1 Abhakörintö 4
4
Emeremo ighya abhatomwa
1Mbe, abhantö bhamanye igha, bhëëtö m-baköri abha emeremo abha Yëësu Kiristo törë, abharaarëki abha amangʼana agha ibhibhisirë ibhya Waryobha. 2Bhoono keno kikutunwa, nu-bhwimërërri ubhwa heene. 3Ko orobhaara urwane öni, mmokaanshongera, te-ngʼana hë, handë nenkaashongerwa na abhantö abha ubhwera honswe te-ngʼana hë. Kasi öni umwene tinkwishongera hë. 4Amaitegherro aghaane m-buuya gharë, kasi engʼana iyö tekoghera nange okobha na obhosarya. Omonene we akombotorra ikiina. 5Ku bhuyö motakaabhotora ikiina, enkaagha iyaako etaraabha, moghanye okohekera hano Omonene ariisha. We aremoreka amangʼana agha mu-kisuntë ghonswe igho ghano ghabhisirwë, na okotoora harabhu ghano gharëngë mo-senkoro isya abhantö. Hayö ho bhoono kera ömöntö arinyoora sinkuma seno aingʼarëëyi, ukurwa ku-Waryobha.
6Mbe, abhakumya bharikyane, nëndëngëri amangʼana aghaane na Apöörö, okore ghabhe ëkërëngyö keno keraabhatöörri okomanya amangʼana agha ëkërëngyö keno igha, “Motakaataamboka keera Amaandeko Amahörëëru ghakoghamba.” Nkoghamba ndë igho, okore ömöntö mö-bhëënyu muyö, atakaibhaakera murikyaye na okomosera. 7Bhoono uwe n-nawë yaakokora obhe uwa heene okokera abhandë? N-kë onakyo keno otaahaanwa na Waryobha? Nyoore waahaanwa, n-kwakë ukwibhaaka kya ono otaahaanwa?
8Bhoono ghonswe igho ghano mukutuna, mmoonagho! Mwameha! Mwabhaayë abhakama, bhëëtö totaamo. Nyakara mbe ekaabhaayë maheene igha, m-bakama mörë, okore na bhëëtö bhonswe totonge hamwë na bhëënyu! 9Kasi ndamanya bhëëtö abhatomwa, Waryobha yaatokora abhantö abha okoserwa okokera bhonswe igho. Twabha kya abhantö bhano bhaabhotorrwa ikiina igha bhaitwe. Nkoghamba ndë igho, ko bhoora twabha abhantö abha okosekerrwa ko-kebhara kyonswe igho, ko-bhamaraika na ko-bhantö. 10Abhantö bharatomaaha igha m-bakangi törë, ko okoghera iya okokorra emeremo Yëësu Kiristo, kasi bhëënyu moraikora igha m-bangʼaini mörë, ko okoghera iya Yëësu Kiristo. Bhëëtö m-batëntëëru törë, kasi bhëënyu moraikora igha, mmoona singuru, bhëënyu mmoona emerengaari, kasi bhëëtö nkoserwa törë. 11Kora bhoono, ntoona umweko na inyonta, twaghoterwa singibho, toratemwa sinkundi, nkoghendaghenda törë igho, tetoona ahasë aha okomenya hë. 12Nkunyanka törë ukwikorra emeremo na amabhoko aghëëtö abheene. Hano twatokwa, nkongʼoora törë. Hano twateeswa, nköghömërrya törë. 13Hano bhatohanga engʼana, nkobhahonshora törë bhuuya. Kora bhoono twakorwa kya amatokoore agha ko-kebhara kono, twabha kya abhantö bhano bhataana ubhwera okokera ëbhëntö bhyonswe igho.
14Tinkwandeka amangʼana ghano okore mbasöökërri hë, kasi nkobhakaania ndë kya hano nkokaania abhaana abhaane abhaghonshe. 15Mokaabha na abhëëghya ëbhëkwë ikömi, abha ököbhëëghya amangʼana agha Yëësu Kiristo, kasi bhasuwëënyu, te-bhaaru hë. Kasi suwëënyu ko amangʼana agha Yëësu Kiristo nö-öni, ko bhoora nö-öni naabharaarëkëëyë Amangʼana Amaiya. 16Mbe, ndabhasaasaama mokorenga bhono öni nkokora. 17Ku bhuyö ntömirë Timoteo, omoona uwaane omoghonshe ku umukumo ghono tokosanga nawe, m-möntö uwa heene ko-meremo ighya Omonene. Uyö we araabhahiitöki amangʼana aghaane kya bhono nkosoorana Yëësu Kiristo. Naraabhatëëbhi kya bhono nkwëghya kera ahasë mo-makanisa ghonswe igho.
18Ndaighwa igha mö-bhëënyu muyö bhaamo bhano bhakwihasha bharakanya igha tiniishe kö-bhëënyu iyö hë. 19Kasi hano Omonene araahanshe, m-böngö ndaashe kö-bhëënyu iyö. Hayö ho ndemanya ta-mangʼana aghaabho agha ukwihasha agheene igho, kasi nendemanya kora na obhotoro ubhwabho bhwonswe kya igho bhörë. 20Nkoghamba ndë igho, ko bhoora Obhokama ubhwa Waryobha, tebhokobha ko amangʼana agheene igho hë, kasi nko-bhotoro. 21Bhoono iyakë mukutuna? Niishe na inyimbo? Kasi ni-igha niishe na righonshe bhohaabhu igho?
Currently Selected:
1 Abhakörintö 4: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.