Kakpiʔiligele 16

Pɔli nɛ́ Silasi pe 'Timote kɔ́ri nɛ̀ fàri pìye nɛ̄

1A Pɔli wi sɛ́nì nɔ̀ Dɛribi kàʔa nɛ̄, nɛ̀ sùuri nɛ̀ fali Liisitiri kàʔa mɛ́. A ki 'nyaa tɛ́ngɛfɔli wáà 'puu baa pe 'puu nɛ wi ye Timote; Zuufu tɛ́ngɛfɔcuɔ wáà jaa wi 'puu, wi tuu ní wè Girɛki kùlo wuu. 2Liisitiri kàʔa tɛ́ngɛfɔlilɔ bèle nɛ́ Ikonɔmi kàʔa wuulo ní bèle, pe 'puu nɛ Timote wi míɛtanʔa yeri. 3A ki 'Pɔli dɛ́ni wè bè Timote kɔ́ri wè wi- puu wire kodanʔanyɛni. A wi sí Timote kɛnɛkɛnɛ wè Zuufulo peli kɛnmɛ nɛ̄, bàli pe 'puu baa ki tiʔɛ tɛ́nimɛ báà nī bè. Ki 'nyaa pe mìɛni cé ki cɛ́n wi tuu wi 'puu Girɛki kùlo wuu.

4A pe cé gbɛ́nɛ̀ tóri kàʔa ó kàʔa nī gè, Pɔli wire nɛ́ Silasi ní wè, pe nɛ̂ cé ti juu nɛ̀ tìɛ tɛ́ngɛfɔlilɔ nɛ̄ bèle, katiʔɛlɛ gílì Zezi tundunminɔ nɛ́ liɛlɛ pe cé juu nɛ̀ bìɛ gèle Zerizalɛmi kàʔa mɛ́ gè, níɛ̀ sí pe yɛ peri tári ti nɛ̄. 5A tɛ́ngɛfɔlilɔ gbuʔulo ke sí nìre wáa tɛ́ngɛlɛ nī lè; cɛngɛ ó cɛngɛ kàa 'puu nɛ taʔala pe nyuɔ nɛ̄ gè.

Kulocɛliɛ wi 'kaala láà tìɛ Pɔli nɛ̄ wè Turowasi kàʔa nī gè

6A Pɔli nɛ́ Silasi ní wè a pe 'nyaari nɛ̀ tóri Firizii kùlo nī lè nɛ́ Galasi kùlo ní lè; Kulocɛliɛ Pìle niì cé fɔ̀li ki nɛ̄ʔ pe- Kulocɛliɛ siɛnrɛ juu dè Azii tɛ́nimɛ nī bèʔ. 7Bà pe sɛ́nì nɔ̀ Misii tɛ́nimɛ jíinmɛ nɛ̄ bè, a pe 'pìye ŋàʔana bè kɛ́ Biitinii tɛ́nimɛ nī. Nɛ̀ sí ki taa Zezi Pìle niì fɔ̀li nɛ́ pe níʔ. 8A pe sí sùuri Misii tɛ́nimɛ nī bè nɛ̀ kɛ́ Turowasi kàʔa mɛ́. 9Cɛngɛ káà pìlige nī a Kulocɛliɛ wi 'Pɔli yiʔɛ múgu gè, a wi 'kaala láà nyaa, ki kaala n'nɛ: Maseduwani tɛ́nimɛ nàguɔ wáà pɛ́nì yéri nɛ̀ wi fiɛn nɛ́ wi yɛ: «Tóri baa Maseduwani tɛ́nimɛ nī bè ma sa weli sáʔa.»

10Bà kaala náà ni 'tóri lè, a weli 'yɛ̀ fáari nɛ koligo caa bè kɛ́ Maseduwani tɛ́nimɛ nī bè. Ki 'nyaa weli cé tɛ́ngɛ ki nɛ̄ Kulocɛliɛ wire wi 'weli yeri we sa Kataanna Siɛnrɛ juu dè.

Liidii wi 'tɛ́ngɛ Zezi nɛ̄ Filipi kàʔa mɛ́

11Bà we 'jíin kɔ́rikpuʔɔ nī gè nɛ̀ yiri Turowasi kàʔa nī gè, a we 'sìɛn térire Samotirasi kùpile mɛ́ nàa ni 'puu luʔɔ sunʔɔmɔ nī bè. Ki kpìɛnduu gè a we 'jíin Neyapoliisi kàʔa nī. 12Bà we 'yiri kire tiʔɛ nī gè a we 'kɛ́ Filipi kàʔa mɛ́, kire gī Maseduwani kàkpuʔɔ gè; Wurɔmi wuulo pe 'puu nɛ fànʔa kpúɔn ki kàʔa nɛ̄ gè a ki 'mɔgɔ. A we 'cɛnyɛ yáà kúɔ baa ki kàʔa nī gè.

13 Cɛndɛnigɛ cɛngɛ gè, a weli 'yiri kàʔa nī gè nɛ̀ kɛ́ lakoligo mɛ́ gè, níɛ sɔ̀ngí weli bàa tiʔɛ taa baa bè Kulocɛliɛ náari wè. Bà weli 'tɛ́ni bèle, cɛlilɛ bálì pe 'puu baa gbuʔulilo bèle, a weli 'séli nɛ nyu nɛ́ pe ní. 14Wàa 'puu baa ki cɛlilɛ nī bèle, pe 'puu nɛ wi ye Liidii; Tiyatiiri kàʔa mɛ́ wi cé kɔ́n, lagbɛnrɛ fɛ̀ninɛ wi 'puu nɛ pári, kábebe céri wuulo. Ki cuɔ ŋáà wi 'puu nɛ Kulocɛliɛ gbùʔɔrɔ́ wè. Wire wè wi cé líiye cáan nɛ lúru. Ki 'nyaa Kàfɔli wi cé wi fungo múgu gè wi Pɔli siɛnrɛ lúru dè, 15fúɔ a wi cɛ́nì batɛmi kpíʔile wè, wire nɛ́ wi saʔa wuulo ní bèle. A wi 'weli fiɛn nɛ́ jo: «A ki yē yeli 'ki nyaa mi tɛ́ngɛlɛ ni 'yɛli baa ni tiʔɛ nī gè Kàfɔli nī wè, yeri báan ye pa kò náʔa mi saʔa mɛ́ gè.»

A wi 'weli ŋàʔana fúɔ nɛ̀ taa a weli pɛ́nì yéri ki nɛ̄.

Pe 'Pɔli nɛ́ Silasi tɔ́n kasuu nī

16Làa nɛ̄ weli 'puu nɛ waa Kulocɛliɛ náaridiʔɛ nī gè, a sùkulocuɔ wáà sɛ́nì yiri weli kúrugu; fùu wi cé wi kánʔa. Wi 'puu nɛ kele kálì nyaʔa nɛ nyu wi kàfɔlilɔ mɛ́ bèle, a kire 'ki kɛn pe wali tari nìʔɛgɛ. 17A ki cuɔ wi 'líɛ nɛ̀ taʔa weli kúrugu, weli nɛ́ Pɔli ní wè, níɛ nyu kpuʔɔ níɛ wáa: «Siɛnnɛ bálì bèle, Kulocɛliɛ ŋáà wī Duniya wi Mìɛni Nyùgo nɛ̄ gè, wire baakuɔlɔ bīɛlɛ ! Suɔlɔ koligo kire wori piyē nɛ nyu yeli mɛ́ !»

18A wi 'fàan nɛ ki siɛnrɛ dáà nyu dè nɛ̀ pɛ́nì taa cɛnyɛ nyuɔ. A ti kɛ́ni Pɔli ngbúʔulo fúugi gèle wi nɛ̄, a wi 'yiʔɛ nɛ̀ juu ki gbòdoli nɛ̄ wè nɛ́ jo: «M'bé ki juu muɔ mɛ́ Zezi Kirisi míʔɛ nɛ̄, yiri cɛliwɛ ŋáà nī wè !»

Tiɛnugo nī gè a gbòdoli wi 'fali nɛ̀ yiri cɛliwɛ nī wè sɛni. 19Bà cɛliwɛ wi kàfɔlilɔ pe 'ki nyaa peli wali taadiʔɛ ki 'cúʔɔ gè, a pe 'Pɔli cò wè, wire nɛ́ Silasi ní wè, nɛ̀ pe dàridari nɛ̀ kɛ́ dàlikpuʔɔ mɛ́ gè kàʔafɔlilɔ kúrugu bèle, 20nɛ̀ sɛ́nì pe kɛn Wurɔmiyé kàyuʔujuulo mɛ́ bèle, nɛ́ jo: «Siɛnnɛ bálì bèle, Zuufulo bīɛlɛ, piyē nɛ siɛnnɛ sɔ̀ngirɔ nyaʔami dè weli kàʔa nī gè. 21Piyē nɛ kaliɛmɛ páà tɛnmɛ siɛnnɛ nɛ̄ bèle; kire kaliɛmɛ báà bè, weli bálì bīɛlɛ Wurɔmiyé bèle, weli sǐ gbɛ̀ yéri kire nɛ̄ʔ.»

22A siɛnniʔɛmɛ pi 'yɛ̀ pe kúrugu, a kàyuʔujuulo pe 'siɛnnɛ líʔi bèle nɛ̀ wáa pe nɛ̄, a pe 'pe bururo píle dè nɛ̀ fòlilo pe nɛ̄, nɛ́ tí a pe 'pe kpúɔn sápinyiʔɛnɛ nɛ̄. 23Bà pe kɛ́nì pe tári nɛ̀ kpúɔn bèle, a pe 'pe cò nɛ̀ sɛ́nì wáa kasuu nī, nɛ́ kasuusaʔa wélifɔli yɛ wè wi de pe sɔ́migi de wéli cɛ̀ngɛ. 24Bà pe sí kire tunduro dáà kɛn dè kasuusaʔa wélifɔli mɛ́ wè, a wi 'Pɔli nɛ́ Silasi nyɔ́gɔ bèle baa kasuusaʔa laamɛ nī bè, nɛ́ kpàʔaliyɛ le pe tɔliyɔ nɛ̄ yè.

Kasuusaʔa wélifɔli wi 'tɛ́ngɛ Zezi nɛ̄ wè

25Bà pìlige ki pɛ́nì wúɔ nɛ̀ nɔ̀ nyìjaliɛlɛ lɛ̀lɛ nī lè, a Pɔli nɛ́ Silasi ní wè a pe 'yɛ̀ nɛ Kulocɛliɛ náari wè níɛ wi gbùʔɔrɔ́ ŋúniyɔ ní; kasuulebele bílì pe 'puu nɛ lúru pe mɛ́. 26A dàala ni kɛ́nì fuu nɛ cúngo kpuʔɔ, a kasuusaʔa kàkpuɔnnɔ pe 'yúgɔ. A kɔ̀riyɔ yi mìɛni 'fali nɛ̀ múgolo sɛni, a kasuulebele pe mìɛni nɛ̀gɛjɔliyɔ yi 'sáʔala pe tɔliyɔ nɛ̄ yè.

27Bà kasuusaʔa wélifɔli wi kɛ́nì yɛ̀ ŋɔ́nimɔ nɛ̄ bè, nɛ́ kasuusaʔa kɔ̀riyɔ nyaa yè múguyo yè, a wi 'wi ŋɔsii píle wè nɛ̀ yige wi kpàfuʔu nī gè; wi 'puu nɛ caa bè wìi kpúu wī. Ki 'nyaa wi 'puu nɛ ki sɔ̀ngí nɛ̀ jo dùʔɔ kasuulebele pe 'fɛ̀ nɛ̀ suɔ wī.

28A Pɔli wi 'kòkuulo wáa wi kúrugu kpuʔɔ nɛ́ jo: «Fǎga ki puu bɛ̀ʔ; weli yē náʔa we mìɛni bèle !»

29A wi 'jo peri báan fètinnɛ ní, nɛ́ fɛ̀ nɛ̀ jíin, nɛ̀ tuu nɛ fún nɛ yàʔará, nɛ̀ káguro wáa Pɔli nɛ́ Silasi yiʔɛ mɛ́ gè. 30A wi 'pe kɔ́ri nɛ̀ yige kpànʔanɛ nɛ̀ sɛ́nì pe yúgo nɛ́ pe yɛ: «Gáa mi 'yɛli bè kpíʔile bé sí suɔ wè ?»

31A pe sí 'wi yɛ: «Tɛ́ngɛ Kàfɔli Zezi nɛ̄ wè, bɛ̀ muɔ bé suɔ nɛ́ muɔ saʔa wuulo ní bèle.»

32A pe 'Kàfɔli wi siɛnrɛ juu dè kasuusaʔa kàfɔli mɛ́ wè, nɛ́ wi kpáa wuulo pe mìɛni ní bèle. 33Ki pìlige nī gè, a kasuusaʔa kàfɔli wi 'pe kɔ́ri nɛ̀ sɛ́nì nɔmirɔ gbàri dè pe nɛ̄, nɛ́ tí a pe 'wi batiize, wire wè nɛ́ wi saʔa wuulo pe mìɛni ní bèle. 34A wi 'kúɔ nɛ́ Pɔli nɛ́ Silasi kɔ́ri bèle a pe 'kɛ́ nɛ̀ sɛ́nì lìi wi kpáa mɛ́, nɛ́ sí ki fundaanra kpíʔile dè nɛ́ wi kpáa wuulo ní bèle, bɛ̀ wire 'tɛ́ngɛ Kulocɛliɛ nɛ̄ wè.

Pe 'Pɔliyé yaʔa bèle a pe 'kɛ́

35Bà kpìɛnmɛ pi 'yɛ̀ nɛ̀ tuu wè, a kàyuʔujuulo pe 'kapiɛngbuɔnnɔ yɛ̀gɛ nɛ̀ tórigo nɛ́ jo pe sa kasuusaʔa kàfɔli yɛ wè wi- siɛnnɛ bálì yaʔa bèle peri waa.

36A kasuusaʔa kàfɔli wi sɛ́nì ki siɛnrɛ juu dè Pɔli mɛ́ wè, nɛ́ wi yɛ dí kàyuʔujuulo pe 'jo wire- pe yaʔa peri waa. Kire nɛ̄ píra ŋáà nī wè, pe- yiri peri waa yanyige nɛ̄.

37A Pɔli sí pe yɛ: «Pe 'weli kɛn a pe 'weli kpúɔn siɛnnɛ yiʔɛ mɛ́ gè kàyuʔu sìnjuu nī. Wurɔmi kùlo wuulo bīɛlɛ weli bèle, á pe sí weli cò nɛ̀ tɔ́n kasuu nī, píra ŋáà nī wè nɛ́ jo pe bé weli múgu wáa làrimɛ nī lé ? ʔéʔe, kire sǐ gbɛ̀ kpíʔileʔ, fúɔ macɛn peli tíimɛ bèle peri báan pe pa weli tórigo.»

38A kapiɛngbuɔnnɔ pe 'kɛ́ nɛ̀ sɛ́nì ki siɛnrɛ dáà juu dè kàyuʔujuulo mɛ́ bèle. A ki siɛnrɛ ti 'fíɛrɛ cò pe nɛ̄, bɛ̀ ki 'nyaa Wurɔmi kùlo wuulo bīɛlɛ pe 'puu bèle. 39A pe 'pɛn nɛ̀ pɛ́nì náarigɛ kpíʔile pe mɛ́, nɛ́ kúɔ nɛ́ pe yige kasuu nī wè, nɛ́ sí pe fiɛn pe- yiri kàʔa nī gè. 40Bà pe 'yiri kasuusaʔa nī gè, a pe 'kɛ́ Liidii kpáa mɛ́. A pe sɛ́nì tɛ́ngɛfɔlilɔ nyaa bèle baa, a pe 'siɛnrɛ juu nɛ̀ lèbaanna nyɔ́gɔ pe nī, nɛ́ yiri nɛ̀ kɛ́.

Currently Selected:

Kakpiʔiligele 16: sev

Highlight

Copy