gÿo, ḿbí nkáb gie à ka kẅě pàg móm ntá ná yɔɔn nò la, ńdɔg ńgʉa ńgyá *mentándá pànùŋe pwɔ́’ lâ mekěme lá’, 4ńgɔɔn né pɔ́b ngie: Mèŋ n ka gÿo no tepoŋ pá’ n ka náa tèfʉa ngie mé zẅé yé. Pɔ́ jú’ ńtsɔ́’ ngie: Peg tè nò mǒ gẅiin, á jú’u lé gù. 5Jẅidas ma’ nkáb á *jʉ’ʉ Ssé, éfó jʉ’ó ńgʉa, ńdeen ńké ńgʉa ńcʉŋe. 6*Mentándá pànùŋe pwɔ́’ lagte nkáb, ńgɔɔn ngie: Ńgwɔ́ pege ké le néŋ yɔɔn nkáb nà nkáb *jʉ’ʉ Ssé wɔ́, mélà’mie ee nkáb metse nyìŋ. 7Pɔ́ kwaŋ tà ńgwɔ́ tà’ ncwò, ńdɔg nkáb ńgʉa ńjú tsɔ́ nká’ gẅie mé lɔ́ɔn ńtóŋo lê nká’ mbwòon mekʉŋe tsá’, ńjú pú’u, ńdɔg ńgÿo jʉ’ gie mé túŋo megʉ̀ wó. 8Tà fó fʉ̀’ó, mé ée ńcʉ́’ʉ ńtóŋo wɛ̌ nká’, pɔ́ ngie nká’a metse tà ńkú lyɛ̌’ɔɔn. 9Yɛ̌ nò gÿo pú’u, ḿbumte ná pá’ *ntsẅì nkʉ̀ Ssé Yeremi la gɔɔn ngie: «Pɔ́ kěen ńkẅé nkáb pàg móm ntá, é gwɔ́ nzẅìŋ gẅie pà Israel ka zǎb ngie mé lɔg ńjúu yé». 10Pɔ́ ka ná yɛ̌ nkáb ńdɔg ńjú nká’ mbwòon mekʉŋ tsá’a, á gwɔ́ mmó gie Cʉ̀apʉ̀a la lá’ ńtsẅi ngie mé gÿo

Yěsô aa mvfò Pilato

(Malékuse 15.2-15; Lukase 23.2-5,13-25; Jâŋ 18.29-40; 19.4-16)

11Yěsô kúu mvfò Ngúmnɔ́ɔn *Pilato, á zɛ́te yé ngie: Ɔ̀ɔ fùɔ pà Yuda lá? Yěsô tsɔ́’ɔ mbwó yé ngie: Ɔ̀ gɔ̌ɔn pú’u. 12*Mentándá pànùŋe pwɔ́’ pâ mekěme lá’ ne ńtÿɔ́gɔ menò twó Yěsô tà é gyɔ́ɔn gyɔ̌ɔn, á ké tè ne ḿbÿɛɛ wɔ́. 13*Pilato, gɔɔn né yé ngie: Ɔ̀ tè ne ńjú’u nzẅìŋ menò mie mé gɔɔn ná gù wɔ́ ka? 14Tá Yěsô pú tè pÿɛ. Ngúmnɔ́ɔn gyá á pú ńkʉ’ʉ yé tɛ’.

Mé zǎ’ ntsaŋ ngie mé ge zẅé Yěsô

15Á lɔ́ɔn ńgwɔ́ lyɛ’ɛ́ línɔ́ɔn *Páskà, Ngúmnɔ́ɔn tsɔ́’ɔ ngàŋa tsǎŋ gẅie àlá’ zɛté. 16Á gwaa gwɔ́ fʉ̀’ó, àtsɔ̌ ntʉ̀ ngàŋa tsǎŋ gwɔ́ tsɛ̀ɛ ndá tsǎŋ, mé tóŋo yé lê Yěsô Panepâse. 17Àlá’ tó ńcú’te. *Pilato zɛ́te ngie: Pi kwǒŋ ngie n gʉa ná pʉ̀a pɔɔn ńnyé pɔ́ Yěsô Panepâse ka pɔ́ Yěsô gẅie mé tóŋo ngie Kristo? 18*Pilato lɔ̌ɔn ńgɔɔn pú’u, mélà’mie à cwoŋo ne ńzsé ngie mé kwɔ́’ɔ pɔ́ lóŋ ná Yěsô tá sẅiŋe ye. 19*Pilato la ne ńŋaga nò Yěsô, ànzwě we túmo nyìŋ ngie à gʉa, ńgɔɔn né yé ngie à laga twó yé ná ntsaŋ nyìŋ wɛ̂, ńgie aa pɛ́’ɛ ńgwɔ́ tèfʉa, ńgie ngàŋ shwóŋó yé ngie yé ně ńdá’a lá’, ńdyé njÿòon ná yé é gege yé tɛ’. 20*Mentándá pànùŋe pwɔ́’ pâ mekěme lá’ ne ńtsóte lá’ ngie á zɛ́te ngie *Pilato tsɔ́’ pɔ́ Panepâse ńgÿo mé zẅé Yěsô. 21Ngúmnɔ́ɔn gíŋe ńgɔɔn mbwó lá’ ngie: Mèŋ n ge nyé tà’ ngàŋa tsǎŋ né pi. Pi kwǒŋ ngie mèŋ n gʉa ná pʉ̀a pɔɔn mépʉ́a, ńnyé wɔ́? Pɔ́ yé á Panepâse! 22*Pilato gíŋe ńzɛ́te ngie: Tà mèŋ n gee pá’ɔɔn gÿo pɔ́ lêkɔ́ ná Yěsô gẅie mé tóŋo lê Kristo? Mânyìŋ ntsèm tsɔ́’ ngie: Kime yé nà tÿǒ nkǐ! 23*Pilato zɛ́te wɔ́b ngie: Kwà’ nò tepòŋ gie à gÿǒ gwɔ́ pɔ́ kɔ́? Tá àlá’ kẅi’i ńnáa gwá, ńgɔɔn pé ngie: Ké ńkime yé kim! 24*Pilato gyá ngie mé té ne ńjú’u nò gie à gɔɔn wɔ́, ńně ńgyá ngie ńgwɔ́ á sele pʉ̀a tág jʉ’, ńdeen ńké ńkaa ntse, ésɔg mbwó mé á mvfò lá’, ńgɔɔn ngie: Mèŋ n te nò ná nò nyìŋ wɛ̂ gẅiin, á ne ńdíe pɔ́ gẅí 25Mânyìŋ ntsèm tsɔ́’ ngie: Metse nyìŋ wɛ̂ sẅɛ́’ɛ ndù peg tà mbɔɔ ndù penkʉ́ peg. 26*Pilato leen ńké ńkẅile Panepâse ndá tsǎŋ, ńgÿo mé lɔg ngwɔɔn ńcúɔ Yěsô, ḿbiŋ ńná yé ngie mé lɔgɔ yé ńgʉa, ńkime yé nà tÿǒ nkǐ.

Pàlÿɔ́’ ncù ne ńzoonte Yěsô

(Malékuse 15.16-20; Lukase 23.11; Jâŋ 19.2-3)

27Pàlÿɔ́’ ncù pà *Roma leen ńké ńdɔgɔ Yěsô ńgʉa mbʉ̀a Ngúmnɔ́ɔn, pɔ́b metsèm cú’te ńkéle yé ńnéŋe soŋ, 28ḿbú sẅɛ menzsǒ mé, ńcʉ́’ mma’ pɔ́ nzsǒ lefùɔ ná yé, 29ḿbiŋ ńdɔg menzóŋ ḿbá’a cÿɔ̀’ shuu twó yé, ńnéŋe kekà’a ná pwó yé ye tʉ̀, ńně ńkẅí’te mvfò yé, ńzoonte yé ńgɔɔn ngie: Zɔɔn múɔ, àfùɔ pà Yuda! 30Ńně ńtsɔgɔ metyé ná yé, ńkẅé kekà’a, ńcúɔ twó yé, 31ńzoonte yé tà ńkʉ́a, éfó ná yé sẅɛ nzsǒ lefùɔ, ńgíŋe ḿma’ kwà’ mé menzsǒ ná yé. Á ku’ pɔ́ lɔgɔ yé fó wó ńkẅɛ, légʉa ńkime ná tÿǒ nkǐ.

Mé kimé Yěsô nà tÿǒ nkǐ

(Malékuse 15.21-32; Lukase 23.26-43; Jâŋ 19.17-22)

32Pàlÿɔ́’ ncù lɔgɔ yé fó tÿǒsoŋ ńkẅɛ, ńgiŋ tà ḿbumte tsɔ̌ nyìŋ Sirɛne, mé tóŋo yé lê Símo, mé sẅɛ́ɛ yé ngie à kaa tÿǒ nkǐ Yěsô. 33Pɔ́ gʉa tà ńkúu tsɔ́ jʉ’ gie mé tóŋo lê Golgota, ńdɔgɔ ńgɔɔn ngie: Àjʉ’ʉ kẅǐ twó. 34Pɔ́ kúu jʉ’ó, ńdɔgɔ tsɔ́ mmó gie á lẅe lẅe ḿvoŋ melù’, ńná ngie Yěsô nú. Yěsô zẅí’ à tè kwoŋo lénú wɔ́. 35Pàlÿɔ́’ ncù leen ńké ńkime yé ná tÿǒ nkǐ, ḿma’a tyéente ńdɔg ńgab menzsǒ mé, ńná ye wɔ̌wɔɔ tsetsɛ̀ɛ pɔ́b 36Á ku’, pɔ́ ńnéŋe ssé ńne ḿbyɛ́bɛ Yěsô. 37Mé ŋwe’e mmó gie à fʉa ńkime tÿǒ á jʉ’ gie twó yé la wó ńgie: Wɔɔn aa Yěsô, fùɔ pà Yuda. 38Pɔ́ la gíŋe ńkim metsǒŋ mépʉ́a nâ metÿǒ nkǐ, tà’ gwɔ́ nà gwǒŋo pwó Yěsô ye tʉ̀, wetsɔ̌ gwɔ́ ná gwǒŋo pwó kyɛ̀bɛ. 39Pàcʉa mánzsè la ne ńnyime yé yɔ́b, ńzoonte Yěsô, 40ńgɔɔn ngie: Ɔ̀ ka ne fa’a lékeme *jʉ’ʉ Ssé, ńdɔg lyɛ’ɛ́ lá’ sétá ńkwɛ́. Kwà’ gù zɔ kẅé twó ɔ̀, pá’ ɔ̀ lɔɔn ńgwɔ́ Míŋ Ssé, éfó ná tÿǒ nkǐ ésẅɛ́. 41*Metándá pànùŋe pwɔ́’, pâ *pàkyagte lepʉ̌ Mǒsê, pâ mekěme lá’ ne ńzoonte yɔ́b Yěsô ńgɔɔn ngie: 42À ka gÿo tsɔ́ pʉ̀a tsẅɛ́, tá’ à kâ ku’u lékẅé yé twó á mbwó legwé wɔ́! À lɔɔn ńgwɔ́ fùɔ pà Israel, á fó ná tÿǒ nkǐ fʉ̀’ɔɔn ésẅɛ́’ peg gyá, ńzáb ntʉ́m wég ná yé. 43À la záb ntʉ́m wé nà Ssé, e Ssé lɔɔn ne ńkwoŋo yé tà shwóŋó nò, á gÿo á tsẅɛ́ fʉ̀’ɔɔn! Nyìŋ wɛ̂ la zɔɔn ńgɔɔn ngie: Mèŋ n ge Míŋ Ssé. 44Tà mbɔɔ metsǒŋ pie mé la kime wɔ́b nà metÿǒ nkǐ á lejʉ́ŋ Yěsô gíŋe ne ńzoonte yé yɔ́b pɔ́ pú’u.

Yěsô kwě

(Malékuse 15.33-41; Lukase 23.44-49; Jâŋ 19.25-30)

45Tsɛ̀ɛ zsǒ la gwɔ́ tà ńku’, ejʉ’ ntsèm tsɛ̀ɛ ngwòŋ pú síŋ, tà ńdá’ ńkúu ná nèm tá mbÿɛ̀ njÿó. 46Á gwɔ́ ná nèm tá ŋwɛ́, Yěsô ga’te nê ngyè tetʉ̀ ńgɔɔn ngie: Eloï, Eloï lama sabatani, ńdɔgɔ ńgɔɔn ngie: «E Ssé yɔ̀ɔn, e Ssé yɔ̀ɔn, ɔ̀ gwá’a wɔ̀ɔn mélà’a kɔ́»? 47Petsɔ́ pʉ̀a pie é laa jʉ’ó jú’, ńgɔɔn ngie: À wɛ̂ gẅie à ne ńtóŋo *Elîɛ lɛ̂! 48Àtsɔ̌ tà’ nyìŋ ná pɔ́b gwóon ńkÿote, ńgʉa fa’a kùsáa, ńtsaba tsɛ̀ɛ kikii melù’, éshÿɔ́gɔ nà twó kekà’a, ńtsege ńnéŋe ncwò Yěsô ngie à sẅíte. 49Petsɔ́ pʉ̀a ne ńgɔɔn ngie: Pi cʉ́’ pege gyá ka *Elîɛ ge tó fó nà tÿǒ nkǐ ésẅi’i yé wɔ́! 50Yěsô gíŋe ńga’te nê ngyè tetʉ̀ ndeen ńcʉ́m. 51Yěsô cʉ́m pú’u, nzsǒ gie mé la lɔg ńkʉŋe tsɔ́ jʉ’ tsɛ̀ɛ *jʉ’ʉ Ssé fó tÿǒ shʉa pàg pʉ́a tá ńkúu ssé. Tsetsá’ cʉ’ʉ, metóon shʉ́ate, 52metwó mesyè tsɔ́’ɔ ńtyé, mepfó pie pɔ́ la záb ntʉ́m ná Ssé zyeente tà ńgyɔ́ɔn, 53éfó tsɛ̀ɛ mesyè ńkẅɛte. Yěsô gÿo ńgwɔ́ tà ńzíme nà legwé, pɔ́ kúu Yerósalem, á tÿǒsoŋo ndʉalʉ̌a, epʉ̀a tà ńgyɔ́ɔn gyá wɔ́b. 54Yěsô lá kwé pá’ɔɔn, tándá pàlÿɔ́’ ncù pâ pàlÿɔ́’ ncù pie é la ne ḿbyɛ́be Yěsô gyá pá’ tsetsá’ pǔ ńcʉ’ʉ, ńgíŋe ńgyá kɔ́ɔkɔ́ wɔ́ gie á ne ńcʉa, ḿbú ńcÿɔ’ tɛ’, ńgɔɔn ngie Yěsô kaa kwà’ Míŋ Ssé. 55Pànzwě tá ńgyɔ́ɔn tyé ngʉ̀a shʉ̀shʉ̀a ne ńdíe, mbà pɔ́ la zsê nzèm Yěsô tà fó Galilea, ńgiŋe ńkẅéte yé. 56Á laa tsetsɛ̀ɛ pɔ́b, wɔɔn gwɔ́ Malîɛ Magdala, ńgÿo Malîɛ má pà Jâg pɔ́ Yesyɛ̂b, ńgíŋ ńgÿo má pà gubé Zebede.

Yesyɛ̂b neŋé Yěsô tsɛ̀ɛ lesyè

(Malékuse 15.42-47; Lukase 23.50-56; Jâŋ 19.38-42)

57Á gÿo ńgwɔ́ ncwò nzèm àtsɔ̌ ngàŋa mmó tó, lezíŋ sé gwɔ́ lê Yesyɛ̂b, á gwɔ́ nyìŋ tÿǒsoŋo Arimaté, ńgwɔ́ yé tsɔ̌ *ngàŋa kwò Yěsô. 58Á gʉa ńgyá *pilato, ńdúɔ pfó Yěsô légʉa ńde’e. *Pilato zẅíŋ, ńtsẅi ngie mé ńná né yé. 59Mé kyɛ́’, Yesyɛ̂b kẅé, ńdɔgɔ pwó nzsǒ sẅé ńzémte pfó ye, 60ńkaa yé ńdɔg ńgʉa ńnéŋe tsɛ̀ɛ lesyè sie à ka nyě shʉ’ʉ ná tóon, é gwɔ́ sé Yesyɛ̂b. Á ńnéŋe Yěsô tsɛ̀ɛ wó, ńtsóte máamáa tóon ńdɔg ńjÿɔ́’ ncwò ńgʉa. 61À la gwɔ́ ńnéŋe pfó Yěsô jʉ’ó Malîɛ Magdala pɔ́ wetsɔ̌ Malîɛ ńnéŋe ssé á ngʉ̀ŋe lesyè, ńne ńgyá.

Pàlÿɔ́’ ncù ne ḿbyɛ́bɛ lesyè Yěsô

62Njÿó gÿo ńdʉ́a, á gwɔ́ lyɛ’ɛ́ nzsè Ssé gie mé kaa yetsɔ́ lyɛ̌’ ne ńnyɛte la. *Metándá pànùŋe pwɔ́’ lâ pà *farisay pú ńcú’te mbʉ̀a *Pilato, 63ńgɔɔn né yé ngie: Ànkwɔbɔ́, peg ne ńkímte tsɔ́ nò. Àngàŋa cÿɔ̌ nò wɛ̌ ka nyé ntentʉ́, ńgɔɔn ngie: Meŋ n ge lá’ zime nà legwé na mbɔɔnte lyɛ̌’ tá 64Áa pú’u, tá peg ne ńzɛ́te ngie ɔ̀ tsẅi pàlÿɔ́’ ncù pyɛ́b lesyè tà kúu na ḿbɔ́ɔnte lyɛ̌’ tá. Tà á té pú’u wɔ́, mbà ńgwɔ́ ngáŋa kwò yé tó ńjʉʉ pfó yé, ńdeen ńké ńgʉa shwóŋó lá’ ngie à zimé nà legwé! Wɛ̌ cÿɔ̌ nò e mege ḿbÿɔ́g tà ńcʉa we mvfò. 65*Pilato gɔɔn né pɔ́b ngie: Pàlÿɔ́’ ncù é pɛ̂. Pi gʉa ńgÿo mé pyɛ́b lesyè pá’ pi kwǒŋ! 66Pɔ́ gʉa ńdɔgɔ tsɔ́ mmó ńcÿɔ’ɔ liŋé ná tóon gẅie mé ně ńdɔg ńjÿɔ́’ lesyè, ńcÿɔ’ɔ pú’u, ńdɔgɔ ńgɔɔn ngie lesyè ée se njÿɔ̌’, ńdeen ńtÿɔ́g pàlÿɔ́’ ncù, pɔ́ ne ḿbyɛ́bɛ, ḿbɔ́gɔ mmó légÿo ná lesyè.

Currently Selected:

Matio 27: NGBM

Highlight

Copy