Kakpiʔiligele 15
15
Tɛ́ngɛfɔlilɔ pe sɛ́nì nyaagbuɔlɔ kpíʔile Zerizalɛmi mɛ́
1A ki 'nyaa Zuufulo tɛ́ngɛfɔlilɔ pálì cé kɔ́n Zude tɛ́nimɛ nī bè nɛ̀ pɛn Antiyɔsi kàʔa mɛ́ nɛ pɛ́ni pe siinyɛninɛ tɛnmɛ bèle, tɛ́ngɛfɔlilɔ bèle, nɛ́ pe yɛ: «A yeli sì kɛnɛkɛnɛ kpíʔile wèʔ bɛ̀ Misa Fànʔa Siɛnrɛ ti 'ki tìɛ gè#15.1 Wéli baa Lev 12.3; Gal 2.11,14; 5.2,3., yeli sǐ gbɛ̀ suɔlɔ taa lèʔ.»
2A ki siɛnrɛ dáà ti 'pɛn nɛ́ kàgbaaligɛ ní peli nɛ́ Pɔli nɛ́ Barinabasi sunʔɔmɔ ní bè; ki kàgbaaligɛ kiì puu cíʔɛʔ. A pe sí ki wéli, nɛ́ pàli yige pìye nī, nɛ̀ fàri Pɔli nɛ́ Barinabasi nɛ̄ bèle, nɛ̀ pe tun baa Zerizalɛmi kàʔa mɛ́ gè liɛlɛ mɛ́ bèle, peli nɛ́ Zezi tundunminɔ ní bèle, pe sa juu ki siɛnrɛ dáà nɛ̄ dè. 3A tɛ́ngɛfɔlilɔ gboli ni 'pe kɛn nɛ́ yɛrɛ ní dàa nɛ̄ pe màakuu wi 'puu pe tánʔana nɛ̄ lè. A pe 'sùuri Fenisii tɛ́nimɛ nī bè nɛ̀ sɛ́nì sùuri Samarii tɛ́nimɛ nī bè; pe 'puu nɛ ki nyu nɛ láʔala, dí kùlogolo kálì siɛnnɛ nyɛ́nì 'jíin tɛ́ngɛlɛ nī lè. A pe siɛnrɛ ti 'fundaanra nyɔ́gɔ tɛ́ngɛfɔlilɔ pe mìɛni nī kpuʔɔ.
4Bà pe sɛ́nì jíin Zerizalɛmi kàʔa nī gè a tɛ́ngɛfɔlilɔ pe 'pe kpàli; Zezi tundunminɔ pe 'puu baa nɛ́ liɛlɛ ní bèle. A Pɔli nɛ́ Barinabasi pe sí ti mìɛni tɔ́ri nɛ̀ tìɛ pe nɛ̄, gàa Kulocɛliɛ wi 'kpíʔile nɛ́ peli ní bèle. 5A tɛ́ngɛfɔlilɔ pálì 'yɛ̀ nɛ̀ yéri nɛ́ siɛnrɛ líɛ dè, ki 'nyaa peli cé kíni nɛ̀ puu Fariziɛnnɛ gboli wuulo, a pe 'jo: «Ki 'yɛli we- pe cɔ̀ri pe- kɛnɛkɛnɛ kpíʔile wè, bè Misa Fànʔa Siɛnrɛ ti koliyo tánʔa yè.»
6A Zezi tundunminɔ bèle nɛ́ liɛlɛ ní bèle, a pe 'kɛ́ bè sa pìye nyaa bè juu siɛnrɛ dáà nɛ̄ dè. 7A kàyuʔu 'yɛ̀ kpuʔɔ pe sunʔɔmɔ nī bè, a Piɛri kɛ́nì yɛ̀ nɛ̀ yéri nɛ́ pe yɛ: «Mi siinyɛninɛ, yeli 'ki cɛ́n Kulocɛliɛ wi 'mi nyíɛnɛ nɛ̀ yige yeli nī kiī faʔa, a kire 'ki kɛn a kùlogolo kálì siɛnnɛ 'Kataanna Siɛnrɛ taa dè nɛ̀ lúʔu mi nyuɔ nɛ̄, nɛ̀ tɛ́ngɛ. 8A Kulocɛliɛ míɛni wè, wire ŋáà wi 'siɛnnɛ funyɔ cɛ́n yè, a wi 'ki tìɛ dí wire nyɛ́nì fɔ̀li pe nɛ̄ bɛ̀ wi 'wi Pìle kɛn lè pe mɛ́ nɛ̀ pínɛ wè, majo bɛ̀ wi 'ki kpíʔile weli mɛ́ bèle. 9Wiì ki wáligiʔ, weli nɛ́ pe ní bèleʔ; wi 'pe funyɔ cìile yè nɛ́ tɛ́ngɛlɛ ní lè. 10Píra ŋáà nī wè, gáa nɛ̄ ye je Kulocɛliɛ nyuɔ caa gè, nɛ́ jo ye bé tugoro táà tugo tɛ́ngɛfɔlilɔ bálì nɛ̄ bèle, dàa weli tobilo piyè jáa nɛ̀ tugo dèʔ, bé nɛ́ ga jo weli bèle ? 11Nɛ̀ sí ki taa Kàfɔli Zezi wire kpuʔɔrɔ kɛnmɛ nɛ̄ bè, weli 'tɛ́ngɛ ki nɛ̄ weli nyɛ́nì suɔ bɛ̀ bàli tíɛlɛ bèle.»
12A pe 'pìiri, á siɛnniʔɛmɛ pi mìɛni 'kò nɛ lúru Pɔli nɛ́ Barinabasi mɛ́ bèle, pe Kulocɛliɛ fìɛlɛ wori nyu dè nɛ tìí, nɛ́ wi kakpoliyo ní yè, nyàa wi 'kpíʔile peli kiyɛ nī yè kùlogolo kálì siɛnnɛ sunʔɔmɔ nī bè.
13Bà pe kɛ́nì juu nɛ̀ kúɔ wè, a Zaki wi 'siɛnrɛ líɛ dè, nɛ́ pe yɛ: «Mi siinyɛninɛ, ye- lúʔu m'mɛ́. 14Siimɔ#15.14 Siimɔ: Piɛri wi míɛpelige kire ki 'puu (wéli baa Mat 4.18). wi 'ki juu nɛ̀ tìɛ we nɛ̄ mɛni Kulocɛliɛ wi 'ki kpíʔile sélimɛ nɛ̄ bè, nɛ́ kùlogolo kálì siɛnnɛ líɛ bèle nɛ̀ pe kpíʔile wire wuulo bèle. 15Ki siɛnrɛ ti 'yɛli baa nɛ́ Kulocɛliɛ siɛnjuuliɛlɛ pe wori ní dè, dàa pe 'sɛbɛ dè nɛ́ jo:
16 A kire kúɔ wè,
m'bé koli bè Dawuda saʔa
yérige gè, bɛ̀ ki 'tuu gè.
Bɛ̀ ki 'tuu á dìi 'kò dè,
m'bé koli bè ki yɛ̀gɛ bè yérige
ki- kò lìrige,
17 gìi ki bé tí siɛnnɛ sɛnminɛ bèle,
nɛ́ kùlogolo kálì ke mìɛni ní gèle,
peri Kàfɔli caa wè,
peli bálì mi 'yeri
pe- kò mi wuulo bèle.
Kàfɔli wi 'jo bɛ̀,
wire ŋáà wi nyɛ́ni
kele gálì kúu gèle,
18 wi kakpiʔiligele gálì
we 'cɛ́n a ki 'mɔgɔ gè # 15.18 Koliyo 16-18 tiʔɛ nī gè, Am 9.11-12 tire ti 'juu náʔa nɛ̀ yɛli nɛ́ girɛki siɛnliɛrɛ ní dè. .
19«Kire tiʔɛ gáà nī gè, mi 'ki nyaa kiì yɛliʔ we ní fùrɔgɔ taʔa kùlogolo kálì wuulo nɛ̄ bèleʔ, bàli pe 'pìye kɛn Kulocɛliɛ mɛ́ wè. 20Gìi ki 'pɔ́ri gè, we- siɛnrɛ sɛbɛ we tórigo pe mɛ́ we pe yɛ pe- pìye cò yasunro kaara nɛ̄ dè dàa tiī nɛ siɛn nɔ́ri Kulocɛliɛ yiʔɛ mɛ́ gè, nɛ́ kanuʔɔrɔ ní dè, nɛ́ yajuuro dáà pe sî seri nɛ̀ kpúu yétiige nī gè; nɛ̀ pínɛ pe fǎri sìsiɛn káa gèʔ#15.20 Wéli baa Yir 34.15-16; Lev 17.10-16. Siɛnrɛ dáà dè ti 'juu faʔa Zuufulo mɛ́ bèle. Pàngɛ gè cúʔɔmɔ nɛ́ tètii tire wuʔu kire ki 'kpúʔɔ, tɛ́ngɛfɔlilɔ pe 'yɛli bè pìye cò ti nɛ̄. Kasɛngɛlɛ gílì wori ti 'juu baa dè, Pɔli wi 'tɛnmɛnɛ kɛn Kor1 8.4-13.. 21Nɛ̀ taʔa gíi nɛ̄, bà ki 'líɛ faʔa liɛlɛ lɛ̀lɛ nī lè, piyē nɛ Misa Fànʔa Siɛnrɛ wéli dè tɛnmɛzaaya nī yè kàʔa ó kàʔa nī, cɛndɛnigɛ cɛngɛ ó cɛndɛnigɛ cɛngɛ.»
Kùlogolo kálì wuulo tɛ́ngɛlɛ wori dè
22A ti 'bìɛ pe mɛ́, a Zezi tundunminɔ bèle nɛ́ liɛlɛ ní bèle, nɛ̀ fàri tɛ́ngɛfɔlilɔ pe mìɛni nɛ̄ bèle, a pe 'nàguɔlɔ pálì nyíɛnɛ nɛ̀ yige pìye nī, nɛ̀ pe tun Antiyɔsi kàʔa mɛ́ gè, peli nɛ́ Pɔli nɛ́ Barinabasi. Zudasi ŋáà pe 'puu nɛ ye Barisabasi wè, a wire míɛni 'kɛ́ nɛ́ pe ni nɛ̀ fàri Silasi nɛ̄; pe siin bálì bèle pe 'puu nɛ tɔ́ri nɛ́ pe ní kpuʔɔ tɛ́ngɛfɔlilɔ sunʔɔmɔ nī bè.
23A siɛnrɛ ti 'sɛbɛ nɛ̀ le pe kiyɛ nī, pe yé jo: «Yeli siinyɛninɛ bèle, Zezi tundunminɔ bèle nɛ́ liɛlɛ ní bèle, peli pe nyɛ́ni yeli síɛri, yeli bèle Antiyɔsi kàʔa wuulo bèle, nɛ́ Siirii kùlo wuulo bèle, nɛ́ Silisii tɛ́nimɛ wuulo bèle, yeli bèle weli siinyɛninɛ bèle, kùlogolo kálì wuulo bèle. 24Bɛ̀ weli 'ki lúʔu dí siɛnnɛ pálì 'yiri náʔa weli sunʔɔmɔ nī bè nɛ̀ kɛ́ nɛ̀ sɛ́nì yeli funyɔ curugo yè nɛ́ pe siɛnjuuro ní dè, nɛ̀ sí ki taa peli bèle siɛn sì cé pe tun wèʔ, 25kire kɛnmɛ nɛ̄ weli 'bìɛ ki nɛ̄, nɛ̀ pàli nyíɛnɛ nɛ̀ yige wìye nī nɛ̀ fàri weli siinyɛninɛ Barinabasi nɛ́ Pɔli nɛ̄ bèle, nɛ̀ pe tórigo baa yeli mɛ́. 26Ki nàguɔlɔ bálì pe nyɛ́nì pe sìi pári wè Kàfɔli Zezi Kirisi wire míʔɛ kire kɛnmɛ nɛ̄ bè. 27A weli sí Zudasi nɛ́ Silasi tórigo bèle pe sa ki siɛnnuro dáà juu dè.
28«Kulocɛliɛ Pìle lè nɛ́ weli ní bèle, weli 'ki nyaa ki 'pɔ́ri we fǎga ní tugoro táà fáala tugo yeli nɛ̄ʔ, nɛ̀ yiri dàa nī dèʔ, dàa ti 'yɛli baa ti tiʔɛ nī gè, tire dī dàa dè: 29ye- yìye cò yasungo kaara nɛ̄ dè, nɛ́ sìsiɛn káʔa ní gè, nɛ́ yajuʔu gáà pe sî seri nɛ̀ kpúu yétiige nī gè, nɛ́ kanuʔɔrɔ ní dè; tire dáà dè a yeli 'ti yaʔa dè, ki bé pɔ́ri. Ye- ki yaʔa we- puu cɛ̀.»
30Nɛ́ sí tundunminɔ tórigo bèle Antiyɔsi kàʔa mɛ́ gè. Bà pe sɛ́nì jíin bèle a pe 'tɛ́ngɛfɔlilɔ gboli yeri lè nɛ̀ pe gbuʔulo nɛ́ sɛbɛ kɛn wè pe mɛ́. 31Bà pe 'sɛbɛ wi siɛnrɛ wéli dè, a ki 'funyɔ tɛ́ni yè pe nī, ki 'nyaa ti cé juu nɛ̀ ŋɔri nyɔ́gɔ pe nī.
32Zudasi wè nɛ́ Silasi ní wè, bɛ̀ peli 'puu Kulocɛliɛ siɛnjuulo bèle, a pe 'juu nɛ̀ mɔgɔ nɛ́ siinyɛninɛ ní bèle, nɛ̀ lèbaanna nɛ́ ŋɔri nyɔ́gɔ pe nī tɛ́ngɛlɛ nī lè, 33nɛ́ sí lɛ̀lɛ láà kúɔ baa nɛ́ pe ní. Kire kàduʔumɛ gè a tɛ́ngɛfɔlilɔ pe 'koligo yaʔa pe mɛ́, nɛ́ diba kpíʔile pe mɛ́, pe- koli pe kɛ́ yanyige nɛ̄ bìli kúrugu bèle, bàli pe cé pe tun bèle. 34[A Silasi wire 'ki nyaa ki 'pɔ́ri wire- kò baa nɛ́ pe ní, a wi sí kò baa.]
35Pɔli wire nɛ́ Barinabasi ní wè, a peli 'kò baa Antiyɔsi kàʔa mɛ́ gè, nɛ siɛnnɛ tɛnmɛ bèle, níɛ Kàfɔli wi Kataanna Siɛnrɛ jáari dè, peli nɛ́ pàli nìʔɛnɛ ní.
Pɔli nɛ́ Barinabasi pe 'láʔala pìye nɛ̄
36Bà cɛnyɛ yáà kɛ́nì tóri yè, a Pɔli wi 'Barinabasi yɛ wè: «Tí we- koli we tóri kàaya yi mìɛni nī yè, tiɛrɛ díì nī we yé Kàfɔli wi Kataanna Siɛnrɛ juu dè, we sa yiri baa weli siinyɛninɛ mɛ́ bèle, we- ki cɛ́n mɛni pe yē baa.»
37Barinabasi 'puu nɛ ki caa pe- Zan Mariki kɔ́ri wè nɛ́ pìye ní. 38Pɔli sì cé yéri ki nɛ̄ʔ pe- wi kɔ́ri pe pínɛ nɛ́ pìye ní wèʔ. Ki 'nyaa Zan Mariki wi cé koli pe kúrugu bà pe 'puu baa Panfilii tɛ́nimɛ nī bè; wiì cé wúɔ nɛ́ pe ní a pe 'baara kúɔ dèʔ. 39A siɛnrɛ ti 'tìi wáa nɛ̀ laa pe mɛ́ kpuʔɔ, fúɔ a kire 'kpíʔile kaala a pe 'láʔala pìye nɛ̄. A Barinabasi wi 'Mariki kɔ́ri wè a pe 'jíin kɔ́rikpuʔɔ nī gè nɛ̀ kɛ́ Siipiri tɛ́nimɛ nī bàa pi 'puu luʔɔ sunʔɔmɔ nī bè. 40Pɔli wire wè a wire sí Silasi kɔ́ri nɛ̀ fàri wìi nɛ̄, a tɛ́ngɛfɔlilɔ pe 'náari pe mɛ́, nɛ̀ pe le Kàfɔli wi kiyɛ nī. 41Pɔli wi 'puu nɛ nyaari nɛ tòrí Siirii kùlo nī lè nɛ́ Silisii tɛ́nimɛ ní bè, nɛ nyu nɛ ŋɔri nyɔ́gi tɛ́ngɛfɔlilɔ gbuʔulo nī gèle.
Currently Selected:
Kakpiʔiligele 15: sev
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
Kakpiʔiligele 15
15
Tɛ́ngɛfɔlilɔ pe sɛ́nì nyaagbuɔlɔ kpíʔile Zerizalɛmi mɛ́
1A ki 'nyaa Zuufulo tɛ́ngɛfɔlilɔ pálì cé kɔ́n Zude tɛ́nimɛ nī bè nɛ̀ pɛn Antiyɔsi kàʔa mɛ́ nɛ pɛ́ni pe siinyɛninɛ tɛnmɛ bèle, tɛ́ngɛfɔlilɔ bèle, nɛ́ pe yɛ: «A yeli sì kɛnɛkɛnɛ kpíʔile wèʔ bɛ̀ Misa Fànʔa Siɛnrɛ ti 'ki tìɛ gè#15.1 Wéli baa Lev 12.3; Gal 2.11,14; 5.2,3., yeli sǐ gbɛ̀ suɔlɔ taa lèʔ.»
2A ki siɛnrɛ dáà ti 'pɛn nɛ́ kàgbaaligɛ ní peli nɛ́ Pɔli nɛ́ Barinabasi sunʔɔmɔ ní bè; ki kàgbaaligɛ kiì puu cíʔɛʔ. A pe sí ki wéli, nɛ́ pàli yige pìye nī, nɛ̀ fàri Pɔli nɛ́ Barinabasi nɛ̄ bèle, nɛ̀ pe tun baa Zerizalɛmi kàʔa mɛ́ gè liɛlɛ mɛ́ bèle, peli nɛ́ Zezi tundunminɔ ní bèle, pe sa juu ki siɛnrɛ dáà nɛ̄ dè. 3A tɛ́ngɛfɔlilɔ gboli ni 'pe kɛn nɛ́ yɛrɛ ní dàa nɛ̄ pe màakuu wi 'puu pe tánʔana nɛ̄ lè. A pe 'sùuri Fenisii tɛ́nimɛ nī bè nɛ̀ sɛ́nì sùuri Samarii tɛ́nimɛ nī bè; pe 'puu nɛ ki nyu nɛ láʔala, dí kùlogolo kálì siɛnnɛ nyɛ́nì 'jíin tɛ́ngɛlɛ nī lè. A pe siɛnrɛ ti 'fundaanra nyɔ́gɔ tɛ́ngɛfɔlilɔ pe mìɛni nī kpuʔɔ.
4Bà pe sɛ́nì jíin Zerizalɛmi kàʔa nī gè a tɛ́ngɛfɔlilɔ pe 'pe kpàli; Zezi tundunminɔ pe 'puu baa nɛ́ liɛlɛ ní bèle. A Pɔli nɛ́ Barinabasi pe sí ti mìɛni tɔ́ri nɛ̀ tìɛ pe nɛ̄, gàa Kulocɛliɛ wi 'kpíʔile nɛ́ peli ní bèle. 5A tɛ́ngɛfɔlilɔ pálì 'yɛ̀ nɛ̀ yéri nɛ́ siɛnrɛ líɛ dè, ki 'nyaa peli cé kíni nɛ̀ puu Fariziɛnnɛ gboli wuulo, a pe 'jo: «Ki 'yɛli we- pe cɔ̀ri pe- kɛnɛkɛnɛ kpíʔile wè, bè Misa Fànʔa Siɛnrɛ ti koliyo tánʔa yè.»
6A Zezi tundunminɔ bèle nɛ́ liɛlɛ ní bèle, a pe 'kɛ́ bè sa pìye nyaa bè juu siɛnrɛ dáà nɛ̄ dè. 7A kàyuʔu 'yɛ̀ kpuʔɔ pe sunʔɔmɔ nī bè, a Piɛri kɛ́nì yɛ̀ nɛ̀ yéri nɛ́ pe yɛ: «Mi siinyɛninɛ, yeli 'ki cɛ́n Kulocɛliɛ wi 'mi nyíɛnɛ nɛ̀ yige yeli nī kiī faʔa, a kire 'ki kɛn a kùlogolo kálì siɛnnɛ 'Kataanna Siɛnrɛ taa dè nɛ̀ lúʔu mi nyuɔ nɛ̄, nɛ̀ tɛ́ngɛ. 8A Kulocɛliɛ míɛni wè, wire ŋáà wi 'siɛnnɛ funyɔ cɛ́n yè, a wi 'ki tìɛ dí wire nyɛ́nì fɔ̀li pe nɛ̄ bɛ̀ wi 'wi Pìle kɛn lè pe mɛ́ nɛ̀ pínɛ wè, majo bɛ̀ wi 'ki kpíʔile weli mɛ́ bèle. 9Wiì ki wáligiʔ, weli nɛ́ pe ní bèleʔ; wi 'pe funyɔ cìile yè nɛ́ tɛ́ngɛlɛ ní lè. 10Píra ŋáà nī wè, gáa nɛ̄ ye je Kulocɛliɛ nyuɔ caa gè, nɛ́ jo ye bé tugoro táà tugo tɛ́ngɛfɔlilɔ bálì nɛ̄ bèle, dàa weli tobilo piyè jáa nɛ̀ tugo dèʔ, bé nɛ́ ga jo weli bèle ? 11Nɛ̀ sí ki taa Kàfɔli Zezi wire kpuʔɔrɔ kɛnmɛ nɛ̄ bè, weli 'tɛ́ngɛ ki nɛ̄ weli nyɛ́nì suɔ bɛ̀ bàli tíɛlɛ bèle.»
12A pe 'pìiri, á siɛnniʔɛmɛ pi mìɛni 'kò nɛ lúru Pɔli nɛ́ Barinabasi mɛ́ bèle, pe Kulocɛliɛ fìɛlɛ wori nyu dè nɛ tìí, nɛ́ wi kakpoliyo ní yè, nyàa wi 'kpíʔile peli kiyɛ nī yè kùlogolo kálì siɛnnɛ sunʔɔmɔ nī bè.
13Bà pe kɛ́nì juu nɛ̀ kúɔ wè, a Zaki wi 'siɛnrɛ líɛ dè, nɛ́ pe yɛ: «Mi siinyɛninɛ, ye- lúʔu m'mɛ́. 14Siimɔ#15.14 Siimɔ: Piɛri wi míɛpelige kire ki 'puu (wéli baa Mat 4.18). wi 'ki juu nɛ̀ tìɛ we nɛ̄ mɛni Kulocɛliɛ wi 'ki kpíʔile sélimɛ nɛ̄ bè, nɛ́ kùlogolo kálì siɛnnɛ líɛ bèle nɛ̀ pe kpíʔile wire wuulo bèle. 15Ki siɛnrɛ ti 'yɛli baa nɛ́ Kulocɛliɛ siɛnjuuliɛlɛ pe wori ní dè, dàa pe 'sɛbɛ dè nɛ́ jo:
16 A kire kúɔ wè,
m'bé koli bè Dawuda saʔa
yérige gè, bɛ̀ ki 'tuu gè.
Bɛ̀ ki 'tuu á dìi 'kò dè,
m'bé koli bè ki yɛ̀gɛ bè yérige
ki- kò lìrige,
17 gìi ki bé tí siɛnnɛ sɛnminɛ bèle,
nɛ́ kùlogolo kálì ke mìɛni ní gèle,
peri Kàfɔli caa wè,
peli bálì mi 'yeri
pe- kò mi wuulo bèle.
Kàfɔli wi 'jo bɛ̀,
wire ŋáà wi nyɛ́ni
kele gálì kúu gèle,
18 wi kakpiʔiligele gálì
we 'cɛ́n a ki 'mɔgɔ gè # 15.18 Koliyo 16-18 tiʔɛ nī gè, Am 9.11-12 tire ti 'juu náʔa nɛ̀ yɛli nɛ́ girɛki siɛnliɛrɛ ní dè. .
19«Kire tiʔɛ gáà nī gè, mi 'ki nyaa kiì yɛliʔ we ní fùrɔgɔ taʔa kùlogolo kálì wuulo nɛ̄ bèleʔ, bàli pe 'pìye kɛn Kulocɛliɛ mɛ́ wè. 20Gìi ki 'pɔ́ri gè, we- siɛnrɛ sɛbɛ we tórigo pe mɛ́ we pe yɛ pe- pìye cò yasunro kaara nɛ̄ dè dàa tiī nɛ siɛn nɔ́ri Kulocɛliɛ yiʔɛ mɛ́ gè, nɛ́ kanuʔɔrɔ ní dè, nɛ́ yajuuro dáà pe sî seri nɛ̀ kpúu yétiige nī gè; nɛ̀ pínɛ pe fǎri sìsiɛn káa gèʔ#15.20 Wéli baa Yir 34.15-16; Lev 17.10-16. Siɛnrɛ dáà dè ti 'juu faʔa Zuufulo mɛ́ bèle. Pàngɛ gè cúʔɔmɔ nɛ́ tètii tire wuʔu kire ki 'kpúʔɔ, tɛ́ngɛfɔlilɔ pe 'yɛli bè pìye cò ti nɛ̄. Kasɛngɛlɛ gílì wori ti 'juu baa dè, Pɔli wi 'tɛnmɛnɛ kɛn Kor1 8.4-13.. 21Nɛ̀ taʔa gíi nɛ̄, bà ki 'líɛ faʔa liɛlɛ lɛ̀lɛ nī lè, piyē nɛ Misa Fànʔa Siɛnrɛ wéli dè tɛnmɛzaaya nī yè kàʔa ó kàʔa nī, cɛndɛnigɛ cɛngɛ ó cɛndɛnigɛ cɛngɛ.»
Kùlogolo kálì wuulo tɛ́ngɛlɛ wori dè
22A ti 'bìɛ pe mɛ́, a Zezi tundunminɔ bèle nɛ́ liɛlɛ ní bèle, nɛ̀ fàri tɛ́ngɛfɔlilɔ pe mìɛni nɛ̄ bèle, a pe 'nàguɔlɔ pálì nyíɛnɛ nɛ̀ yige pìye nī, nɛ̀ pe tun Antiyɔsi kàʔa mɛ́ gè, peli nɛ́ Pɔli nɛ́ Barinabasi. Zudasi ŋáà pe 'puu nɛ ye Barisabasi wè, a wire míɛni 'kɛ́ nɛ́ pe ni nɛ̀ fàri Silasi nɛ̄; pe siin bálì bèle pe 'puu nɛ tɔ́ri nɛ́ pe ní kpuʔɔ tɛ́ngɛfɔlilɔ sunʔɔmɔ nī bè.
23A siɛnrɛ ti 'sɛbɛ nɛ̀ le pe kiyɛ nī, pe yé jo: «Yeli siinyɛninɛ bèle, Zezi tundunminɔ bèle nɛ́ liɛlɛ ní bèle, peli pe nyɛ́ni yeli síɛri, yeli bèle Antiyɔsi kàʔa wuulo bèle, nɛ́ Siirii kùlo wuulo bèle, nɛ́ Silisii tɛ́nimɛ wuulo bèle, yeli bèle weli siinyɛninɛ bèle, kùlogolo kálì wuulo bèle. 24Bɛ̀ weli 'ki lúʔu dí siɛnnɛ pálì 'yiri náʔa weli sunʔɔmɔ nī bè nɛ̀ kɛ́ nɛ̀ sɛ́nì yeli funyɔ curugo yè nɛ́ pe siɛnjuuro ní dè, nɛ̀ sí ki taa peli bèle siɛn sì cé pe tun wèʔ, 25kire kɛnmɛ nɛ̄ weli 'bìɛ ki nɛ̄, nɛ̀ pàli nyíɛnɛ nɛ̀ yige wìye nī nɛ̀ fàri weli siinyɛninɛ Barinabasi nɛ́ Pɔli nɛ̄ bèle, nɛ̀ pe tórigo baa yeli mɛ́. 26Ki nàguɔlɔ bálì pe nyɛ́nì pe sìi pári wè Kàfɔli Zezi Kirisi wire míʔɛ kire kɛnmɛ nɛ̄ bè. 27A weli sí Zudasi nɛ́ Silasi tórigo bèle pe sa ki siɛnnuro dáà juu dè.
28«Kulocɛliɛ Pìle lè nɛ́ weli ní bèle, weli 'ki nyaa ki 'pɔ́ri we fǎga ní tugoro táà fáala tugo yeli nɛ̄ʔ, nɛ̀ yiri dàa nī dèʔ, dàa ti 'yɛli baa ti tiʔɛ nī gè, tire dī dàa dè: 29ye- yìye cò yasungo kaara nɛ̄ dè, nɛ́ sìsiɛn káʔa ní gè, nɛ́ yajuʔu gáà pe sî seri nɛ̀ kpúu yétiige nī gè, nɛ́ kanuʔɔrɔ ní dè; tire dáà dè a yeli 'ti yaʔa dè, ki bé pɔ́ri. Ye- ki yaʔa we- puu cɛ̀.»
30Nɛ́ sí tundunminɔ tórigo bèle Antiyɔsi kàʔa mɛ́ gè. Bà pe sɛ́nì jíin bèle a pe 'tɛ́ngɛfɔlilɔ gboli yeri lè nɛ̀ pe gbuʔulo nɛ́ sɛbɛ kɛn wè pe mɛ́. 31Bà pe 'sɛbɛ wi siɛnrɛ wéli dè, a ki 'funyɔ tɛ́ni yè pe nī, ki 'nyaa ti cé juu nɛ̀ ŋɔri nyɔ́gɔ pe nī.
32Zudasi wè nɛ́ Silasi ní wè, bɛ̀ peli 'puu Kulocɛliɛ siɛnjuulo bèle, a pe 'juu nɛ̀ mɔgɔ nɛ́ siinyɛninɛ ní bèle, nɛ̀ lèbaanna nɛ́ ŋɔri nyɔ́gɔ pe nī tɛ́ngɛlɛ nī lè, 33nɛ́ sí lɛ̀lɛ láà kúɔ baa nɛ́ pe ní. Kire kàduʔumɛ gè a tɛ́ngɛfɔlilɔ pe 'koligo yaʔa pe mɛ́, nɛ́ diba kpíʔile pe mɛ́, pe- koli pe kɛ́ yanyige nɛ̄ bìli kúrugu bèle, bàli pe cé pe tun bèle. 34[A Silasi wire 'ki nyaa ki 'pɔ́ri wire- kò baa nɛ́ pe ní, a wi sí kò baa.]
35Pɔli wire nɛ́ Barinabasi ní wè, a peli 'kò baa Antiyɔsi kàʔa mɛ́ gè, nɛ siɛnnɛ tɛnmɛ bèle, níɛ Kàfɔli wi Kataanna Siɛnrɛ jáari dè, peli nɛ́ pàli nìʔɛnɛ ní.
Pɔli nɛ́ Barinabasi pe 'láʔala pìye nɛ̄
36Bà cɛnyɛ yáà kɛ́nì tóri yè, a Pɔli wi 'Barinabasi yɛ wè: «Tí we- koli we tóri kàaya yi mìɛni nī yè, tiɛrɛ díì nī we yé Kàfɔli wi Kataanna Siɛnrɛ juu dè, we sa yiri baa weli siinyɛninɛ mɛ́ bèle, we- ki cɛ́n mɛni pe yē baa.»
37Barinabasi 'puu nɛ ki caa pe- Zan Mariki kɔ́ri wè nɛ́ pìye ní. 38Pɔli sì cé yéri ki nɛ̄ʔ pe- wi kɔ́ri pe pínɛ nɛ́ pìye ní wèʔ. Ki 'nyaa Zan Mariki wi cé koli pe kúrugu bà pe 'puu baa Panfilii tɛ́nimɛ nī bè; wiì cé wúɔ nɛ́ pe ní a pe 'baara kúɔ dèʔ. 39A siɛnrɛ ti 'tìi wáa nɛ̀ laa pe mɛ́ kpuʔɔ, fúɔ a kire 'kpíʔile kaala a pe 'láʔala pìye nɛ̄. A Barinabasi wi 'Mariki kɔ́ri wè a pe 'jíin kɔ́rikpuʔɔ nī gè nɛ̀ kɛ́ Siipiri tɛ́nimɛ nī bàa pi 'puu luʔɔ sunʔɔmɔ nī bè. 40Pɔli wire wè a wire sí Silasi kɔ́ri nɛ̀ fàri wìi nɛ̄, a tɛ́ngɛfɔlilɔ pe 'náari pe mɛ́, nɛ̀ pe le Kàfɔli wi kiyɛ nī. 41Pɔli wi 'puu nɛ nyaari nɛ tòrí Siirii kùlo nī lè nɛ́ Silisii tɛ́nimɛ ní bè, nɛ nyu nɛ ŋɔri nyɔ́gi tɛ́ngɛfɔlilɔ gbuʔulo nī gèle.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.