Amangʼana agha Abhatomwa 11
11
Peetero araikoorerra ko amangʼana ghano ghaaikörrë Kaisaaria
1Abhatomwa abha Yëësu na abhakumya bharikyabho mo-mokowa ughwa Yudea, bhakaighwa igha Abhakyaro bhonswe bhaikërëëyi engʼana iya Waryobha. 2Ku bhuyö hano Peetero yaakyörrë Yërusarëëmu, Abhayahudi bhano bhaaikërëëyi Yëësu, bhakamotema amasoro. 3Bhakamötëëbhya igha, “Uwe waasöhirë wa ömörëësya (ömöntö ono atakosaarwa) kora okasanga nabho ibhyakorya!”
4Mbe, Peetero akasimya okobharaghërrya bhuuya keno kyaabhaayë, akaghamba igha, 5“Naarenga Yafa ndasaasaama Waryobha, urusikö nyabhorebhe. Nkeesherwa na amamaaho. Nkamaaha mo-mamaaho muyö, ëkëntö ekenene kenga ishuuka, keraikibhwa hansë, këghöötërrëywë ëbhëköbhöbhi ibhya-ko bhine. Kekaikibhwa haangʼë na öni. 6Hano naasyömëri-mo na ukwitaaha-mo bhuuya, nkamaaha-mo sityënyi syonswe igho nyamaghörö ane, bheno bhikwingʼuura, hamwë na ibhinyönyi.
7“Nkaighwa engamba erantëëbhya igha, ‘Peetero, emoka oghooghe, oraaghere!’ 8Nkahonshora igha, ‘Tekeebhe hë ore Omonene! Öni tenakarëëyë ibhyakorya bhyobhyonswe igho bheno amaraghërryö agha Mosa ghakoraghërrya igha m-binyanku na mughiro!’ 9Kasi nkaighwa ghwiki urwa kabhërë, engamba iyö ukurwa mu-ryobha erahonshora. Ekahonshora igha, ‘Otakaabherekera ëkëntö keno Waryobha yaasendoora igha n-kinyanku.’ 10Engʼana iyö yaaikörrë katatö, ho ëbhëntö bhiyö bhonswe igho bhyaakyöriibhwi mu-ryobha.
11“Kamwë igho, abhantö abhatatö bhano bhaaruurë Kaisaaria, bhaarenga bhaimërëëyë haangʼë na inyumba eno twaaikaranga-mo. Abhantö bhayö, bhaarenga bhatömirwë ku-öni. 12Umwika Ömöhörëëru akantëëbhya igha, nhinane nabho, ntakaakubhya. Kora bharikyëtö bhasansabha bhano bhaahano, ntwaasöhirë bhonswe igho mu-nyumba iya Körönëriö. 13Körönëriö akatötëëbhya kya bhono yaarööshë maraika aimërëëyë mu-nyumba iyaaye, na bhono maraika uyö yaamötëëbhëri igha, ‘Toma abhantö Yafa, bhabherekere Simööni ono akobherekerwa igha Peetero, aashe hano. 14Peetero uyö naraakötëëbhi amangʼana. Ko okohetera amangʼana ghano araakötëëbhi, uwe na abhantö abhaaho bhonswe igho, moraatööribhwi.’
15“Bhuyö naasimiri okobhatëëbhya amangʼana ghayö igho, këmwë Umwika Ömöhörëëru akabhaitoomera kya bhoorabhoora yaatwitömëëyë na bhëëtö. 16Hayö ho naahiitökirë engʼana iya Omonene eno yaaghambirë igha, ‘Yohana, na-manshë yaabhatiisiiyi abhantö.#11:16 Maaha mo-ketabho ikya Amangʼana agha Abhatomwa 1:5. Kasi bhëënyu, m-böngö hano moraabhatiisiribhwi Umwika Ömöhörëëru.’ 17Mbe, ko bhono Waryobha abhahaayë ituho eeraeera yaatohaayë bhëëtö hano twaakumiri Omonene Yëësu Kiristo, bhoono öni m-bwera kë neenabho, bhono bhoraaghere nshaashi okorebherra Waryobha?”
18Hano Abhayahudi bhayö bhaaighuurë amangʼana ghayö, bhakakira kiri. Bhakatöönia Waryobha bharaghamba igha, “Waryobha ahaayë Abhakyaro umweya, ughwa okohongora ëbhëbhë ibhyaho, okore bhanyoore öbhöhöru ubhwa amakora ghonswe igho!”
Ekanisa iya Antiökia
19Mbe, abhakumya bhano bhaanyaraghaini ku kibhuno ikya inyaanyi iya ukwitwa ukwa Sitefaano, mbaangʼösëëyë mu-bhyaro ibhya Föinikë, abhandë Kiipuro, na mu-mughi ughwa Antiökia. Hano bhaahikirë iyö, bhakabha bharëëghya amangʼana agha Yëësu ko-Bhayahudi abheene igho. 20Kasi abhakumya abhandë bhano bhaarwërëëyë kwi-ghinga irya Kiipuro, na mu-mughi ughwa Kirene, bho bhaangʼösëëyë Antiökia, abheene mbaaraarëkirë Amangʼana Amaiya agha Omonene Yëësu kora ko bhano bhaashumaashanga Ikiyunaani.#11:20 Bhano bhaashumaashanga Ikiyunaani. Ensonga iyaamo iyëndë ni-igha, Abhayahudi abha Ikiyunaani. 21Obhotoro ubhwa Omonene Waryobha, mbwaarë hamwë nabho. Abhantö abhaaru këmwëkëmwë, bhakakumya na ukukyora ko-Monene Yëësu.
22Hano abhantö abha ekanisa iya Yërusarëëmu bhaaighuurë amangʼana ghayö, bhakatoma Bharinaabha aghende Antiökia iyö. 23Hano yaahikirë-yo akamaaha bhono abhantö bhayö bhaarë na örööbhö urwa Waryobha. Akashomerwa, akabhakangʼasërrya igha, bhaghëndërri okobha abhakumya abha heene mo-senkoro isyabho, ko-Monene Yëësu. 24Bharinaabha m-möntö uwa heene yaarë, yaaishööyë Umwika Ömöhörëëru, na kora m-möntö uwa umukumo yaarë. Ekerengere ikya abhantö bhano bhaakumiri Omonene, kekaaruha bhököngʼu.
25Hano Bharinaabha yaamarrë, akaghya mu-mughi ughwa Tariso ukutuna-yo Sauri. 26Akamunyoora-yo, ku bhuyö akaasha nawe Antiökia hayö. Bhakaikara-ho omooka umughima. Bhakëëghya-ho abhantö abhaaru. Antiökia hayö, ho abheegha abha Yëësu bhaasëmökirë okobherekerwa igha, “Abhakiristo.”
27Ko-nkaagha iyöiyö, abharööti abhandë bhaangʼaaraarrë ukurwa Yërusarëëmu, bhakaghya Antiökia. 28Ömwë uwa abharööti bhayö, yaabherekerwanga igha Aghaabho, akaimerra mo-sango iya abhakumya abha Antiökia hayö. Akaruusya öbhörööti ubhwaye okohetera Umwika Ömöhörëëru igha, inshara ëndörö kai, neraabhe ko-kebhara kyonswe igho. Inshara iyö, yo eera yaaibhökirë enkaagha eno Kaisaari#11:28 Kaisaari. Uyö nö-mötöngi omonene uwa öbhötöngi ubhwa Ruumi. Maaha mo-faharaasa. Kiraudio yaarenga ömötöngi uwa obhokama ubhwa Abharuumi bhwonswe igho. 29Engʼana iyö, yaaghërrë abheegha bhakahëtya omosorro, ko okorengʼaana na ubhurito ubhwa ömöntö, okore bhaherre abhakumya bharikyabho bhano bhaamënyirë Yudea. 30Bhakasorra kya bhono bhaaighwerraini, bhakahaana Bharinaabha bhaana Sauri omosorro ghuyö, okore bhaghuhire ko-bhaghaaka abhatangati abha ekanisa iya Yërusarëëmu.
Currently Selected:
Amangʼana agha Abhatomwa 11: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
