Kut 24
24
1Mbwenu obwo Aburahamu akaba akuzire, yaahikire omu ngingo za bukuru, na Nyakubaho amuhaire emigisha omu bintu byona. 2Mpaho Aburahamu yaagambira omugaragwa we omukuru omu b'omu nju ye, owaabaire naareeberera byona ebi yaabaire aine, yaamugira ati: Ta omukono gwawe ahansi y'ekibero kyangye, 3nkurahize Mukama Ruhanga w'eiguru n'ensi, ku otarishwererera mutabani wangye omukazi omu bahara b'Abanyakanaani, abu ntwiremu. 4Kureka oryaza omu b'eihanga ryangye n'omuri beene waitu oshwererereyo mutabani wangye Isaaka omukazi. 5Ogwo mugaragwa yaamugira ati: Obundi ogwo mukazi akaayanga kwija naanye omuri egi nsi. Mbwenu shi ngarure mutabani waawe omu nsi ei waarugiremu? 6Aburahamu amugira ati: Oyerinde otarigarurayo mutabani wangye. 7Mukama Ruhanga w'omu iguru, owaanyihire omu ka ya tata n'omu ihanga ri naazaariirwemu, kandi owaanyegambiriire akandahira ati: Ndyaha baijukuru baawe egi nsi, naija kutuma maraika we kukwebembera, oshwererereyo mutabani wangye omukazi. 8Kwonka omukazi ku araayangye kwija naiwe, obwo nooba otakiine rubanja rw'egi ndahiro ei naakurahiza; kureka eki ndikukwehanangiriza n'okutagarurayo mutabani wangye. 9Atyo ogwo mugaragwa ata omukono gwe ahansi y'ekibero kya Aburahamu mukama we, amurahira kukora eki yaamuragiira.
10Bwanyima ogwo mugaragwa yaiha engamira ikumi omu za mukama we, yaagyenda aine ebiconco birungi eby'emiringo yoona ebi yaahairwe mukama we; yaimuka yaaza Mesopotamiya, yaahika aha rurembo rwa Nahori. 11Atyo ahendesa engamira enkokora aheeru y'orurembo aha rubaju rw'eiziba nibuza kuba omwabazyo ah'abakazi bashohorera kutaha amaizi. 12Reero ashaba ati: Ai Mukama Ruhanga wa Aburahamu mukama wangye, naakweshengyereza ompiire eri izooba, ogirire mukama wangye Aburahamu embabazi. 13Reeba naayemerera ahari eri iziba, bahara b'abashaija b'omuri oru rurembo nibashohora kutaha amaizi. 14Mbwenu ikiriza omwishiki ou ndaagire nti: Huumuza orunywero rwawe nnyweho, haza akagira ati: Nywaho; kandi naaza kweshera n'engamira zaawe; abe ou waateekateekyeire omuheereza waawe Isaaka. Aho niho ndaamanyire ku waagirira mukama wangye embabazi.
Ruhanga okuha omugaragwa wa Aburahamu eki yaashabire
15Ku yaabaire atakaherize kugamba, ahonaaho haija Rebeka, muhara wa Betueli mwene Milika, muka Nahori murumuna wa Aburahamu, aine orunywero rwe rw'amaizi aha ibega. 16Ogwo mwishiki akaba ari murungi munonga, oshugaine. Atyo ashuuma aha iziba aijuza orunywero rwe atuuhuukayo. 17Mpaho ogwo mugaragwa airuka kumubugana, amugira ati: Naakweshengyereza, mpa otwizi tw'omu runywero rwawe nnyweho. 18N'onu amugira ati: Nywaho, mukama wangye. Atyo ahonaaho atuura orunywero rwe aruta aha kiganja amuha anywa. 19Ku aheza kumuha ekyokunywa, agira ati: Naaza kutahira engamira zaawe nazo, okuhitsya obu ziraanywe zikahwa eiriho. 20Atyo ayehuuta afukunkurira orunywero rwe omu bwato, airuka naagaruka omu iziba kutaha, atahira engamira ze zoona. 21Omushaija amugumyaho amaisho ahunami, kumanya yaaba Nyakubaho yaaha orugyendo rwe omugisha nari tikwo.
22Engamira ku zaaherize kunywa, ogwo mushaija yaihayo empeta y'ezaabu y'oburemeezi bwa kimwe kya kabiri kya rupiiha, n'engoro ibiri z'okujwara aha mikono, ezirikuhitsya oburemeezi bw'empiiha ikumi n'ezaabu. 23Haza yaamubuuza ati: Ngambira! Beitu ori muhara w'oha? Mbwenu ebyo omu ka ya sho tukaabonamu oburaaro? 24N'onu amugarukamu ati: Ndi muhara wa Betueli mutabani wa Milika ou yaazairweho Nahori. 25Agumizamu ati: Twine obunyaatsi n'ebyokurya byazo ebirikumara; n'ekishengye ky'okuraaramu. 26Ogwo mushaija ainika omutwe, aramya Nyakubaho 27kandi agira ati: Mukama Ruhanga wa mukama wangye Aburahamu ahimbisibwe, ahabw'okuba tarekire kugirira mukama wangye embabazi n'obwesigwa. Kandi naanye Nyakubaho anyebembeire omu muhanda yampitsya aha nju y'abanyabuzaare ba mukama wangye.
28Bwanyima omwishiki airuka abiteekyerereza ab'omu nju ya nyina. 29Obwo Rebeka akaba aine munyaanya orikwetwa Labaani. Labaani atyo ashohora airuka kushanga ogwo mushaija aha iziba. 30Ku yaareebire empeta n'engoro aha mikono ya munyaanya, kandi ku yaahuriire ebigambo bya Rebeka munyaanya, naagira ati: Nikwo ogwo mushaija yangambira, atyo agyenda ahika ogwo mushaija amushanga ayemereire haihi n'engamira aha iziba. 31Amugira ati: Ija otaahe omuka, iwe ou Nyakubaho ahaire omugisha! Mbwenu shi ekikwemereize aheeru ni ki? Manya naaherize kuteguura enju n'omwanya gw'engamira. 32Ogwo mushaija atyo ataaha omu nju, na Labaani atandukurira engamira, amuha obunyaatsi n'ebyokurya byazo, amureetera n'amaizi g'okunaaba ebigyere bye n'eby'abashaija bu yaizire nabo.
33Bwanyima bamwihurira ebyokurya ngu arye, kwonka we agira ati: Tindikwija kurya ntakagambire bi bantumire. N'onu ati: Bigambe!
Omugaragwa wa Aburahamu okugamba Rebeka obugyenyi
34Mpaho agira ati: Ndi omugaragwa wa Aburahamu. 35Nyakubaho akaha mukama wangye emigisha mingi, yaaba omuntu rugambwa. Akamutungisa amasyo g'ente n'ag'entaama, efeeza n'ezaabu, abahuuku n'abazaana, engamira n'endogoya. 36Kandi Saara muka mukama wangye akazaarira mukama wangye omutabani, Saara obwo yaakuzire. Haza Aburahamu yaaha ogwo mutabani byona ebi atungire. 37Mbwenu mukama wangye andahiize naagira ati: Otarishwererera mutabani wangye omukazi omuri bahara b'Abanyakanaani abu ntwire omu nsi yaabo. 38Kureka oryaza omu b'omuryango gwa tata n'omuri beene waitu, obe nimwo waashwererera mutabani wangye omukazi. 39Nyowe nkagambira mukama wangye nti: Obundi ogwo mukazi takaikiriza kwija naanye. 40Kwonka we yangira ati: Nyakubaho ou ngyenda anyine, aryatuma maraika we akushagare, obaase gye orugyendo rwawe, oshwererere mutabani wangye omukazi, noomwiha omuri beene waitu, kandi ab'omu muryango gwa tata. 41Reero ku orihika omuri beene waitu, oryaba otakiine rubanja rw'egyo ndahiro yangye. Nangwa nobu barimukwima, nabwo oryaba otakiine rubanja rw'egyo ndahiro yangye.
42Mbwenu eri izooba ku naahika aha iziba, naashaba nti: Ai Mukama Ruhanga wa Aburahamu mukama wangye, ku oraabe noosiima kuha omugisha orugyendo rwangye oru ndimu, 43reeba naayemerera aha rubaju rw'eiziba; haza omwishiki empangare oraije kutaha amaizi ou ndaagire nti: Nyaabura 'we, mpa otwizi tw'omu runywero rwawe nnyweho, 44reero akangira ati: Nywaho, kandi n'engamira zaawe nazo niinyija kuzitahira, abe niwe yaaba omukazi ou Nyakubaho ateekateekyeire mutabani wa mukama wangye.
45Ku naaba ntakaherize kukigambira aha mutima, ahonaaho Rebeka aija ayekoreire orunywero rwe rw'amaizi aha ibega; atyo ashuuma aha iziba ataha. Naanye mmugira nti: Nyaabura 'we, ndeka nnyweho! 46Nawe tahwama aiha orunywero rwe aha ibega agira ati: Nywa, kandi niinyija kweshera n'engamira zaawe. Ntyo nnywa; engamira nazo azeeshera. 47Bwanyima mmubuuza nti: Beitu ori muhara w'oha? Agarukamu ati: Ndi muhara wa Betueli mutabani wa Nahori ou Milika yaamuzaariire. Naanye nikwo kumuta empeta aha nyindo n'engoro aha mikono. 48Bwanyima ntsimba amaju, ndamya Nyakubaho. Mpimbisa Mukama Ruhanga wa Aburahamu mukama wangye, onyebembeire omu muhanda guhikire, nkashwererera mutabani wa mukama wangye muhara wa mwene waabo. 49Mbwenu nu, ku muraabe nimwija kubeera mukama wangye abeesigwa kandi ab'amazima nimungambire; kandi ku kiraabe kitari kityo nabwo mungambire, mbone kugira orubaju ru naatoora, yaaba rwa buryo nari orwa bumosho.
Labaani okuhingira Rebeka
50Bwanyima Labaani na Betueli baagarukamu bati: Ekyo kintu n'ekya Nyakubaho; n'ahabw'ekyo titurikubaasa kukugambira yaaba twakuha nari twakwima. 51Reeba Rebeka ngugu omutware ogyende, abe muka mutabani wa mukama waawe, nk'oku Nyakubaho yaakicumire.
52Omugaragwa wa Aburahamu ku ahurira ebi baagamba, ajuumara ahansi omu maisho ga Nyakubaho. 53Mpaho ogwo mugaragwa aihayo amabaare gahunzirwe efeeza n'agahunzirwe ezaabu n'ebijwaro, abiha Rebeka, kandi aha munyaanya na nyina amahunde g'obuguzi bwingi.
54Bwanyima ogwo mugaragwa n'abu yaabaire aine, baarya kandi baanywa, baaraarayo ekyo kiro. Omu kasheeshe ku baimukire, yaagira ati: Mundagye ngarukye owa mukama wangye. 55Munyaanya w'ogwo mwishiki na nyina baamugarukamu bati: Reka omwishiki amare naitwe akaanya nangwa ebiro ikumi, reero abone kugyenda. 56Kwonka we abagira ati: Nk'oku Nyakubaho ahaire omugisha orugyendo rwangye, mutantuuzaho. Ka ngyende mbone kugaruka owa mukama wangye. 57Nabo bagira bati: Ka twete omwishiki tumubuuze. 58Batyo beeta Rebeka bamubuuza bati: Noikiriza kugyenda n'ogu mushaija? Nawe ati, Eego niinyija kugyenda. 59Mpaho baaraga Rebeka munyaanyabo n'omurezi we n'omugaragwa wa Aburahamu n'abashaija b'ogwo mugaragwa.
60Haza baashabira Rebeka omugisha nibamugira bati: Munyaanyaitwe, kabe nyina w'enkumi n'obukumi; na baijukuru baawe nibakakubuure amarembo g'abarikubanga. 61Bwanyima Rebeka n'abaranga be baimuka, baatemba engamira, baagyenda n'ogwo mushaija. Nikwo ogwo mugaragwa yaatwaire atyo Rebeka, akeegyendera.
Isaaka okutaasya Rebeka
62Reero obwo, Isaaka akaba yaarugire Beeri-lahai-roi, atwire omuri Negebu. 63Mbwenu Isaaka akaba ashohoire aheeru naagyendagyenda omu ishwa omu mwabazyo, ari omu biteekateeko. Ku yaimukize ati amaisho, yaareeba engamira niziija. 64Rebeka nawe ku yaimukize amaisho yaareeba Isaaka, yaatemburuka aha ngamira, 65yaabuuza omugaragwa, ati: Oriya muntu owaareetana omu ishwa kutubugana n'oha? Omugaragwa ati: Manya ogwo niwe mukama wangye. Na Rebeka nikwo kukwata omwenda gwe akeetwekyerera.
66Reero ogwo mugaragwa akateekyerereza Isaaka byona ebi yaakozire. 67Bwanyima Isaaka yaataasya Rebeka omu ihema yaamushwera, n'onu yaaba omukazi we; haza iba yaamukunda. Isaaka yaahuumurizibwa atyo enaku z'okufa kwa nyina.
Oruzaaro rwa Ketura
Currently Selected:
Kut 24: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
