Kakpiʔiligele 1
1
LUKU WI 'WI SƐBƐ WI TÌƐDIʔƐ JUU GE
(1.1-3)
1Mi siinyɛni Towofiili, mi sɛbɛ péliwe nī wè, mi 'ti mìɛni juu muɔ mɛ́, kele gílì Zezi wi 'kpíʔile gèle nɛ́ tɛnmɛgɛlɛ gílì wi 'kɛn siɛnnɛ mɛ́ bèle nɛ̀ ki líɛ baa sélimɛ nɛ̄ bè, 2fúɔ nɛ̀ taa cɛngɛ gíì Kulocɛliɛ wi cé kɛ́nì wi líɛ nɛ̀ yɛ̀gɛ nyìʔɛnɛ nī lè. Náʔanɛ wi- kɛ́ wè, wi tundunminɔ bílì wi cé nyíɛnɛ nɛ̀ kɔ̀n bèle, a wi 'siɛnrɛ juu nɛ̀ yaʔa pe mɛ́ nɛ̀ ki juu nɛ̀ gbɛ̀ngɛ pe mɛ́ Kulocɛliɛ Pìle fànʔa nɛ̄ gè. 3Ki 'nyaa peli nɛ̄ wi cé sɛ́nì wìi tìɛ bà wi cé nyɛ́ nɛ̀ yiri, wi wuʔɔgɔ nɛ́ wi kùu kàduʔumɛ gè. Wi cé kɛnmɛ sáa kpíʔile nɛ̀ ki tìɛ dí wire wī. A wi 'cɛnyɛ togosiin kúɔ nɛ́ pe ní, nɛ nyu nɛ́ pe ní Kulocɛliɛ Kùlofɔligɔ ki wori nɛ̄ dè.
KAFƆLI WI TUNDUNMINƆ PIYE NƐ KULOCƐLIƐ PILE SIRI LE
(1.4-26)
Zezi wi 'wi kajuusɛngɛlɛ juu gèle wi pìtɛnmɛnɛ mɛ́ bèle
4Cɛngɛ káà, pe 'puu pínɛnɛ tiɛnugo nī, a Zezi wi kɛ́nì pe yɛ: «Ye fǎga tí bága líili Zerizalɛmi kàʔa nɛ̄ gèʔ; nyafɛnigɛ gáà Tuufɔli wi 'líɛ á yeli 'ki wori lúʔu dè m'mɛ́ gè, yeri ki siri. 5Ki 'nyaa Zan#1.5 Zan ŋáà wi 'puu nɛ siɛnnɛ batiize bèle Zurudɛn lakoligo nī gè wire wī, pe wi ye nɛ pínɛ Zan Batiisi. wi 'puu nɛ wi batɛmi kpínʔini wè nɛ́ luʔɔ ní; yeli sí bèle, náʔanɛ cɛnyɛ yáà cɛ̀ri ní, yeli batɛmi wi bé kpíʔile nɛ́ Kulocɛliɛ Pìle ní.»
6Bìli pe 'puu baa nɛ́ wi ní bèle, a pe 'wi yúgo nɛ́ wi yɛ: «Kàfɔli, kire lɛ̀lɛ lire nī lé muɔ bága koli bè Isirayɛli kùlofɔligɔ tɛ́ngɛ gè lé ?»
7A Zezi wi 'pe yɛ: «Lɛ̀gɛlɛ gílì Tuufɔli wi 'tɛ́ngɛ wire nigbe fànʔa nɛ̄ gè, yeli wecɛ́nrɛ bɛ̀ʔ tire dèʔ. 8Gìi sí ki 'cɛ́n gè, fànʔa káà bága pɛn yeli mɛ́; Kulocɛliɛ Pìle ni bé tìgi yeli kúrugu, bà yeli bé puu mi wori ti juufɔlilɔ Zerizalɛmi kàʔa nī gè, nɛ́ Zude tɛ́nimɛ tiɛrɛ ti mìɛni ní dè, nɛ́ Samarii tɛ́nimɛ ní bè, fúɔ bè sa nɔ̀ duniya láʔagɛlɛ nɛ̄ gèle.»
Zezi wi 'yɛ̀ nɛ̀ kɛ́ nyìʔɛnɛ nī
9Bà Zezi wi 'tire juu nɛ̀ kúɔ dè, a pe 'wi nyaa a wi 'fali nɛ̀ yɛ̀ nɛ waa nyìʔɛnɛ nī lè, a kàsadibagɛ káà pɛ́nì wi tɔ́n; piyè ń'nɛ̀ wi nyaaʔ. 10Bà sí pìtɛnmɛnɛ pe cé yéri nɛ́ yiɛyɛ yɛ̀gɛ yè nyìʔɛnɛ nī lè á wi ní nɛ waa wè, a pe kɛ́nì fuu nɛ̀ nàguɔlɔ pálì siin nyaa a pe pɛ́nì yéri pe táanni nɛ́ buruviire ní, 11nɛ́ pe yɛ: «Galile nàguɔlɔ yeli, gáa ye 'yéri nɛ wéli nyìʔɛnɛ nī lè mmɛ gè ? Zezi ŋáà yeli 'nyaa a Kulocɛliɛ wi 'wi yɛ̀gɛ yeli táanni nɛ̀ kɛ́ nyìʔɛnɛ nī lè, kire kanumɔ nɛ̄ wi bé ní ga pɛn, majo mɛni yeli 'wi nyaa wi waa nyìʔɛnɛ nī lè.»
Pìtɛnmɛnɛ pe 'wàa caa nɛ̀ nyɔ́gɔ Zudasi larigɛ nī gè
12A pìtɛnmɛnɛ pe sí yiri nyagurugo koligo nī gè, gàa pe 'puu nɛ ye Wolivi Tiire nyagurugo#1.12 Wolivi:Isirayɛli kùlo yasɛnrɛ táà dī, we bé gbɛ̀ ti tɔ́nminɔ nɛ́ lùʔulo ní. Pe nìɛ ki yasɛngɛ pìrimɛ káa bè, níɛ̀ nɛ sùnmɔ yigi ki cìʔile nī gèle. gè, nɛ̀ koli nɛ̀ kɛ́ Zerizalɛmi kàʔa mɛ́ gè. Ki nyagurugo ki wè liʔi nɛ́ kàʔa ní gèʔ, cɛndɛnigɛ tánʔana tɔnigɛnmɛ#1.12 Cɛ̀ri 'fɔ̀n culo nigbe nī: miɛtirele sirasicɛri togosicɛri nɛ́ kpɔrigɔ (890 m)..
13Bà pe sɛ́nì jíin kàʔa nī gè, a pe 'tánʔa nɛ̀ jíin saataʔaligɛ nī gè; kire tiʔɛ nī Piɛri nɛ́ Zan pe 'puu nɛ kòrí túɔn túɔn, peli nɛ́ Zaki nɛ́ Andire, nɛ́ Filipi nɛ́ Toma, nɛ́ Batelemii nɛ́ Matiye, nɛ́ Zaki Alife jaa wè, nɛ́ Siimɔ Zelɔti#1.13 Zelɔti: Míɛkuʔɔgɔ gī. Ki kɔri wi 'jo siɛn ŋáà wī kùlo kaala ni 'kpúʔɔ wi mɛ́ wè, á kire 'laa siɛn ŋáà wī fungo ní gè tànʔa gè., nɛ́ Zudasi Zaki jaa wè. 14Pe mìɛni bálì pe 'puu nɛ pínɛ nɛ kòrí fungo ní gè nigbe níɛ Kulocɛliɛ náari wè, peli nɛ́ cɛlilɛ ní bèle, nɛ́ Maari ní wè Zezi yàa wè, nɛ́ Zezi wi siinyɛninɛ ní bèle.
15A ki kɛ́nì nyaa cɛngɛ káà, tɛ́ngɛfɔlilɔ pe cé pìye pínɛ nɛ̀ siɛnnɛ tekɔlini kúɔ (120). A Piɛri 'yɛ̀ nɛ̀ yéri pe sunʔɔmɔ nī bè nɛ́ jo: 16«Nɛ siinyɛninɛ, siɛnrɛ dáà Kulocɛliɛ Pìle ni cé tí a Dawuda wi 'juu nɛ̀ yaʔa gbínʔɛnɛ Zudasi wori nɛ̄ dè baa Kulocɛliɛ siɛnsɛbɛrɛ nī dè, ki cé yɛli ki siɛnrɛ ti- fori. Zudasi wire wi cé kɛ́nì kíni Zezi còvɔlilɔ pe yiʔɛ mɛ́ gè nɛ̀ sɛ́nì wi tiʔɛ tìɛ gè. 17Wi cé tɔ́ri nɛ̀ nyɔ́gɔ weli nī, nɛ̀ wi liɛlɛ taa lè baara dáà nī dè. 18Wire sí wi cé siʔi suɔ nɛ́ kolimɔ sàri wali ní wè, nɛ́ sí kɛ́nì tuu ndìile nɛ̄ lè, a liyɛ yi 'foli a laara ti 'yiri. 19A Zerizalɛmi wuulo pe mìɛni 'ki kaala náà ni wori lúʔu dè, a pe sí ki siʔi gáà ki míʔɛ le gè pe kùlo siɛnrɛ nī dè nɛ̀ jo ‹Akɛlidama;› kire kɔri wi 'jo: ‹sìsiɛn siʔi#1.19 sìsiɛn siʔi: We bé gbɛ̀ jo senari siʔi.›. 20Bɛ̀ sí ki yē, Ŋúnuyɔ Sɛbɛ nī wè ki 'jo:
Wi kpáa ki bé kò waʔa, siɛn sǐ puu baa ki nīʔ # 1.20
Ŋún 69.26
tire ti 'juu náʔa gè. ,
nɛ̀ pínɛ wàa wi- wi larigɛ líɛ gè baara nī dè # 1.20
Ŋún 109.8
tire ti 'juu náʔa gè. .
21«Kire nɛ̄, ye- tí we- siɛn wáà wéli siɛnnɛ nī bèle, bàli pe tíi nɛ gbúʔuro nɛ́ weli ní bèle nɛ̀ ki líɛ bà Kàfɔli Zezi wi 'puu nɛ tári we sunʔɔmɔ nī bè, 22nɛ̀ ki líɛ Zan batɛmi lɛ̀lɛ nī lè, nɛ̀ pɛ́nì taa fúɔ cɛngɛ gíì Zezi wi cé kɛ́nì yiri we sunʔɔmɔ nī bè, á Kulocɛliɛ wi 'wi yɛ̀gɛ nɛ̀ kɛ́ nyìʔɛnɛ nī lè; ye- tí we kire siɛn wáà caa ŋàa wi bé puu Zezi wi nyɛ́yirile wori ti cɛ́nfɔli wè nɛ́ weli ní wè.»
23A pe 'siɛnnɛ siin tìɛ: Yusufu, n'ŋɛ pe ye Barisabasi wè níɛ wi ye nɛ pínɛ Zusutusi wè, wire nɛ́ Matiyasi. 24A pe 'Kulocɛliɛ náari wè nɛ́ jo: «Kàfɔli, muɔ ma 'siɛnnɛ pe mìɛni funyɔ cɛ́n yè; ŋìi muɔ 'nyíɛnɛ nɛ̀ kɔ̀n bàli pe siin nī bèle, -wi tìɛ weli nɛ̄. 25Wire wi bé baara larigɛ gáà líɛ gè Zezi tundunwɔ wuʔu gè, gàa Zudasi 'cíi gè, nɛ́ kɛ́ wi nyɛ́ni koligo nī gè.»
26A pe 'bìgele wáa gèle a ke 'Matiyasi tìɛ, a pe 'wi fàri Zezi tundunminɔ kiɛ nɛ́ nigbe nɛ̄ bèle.
Currently Selected:
Kakpiʔiligele 1: sev
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
