Kakpiʔiligele 3

Piɛri nɛ́ Zan pe 'loli wáà puʔɔ

1Cɛngɛ káà cɛnguʔɔ, cɛngɛ ki cé cɛ̀li nɛ̀ nɔ̀ Kulocɛliɛ náari lɛ̀lɛ nī, a Piɛri nɛ́ Zan a pe 'kɛ́ náarigɛ mɛ́ gè Kulocɛliɛ Gbùʔɔrɔsaʔa mɛ́ gè. 2Nàguɔ wáà 'puu baa saʔa wìile yiʔɛ mɛ́ gè tɔliyɔ ní yè nɛ̀ mɔ̀nigɔ wi nɛ̄; wi cé sii nɛ́ yi ní bɛ̀ wī. Pe 'puu nɛ wìile náà yeri lè nɛ pínɛ Wìicɛnnɛ. Cɛngɛ ó cɛngɛ, pe nɛ̂ cé sɛ́nì wi tɛ́ngɛ baa wìile náà táanni lè, wiri siɛnnɛ náari bèle a pe gbɛ́nɛ̀ pɛ́nì je jíin Kulocɛliɛ Gbùʔɔrɔsaʔa nī gè. 3A Piɛri nɛ́ Zan a pe pɛ́nì yiri, bà pe je jíin bèle, a nàguɔ ŋáà wi 'pe náari. 4A Piɛri nɛ́ Zan ní wè a pe 'yiɛyɛ le yè wi nī nɛ̀ wi wéli, nɛ́ kɛ́nì wi yɛ: «Te weli wéli.»

5A wi 'yɛ̀ nɛ pe wéli, níɛ sɔ̀ngí wire bé yakaa taa pe mɛ́.

6A Piɛri sí wi yɛ: «Wali wè m'mɛ́ʔ, bé nɛ́ ga jo tiɛʔ; gìi sí mi 'taa gè m'bé ki kɛn muɔ mɛ́: Zezi Kirisi míʔɛ nɛ̄ gè, Nazarɛti kàʔa wuu wè, yɛ̀ mari tári !» 7Nɛ́ fali nɛ̀ wi cò kàliige nɛ̄ gè nɛ̀ yɛ̀gɛ sɛni, a tɔliyɔ nyapigele tiɛyɛ nɛ́ tɔliyɔ ní yè a yi 'fali nɛ̀ 'lìri.

8A wi 'yo nɛ̀ yɛ̀ nɛ̀ fali nɛ tári sɛni, nɛ̀ sɛ́nì jíin nɛ́ pe ní Kulocɛliɛ Gbùʔɔrɔsaʔa nī gè, nɛ tári níɛ yogi nɛ Kulocɛliɛ gbùʔɔrɔ́ wè. 9A siɛnnɛ pe mìɛni 'wi nyaa wi tári níɛ Kulocɛliɛ gbùʔɔrɔ́ wè. 10Bà pe kɛ́nì wi nyaa nɛ̀ cɛ́n wè, nɛ́ ki cɛ́n nàguɔ ŋáà wire wi 'puu nɛ kòrí baa Kulocɛliɛ Gbùʔɔrɔsaʔa wìile yiʔɛ mɛ́ gè, nàa pe 'puu nɛ ye Wìicɛnnɛ lè, nɛ siɛnnɛ náari bèle, a ki 'fíɛrɛ cò pe nɛ̄ kpuʔɔ, nɛ̀ pe fungo wúɔ kátii, gàa ki 'kpíʔile nàguɔ ŋáà nɛ̄ wè.

Piɛri wi 'loli wi puʔɔlɔ wori juu dè nɛ̀ tìɛ siɛnnɛ nɛ̄ bèle

11Bà sí nàguɔ ŋáà wiì puu nɛ kunuʔ Piɛri nɛ́ Zan kúrugu bèle wè, a ki 'siɛnnɛ pe mìɛni fungo wúɔ, a pe 'fɛ̀ nɛ̀ kɛ́ pe kúrugu baa kobigo mɛ́ gè, gàa pe ye kùlofɔli Sulomani kobigo gè.

12Bà Piɛri kɛ́nì pe nyaa pe gbunʔuni bèle, a wi 'juu nɛ́ pe ní nɛ́ pe yɛ: «Isirayɛli siɛnnɛ yeli bèle, gáa nɛ̄ yeli nɛ cúru kaala náà nɛ̄ lè, níɛ weli wéli ma cɛ jo weli fànʔa ki 'jáa nɛ̀ nàguɔ ŋáà kɛn wè wi tári wè, á kire 'laa ma cɛ jo dùʔɔ weli nɛ síngi nɛ wìi Kulocɛliɛ yiʔɛ mɛ́ gè wī ? 13Birayima Kulocɛliɛ wè, nɛ́ ní Siaga Kulocɛliɛ wè, nɛ́ ní Yakuba Kulocɛliɛ wè, nɛ́ ní weli tuuliɛyɛ Kulocɛliɛ wè, wire wi 'kpuʔɔrɔ taʔa wi baakuɔwɔ nɛ̄ wè, Zezi wè. Kire Zezi wire yeli 'cò nɛ̀ kɛn fànʔafɔlilɔ mɛ́ bèle, nɛ́ cíi wi nɛ̄ Pilati yiʔɛ mɛ́ gè, nɛ̀ sí ki taa wire cé ki yɛ̀gɛ bè wi yaʔa wè. 14Ŋàa wi 'puu tiɛlɛfun siɛn wè nɛ́ ní sínwɛ wè, a yeli 'cíi wire nɛ̄, nɛ́ màʔa nɛ̀ jo pe- siɛnkpuuwo wire múgu pe wáa yeli mɛ́. 15A kire 'ki kɛn a yeli 'sìi kɛnvɔli kpúu wè. Kulocɛliɛ wi 'wi nyɛ́ nɛ̀ yigɛ kúbilo nī bèle; weli 'bīɛlɛ ti cɛ́nfɔlilɔ bèle. 16Tɛ́ngɛlɛ lire fànʔa nɛ̄ gè Zezi míʔɛ nɛ̄ gè, kire míʔɛ kire gī ki nyɛ́nì ŋɔri nyɔ́gɔ nàguɔ ŋáà nī wè a wi 'puʔɔ nɛ̀ paʔa; wire yeli nɛ nyaʔa ŋàa wè ye mìɛni bèle, yeli nyɛ́nì wi cɛ́n nɛ̀ pínɛ.

17«Mi siinyɛninɛ, mi sí 'ki cɛ́n yeli nɛ́ yeli kàfɔlilɔ ní bèle, katiire ti 'puu yeli nī, kire ki tí a yeli 'kire kpíʔile Zezi nɛ̄ wè. 18Kulocɛliɛ wi sí nyɛ́nì wi nyasiɛnrɛ fori dè, dàa wi siɛnjuuliɛlɛ pe mìɛni cé juu nɛ̀ yaʔa dè, nɛ́ jo dí wire Siɛnnyiɛnɛgɔnwɔ#3.18 Míɛnugo kire gī, girɛki sɛbɛrɛ nī dè pe nɛ̂ jo Kirisi. wi bága wuʔɔgɔ suɔ wè. 19Kire nɛ̄, ye- yeli funyɔ yiʔɛ yè yé láʔa yeli kapiʔile nɛ̄ gèle, yé sí koli ye pɛn Kulocɛliɛ mɛ́ wè, bà wi bé yeli kapiʔile láʔa gèle yeli nɛ̄. 20A kire kpíʔile gè, Kàfɔli wi bé ŋɔ́daala lɛ̀lɛ kɛn yeli mɛ́, bé sí wi Siɛnnyiɛnɛgɔnwɔ tórigo wè yeli mɛ́, ŋàa wi cé kíni nɛ̀ tìɛ nɛ̀ yaʔa wè, Zezi wè. 21Ki sí nyaa wi 'yɛli bè ní lɛ̀lɛ láà kúɔ baa nyìʔɛnɛ nī lè, fúɔ bè taa kele gílì mìɛni Kulocɛliɛ wi siɛnjuuliɛlɛ bèle pe cé 'juu Kulocɛliɛ wori nɛ̄ dè, ki kele ke- pa kpíʔile bè yɛli nɛ́ lɛ̀lɛ ní lè nàa Kulocɛliɛ wi cé tíi nɛ̀ tìɛ nɛ̀ yaʔa faʔa faʔa gè.

22«Misa wi cé sí ki juu nɛ́ jo: Yeli Kàfɔli Kulocɛliɛ wi bága siɛnjuuwo wáà yige yeli wuulo sunʔɔmɔ nī bè bɛ̀ mi tíɛlɛ. Ye gari lúru wi nɛ̄, dìi mìɛni wi bága juu yeli mɛ́ dè#3.22 Fàn 18.15 tire ti 'juu náʔa gè.. 23Siɛn ó siɛn wiì kɛ́ni lúru ki siɛnjuuwo ŋáà nɛ̄ wèʔ, ki siɛn wi bé kpúu bè yige siɛnnɛ nī bèle wī#3.23 Fàn 18.19 nɛ́ Lev 23.29 tire ti juu náʔa gè..

24«Ki 'nyaa Kulocɛliɛ siɛnjuuliɛlɛ bílì pe mìɛni pe 'tóri bèle, nɛ̀ ki líɛ Samiyɛli nɛ̄ wè nɛ̀ sɛ́nì kpúɔn bìli sɛnminɛ nɛ̄ pe 'pɛn wire kàduʔumɛ gè, pe mìɛni nyɛ́nì juu taʔalimɛ taʔalimɛ kele gílì ke tòrí pàngɛ cɛnyɛ yi wori nɛ̄ dè. 25Yeli yē Kulocɛliɛ siɛnjuuliɛlɛ pe pìile#3.25 Kulocɛliɛ siɛnjuuliɛlɛ pe pìile: Pàli nyɛ́nì tiɛlɛ náà ni siɛnrɛ yiʔɛ dè nɛ̀ juu nɛ̀ jo: Yeli yē Kulocɛliɛ siɛnjuuliɛlɛ pe kɔriliile., nɛ ní Kulocɛliɛ nyakungɛngɛ ki pìile#3.25 Kulocɛliɛ nyakungɛngɛ ki pìile: Girɛki siɛnrɛ nī dè, ti kɔri wi 'jo peli pe nyɛ́nì Kulocɛliɛ nyakungɛngɛ ki sìɛrɛ taa dè, á kire 'laa nɛ̀ nyakungɛngɛ ki tɔ̀ni lìi wè. bèle nɛ̀ pínɛ, bɛ̀ Kulocɛliɛ wi cé ki juu nɛ̀ fílige yeli tuuliɛyɛ mɛ́ yè, nɛ́ Birayima yɛ wè: Muɔ siimɛ pire nyúmɔ nī Kulocɛliɛ bága wi kajɛ̀ngɛ taʔa gè duniya siɛnfeliye yi mìɛni nɛ̄#3.25 Sél 22.18 tire ti 'juu náʔa. Wéli baa Sél 12.3..

26«Yeli mɛ́ Kulocɛliɛ wi 'kíni nɛ̀ wi baakuɔwɔ yige wè nɛ̀ kɛn wè, nɛ́ sí wi tun a wi pɛ́nì diba taʔa yeli nɛ̄, nɛ̀ yeli ye mìɛni nigbe nigbe láʔa bèle yeli kacuʔɔrɔ nɛ̄ dè.»

Currently Selected:

Kakpiʔiligele 3: sev

Highlight

Copy