1 Abhakörintö 11
11
1Ku bhuyö mweghe amangʼana aghaane, kya bhono öni nkwegha amangʼana agha Kiristo.
Bhono ikutunwa tokore enkaagha eno tokosaasaama
2Mbe, nkobhakumya ndë ko bhoora mukunhiita ko mangʼana ghonswe igho, kora nkoghoota mörë amangʼana ghaara, kya bhono naabhatëëbhëri. 3Kasi bhoono nkutuna ndë momanye igha, Yëësu Kiristo we omotwe#11:3 Omotwe. Ensonga iyaamo ni-igha, uwa ubhwera. ughwa umushaasha, na umushaasha we omotwe ughwa mokaaye, na Waryobha we omotwe ughwa Yëësu Kiristo. 4Kera umushaasha hano yasaasaama Waryobha, handë hano yaghamba amangʼana agha öbhörööti, na eno akundikiiyi ëkëntö ko-motwe, uyö no-motwe ughwaye akösöökya, omotwe ughwaye ghuyö, n-Kiristo. 5Kasi kera omokari hano yasaasaama Waryobha, handë hano yaghamba amangʼana agha öbhörööti, atakundikiiyi ëkëntö ko-motwe, nkösöökya arë omotwe ughwaye, omotwe ughwaye ghuyö, m-mushaasha uwaaye, ko bhoora nkobha arë kya omokari ono aghingirrwë#11:5 Aghingirrwë. Senkaagha siyö, në-nsöni yaarë omokari ukughingira situukya ko-motwe. situukya. 6Hano omokari atakundikiiyi ëkëntö ko-motwe ughwaye, aghingirwe situukya isyaye syengʼehe. Nyoore në-nsöni omokari ukughingira situukya isyaye syengʼehe, handë ukusighingira, akundikiiri ëkëntö ko-motwe ughwaye. 7Ti-bhuuya umushaasha akundikiiri ëkëntö ko-motwe, ko bhoora we ni-tuubho na ubhuhika ubhwa Waryobha. Kasi omokari ne-merengaari ighya mushaasha uwaaye. 8Nkoghamba ndë igho ko bhoora Waryobha tiyaabhömbirë umushaasha ukurwa ko-mokari hë, kasi yaabhömbirë omokari ukurwa ku-mushaasha. 9Kora Waryobha tiyaabhömbirë umushaasha ko okoghera iya omokari hë, kasi yaabhömbirë omokari ko okoghera iya umushaasha. 10Ko okoghera iya engʼana iyö, na ko okoghera iya abhamaraika, ni-igha omokari abhe na ëkëntö ikya ukwörökya igha, n-hansë iya ubhwera ubhwa uwöndë arë.#11:10 Ukwörökya igha, n-hansë iya ubhwera ubhwa uwöndë arë. Ensonga iyaamo iyëndë ni-igha, ukwörökya ubhwera ubhwaye umwene.
11Kasi kö-bhömwë ubhwëtö na Omonene, omokari nkwitengʼera arë mushaasha uwaaye, na umushaasha wonswe nkwitengʼera arë mokaaye. 12Mbe, kya bhoora ërëngë igha omokari yaabhömbirwë ukurwa ku-mushaasha, kora umushaasha wonswe nkwebhorwa arë na omokari. Ëbhëntö bhyonswe igho nku-Waryobha bhikurwa. 13Bhoono bhëënyu abheene mwitegherre igha, omokari aingʼarëëyi okosaasaama Waryobha atakundikiiyi ëkëntö ko-motwe ughwaye? 14Kana ëmëbhërë ighyene tighikwörökya igha, në-nsöni umushaasha okobha na situukya sentambë? 15Kasi omokari okobha na situukya sentambë, iyö ni-kuughë iyaaye, ko bhoora yaahaanwa situukya sentambë, okore sebhe kya ingibho iya okotoora ko-motwe. 16Kasi hano ömöntö wowonswe araatune okorya senkaani ko amangʼana ghayö, amanye igha, bhëëtö tetoona eteemo iyëndë hë, kora amakanisa agha Waryobha, teghaana eteemo iyëndë hë.
Okosooka ibhyakorya ëbhëhörëëru ibhya Omonene
17Kasi tembakumi ko amangʼana ghano ndaaraghërri, ko bhoora igha, hano mwaikomania te-ko okoghera iya amangʼana agha ehoorohooro, kasi n-ko okoghera iya amangʼana ghano ghataana ehoorohooro. 18Nkwighwa ndë igha, hano mwaikomania bhunyikanisa, temokobha na ubhwighwerrani hë. Na öni ko-kerengere nyabhorebhe, nkukumya ndë igha, ni-igho gharë. 19Ko bhoora ni-igha ukwahokana kobhe mö-bhëënyu, okore bhamanyekane bhano bhaikërribhwa na Waryobha. 20Mbe, hano mwaikomania hamwë, ti-bhyakorya ibhya Omonene ukunyoora morarya hë, 21ko bhoora hano mwarya, kera ömöntö mö-bhëënyu muyö, nkotangata arë okorya ibhyakorya ibhyaye, takosanga na abhandë hë. Ku bhuyö, abhandë nkutighara bharë na umweko, na abhandë unyoora bhaghöötirwë na amarwa. 22Kasi, motaana imighi ighya okorya na ukunywera-mo? Kasi nkosera mörë ekanisa iya Waryobha na ökösöökërrya bhano bhataana ëkëntö? Bhoono iyakë ndaabhatëëbhi? Mbakumi? A a! Tembakumi ko okoghera iya amangʼana ghayö hë.
23Mbe, amëëghyö ghano naanyöörrë ukurwa ko-Monene Yëësu Kiristo, ngo naabhahaayë igha, ubhutikö bhoora yaakörëëywë inikö, yaaghëghirë omokaate, 24akakumya Waryobha, akaghobhotora, akabhatëëbhya igha, “Ghono ngo ömöbhërë ughwane ghono murimwenserwa. Mobhenga morakora igho, ko okonheetoka!” 25Hano bhaamarrë okorya, akaghegha ekekombe ikya idivai,#11:25a Idivai. Maaha mo-faharaasa. akakora kya bhoorabhoora, akaghamba igha, “Ekekombe keno kereemererra Imuuma#11:25b Imuuma. Maaha mo-faharaasa. Eehya eno Waryobha arekora okohetera ko-maanyinga aghaane. Mokorenga igho, ko okoheetoka.” 26Momanye igha, hano mwarya omokaate ghono, na ukunywera mo-kekombe keno, hayö nu-ruku urwa Omonene ukunyoora moraraareka okohekera hano ariisha.
27Mbe, ömöntö wowonswe igho ono akorya omokaate ghuyö handë ukunywera mo-kekombe kiyö bhono etaingʼarëëyë, uyö nkunyoora örë aikörëëyë risoro irya obhosarya ko okosera ömöbhërë na amaanyinga agha Omonene. 28Kasi bhoono kera ömöntö aibhööri umwene mo-motwe ughwaye, ataraarya omokaate na ukunywera ekekombe kiyö. 29Ngambirë igho, ko bhoora ömöntö ono akorya omokaate na ukunywera ekekombe kiyö, na eno atamanyirë igha, aana öbhömwë na ömöbhërë ughwa Omonene, uyö nkwitoora arë mo-kobhotorrwa ikiina na Waryobha. 30Ko okoghera iya ghayö, nkyo kekoghera abhantö abhaaru mö-bhëënyu, bhaanyamooroka na abhandë m-barööyë na kora abhandë bhaakwa. 31Kasi hano tokaaitëghërrëëyë bhuuya amaitegherro aghëëtö, Waryobha takaatöbhötörrëëyë ikiina hë. 32Kasi hano twashibhibhwa na Omonene, nkwörökërribhwa törë, okore Waryobha atakaasha ukutushibhya hamwë na ekebhara keno. 33Ku bhuyö, abhakumya bharikyane, hano mwaikomania okorya, moghanyanenga. 34Nyoore ömöntö aana umweko, araagherenga waaye ka, okore ukwikomania ukwënyu, kotakaabhakorerra mobhotorrwe ikiina. Mbe, hano ndiisha, nendetoora bhuuya amangʼana aghandë ghano ghatighaayë.
Currently Selected:
1 Abhakörintö 11: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.