1 Abhakörintö 7
7
Amaraghërryö agha öbhötëti
1Mbe, bhoono ko mangʼana ghano mwaanyandëkëëyë igha, “Nyakara umushaasha atakaakunia omokari.”#7:1 Umushaasha atakaakunia omokari. Ensonga iyaamo iyëndë ni-igha, m-buuya ömöntö atakaateta. 2Kasi ko okoghera iya ukwibhasha obhosooraare, ni-igha kera umushaasha abhe na mokaaye umwene igho, na kera omokari abhe na umushaasha uwaaye umwene igho. 3Umushaasha atakaima mokaaye amangʼana ghaara agha abhantö bhakörö, kora omokari wonswe bhuyöbhuyö. 4Omokari atakaabha na ubhwera kö-möbhërë ughwaye, kasi ateghere mushaasha uwaaye ubhwera bhuyö. Umushaasha wonswe ateghere mokaaye ubhwera ubhwa kö-möbhërë ughwaye. 5Ömöntö atakaima murikyaye ko amangʼana agha abhantö bhakörö ghaara, kasi n-hano oraanyoore mwikererraini kwa ibhagha ike igho, okore mobhe na umweya ughwa okosaasaama. Hano mokomara, mukyorrane, okore Oghosambwa ghotakaabhashaasha.
6Amangʼana ghayö ngambirë, ti-igha m-mughiro, kasi n-ko bhono öni umwene nkomaaha. 7Nenkaashömëëywë hano abhantö bhonswe igho bhakaabhaayë kya bhono ndëngë, kasi kera ömöntö, naana ituho iyaaye umwene, ukurwa ku-Waryobha, ömwë ituho eno, na uwöndë iyëndë.
8Bhano bhataraateta, na abhasinö, ndabhatëëbhya igha, nyakara bhaikare ighoigho kya öni. 9Kasi hano bharaakerwe ököghömërrya, bhatete, nyakara ömöntö otete, otakaasekaana oronamba urwa ömöbhërë.
10Kasi bhano bhaamara okotetana, ndabharaghërrya, kasi tö-öni hë, Omonene we akobharaghërrya igha, omokari atakaatighana na mushaasha uwaaye.#7:10 Maaha mo-ketabho ikya Mataayo 5:32; Maariko 10:9, 10:12. 11Kasi nyoore natighana nawe, ni-igha atakaatetwa ghwiki, handë aighwerrane na mushaasha uwaaye. Ghwiki ni-igha, umushaasha wonswe atakaatigha mokaaye.
12Mbe, abhantö abhandë to-Monene akobhatëëbhya hë, kasi nö-öni. Ndabhatëëbhya igha, hano oraanyoore umushaasha umukumya ono aana omokari ono atarë umukumya, na omokari uyö araikërrya ököghëndërrya okobha nawe, atakaamutigha. 13Kora omokari umukumya wonswe, ono aana mushaasha ono atarë umukumya, na umushaasha uyö araikërrya okobha nawe, atakaamutigha. 14Nkoghamba ndë igho, ko bhoora umushaasha ono atarë umukumya, nkosaabhuurwa arë okohetera ko mokaaye. Kora omokari ono atarë umukumya, wonswe nkosaabhuurwa arë okohetera ku-mushaasha uwaaye. Hano etakaabhaayë igho, abhaana abhëënyu mbakaanyankuhirë. Kasi bhoono m-bahörëëru abha Waryobha.
15Kasi ono atarë umukumya hano araatanore, mutighe aghende. Hayö bhoono umushaasha handë omokari umukumya uyö, takorebherrwa na umughiro ughwa bhano bhaatetana. Kasi momanye igha, Waryobha yaatobherekera okore tobhe na omorembe. 16Ko bhoora ni-igha, uwe omokari umukumya, okaamanya igha oratora ökötöörya mushaasha uwaaho? Handë uwe umushaasha umukumya, okaamanya igha oratora ökötöörya mokaaho?
Mobhe kya bhono mwaarë hano Waryobha yaabhabhërëkëëyë
17Kera ömöntö amenye ko okorengʼaana na ësëëmyö iya Omonene, aghëndërri okobha kya bhono yaarë hano Waryobha yaamöbhërëkëëyë. Amangʼana ghayö, ngo nkoraghërrya ko-makanisa ghonswe igho. 18Nyoore aaho ömöntö nyabhorebhe, ono yaabhërëkëëywë na Waryobha amarrë okosaarwa, atighare bhuyöbhuyö. Nyoore aaho ömöntö nyabhorebhe ono yaabhërëkëëywë mo-bhano bhatakosaarwa, atighare bhuyöbhuyö. 19Okosaarwa handë ukwanga okosaarwa te-ngʼana hë. Kasi ekenene, no-koghoota amaraghërryö agha Waryobha.
20Bhoono ni-igha, kera ömöntö atighare kya bhono yaarenga enkaagha eno Waryobha yaamöbhërëkëëyë. 21Nyoore wabhërëkëëywë enkaagha eno waarë omoghorwa, otakaighwa bhoghogho, kasi hano oraanyoore umweya ughwa okobha ömötöönööni, kora igho. 22Ko bhoora ömöntö ono yaabherekerwa arëngë omoghorwa, m-mötöönööni ko-Monene. Ni-ighoigho kora na ono yaabherekerwa arëngë ömötöönööni, m-moghorwa uwa Kiristo. 23Waryobha yaabhatungurya kö öbhöghöri obhonene, ku bhuyö, motakaabha abhaghorwa abha abhantö. 24Abhakumya bharikyane, kera ömöntö ku-Waryobha, abhe kya bhono yaarë enkaagha eno yaabhërëkëëywë.
Amaraghërryö ko abhasinö na ko bhano bhataraatetwa
25Bhoono ko amangʼana agha abhahara bhano bhataraatetwa,#7:25 Abhahara bhano bhataraatetwa. Ensonga iyaamo iyëndë ni-igha, bhano bhataraateta handë okotetwa. teneena engʼana iya Omonene iya okobharaghërrya. Kasi nkobharaghërrya ndë bhono öni nkomaaha, ko bhoora ko okoghera iya ikyabhera ikya Omonene, m-möntö uwa heene ndë. 26Mbe, nkomaaha ndë igha, engʼana eno ni-nshiiya ko okorengʼaana na inyanko eno eeho, ni-igha, ömöntö abhe kya bhuyö arë. 27Nyoore waateta, otakaatigha mokaaho. Nyoore otaraateta, otakaateta. 28Kasi nyoore noteta, tunyoore osarri hë. Na omohara wonswe nyoore natetwa, tunyoore asarri hë. Kasi, bhano bhaatetana mbaraanyoore inyanko ko-kebhara kono. Keno nkutuna ni-igha motakaanyoora inyanko iyö.
29Abhakumya bharikyane, nkoghamba ndë igha, ribhagha reno ritighaayë ni-ike igho. Ukurwa bhoono igho, bhano bhaateta, bhabhe kya bhano bhataateta. 30Abhantö bhano bhakukuura, bhabhe kya bhano bhatakukuura, bhano bhakushomerwa bhabhe kya bhano bhatakushomerwa, na bhano bhakoghora ëbhëntö, bhabhe kya bhano bhataana ëkëntö. 31Abhantö bhano bhakutighinkanera ëbhëntö ibhya ko-kebhara keno, bhabhe kya bhano bhatakutighinkana. Ko bhoora ekebhara keno m-manshë mahëti.
32Keno nkutuna ni-igha, motakaanyankibhwanga na amangʼana ghayö. Mmomanyirë igha ömöntö ono atatëtirë, amangʼana agha Omonene ngo akutighinkanera, okore atëghëri Omonene. 33Kasi ömöntö ono atëtirë, amangʼana agha ko-kebhara kono, ngo akutighinkanera, okore atëghëri mokaaye. 34Ku bhuyö amangʼana aghaaye n-ga mbagha ibhërë. Omohara ono ataraatetwa, handë omokari ono ataraatetwa, we nkutighinkanera arë amangʼana agha Omonene, okore abhe ömöhörëëru uwa enkoro na ömöbhërë. Kasi omokari ono yaatetwa, umwene nkutighinkanera arë amangʼana agha ko-kebhara kono, okore atëghëri mushaasha uwaaye. 35Nkoghamba ndë amangʼana ghayö, okore mobhe na ehoorohooro, tërëngë igha nkobhatimbya ndë hë. Kasi keno nkutuna ni-igha mwikarane bhwaheene, mutighinkanerenga Omonene bhuuya, motaköngʼënërribhwa na ëkëntö.
36Ömöntö wowonswe igho ono akomaaha igha ti-bhuuya ukwanga okoteta omohara ono aghambëëyë öbhökwë, kora ömöbhërë ughwaye nkomokera ghörë ukwirebherra,#7:36 Kora ömöbhërë ughwaye nkomokera ghörë ukwirebherra. Ensonga iyaamo iyëndë ni-igha, kora nokaanyoora imyoka ighyaye ighya okotetwa ghyaheta. aramaaha igha m-buuya atete, mbe, akore kya bhono akutuna, okore bhatetane. Hayö të-këbhë ukunyoora akörrë hë. 37Hano ömöntö umwene araamaahe igha, taatëtë omohara uyö hë, airebherre bhuuya umwene, amarrë okomaaha igha tekeeho ëkëntö ikya ukumusingʼirrya okoteta, hayö m-buuya oraanyoore akörrë ku ukwanga okoteta omohara uyö. 38Ku bhuyö, ono araatete omohara uyö, m-buuya oraanyoore akörrë, kasi ono araange okoteta omohara uyö, m-buuya bhököngʼu ukunyoora akörrë.#7:36-38 Ensonga iyëndë iya senkarra siyö ni-igha, Ömöntö wowonswe igho ono akomaaha igha ti-bhuuya ukwanga umwisëkë uwaaye ono aghambëëywë öbhökwë atakaatetwa, kora imyoka ighyaye ighya okotetwa ghyamara okoheta, na ömöntö uyö aramaaha igha m-buuya umwisëkë uyö atetwe, akore bhono akutuna okore umwisëkë uyö atetwe. Hayö të-këbhë oraanyoore akörrë hë. Na hano oraanyoore ömöntö aikërëëyi mo-motwe ughwaye umwene igha takutuna mwisëkë uwaaye atetwe hë, na teeho engʼana eno ekomobhandërrya igha atetwe, kora nkotora arë okorebherra righonshe iryaye, hayö m-buuya oraanyoore akörrë. Ku bhuyö ömöntö ono akutuna mwisëkë uwaaye ono aghambëëywë öbhökwë igha atetwe, uyö m-buuya oraanyoore akörrë. Na ono atakutuna igha umwisëkë uwaaye atakaatetwa, uyö m-buuya bhököngʼu ukunyoora akörrë.
39Omokari ono atëtirwë, nabhöhirwë na amaraghërryö agha öbhötëti, ko-nkaagha yonswe igho, eno ukunyoora mushaasha uwaaye ataraakwa. Kasi hano mushaasha uwaaye araakwe, hayö nkobha arë ömötöönööni, aratora okotetwa na ömöntö wowonswe igho, ono akutuna, kasi ömötëti uyö, abhe Umukiristo. 40Kasi nyakara umusinö uyö aikare igho atatëtirwë. Ghayö na-maitegherro aghaane, ndamanya öni wonswe nu-Mwika uwa Waryobha we akontangata ngambe amangʼana ghayö.
Currently Selected:
1 Abhakörintö 7: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.