Amangʼana agha Abhatomwa 20
20
Pauro araghya mu-kyaro ikya Makedonia na Bhughiriki
1Hano riihë irya Ëfësö riyö ryaahööyë, Pauro akabherekera Abhakiristo abha hayö, akabhatërëmya. Akaraghana nabho, akaghya Makedonia. 2Hano yaahetanga mu-kyaro kiyö, yaatëëbhyanga Abhakiristo amangʼana amaaru agha okobhatërëmya. Akamara, akaghya Bhughiriki, 3akamara-yo imyëri etatö.
Hano Pauro yaangʼatirë ukuriina mu-ryato aghende Siria, akanyoora amangʼana igha, Abhayahudi bhamöghëmëëyë inikö. Amangʼana ghayö ghakaghera Pauro aighambere mo-motwe ughwaye, akakyora, akahetera Makedonia. 4Oroghendo ruyö, Pauro yaahinaini hamwë na bhaabho Sopatero mura uwa Piro ono yaarwërëëyë mu-mughi ghono ghwaabherekerwanga Bherooya, Arisitariko bhaana Sekundo ukurwa Tësarönikë, Ghaayo uwa mu-mughi ughwa Dëribhë, Timoteo, na abhantö abhabhërë abha Asia Enke, Tikiiko bhaana Turofimo. 5Abhantö bhayö, bhakatangata ukughya Tiroa, bhakatoghanyera-ho. 6Sinsikö isya inyangi iya emekaate gheno ghetatöörrwë-mo ehamiira, hano syaahööyë, tokarwa Firipi na iryato. Iryato rekakenya sinsikö isaano, tokahika Tiroa. Tokasikana-ho na bharikyëtö bhayö. Tokaikara hayö sinsikö muhungatë.
Pauro araryökya Ëutikö
7Hano urusikö urwa Jumapiri rwaahikirë, tokasangerania, okore tomonyorrane omokaate. Ko bhoora Pauro yaarë na oroghendo nyinkyo yaako, akashumaasha na abhantö igho ubhutikö bhokahengekana. 8Mu-kinyumba ikya eghorofa keno twaaikomanëëyi-mo, syaare-mo setara sinsharu seno syookanga-mo. 9Yaare-mo umumura ono yaabherekerwanga igha Ëutikö. Ëutikö uyö, yaaikaayë haangʼë na ridirisha irya ikinyumba kiyö. Ikinyumba kiyö, kyaarë ko-ghorofa iya katatö. Enkaagha eno Pauro yaaghëndërryanga ukushumaasha, Ëutikö akasundaghera, akakamba akaihiribhwa, akaharaatoka ukurwa ku-ridirisha kuyö, akaisendeka hansë. Akasengʼenswa na abhantö, amarrë ukukwa. 10Pauro akaika, akabhuumara ku-mumura uyö, akamwibhaara, akatëëbhya abhantö bhayö igha, “Motakoobhoha, naraaryoke!” 11Ho Pauro yaatirrë mu-kinyumba ikya ko-ghorofa, akamonyora omokaate, akarya. Ghwiki akaghëndërrya ukushumaasha igho na hano öröghörö rwaasambirë, ho yaatanööyë. 12Abhantö bhayö, bhakahira umumura uyö yeeka arëngë ömöhöru, bhakashomerwa bhököngʼu.
Pauro ararwa Tiroa araghya Mireto
13Mbe, bhëëtö tokariina mu-ryato, tokaghya mu-mughi ghono ghwaabherekerwanga igha Aso, okore tusikane-yo na Pauro. Twaarenga twighwerraini nawe igha, tomohetere iyö. Pauro akaghenda amaghörö ukughya Aso. 14Tokasikana iyö, akariina mu-ryato, tokahinana mu-mughi ghono ghwaabherekerwanga igha Miturene. 15Hano bhwaakëëyë, tokaghëndërrya na oroghendo urwëtö, tokaheta mbareka iya righinga irya Kio. Hano bhwaakëëyë, urusikö urwa katatö, tokaghobha kwi-ghinga irya Saamo, tokaikara Tiroghirio. Hano bhwaakëëyë ghwiki urwa kane, tokahika mu-mughi ughwa Mireto. 16Pauro yaatunirë igha toheteerani igho totakaaheta mu-mughi ughwa Ëfësö, ko bhoora ataatunanga ateghete mu-kyaro ikya Asia Enke. Kasi hano akaanyöörrë umweya, yaatunanga angohe ukuhika Yërusarëëmu, urusikö urwa inyangi iya Pentekosite rotaraahika.
Pauro araraghana na abhaghaaka abha ekanisa iya Ëfësö
17Hano Pauro yaarë Mireto hayö, yaatömirë amangʼana ko-bhaghaaka abha ekanisa iya Ëfësö igha bhaashe. 18Hano abhaghaaka bhayö bhaahikirë, Pauro akabhatëëbhya igha, “Bhëënyu momanyirë bhuuya bhono naikaayë na bhëënyu hano, ukurwa urusikö urwa mbere rono naatashirë Asia Enke hano. 19Kora hano Abhayahudi abhëëtö bhaankörëëyë inikö, öni naaghömërrëëyi inyanko, ndatighinkanera Omonene Yëësu, m-mara kaaru naakuuranga amaisöri gharaheta. 20Momanyirë kya bhono naabharaghërrëëyi amangʼana ghonswe igho ghano gharaabhatöörri. Tenabhabhisirë engʼana iya okobhatöörrya kora ëmwë hë. Naabhëëghyanga harabhu igho, kora na mu-mighi ighyënyu honswe. 21Naatëëbhyanga Abhayahudi hamwë na Abhayunaani igha, bhahongore ëbhëbhë ibhyaho, bhaashe ku-Waryobha, bhakumi Yëësu Kiristo, Omonene uwëëtö.
22“Mbe, bhoono Umwika Ömöhörëëru angöötirë-ko igha ngende Yërusarëëmu. Kasi temanyirë amangʼana ghano gharaannyoore iyö hë. 23Kasi Umwika Ömöhörëëru yaahonyorranga mu-mighi ghyonswe igho gheno naahetanga-mo igha, inyanko na ekebhohe, nkonganya bhërë. 24Kora nenkaakwa të-këntö ku-öni hë. Keno këntönëri ni-igha, mmarërri emeremo gheno Omonene Yëësu yaangʼaana okokora. Emeremo ghiyö, ni-ighya okoraarekera abhantö Amangʼana Amaiya agha örööbhö urwa Waryobha.
25“Kasi bhoono nemanyirë igha, kö-bhëënyu bhonswe igho bhano naaraarekera amangʼana agha Obhokama ubhwa Waryobha, taaho ömöntö ono areemaaha ghwiki hë. 26Ku bhuyö, bhoono nkobhatëëbhya ndë harabhu igho igha, nyoore ömöntö nasira mö-bhëënyu mono, amaanyinga aghaaye teghanyirombere hë. 27Ko bhoora tenaakubhiri okobhatëëbhya ko obhokarë ghonswe igho ghano Waryobha akutuna momanye.
28“Bhëënyu mwiraarerrenga abheene, na okonaghya bhuuya abhakumya. Umwika Ömöhörëëru we yaabhakora mobhe abhaimërërri abhaabho. Ko bhoora Yëësu, we yaabhatungurya okohetera ko-maanyinga aghaaye. 29Nemanyirë igha, hano ndaaihëëni-ho, abhëëghya abharongo mbariisha kö-bhëënyu. Abhëëghya bhayö, bhareebha kya sishuushë sëmbë seno setakwabhera rihisho. 30Kora mö-bhëënyu monomono, mbaryebhoka-mo abhantö bhano bharëtëëya amangʼana agha obhoheene okore bhangʼöröngʼööbhi Abhakiristo, bhabhasoorane. 31Ku bhuyö, mwiyangarre! Muhiitenga igha, imyoka etatö gheno naikaayë hamwë na bhëënyu hano, naaraghërryanga kera ömöntö ubhutikö na omobhasö, kora nkuura amaisöri ghaheta.
32“Bhoono ndabhatoora ku-Waryobha, na ko engʼana iya örööbhö urwaye. Engʼana iyö, yo ekotora okobhatogheka ebhakore mobhe abhasangi abha umwandö hamwë na abhantö bhonswe igho bhano bhasaabhuurwa.
33“Öni tenaighömbirë hera, esahaabhu handë singibho isya ömöntö wowonswe oora hë. 34Bhëënyu abheene mmomanyirë bhuuya igha, ko okokora emeremo na amabhoko aghaane, naaitoneranga öni umwene na bhano naarë hamwë nabho. 35Ko-ghayö ghonswe igho, naabhörökëri igha, okobha na omotono ko-meremo, ne-nshera inshiiya iya ökötöörrya bhano bhaana obhohabhë. Muhiite bhono Omonene Yëësu yaaghambirë igha, ‘Nyakara okohaana, ko bhoora te-konga okohaanwa hë.’ ”
36Mbe, hano Pauro yaamarrë okoghamba amangʼana ghayö, akatema hansë ibhiru hamwë na bhayö bhonswe igho, akasaasaama Waryobha. 37Bhonswe igho bhakakuura bhököngʼu, bharamwibhaara na bharamumumunta. 38Engʼana eno yaaghërrë bhakabhaabhayera bhököngʼu, m-boora yaabhatëëbhëri igha, taaho ömöntö ono areemaaha ghwiki hë. Mbe, bhakamoherekerra igho, bhakamuhikya mu-ryato.
Currently Selected:
Amangʼana agha Abhatomwa 20: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
Amangʼana agha Abhatomwa 20
20
Pauro araghya mu-kyaro ikya Makedonia na Bhughiriki
1Hano riihë irya Ëfësö riyö ryaahööyë, Pauro akabherekera Abhakiristo abha hayö, akabhatërëmya. Akaraghana nabho, akaghya Makedonia. 2Hano yaahetanga mu-kyaro kiyö, yaatëëbhyanga Abhakiristo amangʼana amaaru agha okobhatërëmya. Akamara, akaghya Bhughiriki, 3akamara-yo imyëri etatö.
Hano Pauro yaangʼatirë ukuriina mu-ryato aghende Siria, akanyoora amangʼana igha, Abhayahudi bhamöghëmëëyë inikö. Amangʼana ghayö ghakaghera Pauro aighambere mo-motwe ughwaye, akakyora, akahetera Makedonia. 4Oroghendo ruyö, Pauro yaahinaini hamwë na bhaabho Sopatero mura uwa Piro ono yaarwërëëyë mu-mughi ghono ghwaabherekerwanga Bherooya, Arisitariko bhaana Sekundo ukurwa Tësarönikë, Ghaayo uwa mu-mughi ughwa Dëribhë, Timoteo, na abhantö abhabhërë abha Asia Enke, Tikiiko bhaana Turofimo. 5Abhantö bhayö, bhakatangata ukughya Tiroa, bhakatoghanyera-ho. 6Sinsikö isya inyangi iya emekaate gheno ghetatöörrwë-mo ehamiira, hano syaahööyë, tokarwa Firipi na iryato. Iryato rekakenya sinsikö isaano, tokahika Tiroa. Tokasikana-ho na bharikyëtö bhayö. Tokaikara hayö sinsikö muhungatë.
Pauro araryökya Ëutikö
7Hano urusikö urwa Jumapiri rwaahikirë, tokasangerania, okore tomonyorrane omokaate. Ko bhoora Pauro yaarë na oroghendo nyinkyo yaako, akashumaasha na abhantö igho ubhutikö bhokahengekana. 8Mu-kinyumba ikya eghorofa keno twaaikomanëëyi-mo, syaare-mo setara sinsharu seno syookanga-mo. 9Yaare-mo umumura ono yaabherekerwanga igha Ëutikö. Ëutikö uyö, yaaikaayë haangʼë na ridirisha irya ikinyumba kiyö. Ikinyumba kiyö, kyaarë ko-ghorofa iya katatö. Enkaagha eno Pauro yaaghëndërryanga ukushumaasha, Ëutikö akasundaghera, akakamba akaihiribhwa, akaharaatoka ukurwa ku-ridirisha kuyö, akaisendeka hansë. Akasengʼenswa na abhantö, amarrë ukukwa. 10Pauro akaika, akabhuumara ku-mumura uyö, akamwibhaara, akatëëbhya abhantö bhayö igha, “Motakoobhoha, naraaryoke!” 11Ho Pauro yaatirrë mu-kinyumba ikya ko-ghorofa, akamonyora omokaate, akarya. Ghwiki akaghëndërrya ukushumaasha igho na hano öröghörö rwaasambirë, ho yaatanööyë. 12Abhantö bhayö, bhakahira umumura uyö yeeka arëngë ömöhöru, bhakashomerwa bhököngʼu.
Pauro ararwa Tiroa araghya Mireto
13Mbe, bhëëtö tokariina mu-ryato, tokaghya mu-mughi ghono ghwaabherekerwanga igha Aso, okore tusikane-yo na Pauro. Twaarenga twighwerraini nawe igha, tomohetere iyö. Pauro akaghenda amaghörö ukughya Aso. 14Tokasikana iyö, akariina mu-ryato, tokahinana mu-mughi ghono ghwaabherekerwanga igha Miturene. 15Hano bhwaakëëyë, tokaghëndërrya na oroghendo urwëtö, tokaheta mbareka iya righinga irya Kio. Hano bhwaakëëyë, urusikö urwa katatö, tokaghobha kwi-ghinga irya Saamo, tokaikara Tiroghirio. Hano bhwaakëëyë ghwiki urwa kane, tokahika mu-mughi ughwa Mireto. 16Pauro yaatunirë igha toheteerani igho totakaaheta mu-mughi ughwa Ëfësö, ko bhoora ataatunanga ateghete mu-kyaro ikya Asia Enke. Kasi hano akaanyöörrë umweya, yaatunanga angohe ukuhika Yërusarëëmu, urusikö urwa inyangi iya Pentekosite rotaraahika.
Pauro araraghana na abhaghaaka abha ekanisa iya Ëfësö
17Hano Pauro yaarë Mireto hayö, yaatömirë amangʼana ko-bhaghaaka abha ekanisa iya Ëfësö igha bhaashe. 18Hano abhaghaaka bhayö bhaahikirë, Pauro akabhatëëbhya igha, “Bhëënyu momanyirë bhuuya bhono naikaayë na bhëënyu hano, ukurwa urusikö urwa mbere rono naatashirë Asia Enke hano. 19Kora hano Abhayahudi abhëëtö bhaankörëëyë inikö, öni naaghömërrëëyi inyanko, ndatighinkanera Omonene Yëësu, m-mara kaaru naakuuranga amaisöri gharaheta. 20Momanyirë kya bhono naabharaghërrëëyi amangʼana ghonswe igho ghano gharaabhatöörri. Tenabhabhisirë engʼana iya okobhatöörrya kora ëmwë hë. Naabhëëghyanga harabhu igho, kora na mu-mighi ighyënyu honswe. 21Naatëëbhyanga Abhayahudi hamwë na Abhayunaani igha, bhahongore ëbhëbhë ibhyaho, bhaashe ku-Waryobha, bhakumi Yëësu Kiristo, Omonene uwëëtö.
22“Mbe, bhoono Umwika Ömöhörëëru angöötirë-ko igha ngende Yërusarëëmu. Kasi temanyirë amangʼana ghano gharaannyoore iyö hë. 23Kasi Umwika Ömöhörëëru yaahonyorranga mu-mighi ghyonswe igho gheno naahetanga-mo igha, inyanko na ekebhohe, nkonganya bhërë. 24Kora nenkaakwa të-këntö ku-öni hë. Keno këntönëri ni-igha, mmarërri emeremo gheno Omonene Yëësu yaangʼaana okokora. Emeremo ghiyö, ni-ighya okoraarekera abhantö Amangʼana Amaiya agha örööbhö urwa Waryobha.
25“Kasi bhoono nemanyirë igha, kö-bhëënyu bhonswe igho bhano naaraarekera amangʼana agha Obhokama ubhwa Waryobha, taaho ömöntö ono areemaaha ghwiki hë. 26Ku bhuyö, bhoono nkobhatëëbhya ndë harabhu igho igha, nyoore ömöntö nasira mö-bhëënyu mono, amaanyinga aghaaye teghanyirombere hë. 27Ko bhoora tenaakubhiri okobhatëëbhya ko obhokarë ghonswe igho ghano Waryobha akutuna momanye.
28“Bhëënyu mwiraarerrenga abheene, na okonaghya bhuuya abhakumya. Umwika Ömöhörëëru we yaabhakora mobhe abhaimërërri abhaabho. Ko bhoora Yëësu, we yaabhatungurya okohetera ko-maanyinga aghaaye. 29Nemanyirë igha, hano ndaaihëëni-ho, abhëëghya abharongo mbariisha kö-bhëënyu. Abhëëghya bhayö, bhareebha kya sishuushë sëmbë seno setakwabhera rihisho. 30Kora mö-bhëënyu monomono, mbaryebhoka-mo abhantö bhano bharëtëëya amangʼana agha obhoheene okore bhangʼöröngʼööbhi Abhakiristo, bhabhasoorane. 31Ku bhuyö, mwiyangarre! Muhiitenga igha, imyoka etatö gheno naikaayë hamwë na bhëënyu hano, naaraghërryanga kera ömöntö ubhutikö na omobhasö, kora nkuura amaisöri ghaheta.
32“Bhoono ndabhatoora ku-Waryobha, na ko engʼana iya örööbhö urwaye. Engʼana iyö, yo ekotora okobhatogheka ebhakore mobhe abhasangi abha umwandö hamwë na abhantö bhonswe igho bhano bhasaabhuurwa.
33“Öni tenaighömbirë hera, esahaabhu handë singibho isya ömöntö wowonswe oora hë. 34Bhëënyu abheene mmomanyirë bhuuya igha, ko okokora emeremo na amabhoko aghaane, naaitoneranga öni umwene na bhano naarë hamwë nabho. 35Ko-ghayö ghonswe igho, naabhörökëri igha, okobha na omotono ko-meremo, ne-nshera inshiiya iya ökötöörrya bhano bhaana obhohabhë. Muhiite bhono Omonene Yëësu yaaghambirë igha, ‘Nyakara okohaana, ko bhoora te-konga okohaanwa hë.’ ”
36Mbe, hano Pauro yaamarrë okoghamba amangʼana ghayö, akatema hansë ibhiru hamwë na bhayö bhonswe igho, akasaasaama Waryobha. 37Bhonswe igho bhakakuura bhököngʼu, bharamwibhaara na bharamumumunta. 38Engʼana eno yaaghërrë bhakabhaabhayera bhököngʼu, m-boora yaabhatëëbhëri igha, taaho ömöntö ono areemaaha ghwiki hë. Mbe, bhakamoherekerra igho, bhakamuhikya mu-ryato.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.