Sélimɛ 13
13
Birama nɛ́ Lɔti pe 'láʔala pìye nɛ̄
1Bà pe 'Birama cìra nɛ̀ yige Ezipiti kùlo nī lè, a wi 'koli nɛ waa wi kɔ́ndiʔɛ kɔli mɛ́ gè gàa gī Nɛgɛvi waama kùlo lè, cɛngɛnyɛnifoligɔli mɛ́ gè, wire nɛ́ wi cuɔ ní wè, nɛ́ Lɔti ní, nɛ́ wi kɔliyɛrɛ ti mìɛni ní. 2Birama wi lɔri ti tɔ̀ni nɛ̀ puu nìʔɛrɛ kányiʔɛ ní: yajuuro 'puu wi mɛ́, tiɛ 'puu baa nɛ́ walifiiwe ní. 3A wi ga sɛ́nì nɔ̀ Nɛgɛvi waama kùlo nɛ̄ lè, nɛ sìʔɛrɛ́ nɛ waa cɛ̀cɛ fúɔ nɛ̀ sɛ́nì nɔ̀ Betɛli kàʔa nɛ̄ gè, baa wi yé kíni nɛ̀ tɛ́ni wè nɛ́ fɛ̀ni saaya kóri yè Betɛli nɛ́ Ayi kàaya sunʔɔmɔ ní bè.
4A Birama sɛ́nì nɔ̀ Kulocɛliɛ gbùʔɔrɔdiʔɛ nɛ̄ gè gàa wi yé kíni nɛ̀ faan gè nɛ́ yajuʔu kɔni nɛ̀ taʔa ki nɛ̄. A wi 'Yewe míʔɛ yeri gè nɛ́ wi síɛri nɛ́ wi gbùʔɔrɔ baa kire tiʔɛ nī gè.
5Lɔti ŋáà wi 'puu nɛ́ Birama ní wè, siɛnmɛfɔli wi yé puu míɛni, yajuuro 'puu wi mɛ́ nìʔɛrɛ: nìɛyɛ, sìnbaara, nɛ́ síkaala ní. 6A ki ga nyaa mmɛ gè, bɛ̀ pe siɛnmɛ nɛ́ pe yajuuro ti yé niʔɛ nɛ̀ tóri dè, kire tiʔɛ nyàʔa kiì puu nɛ pe yɛligi cíginiʔ. Piyè cî ní gbɛ̀ kún tiɛnugo nīʔ. 7A kàsii 'kò nɛ yɛ̀gí túɔntuɔn Birama yajuunaʔana bèle nɛ́ Lɔti yajuunaʔana ní pe sunʔɔmɔ ní bè. Nɛ̀ ki cɛ́n kire lɛ̀lɛ nī lè, Kanaa kùlo siɛnnɛ bèle, nɛ́ Perezi siɛnnɛ ní bèle, pe 'puu tɛ́ninɛ kùlo nī lè.
8A Birama 'fali nɛ̀ ki juu Lɔti mɛ́, nɛ́ jo: «Mi nɛ muɔ náari, kiì yɛli kàsii de yɛ̀gí mi nɛ́ muɔ sunʔɔmɔ ní bèʔ, nɛ́ míɛni mi yajuunaʔana nɛ́ muɔ yajuunaʔana ní bèleʔ, nɛ́ ki cɛ́n m'bé muɔ ye mi jaa. 9Kùlo niì kpúʔɔ nɛ̀ caanri lé, gàa ki mìɛni wè nɛ waa tiʔɛ lé ? Kire nɛ̄ mi nɛ muɔ náari, we‑ wáligi wìye nɛ̄; a muɔ nɛ waa kàmɛgɛ mɛ́, m'béri waa kàliige mɛ́; a muɔ nɛ waa kàliige mɛ́, m'béri waa kàmɛgɛ mɛ́.»
10A Lɔti 'yɛ̀ nɛ̀ yéri nɛ́ yiʔɛ yɛ̀gɛ gè, nɛ̀ Zurudɛn cáʔa kpàanjali wi mìɛni wéli fúɔ nɛ̀ sɛ́nì nɔ̀ Zowari kàʔa nɛ̄ gè. A wi 'ki nyaa a nyàʔa ki 'fùn nɛ̀ nyuɔ bɛ̀ Yewe kákpuɔ tiɛcɛ̀ngɛ tíɛlɛ gè, gàa wi yé kpíʔile nɛ̀ kɛn Adama nɛ́ Awa mɛ́ wè, bɛ̀ Ezipiti kùlo lakoligo kpàanjali tíɛlɛ wè. Wi yé ki nyaa nɛ̀ ki yaʔa Yewe sì yé fìɛ Sodɔmi nɛ́ Gomɔri kàaya cúʔɔ yèʔ.
11A Lɔti 'fali nɛ̀ Zurudɛn cáʔa kpàanjali tiʔɛ ki mìɛni nyíɛnɛ nɛ̀ kɔ̀n ki‑ puu wire wuʔu, nɛ́ fali nɛ̀ kɛ́ nɛ̀ sɛ́nì tɛ́ni cɛngɛnyɛnifoligɔli mɛ́ gè. Bà ki 'kpíʔile a pe 'láʔala pìye nɛ̄.
12A Birama 'tɛ́ni Kanaa kùlo nī lè, á Lɔti wire wè, a wire sɛ́nì tɛ́ni Zurudɛn cáʔa kpàanjali nɛ̄ wè kàaya táanni yè, nɛ̀ wi fɛ̀ni saaya kóri yè fúɔ nɛ̀ sɛ́nì nɔ̀ Sodɔmi kàʔa nɛ̄. 13Nɛ̀ ki yaʔa Sodɔmi siɛnnɛ pe yé tɔ̀ni nɛ̀ pii; pe 'puu nɛ kapiʔile kpínʔini Yewe nɛ̄.
14Bà Lɔti 'láʔa Birama nɛ̄ wè, cɛngɛ káà a Yewe ki 'juu Birama mɛ́ nɛ́ jo: «‑Muɔ yiʔɛ yɛ̀gɛ gè naamɛ tiʔɛ gíì nī muɔ yē yériwe wè, ma wéli cɛngɛnyɛnifoligɔli mɛ́ gè, nɛ́ cɛngɛnyɛnijiingɔli mɛ́ gè, nɛ́ muɔ kàliige kɔli mɛ́ gè, nɛ́ muɔ kàmɛgɛ kɔli mɛ́ gè. 15Nɛ́ ki cɛ́n kùlo náà muɔ nɛ nyaʔa nàa lè, m'bé ni mìɛni kɛn muɔ mɛ́ nɛ́ muɔ siimɛ ní bè lɛ̀lɛ ó lɛ̀lɛ. 16M'bé muɔ siimɛ niʔɛ bè bɛ̀ dàrimiʔɛ tíɛlɛ. A ki 'nyaa siɛn bé gbɛ̀ jáa bè dàrimiʔɛ tɔ́ri gè, ki siɛn wi bé gbɛ̀ jáa bè muɔ siimɛ tɔ́ri bè míɛni. 17Yɛ̀ maa kùlo tánʔana lè, ma ni nyaari ma wéli, ma ni kpúʔɔgɛnmɛ wéli bè, nɛ́ ki cɛ́n m'bé ni kɛn muɔ mɛ́.»
18A Birama wi 'fɛ̀ni saaya kɔ́ligi yè, nɛ́ kɛ́ nɛ̀ sɛ́nì nɔ̀ Eburɔn kàʔa nɛ̄ gè. A wi 'tɛ́ni baa tiikpoliyo tiɛliʔɛ káà táanni gàa ki 'puu Mambire wuʔu gè. A wi ń'nɛ̀ Kulocɛliɛ gbùʔɔrɔdiʔɛ káà faan baa nɛ́ yajuʔu káà kɔni nɛ̀ taʔa ki nɛ̄ nɛ̀ Yewe gbùʔɔrɔ wè baa kire tiʔɛ nī gè.
Currently Selected:
Sélimɛ 13: sev
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
