1 Abhakörintö 9
9
Ehoorohooro eno abhatomwa bhaingʼarëëyë ukunyoora
1Kanaa, nkokanya mörë igha tëndëngë mötöönööni hë? Tëndëngë omotomwa hë? Tenaamaaha Omonene uwëëtö Yëësu Kiristo hë? Emeremo gheno naakörrë, të-ghyö ghyaaghërrë mokakumya Omonene uwëëtö? 2Nokaanyoora igha, tëndëngë omotomwa ko abhandë hë, kasi kö-bhëënyu, m-motomwa ndë, ko bhoora bhëënyu mbo ekemanyërryö ikya ukwörökya igha, öni no-motomwa uwa Omonene ndë.
3Riyö ndyo rihonshoro iryane ko bhano bhakunyeera senkaani emeremo ighyane ighya obhotomwa. 4Kanaa, ntotaana obhotoro ubhwa okorya na ukunywa? 5Ntotaana ubhwera ubhwa ukughya na abhakari abhakumya ko-roghendo urwëtö, kya bhono bhakokora abhatomwa abhandë, hamwë na bhamura bhaabho Omonene uwëëtö Yëësu Kiristo bhaana Keefa? 6Kasi nö-öni na Bharinaabha abheene igho, mbo twingʼarëëyë ukwikorra emeremo ko okoghera iya obhohabhë ubhwëtö? 7M-musirikare kë ono akwironerra umwene ukughya ku-riihë, na ehoorohooro iyaaye umwene? M-mörëmi kë ono akwëmya emezabhibhu, aanga okorya sehagho isyaghyo? Handë m-monaghya kë uwa situgho ono akwanga ukunywa amabheere agha situgho siyö?
8Kasi nkokanya mörë igha, m-mangʼana agha kinyabhantö nkoghamba? Nda ni-igho amaraghërryö agha Mosa ghakoghamba? 9Amaraghërryö agha Mosa gharaghamba igha, “Otakaabhoha engʼombe umunywa, hano yakohoorra engano.”#9:9 Maaha mo-ketabho ikya Eheetoko iya Etoraati 25:4. Nkokanya mörë igha, hayö Waryobha na-mangʼana agha sengʼombe akushumaashera? 10Kasi m-bëëtö akushumaashera? Ni-igho ërë! Amaandeko ghayö, ngaandëkirwë ko okoghera iya bhëëtö! Ko bhoora ono akorema, nkorema arë aana ubhweseghe igha, naraaghese. Na ono akohoora wonswe, naana ubhweseghe ubhwa ukunyoora ikitweno ikyaye. 11Hano twaabharaarëkëëyë amangʼana agha Yëësu Kiristo, ntwaarë kya bhano twaabhusuranga. Bhoono m-boghogho kë, hano toraanyoore ëbhëntö ukurwa kö-bhëënyu ibhya ökötötöörrya obhohabhë ubhwëtö, kya bhano tokoghesa? 12Hano okomaaha abhandë mbaingʼarëëyë okohaanwa ëbhëntö ukurwa kö-bhëënyu, bhoono bhëëtö bho titwingʼarëëyi bhököngʼu okohaanwa ëbhëntö bhiyö okokera bhayö?
Kasi tetwasabha ëbhëntö bheno twingʼarëëyi ukunyoora, nköghömërrya törë amangʼana ghonswe igho, okore totakaarebherra abhantö ukukumya Amangʼana Amaiya agha Yëësu Kiristo. 13Kasi, motamanyirë igha, bhano bhakokora emeremo mu-risengerro irya Waryobha,#9:13 Mu-risengerro irya Waryobha. Maaha mo-faharaasa engʼana, Risengerro irya Waryobha. ibhyakorya ibhyabho mu-risengerro muyö bhikurwa? Kora bhano bhakumwensa, ikitweno ikyabho nku-kimwenso kuyö kikurwa? 14Kora Omonene ni-ighoigho yaaraghërrya igha, bhano bhakoraareka Amangʼana Amaiya, bharaagherenga okohetera ko-meremo ghiyö.
15Kasi öni, tenaakakörrë igho hë. Kora tërëngë igha nkwandeka ndë igho, okore mongʼaane, ti-igho hë. Ko bhoora nyakara nkwe, kasi ömöntö wowonswe igho, atakaasha ukunduusirya-ho ukwikumya ukwane kono. 16Ko bhoora nokaanyoora nkoraareka ndë Amangʼana Amaiya, teneena ikiheemere hë, ko bhoora ni-igha ndaareke. Hano ndaange okoraareka Amangʼana Amaiya ghayö, haahö. 17Hano ndaakore emeremo ghiyö ko okohansha ukwane öni umwene, nendaatuhwe. Kasi hano oraanyoore igha te-ko okohansha ukwane hë, mmanye igha naakumibhwa, nkahaanwa ubhwimërërri. 18Bhoono ituho iyaane në-ëëhë? Ituho iyaane no-koraareka Amangʼana Amaiya bhosa igho, ntakosabha keno ningʼarëëyë okohaanwa.
Amangʼana ghano abhatomwa bhakutunwa igha bhakore
19Öni tëndëngë omoghorwa uwa ömöntö wowonswe igho hë, m-mötöönööni ndë. Kasi naikërrya okobha omoghorwa uwa abhantö bhonswe igho, okore ntöörri abhantö abhaaru bhakumi Kiristo. 20Ko-Bhayahudi, m-Muyahudi naarë, okore ntöörri Abhayahudi bhakumi Yëësu Kiristo. Ko abhaghööti abha amaraghërryö, öni wonswe nkabha kya ömöghööti uwa amaraghërryö, nokaanyoora öni umwene tëmöghööti uwa amaraghërryö ndë hë. Naakörrë igho, okore ntöörri abhaghööti abha amaraghërryö, bhakumi Yëësu Kiristo. 21Ko bhano bhataana amaraghërryö agha Mosa, nkabha kya ono ntaana amaraghërryö, okore mbatöörri bhakumi Yëësu Kiristo. Ti-igha teneena amaraghërryö ukurwa ku-Waryobha, kasi neena amaraghërryö agha ukurwa ku-Yëësu Kiristo. Naakörrë igho okore ntöörri bhano bhataana amaraghërryö. 22Ko bhanyamukumo mötëntëëru, nkabha kya ono neena umukumo mötëntëëru, okore mbatöörri. Naakora ghayö ghonswe igho, ko-bhantö bhonswe igho, okore kwa nshera yoyonswe eera, ntööri abhandë mo-bhantö bhayö. 23Nkokora ndë amangʼana ghayö ghonswe igho, ko okoghera iya Amangʼana Amaiya, okore nsange na abhandë obhongʼoore ubhwa Amangʼana Amaiya ghayö.
24Temomanyirë igha abhantö bhano bhakohambana rikenya, nkokenya bharë bhonswe igho, kasi ono akokera, we umwene igho akutuhwa? Bhoono, mokenye bhököngʼu, okore mutuhwe. 25Ömöntö ono akutuna abhe embaahi ko-mehooyo, nkwirebherra arë amangʼana ghonswe igho. Mbe, bhayö nkokora bharë igho, okore bhanyoore ikirighi keno kekomara kesareka, kasi bhëëtö ntoraanyoore ikirighi keno ketakosareka röndë. 26Ku bhuyö öni tenkokenya kya ömöntö ono akokenya bhosa igho, atamanyirë keno akokenyera. Ghwiki tinkwitana kya ömöntö ono akorekera sinkundi bhosa igho. 27Kasi nö-möbhërë ughwane nkunyankya, kora ndairebherra, okore ntakaasha okomara okoraarekera abhandë, öni umwene nangwe.
Currently Selected:
1 Abhakörintö 9: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.