Amangʼana agha Abhatomwa 22
22
1“Bhare bhahiiri abhaane na bhaataata, munyitegherre kya igho nkwikoorerra kö-bhëënyu hano!”
2Hano abhantö bhayö bhaaighuurë igha Pauro ni-Kiëbhuraania ikyabho akushumaasha, bhakakira kiri. Pauro akabhatëëbhya igha, 3“Öni m-Muyahudi ndë, umwebhorwa uwa mu-mughi ughwa Tariso, mo-mokowa ughwa Kirikia. Kasi Yërusarëëmu hano ho nkënëëyë. Nkëëghibhwa bhuuya na Ghamariëri amaraghërryö ghonswe igho ghano twaategherwa na abhakörö abhëëtö. Naarenga na omotono ko mangʼana agha Waryobha, kya ghono bhëënyu bhonswe igho mukwörökya urusikö urwa reero igha moonagho.
4“Naanyankyanga na ukwita abhasoorani abha Yëësu. M-bakari na abhashaasha igho, naabhaghootanga mbahira mu-nyumba iya ekebhohe. 5Kora omonene uwa abhasëngëri na abhaghaaka abha ribharasa, mbaraaikërri ghayö ngambirë. Ko bhoora mbo bhaangʼaayë ritashandighi okoherra Abhayahudi abha mu-mughi ughwa Damasiko. Nkaghya-yo, okore ngoote Abhakiristo abha mu-mughi ghuyö, mbareete Yërusarëëmu hano, bhashibhibhwi.
6“Mbe, nkaghya. Hano naahikirë haangʼë na Damasiko, iryobha rihikirë ko-motwe bhöröngë, kamwë igho, emerengaari ëmërörö kai ukurwa mu-ryobha, ghekammërëkërya mbaara syonswe igho. 7Nkaghwa hansë, nkaighwa engamba erantëëbhya igha, ‘Sauri! Sauri! N-kwakë ukunnyankya igho?’
8“Mbe, nkabhöörya igha, ‘Kana Omonene, nu-uwe wë?’ Ekahonshora igha, ‘Nö-öni Yëësu uwa Nazarëëti, ono ukunyankya.’ 9Bharikyane bhano naarë hamwë nabho, mbaarööshë emerengaari, kasi tebhaighuurë engamba iyö hë. 10Nkabhöörya igha, ‘Bhoono iyakë nkaakora Omonene uwaane?’ Akanhonshora igha, ‘Emoka, osohe Damasiko muyö. Muyö mo oraatëëbhibhwi bhuuya ghonswe igho ghano Waryobha akutuna okore.’ 11Emerengaari ghiyö, ghekaghera amaiso aghaane ghakamwama. Ku bhuyö bharikyane bhakandahuuna, bhakansöhya Damasiko muyö.
12“Mu-mughi muyö, yaarenga-mo ömöntö ono yaasookwanga na Abhayahudi bhonswe igho abha iyö, yaabherekerwanga igha, Anania. Anania uyö, yaasookanga amaraghërryö aghëëtö. 13Mbe, akaasha, akaimerra mbareka iyaane hayö, akantëëbhya igha, ‘Sauri umukumya murikyane, ramökya!’ Kamwë igho amaiso aghaane ghakaramökya, nkamomaaha.
14“Akantëëbhya igha, ‘Waryobha uwa abhakörö abhëëtö, akushaaghööyë, okore omanye righonshe iryaye, kora omaahe ömöntö uwa heene ku-Waryobha,#22:14 Ömöntö uwa heene ku-Waryobha n-Yëësu. Maaha mo-ketabho ikya Amangʼana agha Abhatomwa 7:52. na wighwe obhoghambi ubhwaye umwene. 15Ko bhoora nu-uwe oraabhe umwimërërri uwaaye ko-bhantö bhonswe igho, obhatëëbhi ghonswe igho ghano örööshë, na ghano wighuurë. 16Bhoono uwe, otakaategheta. Emoka! Obhatiisibhwi, osaabhuurwe, osaasaame Waryobha akwabhere ëbhëbhë ibhyaho.’
17“Hano naakyörrë Yërusarëëmu, enkaagha eno naasaasaamanga mo-bhogho ubhwa risengerro irya Waryobha, nkeesherwa na amamaaho. 18Nkamaaha Omonene Yëësu mo-kerooto muyö, arantëëbhya igha, ‘Wangohe ukurwa Yërusarëëmu hano, ko bhoora abhantö abha mu-mughi ghono, tebhaikërri ubhwimërërri ubhwaho ko amangʼana aghaane.’ 19Kasi öni nkamohonshora igha, ‘Ore Omonene uwaane, ndarra abhantö mbamanyirë bhuuya igha naahetanga mu-sinyumba isya esango iyaabho ndaghoota-mo abhakumya abhaaho, ndabhatema na okobhahira mo-kebhohe. 20Kora hano umwimërërri uwaaho Sitefaano yaaitirwë, ho naarë. Nkaikërrya igha aitwe. Singibho isya bhano bhaamwitirë, nö-öni naasenaghëri.’
21“Kasi wonswe akanhonshora igha, ‘Uwe kaghi! Ko bhoora nendaakotome oghende hare iyö ko-Bhakyaro.’ ”
22Abhantö bhayö, mbaamwitegherranga bhuuya okohekera hano yaaghambirë engʼana iya Abhakyaro. Hayö bhoono bhakashaghana bharaghamba igha, “Aitwe! Ömöntö kya ono, taingʼarëëyë okobha-ho hë!” 23Abhantö bhayö mbaakörrë ikituri, bharahuusha huusha singibho isyabho na ukwirura urutu, ukwörökya igha bharërëëyë.
24Omonene uwa abhasirikare uyö, akahamera abhasirikare abhaaye igha, bhasöhi Pauro mo-bhogho ubhwabho, bhamöbhööri ko okomotema na imishariti, okore aghambe keno kekoghera abhantö bharamushererra.
Pauro araitobhora igha m-Muruumi
25Enkaagha eno abhasirikare bhaamobhohanga okore bhamoreereese bhörrö, Pauro akanöghörya omonene uwaabho ono yaarenga aimërëëyë hayö igha, “Kasi bhëënyu, amaraghërryö nkobhaikërërrya gharë igha motemenga Abharuumi, kora umwahokania ataraabhabhotorra ikiina?”
26Mbe, omonene uyö hano yaaighuurë amangʼana ghayö, akaghya ko-monene uwaabho, akamötëëbhya igha, “Kana, m-mangʼana kë ukutuna okokora? Ömöntö ono m-Muruumi!” 27Ho omonene uwa abhasirikare uyö yaaghëëyë ko-Pauro, akamöbhöörya igha, “Ntëëbhya, m-maheene igha m-Muruumi örë?” Pauro akamohonshora igha, “Yëë, m-Muruumi ndë.” 28Omonene uyö akamötëëbhya igha, “Öni Ubhuruumi bhuyö, naabhoghora seehera sinsharu.” Pauro akamohonshora igha, “Öni m-Muruumi ndë ukurwa okosemoka.”
29Kamwë igho, abhasirikare bhano bhaatunanga ökömöbhöörya amangʼana, bhakarwa-ho bhöngöbhöngö. Omonene uyö hano yaaighuurë igha Pauro m-Muruumi, akoobhoha ko bhoora waanyöörrë amarrë okomobhoha na ebheraangʼani.
Pauro araimerra mo-bharasa
30Omonene uwa abhasirikare uyö, yaatunirë amanye obhoheene ubhwa keno kyaaghërrë Abhayahudi bhakashongera Pauro. Mbe, hano bhwaakëëyë, akatashora Pauro, akaraghërrya igha, abhanene abha abhasëngëri na abhaghaaka abha ribharasa#22:30 Ribharasa. Maaha mo-faharaasa. bhonswe igho bhaikomani. Hano bhaikomaini, akareeta-ho Pauro, akamwimërrya bhöröngë ubhwabho.
Currently Selected:
Amangʼana agha Abhatomwa 22: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
