San Marcos 13
13
Ntákani Jesús na̱xa ntiꞌi xa̱ꞌá Veꞌe Ñu̱ꞌu Káꞌnu
(Mt. 24:1-2; Lc. 21:5-6)
1Tá ka̱na Jesús ini nu̱ú íyo Veꞌe Ñu̱ꞌu Káꞌnu, iin ra̱ sákuaꞌa nu̱ú‑Ña̱ káchi‑ra̱ saá:
―¡Mástro, kutoꞌni na̱xa ví ntuvi yu̱ú náꞌnu kua̱ꞌa veꞌe náꞌnu káa!
2Suu nta̱kuiin Jesús, káchi‑Ña̱ saá:
―¿Á xítoꞌni‑ún veꞌe náꞌnu káa? Suu kïnto̱o nii iin míí túꞌun yu̱ú sa̱tá yu̱ú. Ko̱yo ntiꞌi va‑ña̱.
Ña̱ kuu tá ná ntiꞌi xa̱ꞌá ña̱ yúví
(Mt. 24:3-28; Lc. 21:7-24; 17:22-24)
3Tá nti̱ꞌi, nti̱kó Jesús xi̱kí naní Olivo, ra xítoꞌni ntiaa‑Ña̱ Veꞌe Ñu̱ꞌu Káꞌnu. Ta tá íntúꞌú‑Ña̱, ra nta̱ka̱túꞌun sěꞌe Pedro, Jacobo, Juan, xíꞌin Andrés Ña̱, káchi‑na̱ saá:
4―Ka̱ꞌa̱n xíꞌin‑nti̱ ¿ntáa ku̱va kuu ña̱ yóꞌo? ta ¿ntáa kuu ña̱ kuni‑nti̱ ña̱ ná kuvi kunta̱a̱ ini‑nti̱ ña̱ xa̱ xi̱nu ntiꞌi ña̱ yóꞌo?
5Ta ki̱xáá Jesús káꞌa̱n‑Ña̱ xíꞌin‑na̱:
―Kuénta koo‑ntó. Täxi‑ntó nta̱a̱ nii iin míí túꞌun‑na̱ ná säntáꞌvi ntóꞌo̱, 6chi kua̱ꞌá‑na̱ kixi kachi‑na̱ ña̱ kúú‑na̱ mií‑i̱, kachi‑na̱ saá: “Yu̱ꞌu̱ kúú Cristo, Ña̱ ta̱chíñu Ntióxi̱ va̱xi sáka̱ku na̱ yuví”; ra kua̱ꞌá na̱ yuví sántáꞌvi‑na̱.
7 ’Tá ná kuni so̱ꞌo‑ntó ka̱ꞌa̱n‑na̱ xa̱ꞌá ña̱ káni táꞌan na̱ yuví, ra ná kunta̱a̱ ini‑ntó ña̱ káni táꞌan na̱ iinka ñuu, ra küyǔꞌvi‑ntó chi ntúxá ya̱ꞌa ntikuíi ña̱ yóꞌo; suu täꞌan ka ni̱ꞌi ntiꞌi xa̱ꞌá ña̱ yúví. 8Chi kani táꞌan na̱ ñuu náꞌnu xíꞌin iinka na̱ ñuu náꞌnu, ra kani táꞌan na̱ xáꞌntia chiñu nu̱ú iin ñuu xíꞌin na̱ xáꞌntia chiñu nu̱ú iinka ñuu; ra kua̱ꞌá nu̱ú ta̱an, ta koo sǒko. Suu ña̱ yóꞌo sa̱kán ña̱ kíxáá va kúú‑ña̱ ña̱ ntoꞌo ini‑ntó.
9 ’Suu, ntóꞌo̱, kuntiaa‑ntó mií‑ntó; saá chi xa̱ꞌá mií‑i̱ tiin na̱ yuví ntóꞌo̱, ta ku̱ꞌu̱n‑ntó xíꞌin‑na̱ nu̱ú na̱ kíxa ntúví kua̱chi ñuu mií‑ntó, ra kani‑na̱ ntóꞌo̱ ini veꞌe ñu̱ꞌu, ta ku̱ꞌu̱n ntúxá‑ntó xíꞌin‑na̱ nu̱ú na̱ réy xíꞌin na̱ xáꞌntia chiñu iinka ñuu, ta ntakani‑ntó xa̱ꞌá mií‑i̱ nu̱ú‑na̱. 10Ta xíniñúꞌu ña̱ xina ka ntakani‑ntó tu̱ꞌun va̱ꞌa Ntióxi̱ iin níi saá ña̱ yúví. 11Ta tá ná ku̱ꞌu̱n‑ntó xíꞌin‑na̱ nu̱ú na̱ kíxa ntúví kua̱chi, künti̱ꞌi ini‑ntó xa̱ꞌá tu̱ꞌun ka̱ꞌa̱n‑ntó, chi míí saá ka̱ꞌa̱n kuití‑ntó tu̱ꞌun taxi Ntióxi̱ ka̱ꞌa̱n‑ntó; chi süvi mií‑ntó ka̱ꞌa̱n, chi Espíri̱tu̱ I̱í Ntióxi̱ ka̱ꞌa̱n nu̱ú‑ntó. 12Ta na̱ yuví ntataxi‑na̱ ñani‑na̱ ná kaꞌní‑na̱‑na̱, ta na̱ táta‑na̱ ntataxi‑na̱ se̱ꞌe‑na̱, ra na̱ se̱ꞌe‑na̱ kani táꞌan‑na̱ xíꞌin táta‑na̱ nta̱a̱ kaꞌní‑na̱‑na̱. 13Ta ntikuíi‑na̱ kuntasí ntóꞌo̱ xa̱ꞌá ña̱ ntíku̱n‑ntó mií‑i̱; suu ntáa na̱ ná kuchiñu xa̱a̱ nta̱a̱ nu̱ú ntíꞌi, na̱ ikán kúú na̱ ka̱ku.
14 ’Ta tia̱ sa̱ya̱ꞌa tu̱ꞌun káꞌa̱n Ntióxi̱ xi̱naꞌá, Daniel, tia̱a‑ra̱ xa̱ꞌá ña̱ kini koo, ña̱ sántiꞌi xa̱ꞌá nu̱ú íyo ña̱ i̱í, (na̱ káꞌvi yóꞌo, ra, ná kunta̱a̱ ini‑na̱).#Dn. 9:27; 11:31; 12:11. Tá ná kuni‑ntó ña̱ íyo míí ña̱ kini ikán nu̱ú köntútaꞌan‑ña̱ koo‑ña̱, ntúxá kunu ntiꞌi‑ntó na̱ ntée Judea ku̱ꞌu̱n‑ntó chí yukú. 15Ta na̱ íyo sa̱tá veꞌe, ná nüu‑na̱ ki̱ꞌvi‑na̱ ini veꞌe ña̱ tavá‑na̱ ña̱ꞌa‑na̱; 16ta na̱ íyo nu̱ú káchíñu‑na̱, ná ntïkó‑na̱ veꞌe‑na̱ ntakiꞌin‑na̱ iinka saꞌmá‑na̱. 17¡Ntáꞌvi ná ñúꞌu se̱ꞌe xíꞌin ná táxi chíchí se̱ꞌe míí ki̱í saá! 18Ka̱ka̱ ta̱ꞌví‑ntó nu̱ú Ntióxi̱ ná yäꞌa ña̱ yóꞌo tá tiémpo vi̱xin; 19chi ki̱í ikán ntoꞌo nti̱va̱ꞌa ini‑ntó tá ku̱va täꞌan ka ntoꞌo‑ntó nta̱a̱ tá sa̱va̱ꞌa Ntióxi̱ ña̱ yúví yóꞌo, ta ntïkó ka ña̱ yóꞌo ya̱ꞌa‑ña̱. 20Ta átu Xitoꞌo‑yó Ntióxi̱ níntäsa loꞌo tiémpo ikán, nii iin míí túꞌun‑na̱ käku; xa̱ꞌá na̱ nta̱ka̱xin‑Ña̱, na̱ kúntáꞌvi ini‑Ña̱, kúú ña̱ nta̱sa loꞌo‑Ña̱ míí tiémpo ikán.
21 ’Suu átu iin‑na̱ ná kachi saá xíꞌin‑ntó: “Kutoꞌni‑ntó, yóꞌo íyo Cristo, Ña̱ ta̱chíñu Ntióxi̱ va̱xi sáka̱ku na̱ yuví”, á “Káa íyo‑Ña̱”, käntíxa‑ntó‑na̱. 22Chi kixi kua̱ꞌá na̱ sántáꞌvi ntóꞌo̱ kachi‑na̱ ña̱ kúú‑na̱ Cristo, ta saá tu na̱ vatiá na̱ kachi sáya̱ꞌa tu̱ꞌun káꞌa̱n Ntióxi̱; ta kasa‑na̱ kua̱ꞌá ña̱ xítúꞌun, ña̱ ná kuni na̱ yuví, ra sántáꞌvi‑na̱‑na̱. Ná kuvi, ra nta̱a̱ na̱ nta̱ka̱xin Ntióxi̱ ví sántáꞌvi‑na̱. 23Suu kuénta va̱ꞌa koo‑ntó, chi xa̱ ni̱ka̱ꞌa̱n‑yu̱ ntikuíi ña̱ ya̱ꞌa xíꞌin‑ntó.
Na̱xa kixi Ña̱ ntu̱u Se̱ꞌe Na̱ Yuví
(Mt. 24:29-35, 42-44; Lc. 21:25-36)
24 ’Suu tá nti̱ꞌi ni̱ya̱ꞌa tá kúú ntiꞌi ki̱í nto̱ꞌo ini‑ntó, kunaá ni̱ka̱ntií, ntäye̱ꞌe̱ ka yo̱ó, 25ko̱yo tiu̱ún ntiví, ta ta̱an ntiví, ra kanta̱ ntiꞌi ña̱ꞌa ña̱ íyo ikán. 26Tá nti̱ꞌi, kuni‑na̱ Ña̱ ntu̱u Se̱ꞌe Na̱ Yuví va̱xi‑Ña̱ mǎꞌñu vi̱kó xíꞌin ntikuíi nteé‑Ña̱, ra xíꞌin ntikuíi ña̱ yéꞌe̱‑Ña̱. 27Ta tachíñu‑Ña̱ na̱ ángel ná ntakiꞌin‑na̱ ntikuíi na̱ nta̱ka̱xin‑Ña̱ iin níi saá xiyo ña̱ yúví, nta̱a̱ nu̱ú ntíꞌi ña̱ yúví xíꞌin iin saá nta̱a̱ nu̱ú ntíꞌi ntiví.
28 ’Ta kutu̱ꞌva‑ntó tá ku̱va kúú xíꞌin tún o̱ko̱ u̱xi̱: Tá ntúîtiá‑tún, ra nána yu̱ku̱ ntaꞌá‑tún, ra kúnta̱a̱ ini mií‑ntó ña̱ xa̱ kúyachin tiémpo iꞌní. 29Ra míí ku̱va saá, tá ná kuni‑ntó ni̱ya̱ꞌa ntikuíi tu̱ntóꞌo yóꞌo, xa̱ kunta̱a̱ ini‑ntó ña̱ xa̱ kúyachin kixi Ña̱ ntu̱u Se̱ꞌe Na̱ Yuví, ta xa̱ yachin yéꞌe íyo‑Ña̱. 30Ta ña̱ nta̱a̱ káꞌa̱n‑i̱ xíꞌin‑ntó, tá kúma̱ní ni̱ꞌi kuvi̱ ntiꞌi na̱ ntée vichin, ya̱ꞌa ntikuíi ña̱ yóꞌo. 31Ta ntiví xíꞌin ñuꞌú ntiꞌi xa̱ꞌá‑ña̱, suu tu̱ꞌun mií‑i̱ ntïꞌi xa̱ꞌá‑ña̱.
32 ’Suu míí ki̱í xíꞌin óra, nii iin míí túꞌun‑na̱ xïni̱, nii na̱ ángel ntiví, nii Se̱ꞌe Ntióxi̱, iin nta̱a̱ míí túꞌun Táta‑yó Ntióxi̱ xíni̱.
33 ’Nani saá, ¡Ntútaꞌan‑ntó kuntito‑ntó, ra kuntiaa‑ntó [xíꞌin ka̱ꞌa̱n‑ntó xíꞌin Ntióxi̱]! chi xïni̱‑ntó ntáa óra kixi‑Ña̱. 34Tá ku̱va iin tia̱a tia̱ ka̱na kua̱ꞌa̱n xíka nu̱ú veꞌe‑ra̱ kúú‑ña̱, ta tá kúma̱ní kana‑ra̱, xa̱ꞌntia‑ra̱ chiñu nu̱ú iin iin na̱ káchíñu nu̱ú‑ra̱ ná kuntiaa‑na̱ veꞌe‑ra̱, ta ta̱chíñu‑ra̱ ra̱ ntiáa yéꞌe ná kuntiaa va̱ꞌa‑ra̱ míí yéꞌe. 35¡Kuntito‑ntó! Chi xïni̱‑ntó ntáa ki̱í ntikó xitoꞌo veꞌe‑ra̱, á tá kúñǔu, á tá sava ñǔu, á xi̱tia̱a̱n tá kána chéle, á naꞌa; 36ta iin ntíta ná kixa̱a̱‑ra̱, ná ntäni̱ꞌí‑ra̱ ntóꞌo̱ kíxi̱‑ntó. 37Ña̱ káchi‑i̱ xíꞌin‑ntó, ña̱ ikán kúú ña̱ káchi‑i̱ xíꞌin ntikuíi‑na̱: ¡Kuntito‑ntó!
Currently Selected:
San Marcos 13: jmx
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
