Kakpiʔiligele 9
9
Zezi wi 'wìi tìɛ Sɔli nɛ̄ wè Damasi koligo nɛ̄ gè
1Nɛ̀ ki yaʔa kire lɛ̀lɛ nī lè, Sɔli fungo ki 'puu nɛ kɛ́ngi nɛ tíin Kàfɔli wi pìtɛnmɛnɛ kúrugu bèle nɛ pe caa nɛ́ kpúumɔ ní. A wi 'kɛ́ kacuɔnrilɔ kàfɔli kúrugu wè 2nɛ̀ sɛ́nì wi yɛ wi- sɛbɛlɛ kɛn wire mɛ́ wire- kɛ́ Damasi kàʔa mɛ́ baa tɛnmɛzaaya mɛ́ yè, gìi ki bé tí a wire sɛ́nì siɛn ó siɛn nyaa baa Zezi koligo wuu wè, nàguɔ wī yo, cɛliwɛ wī yo, wire- wi cò bè pɛn Zerizalɛmi kàʔa mɛ́ gè.
3A Sɔli wi 'koligo líɛ gè nɛ waa, nɛ̀ sɛ́ni nɔ̀gí Damasi kàʔa nɛ̄ gè; cɛ̀ri buu a kpìɛnmɛ páà fuu nɛ̀ càanna nyìʔɛnɛ nī lè nɛ̀ wi màʔa nɛ̀ suʔu.
4A wi 'nyɛri nɛ̀ tuu dàala nɛ̄ lè, á wi 'yékpoli láà juumɔ lúʔu a ni 'wi yɛ: «Sɔli, Sɔli, gáa nɛ̄ muɔ nɛ mi wuʔɔ ?»
5A Sɔli wi 'wi yúgo: «Kàfɔli, ŋáasiɛn wī ?»
A wi 'jo: «Mi wī, Zezi wè, mi muɔ nɛ wuʔɔ wè. 6Yɛ̀ mari jíin kàʔa nī gè, pe bé sa muɔ tìɛ gìi muɔ 'yɛli bè kpíʔile gè.»
7Kire lɛ̀lɛ nī lè a wi kobinɛnyɛninɛ pe 'yéri sényi ! Pe 'puu nɛ yékpoli ni juumɔ lúru bè, piyè sí cé siɛn nyaaʔ. 8A Sɔli wi 'yɛ̀ nɛ̀ yéri, nyapigele keli 'tɔ̀ni nɛ̀ puu wi nɛ̄ múgugolo, nɛ̀ ki yaʔa wiì puu nɛ yafiɛn nyaʔa ke nīʔ. A pe 'wi cò kɔli nɛ̄ gè nɛ̀ jíin Damasi kàʔa nī gè. 9A wi 'cɛnyɛ taanri kúɔ wi wè nyaʔaʔ, wiì lìiʔ, wiì luʔɔ gbuɔʔ.
Kulocɛliɛ wi 'Ananiyasi tun Sɔli mɛ́ wè
10 Pìtɛnmɛwɛ wáà 'puu baa Damasi kàʔa nī gè, pe 'puu nɛ wi ye Ananiyasi. A Kàfɔli wi sɛ́nì yiri wi nɛ̄, nɛ̀ wi yeri nɛ́ wi yɛ: «Ananiyasi !»
A wi 'suɔ: «Cooyi, mi n'ŋɛ, Kàfɔli !»
11A Kàfɔli wi 'wi yɛ: «Yɛ̀ mari waa kobile nī lè nàa pe ye ‹Kozinʔɛ gè›, ma sa jíin Zudasi saʔa nī gè, ma yúgo nàguɔ ŋáà pe ye Sɔli wè, Tarisi kàʔa nàguɔ wè; wiī baa nɛ Kulocɛliɛ náari. 12Kulocɛliɛ wi nyɛ́nì kaala láà tìɛ wi nɛ̄ a wi 'nàguɔ wáà nyaa piyē nɛ wi ye Ananiyasi, a ki nàguɔ wi 'kiyɛ taʔala yè Sɔli nɛ̄ wè a wi 'koli nɛ nyaʔa.»
13A Ananiyasi wi 'jo: «ʔé Kàfɔli, mi 'nàguɔ ŋáà wi sìpiire wori lúʔu dè siɛnniʔɛnɛ nyuɔ nɛ̄, gàa ki mìɛni wi 'puu nɛ kpínʔini muɔ wuulo nɛ̄ bèle Zerizalɛmi kàʔa mɛ́ gè. 14Náʔa kàʔa gáà tíimɛ nī gè kacuɔnrilɔ kàfɔlilɔ pe 'ki fànʔa kɛn gè wi mɛ́ wi- gbɛ̀ muɔ wuulo pe mìɛni cò buɔ, bàli pe nyɛ́ni muɔ míʔɛ yeri gè.»
15A Kàfɔli wi sí wi yɛ: «Te waa, nàguɔ ŋáà wiī mi mɛ́ bɛ̀ yakpiʔilige tíɛlɛ, mi 'wi nyíɛnɛ nɛ̀ kɔ̀n bè mi míʔɛ tìɛ gè kùlogolo kálì siɛnnɛ nɛ̄ bèle, nɛ́ kùlofɔlilɔ ní bèle, nɛ́ Isirayɛli siɛnnɛ ní bèle. 16Mi tíimɛ m'bé wi tìɛ fùrɔgɔ gíì wi bé suɔ mi míʔɛ kɛnmɛ nɛ̄ bè.»
17A Ananiyasi wi 'kɛ́ nɛ̀ sɛ́nì jíin saʔa nī gè, nɛ̀ kiyɛ taʔa yè Sɔli nɛ̄ wè, nɛ́ wi yɛ: «Nɛ siinyɛni Sɔli, Kàfɔli wire wi 'mi tun, Zezi ŋáà wi 'wìi tìɛ muɔ nɛ̄ koligo nɛ̄ gè bà muɔ 'puu nɛ báan wè, wire wī, gìi ki bé tí muɔ ní de nyaʔa wè, dí Kulocɛliɛ Pìle ni sí muɔ nyì.»
18Tiɛnugo nī gè a yɛrɛ táà 'láʔala nɛ̀ tuu Sɔli nyapigele nī gèle bɛ̀ fúɔ koriro tíɛlɛ, a wi 'koli nɛ nyaʔa cígini, a wi 'yɛ̀ a pe 'wi batɛmi kpíʔile wè. 19A wi 'lìi nɛ̀ ŋɔri taa. A wi 'kò baa nɛ́ pìtɛnmɛnɛ bílì ní bèle Damasi kàʔa nī gè nɛ̀ cɛnyɛ yáà kúɔ.
Sɔli wi 'séli nɛ Zezi Kataanna Siɛnrɛ jáari dè
20A Sɔli wi 'fali nɛ ki nyu nɛ ki jáari tɛnmɛzaaya nī yè nɛ́ jo Zezi wire wī Kulocɛliɛ Jaa wè. 21Bìli pe 'puu nɛ siɛnrɛ dáà lúru dè a ki 'pe mìɛni fungo wúɔ, a pe 'yɛ̀ nɛ nyu nɛ́ jo: «Nàguɔ ŋáà wire túʔu bɛ̀ʔ wi 'puu nɛ ki caa bè siɛnnɛ cúʔɔ bèle Zerizalɛmi kàʔa nī gè, bàli pe 'puu nɛ míʔɛ gáà yeri gè, nɛ̀ pínɛ wiì túʔu pɛn náʔa gè bè pa pe puɔ bé sí pe kɔ́ri bè kɛ́ kacuɔnrilɔ kàfɔlilɔ tiʔɛ nī gè wī lé ?»
22Kire nɛ́ ki mìɛni ní gè, a Sɔli wi ń'nɛ̀ gbɛ̀nmɛ le. Zuufulo bílì pe 'puu baa Damasi kàʔa wuulo bèle, a wi 'juu nɛ̀ pe nyuɔyɔ tɔ́n yè, ki 'nyaa wi 'puu nɛ ki nyu nɛ láʔala pe mɛ́ dí Zezi wire wī Kirisi wè, Kulocɛliɛ Siɛnnyiɛnɛgɔnwɔ wè.
Zuufulo yiɛgininɛ piyē nɛ caa bè Sɔli kpúu wè
23Bà cɛnyɛ yáà yé kɛ́nì tóri a ki 'mɔgɔ wè, a Zuufulo pe 'bìɛ ki nɛ̄ bè Sɔli kpúu wè. 24A ki siɛnrɛ ti pɛ́nì juu Sɔli mɛ́ wè. Ki 'nyaa pe 'puu nɛ kàʔa wìʔile wéli gèle pìlige nɛ́ cɛnvugo, gìi ki bé tí peli ga wi taa kpúu wè. 25Cɛngɛ káà pìlige nī, a wi pìtɛnmɛnɛ pe sí wi líɛ nɛ̀ le juʔɔ nī, nɛ̀ wi tìrige kàʔa gungo kúrugu gè.
Sɔli wi 'kɛ́ Zerizalɛmi kàʔa mɛ́
26Bà Sɔli wi sɛ́nì jíin Zerizalɛmi kàʔa nī gè, a wi 'yɛ̀ nɛ ki caa bè pínɛ nɛ́ pìtɛnmɛnɛ ní bèle, nɛ̀ sí ki taa peli bèle pe 'puu nɛ fìʔɛ́ wi nɛ̄; piyè cé tɛ́ngɛ ki nɛ̄ wiī pìtɛnmɛwɛ kányiʔɛ nɛ̄ʔ. 27A Barinabasi wè, a wire 'wi líɛ nɛ̀ kɛ́ Zezi tundunminɔ kúrugu bèle, nɛ̀ sɛ́nì ti yiʔɛ juu nɛ̀ tìɛ pe nɛ̄ gìi ki cé tóri gè, bà Sɔli wi cé Kàfɔli nyaa wè koligo nɛ̄ gè, nɛ́ bɛ̀ Kàfɔli wi cé juu nɛ́ wi ní wè. Nɛ̀ pínɛ a wi 'ti juu pe mɛ́ mɛni Sɔli wi cé Zezi wori juu dè nɛ́ nàzorido ní dè Damasi kàʔa mɛ́ gè; wiì 'puu nɛ fìʔɛ́ʔ.
28Bà sí ki 'láʔa kire lɛ̀lɛ nɛ̄ lè a wi 'kò nɛ waa nɛ́ pe ní tiɛrɛ ti mìɛni nī Zerizalɛmi kàʔa nī gè, nɛ Kàfɔli wi wori nyu dè nɛ láʔala nɛ́ nàzorido ní. 29Wi cɛ́nì puu nɛ nyu pe siɛnrɛ píle dè pìye mɛ́, wire nɛ́ Zuufulo bílì ní pe 'puu nɛ girɛki siɛnrɛ nyu dè; peli bèle peli cé sí puu nɛ wi caa nɛ́ kpúumɔ ní. 30Bà tɛ́ngɛfɔlilɔ pe 'ti cɛ́n dè, a pe 'Sɔli kɔ́ri wè nɛ̀ kɛ́ nɛ́ wi ní Sezare kàʔa mɛ́, nɛ̀ sɛ́nì wi tórigo Tarisi kàʔa mɛ́.
31Tɛ́ngɛfɔlilɔ pe 'puu yanyige nɛ̄ Zude tɛ́nimɛ pi mìɛni nī bè, nɛ́ Galile tɛ́nimɛ ní bè, nɛ́ Samarii tɛ́nimɛ nī bè. Pe cé ŋɔri taa nɛ waa yiʔɛ nɛ̄ tɛ́ngɛlɛ nī lè; Kàfɔli wi fíɛrɛ ti 'puu pe nī, nɛ̀ pínɛ Kulocɛliɛ Pìle ni cé ki kɛn pe niʔɛ nɛ waa.
Piɛri wi 'náari siɛnmɔnigiwɔ mɛ́ a wi 'puʔɔ
32 Piɛri wi 'puu nɛ nyaari nɛ waa kùlo tiɛrɛ ti mìɛni nī dè. Cɛngɛ káà wi sɛ́nì yiri baa tɛ́ngɛfɔlilɔ bílì bīɛlɛ baa Liida kàʔa mɛ́ gè. 33A wi 'nàguɔ wáà nyaa baa mɔ̀nigiwɔ, wi ní sínɛwɛ wi yaala yasinɛgɛ nɛ̄ gè, pe 'puu nɛ wi ye Ene. Ki cé yiʔɛlɛ kataanri kúɔ bà wi cé tuu yaama nɛ̄ bè. 34A Piɛri wi 'wi yɛ: «Ene, Zezi Kirisi wi bé muɔ puʔɔ. Yɛ̀ ma muɔ yasinɛgɛ líɛ gè.» A nàguɔ wi 'fali nɛ̀ yɛ̀ sɛni. 35A Liida siɛnnɛ pe mìɛni 'wi nyaa, peli nɛ́ Sarɔn tiʔɛ kpàanjali wuulo ní bèle, a pe 'pìye kɛn Kàfɔli mɛ́ wè.
Piɛri wi 'náari Dɔrikasi mɛ́ a wi 'nyɛ́
36Zope kàʔa nī gè pìtɛnmɛwɛ wáà 'puu baa cɛliwɛ, pe 'puu nɛ wi ye Tabita, pe nɛ̂ ki míʔɛ yeri nɛ̀ pínɛ girɛki siɛnrɛ nī dè Dɔrikasi, ki kɔri wi 'jo wóliwo. Wi 'puu nɛ kacɛ̀ngɛlɛ kpínʔini kpuʔɔ, níɛ fuunmɔfɔlilɔ kanʔa bèle nɛ pínɛ. 37Nɛ̀ sí ki taa kire cɛnyɛ nyáà nī yè a ki cuɔ ŋáà wi 'kò yaawa, cefuuro tiì kún wi nīʔ. A pe 'wi gbéli nɛ́ wi líɛ nɛ̀ sɛ́nì sínge naamɛ saasinɛgɛ nī gè. 38Bɛ̀ Liida kàʔa kiì puu liʔi nɛ́ Zope kàʔa ní gèʔ, a pìtɛnmɛnɛ pe 'Piɛri wi wori lúʔu dè. A pe sí siɛnnɛ siin yɛ̀gɛ nɛ̀ tórigo baa wi mɛ́ pe- sa wi fiɛn pé wi yɛ wi fǎga mɔgɔ baaʔ, wi- pɛn náʔa fáari fáari peli mɛ́. 39A Piɛri wi 'fali nɛ̀ yɛ̀ nɛ̀ pínɛ nɛ́ pe ní. Bà wi sɛ́nì yiri wè, a pe 'wi tórigo baa naamɛ saʔa mɛ́ gè. A lakicɛlilɛ pe mìɛni sɛ́nì gbuʔulo wi táanni níɛ nyɛni, níɛ pe burugboliyo nɛ́ burubigele tìí gèle wi nɛ̄ dàa Dɔrikasi wi cé jɔli nɛ̀ peli kɛn dè, bà wi 'puu nɛ tíin sìi nɛ̄ wè.
40A Piɛri wi 'pe mìɛni yige kpànʔanɛ, nɛ́ káguro wáa níɛ náari, nɛ́ fali nɛ̀ kɛ́nì yiʔɛ nɛ̀ yiʔɛ wáa kpúu mɛ́ wè nɛ́ wi yɛ: «Tabita, yɛ̀ !» A kpúu wi 'nyapigele múgu gèle, nɛ̀ ga Piɛri nyaa wè, a wi 'yɛ̀ nɛ̀ tɛ́ni. 41A Piɛri wi 'wi cò kɔli nɛ̄ gè nɛ̀ yɛ̀gɛ. Nɛ́ fali nɛ̀ tɛ́ngɛfɔlilɔ yeri bèle nɛ́ lakicɛlilɛ ní bèle, nɛ̀ pɛ́nì wi tìɛ pe nɛ̄ wi ní wiiwe wè. 42A ki siɛnrɛ ti 'yiri Zope kàʔa ki mìɛni nī, a siɛnniʔɛnɛ 'tɛ́ngɛ Kàfɔli nɛ̄ wè. 43A Piɛri wi 'kò baa nɛ̀ cɛnyɛ yáà 'kúɔ Zope kàʔa nī gè; wi 'puu nàguɔ wáà tiʔɛ nī pe wi ye Siimɔ, cèligɔniwɔ wi 'puu.
Currently Selected:
Kakpiʔiligele 9: sev
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
Kakpiʔiligele 9
9
Zezi wi 'wìi tìɛ Sɔli nɛ̄ wè Damasi koligo nɛ̄ gè
1Nɛ̀ ki yaʔa kire lɛ̀lɛ nī lè, Sɔli fungo ki 'puu nɛ kɛ́ngi nɛ tíin Kàfɔli wi pìtɛnmɛnɛ kúrugu bèle nɛ pe caa nɛ́ kpúumɔ ní. A wi 'kɛ́ kacuɔnrilɔ kàfɔli kúrugu wè 2nɛ̀ sɛ́nì wi yɛ wi- sɛbɛlɛ kɛn wire mɛ́ wire- kɛ́ Damasi kàʔa mɛ́ baa tɛnmɛzaaya mɛ́ yè, gìi ki bé tí a wire sɛ́nì siɛn ó siɛn nyaa baa Zezi koligo wuu wè, nàguɔ wī yo, cɛliwɛ wī yo, wire- wi cò bè pɛn Zerizalɛmi kàʔa mɛ́ gè.
3A Sɔli wi 'koligo líɛ gè nɛ waa, nɛ̀ sɛ́ni nɔ̀gí Damasi kàʔa nɛ̄ gè; cɛ̀ri buu a kpìɛnmɛ páà fuu nɛ̀ càanna nyìʔɛnɛ nī lè nɛ̀ wi màʔa nɛ̀ suʔu.
4A wi 'nyɛri nɛ̀ tuu dàala nɛ̄ lè, á wi 'yékpoli láà juumɔ lúʔu a ni 'wi yɛ: «Sɔli, Sɔli, gáa nɛ̄ muɔ nɛ mi wuʔɔ ?»
5A Sɔli wi 'wi yúgo: «Kàfɔli, ŋáasiɛn wī ?»
A wi 'jo: «Mi wī, Zezi wè, mi muɔ nɛ wuʔɔ wè. 6Yɛ̀ mari jíin kàʔa nī gè, pe bé sa muɔ tìɛ gìi muɔ 'yɛli bè kpíʔile gè.»
7Kire lɛ̀lɛ nī lè a wi kobinɛnyɛninɛ pe 'yéri sényi ! Pe 'puu nɛ yékpoli ni juumɔ lúru bè, piyè sí cé siɛn nyaaʔ. 8A Sɔli wi 'yɛ̀ nɛ̀ yéri, nyapigele keli 'tɔ̀ni nɛ̀ puu wi nɛ̄ múgugolo, nɛ̀ ki yaʔa wiì puu nɛ yafiɛn nyaʔa ke nīʔ. A pe 'wi cò kɔli nɛ̄ gè nɛ̀ jíin Damasi kàʔa nī gè. 9A wi 'cɛnyɛ taanri kúɔ wi wè nyaʔaʔ, wiì lìiʔ, wiì luʔɔ gbuɔʔ.
Kulocɛliɛ wi 'Ananiyasi tun Sɔli mɛ́ wè
10 Pìtɛnmɛwɛ wáà 'puu baa Damasi kàʔa nī gè, pe 'puu nɛ wi ye Ananiyasi. A Kàfɔli wi sɛ́nì yiri wi nɛ̄, nɛ̀ wi yeri nɛ́ wi yɛ: «Ananiyasi !»
A wi 'suɔ: «Cooyi, mi n'ŋɛ, Kàfɔli !»
11A Kàfɔli wi 'wi yɛ: «Yɛ̀ mari waa kobile nī lè nàa pe ye ‹Kozinʔɛ gè›, ma sa jíin Zudasi saʔa nī gè, ma yúgo nàguɔ ŋáà pe ye Sɔli wè, Tarisi kàʔa nàguɔ wè; wiī baa nɛ Kulocɛliɛ náari. 12Kulocɛliɛ wi nyɛ́nì kaala láà tìɛ wi nɛ̄ a wi 'nàguɔ wáà nyaa piyē nɛ wi ye Ananiyasi, a ki nàguɔ wi 'kiyɛ taʔala yè Sɔli nɛ̄ wè a wi 'koli nɛ nyaʔa.»
13A Ananiyasi wi 'jo: «ʔé Kàfɔli, mi 'nàguɔ ŋáà wi sìpiire wori lúʔu dè siɛnniʔɛnɛ nyuɔ nɛ̄, gàa ki mìɛni wi 'puu nɛ kpínʔini muɔ wuulo nɛ̄ bèle Zerizalɛmi kàʔa mɛ́ gè. 14Náʔa kàʔa gáà tíimɛ nī gè kacuɔnrilɔ kàfɔlilɔ pe 'ki fànʔa kɛn gè wi mɛ́ wi- gbɛ̀ muɔ wuulo pe mìɛni cò buɔ, bàli pe nyɛ́ni muɔ míʔɛ yeri gè.»
15A Kàfɔli wi sí wi yɛ: «Te waa, nàguɔ ŋáà wiī mi mɛ́ bɛ̀ yakpiʔilige tíɛlɛ, mi 'wi nyíɛnɛ nɛ̀ kɔ̀n bè mi míʔɛ tìɛ gè kùlogolo kálì siɛnnɛ nɛ̄ bèle, nɛ́ kùlofɔlilɔ ní bèle, nɛ́ Isirayɛli siɛnnɛ ní bèle. 16Mi tíimɛ m'bé wi tìɛ fùrɔgɔ gíì wi bé suɔ mi míʔɛ kɛnmɛ nɛ̄ bè.»
17A Ananiyasi wi 'kɛ́ nɛ̀ sɛ́nì jíin saʔa nī gè, nɛ̀ kiyɛ taʔa yè Sɔli nɛ̄ wè, nɛ́ wi yɛ: «Nɛ siinyɛni Sɔli, Kàfɔli wire wi 'mi tun, Zezi ŋáà wi 'wìi tìɛ muɔ nɛ̄ koligo nɛ̄ gè bà muɔ 'puu nɛ báan wè, wire wī, gìi ki bé tí muɔ ní de nyaʔa wè, dí Kulocɛliɛ Pìle ni sí muɔ nyì.»
18Tiɛnugo nī gè a yɛrɛ táà 'láʔala nɛ̀ tuu Sɔli nyapigele nī gèle bɛ̀ fúɔ koriro tíɛlɛ, a wi 'koli nɛ nyaʔa cígini, a wi 'yɛ̀ a pe 'wi batɛmi kpíʔile wè. 19A wi 'lìi nɛ̀ ŋɔri taa. A wi 'kò baa nɛ́ pìtɛnmɛnɛ bílì ní bèle Damasi kàʔa nī gè nɛ̀ cɛnyɛ yáà kúɔ.
Sɔli wi 'séli nɛ Zezi Kataanna Siɛnrɛ jáari dè
20A Sɔli wi 'fali nɛ ki nyu nɛ ki jáari tɛnmɛzaaya nī yè nɛ́ jo Zezi wire wī Kulocɛliɛ Jaa wè. 21Bìli pe 'puu nɛ siɛnrɛ dáà lúru dè a ki 'pe mìɛni fungo wúɔ, a pe 'yɛ̀ nɛ nyu nɛ́ jo: «Nàguɔ ŋáà wire túʔu bɛ̀ʔ wi 'puu nɛ ki caa bè siɛnnɛ cúʔɔ bèle Zerizalɛmi kàʔa nī gè, bàli pe 'puu nɛ míʔɛ gáà yeri gè, nɛ̀ pínɛ wiì túʔu pɛn náʔa gè bè pa pe puɔ bé sí pe kɔ́ri bè kɛ́ kacuɔnrilɔ kàfɔlilɔ tiʔɛ nī gè wī lé ?»
22Kire nɛ́ ki mìɛni ní gè, a Sɔli wi ń'nɛ̀ gbɛ̀nmɛ le. Zuufulo bílì pe 'puu baa Damasi kàʔa wuulo bèle, a wi 'juu nɛ̀ pe nyuɔyɔ tɔ́n yè, ki 'nyaa wi 'puu nɛ ki nyu nɛ láʔala pe mɛ́ dí Zezi wire wī Kirisi wè, Kulocɛliɛ Siɛnnyiɛnɛgɔnwɔ wè.
Zuufulo yiɛgininɛ piyē nɛ caa bè Sɔli kpúu wè
23Bà cɛnyɛ yáà yé kɛ́nì tóri a ki 'mɔgɔ wè, a Zuufulo pe 'bìɛ ki nɛ̄ bè Sɔli kpúu wè. 24A ki siɛnrɛ ti pɛ́nì juu Sɔli mɛ́ wè. Ki 'nyaa pe 'puu nɛ kàʔa wìʔile wéli gèle pìlige nɛ́ cɛnvugo, gìi ki bé tí peli ga wi taa kpúu wè. 25Cɛngɛ káà pìlige nī, a wi pìtɛnmɛnɛ pe sí wi líɛ nɛ̀ le juʔɔ nī, nɛ̀ wi tìrige kàʔa gungo kúrugu gè.
Sɔli wi 'kɛ́ Zerizalɛmi kàʔa mɛ́
26Bà Sɔli wi sɛ́nì jíin Zerizalɛmi kàʔa nī gè, a wi 'yɛ̀ nɛ ki caa bè pínɛ nɛ́ pìtɛnmɛnɛ ní bèle, nɛ̀ sí ki taa peli bèle pe 'puu nɛ fìʔɛ́ wi nɛ̄; piyè cé tɛ́ngɛ ki nɛ̄ wiī pìtɛnmɛwɛ kányiʔɛ nɛ̄ʔ. 27A Barinabasi wè, a wire 'wi líɛ nɛ̀ kɛ́ Zezi tundunminɔ kúrugu bèle, nɛ̀ sɛ́nì ti yiʔɛ juu nɛ̀ tìɛ pe nɛ̄ gìi ki cé tóri gè, bà Sɔli wi cé Kàfɔli nyaa wè koligo nɛ̄ gè, nɛ́ bɛ̀ Kàfɔli wi cé juu nɛ́ wi ní wè. Nɛ̀ pínɛ a wi 'ti juu pe mɛ́ mɛni Sɔli wi cé Zezi wori juu dè nɛ́ nàzorido ní dè Damasi kàʔa mɛ́ gè; wiì 'puu nɛ fìʔɛ́ʔ.
28Bà sí ki 'láʔa kire lɛ̀lɛ nɛ̄ lè a wi 'kò nɛ waa nɛ́ pe ní tiɛrɛ ti mìɛni nī Zerizalɛmi kàʔa nī gè, nɛ Kàfɔli wi wori nyu dè nɛ láʔala nɛ́ nàzorido ní. 29Wi cɛ́nì puu nɛ nyu pe siɛnrɛ píle dè pìye mɛ́, wire nɛ́ Zuufulo bílì ní pe 'puu nɛ girɛki siɛnrɛ nyu dè; peli bèle peli cé sí puu nɛ wi caa nɛ́ kpúumɔ ní. 30Bà tɛ́ngɛfɔlilɔ pe 'ti cɛ́n dè, a pe 'Sɔli kɔ́ri wè nɛ̀ kɛ́ nɛ́ wi ní Sezare kàʔa mɛ́, nɛ̀ sɛ́nì wi tórigo Tarisi kàʔa mɛ́.
31Tɛ́ngɛfɔlilɔ pe 'puu yanyige nɛ̄ Zude tɛ́nimɛ pi mìɛni nī bè, nɛ́ Galile tɛ́nimɛ ní bè, nɛ́ Samarii tɛ́nimɛ nī bè. Pe cé ŋɔri taa nɛ waa yiʔɛ nɛ̄ tɛ́ngɛlɛ nī lè; Kàfɔli wi fíɛrɛ ti 'puu pe nī, nɛ̀ pínɛ Kulocɛliɛ Pìle ni cé ki kɛn pe niʔɛ nɛ waa.
Piɛri wi 'náari siɛnmɔnigiwɔ mɛ́ a wi 'puʔɔ
32 Piɛri wi 'puu nɛ nyaari nɛ waa kùlo tiɛrɛ ti mìɛni nī dè. Cɛngɛ káà wi sɛ́nì yiri baa tɛ́ngɛfɔlilɔ bílì bīɛlɛ baa Liida kàʔa mɛ́ gè. 33A wi 'nàguɔ wáà nyaa baa mɔ̀nigiwɔ, wi ní sínɛwɛ wi yaala yasinɛgɛ nɛ̄ gè, pe 'puu nɛ wi ye Ene. Ki cé yiʔɛlɛ kataanri kúɔ bà wi cé tuu yaama nɛ̄ bè. 34A Piɛri wi 'wi yɛ: «Ene, Zezi Kirisi wi bé muɔ puʔɔ. Yɛ̀ ma muɔ yasinɛgɛ líɛ gè.» A nàguɔ wi 'fali nɛ̀ yɛ̀ sɛni. 35A Liida siɛnnɛ pe mìɛni 'wi nyaa, peli nɛ́ Sarɔn tiʔɛ kpàanjali wuulo ní bèle, a pe 'pìye kɛn Kàfɔli mɛ́ wè.
Piɛri wi 'náari Dɔrikasi mɛ́ a wi 'nyɛ́
36Zope kàʔa nī gè pìtɛnmɛwɛ wáà 'puu baa cɛliwɛ, pe 'puu nɛ wi ye Tabita, pe nɛ̂ ki míʔɛ yeri nɛ̀ pínɛ girɛki siɛnrɛ nī dè Dɔrikasi, ki kɔri wi 'jo wóliwo. Wi 'puu nɛ kacɛ̀ngɛlɛ kpínʔini kpuʔɔ, níɛ fuunmɔfɔlilɔ kanʔa bèle nɛ pínɛ. 37Nɛ̀ sí ki taa kire cɛnyɛ nyáà nī yè a ki cuɔ ŋáà wi 'kò yaawa, cefuuro tiì kún wi nīʔ. A pe 'wi gbéli nɛ́ wi líɛ nɛ̀ sɛ́nì sínge naamɛ saasinɛgɛ nī gè. 38Bɛ̀ Liida kàʔa kiì puu liʔi nɛ́ Zope kàʔa ní gèʔ, a pìtɛnmɛnɛ pe 'Piɛri wi wori lúʔu dè. A pe sí siɛnnɛ siin yɛ̀gɛ nɛ̀ tórigo baa wi mɛ́ pe- sa wi fiɛn pé wi yɛ wi fǎga mɔgɔ baaʔ, wi- pɛn náʔa fáari fáari peli mɛ́. 39A Piɛri wi 'fali nɛ̀ yɛ̀ nɛ̀ pínɛ nɛ́ pe ní. Bà wi sɛ́nì yiri wè, a pe 'wi tórigo baa naamɛ saʔa mɛ́ gè. A lakicɛlilɛ pe mìɛni sɛ́nì gbuʔulo wi táanni níɛ nyɛni, níɛ pe burugboliyo nɛ́ burubigele tìí gèle wi nɛ̄ dàa Dɔrikasi wi cé jɔli nɛ̀ peli kɛn dè, bà wi 'puu nɛ tíin sìi nɛ̄ wè.
40A Piɛri wi 'pe mìɛni yige kpànʔanɛ, nɛ́ káguro wáa níɛ náari, nɛ́ fali nɛ̀ kɛ́nì yiʔɛ nɛ̀ yiʔɛ wáa kpúu mɛ́ wè nɛ́ wi yɛ: «Tabita, yɛ̀ !» A kpúu wi 'nyapigele múgu gèle, nɛ̀ ga Piɛri nyaa wè, a wi 'yɛ̀ nɛ̀ tɛ́ni. 41A Piɛri wi 'wi cò kɔli nɛ̄ gè nɛ̀ yɛ̀gɛ. Nɛ́ fali nɛ̀ tɛ́ngɛfɔlilɔ yeri bèle nɛ́ lakicɛlilɛ ní bèle, nɛ̀ pɛ́nì wi tìɛ pe nɛ̄ wi ní wiiwe wè. 42A ki siɛnrɛ ti 'yiri Zope kàʔa ki mìɛni nī, a siɛnniʔɛnɛ 'tɛ́ngɛ Kàfɔli nɛ̄ wè. 43A Piɛri wi 'kò baa nɛ̀ cɛnyɛ yáà 'kúɔ Zope kàʔa nī gè; wi 'puu nàguɔ wáà tiʔɛ nī pe wi ye Siimɔ, cèligɔniwɔ wi 'puu.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.