Amangʼana agha Abhatomwa 17
17
Riihë mu-mughi ughwa Tësarönikë
1Mbe, Pauro bhaana Siira bhakahetera mu-mughi ghono ghwaabherekerwanga igha Amfipöri, na ughwöndë igha Apörönia, bhakahika Tësarönikë. Tësarönikë hayö ho inyumba iya esango iya Abhayahudi yaarë. 2Pauro akabha arasoha mu-nyumba iya esango iya Abhayahudi iyö, kya bhono eteemo iyaaye yaarë. Mbe, Pauro uyö, akabha arashumaasha na abhantö amangʼana agha Amaandeko Amahörëëru ku-sinsikö isatö isya Obhotooro seno syaaroobheraini. 3Akatona amangʼana, arabharahorra kya igho ghaarë igha Yëësu nakaatëësirwë, aitwe, hano akomara, aryoke ukurwa mo-bhaku. Pauro akabhatëëbhya igha, “Yëësu uyö nkobhatëëbhya amangʼana aghaaye, we Kiristo.” 4Amangʼana ghayö Pauro yaaghambirë, Abhayahudi abhandë bhakaghakumya, hamwë na Abhayunaani abhandë abhaaru bhano bhaaighweranga Waryobha. Kora abhakari abhaaru abha ibhyeo, bhakakumya. Abhantö bhayö bhonswe igho, bhakaghootana na bhaabho Pauro na Siira.
5Kasi amangʼana ghayö ghakaghera Abhayahudi abhandë bhakabha na rikenge. Ku bhuyö bhakaghya mo-moteera, bhakakora inikö na abhantö abha eteemo engogho. Abhantö bhayö, bhakakora riihë rinene mu-mughi ghuyö. Bhakaghya yeeka wa Yasööni, bhakasoha mu-nyumba kwa nguru, bharatuna Pauro na Sira, okore bhabhahire mo-sango iya abhantö hayö. 6Hano bhaabho Pauro bhaabhabhörrë, bhakaghoota Yasööni na abhakumya abhandë. Bhakabhahira ko-bhanene abha umughi, bharasaayasaaya igha, “Abhantö bhano bhasyörya ekebhara kyonswe igho, m-bano bhaahikirë mu-mughi mono okoreeta-mo riihë. 7Yasööni uyö, we yaabhasërëënëri waaye. Hamwë na ghayö, nkosarya bharë amaraghërryö agha Kaisaari, ko okoghamba igha, bhaana omokama uwöndë ono akobherekerwa igha Yëësu.”
8Hano abhanene abha umughi hamwë na abhantö bhayö bhaaighuurë amangʼana ghayö, bhakashaghana. 9Bhakashibhya Yasööni na bharikyaye bhayö, bhakabhahaatera.
Pauro na Siira bharëngë Bherooya
10Kamwë igho mu-bhutikö ghatë, abhakumya abha Tësarönikë bhakahira bhaabho Pauro na Siira, bhaghi mu-mughi ghono ghwaabherekerwanga igha Bherooya. Hano bhaahikirë iyö, bhakasoha mu-nyumba iya esango iya Abhayahudi. 11Abhabheerooya bhayö, m-bantö abha heene bhaarë okokera Abhatësarönikë. Ko bhoora bhaaghöötirë engʼana iya Waryobha ko motono, bhakabha bharitaaha mo-Maandeko Amahörëëru sinsikö syonswe igho, okore bhamaahe nyoore amangʼana ghayö Pauro akoghamba m-maheene! 12Mbe, Abhayahudi abhaaru hamwë na abhakari na abhashaasha, na Abhayunaani bhano bhaasookwanga, bhakakumya Yëësu.
13Kasi Abhayahudi abha Tësarönikë, hano bhaamanyirë igha Pauro nkwëghya arë abhantö engʼana iya Waryobha mu-mughi ughwa Bherooya, bhakaghya-yo. Bhakasëëghërrya rikomo irya abhantö bhano bhaarë hayö, riihë rekaghöötya. 14Ko okoghera iya ghayö, abhakumya abha hayö, bhakaherekerra Pauro bhöngöbhöngö, ukughya mo-keghobho. Kasi Siira na Timoteo bho bhakatighara Bherooya hayö. 15Abhakiristo bhayö, bhakamoherekerra igho, bhakamuhikya Atene. Hano bhasëëmyanga ukukyora, akabhatomana igha, bhaghende bhatëëbhi Timoteo bhaana Siira bhamwangohere.
Pauro arashumaasha na Abhaatene
16Hano Pauro yaaghanyanga Siira bhaana Timoteo Atene hayö, akamaaha umughi ghuyö ghonswe igho, ngwishööyë ëbhëtöndö ibhya amasambwa. Engʼana iyö, ekaghera akaighwa bhoghogho bhököngʼu mo-nkoro iyaaye. 17Mbe, akabha arasoha mu-nyumba iya esango iya Abhayahudi, arashumaasha na bhano yaasikananga nabho muyö. Akashumaasha na Abhayahudi na Abhakyaro bhano bhaaighweranga Waryobha, akabhaheemera amangʼana agha Yëësu. Akaheemera kora bhano yaasikananga nabho mo-moteera kera urusikö.
18Mbe, Pauro akahomerana na abhamanyi abha rikomo irya idiini ya Ikiepikureo na Ikisitoiko,#17:18 Ikiepikureo abhantö abha idiini iyö bho bhaakanyanga igha engʼana indito kö-möntö, nu-kwihansha, omorembe na ukushomerwa. Ikisitoiko abhantö abha idiini iyö bho bhaaghambanga igha, ëkëntö kyokyonswe igho ko-kebhara kono, nkeena ensonga yaamo. Ku bhuyö abhantö bhatakaabha na entarëki handë ukwibhëmbëërya. Bhabhaahe amaitegherro ghaabho. bhakanyeerana senkaani. Abhandë bhakaghamba igha, “M-mangʼana kë ghano umwibhamböku ono akoghamba?” Abhandë bhakaghamba igha, “Eramaahekana igha, m-biwaryobha ibhya ikyaro ikyëndë akushumaashera.” Mbaaghambirë igho, ko bhoora Pauro yaabharaarëkëëyë Amangʼana agha Yëësu, na agha ukuryoka ukwa abhaku.
19Mbe, abhantö bhayö, bhakaghegha Pauro bhakamuhira mo-sango iya Abhaatene eno yaabherekerwanga igha Areopagho.#17:19 Areopagho na-hasë hano bhaasikaneranga-ho. Bhakamötëëbhya igha, “Tötëëbhi ensonga iya amëëghyö amahya ghayö ökötëëbhya abhantö. 20Ko bhono twighuurë igha wishirë na amangʼana amahya, bhoono keno tukutuna, ni-igha otorahorre amangʼana ghayö.” 21(Mbaaghambirë igho, ko bhoora Abhaatene, hamwë na abhaghëni abha ukurwa mu-bhyaro ibhyëndë bhano bhaamënyirë Atene hayö, bhaahanshirë ukwitegherra na ukushumaashera amangʼana amahya ghano ghakwebhoka.)
22Mbe, Pauro akaimerra Areopagho hayö akaghamba igha, “Bhare bhaghaaka abha Abhaatene, ndamaaha igha nköröndërrya mörë bhököngʼu amangʼana agha okosengerra. 23Ko bhoora hano naarë okotaara mu-mughi ughwënyu mono, nitaahirë bhuuya ëbhëntö bheno mokosengerra, nkamaaha riighyö irya okosengerra-ko reno ryaarë ryandëkirë igha, ku-waryobha ono atamanyekaini. Waryobha uyö mokosengerra igho motamomanyirë, we nkutuna mbaraghërri.
24“Waryobha we yaabhomba mu-ryobha na ekebhara kyonswe igho, na bheno bheemo. Uyö we Omonene uwa mu-ryobha na ekebhara kyonswe igho, ku bhuyö, takwikara mo-masengerro ghano ghahaghaashwa na abhantö. 25Taana inyanko iya ökötööribhwa engʼana na abhantö, ko bhoora we akohaana abhantö umwika ughwa öbhöhöru, na ëbhëntö bhyonswe igho. 26We yaabhömbirë amakabhira ghonswe igho, ukurwa kö-möntö ömwë, okore bharoomaane ko-kebhara kyonswe igho. Akatoora-ho senkaagha seno yaasëëmëri ukurwa kare, akatoora-ho na sentonga isya ahasë hano bharaikarenga. 27Waryobha yaakörrë ghayö ghonswe igho, okore abhantö bhamutunenga, nokaanyoora n-kwa okohaabhaatahaabhaata igho, bhamomanye. Nokaanyoora umwene tarëngë hare na ömöntö wowonswe igho hë. 28Waryobha we akoghera toraghenda to bhahöru. Kya bhono umwandëki uwëënyu uwa amarëëtyö yaandëkirë igha, ‘Bhëëtö na-bhaana abhaaye törë.’
29“Mbe, ko bhoora igha bhëëtö na-bhaana abha Waryobha törë, tetokaakanya igha, Waryobha natuubhaini na ëbhëtöndö ibhya ebheghera ibhya esahaabhu, ebheghera ibhya seehera, na ibhya amaghena ghano ghakömöghirwë. Amatöndö ghayö, na-bhantö bhakoghakora ko-bhongʼaini ubhwabho. 30Kare hayö, Waryobha yaaikörrë igha takomaaha amangʼana ghayö abhantö bhaakoranga, ko bhokangi ubhwabho ubhwa ukwanga komomanya. Kasi bhoono, nkötëëbhya arë abhantö bhonswe igho abha kera ahasë igha, bhahongore ëbhëbhë ibhyabho. 31Ko bhoora yaatoora-ho urusikö, rono arebhotorra abhantö bhonswe igho ibhiina ibhyabho ko bhoheene. Waryobha, yaamara okotoora-ho ömöntö, ono arebhotorra abhantö ibhiina bhyabho. Yöörökya abhantö bhonswe igho obhoheene ubhwa amangʼana ghayö, ku ukuryökya ömöntö uyö ukurwa mo-bhaku.”
32Mbe, hano bhaaighuurë amangʼana agha ukuryoka ukwa abhaku, abhandë bhakashabhura. Kasi abhandë bhakamötëëbhya igha, “Toratuna ghwiki tukwitegherre ko engʼana iyö.” 33Mbe, Pauro akarwa mu-righambero muyö, akarishoka kebhara. 34Abhantö abhandë bhakakumya Yëësu, bhakaghootana na Pauro. Mo-bhantö bhayö yaare-mo Dionisio, uwa ribharasa irya Areopagho, na omokari ono yaabherekerwanga igha Damari, hamwë na abhandë.
Currently Selected:
Amangʼana agha Abhatomwa 17: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
