Abhagharatia 1
1
Amakëërërryö
1Ritashandighi reno, nku-öni Pauro omotomwa riruurë. Öni tenaatomwa na abhantö hë, kora tebhaaho abhantö bhano bhaaghambirë igha mbe omotomwa. Kasi Yëësu Kiristo umwene we yaantoma bhaana Taata Waryobha ono yaamuryökëri ukurwa mo-bhaku. 2Öni toona abhakumya bharikyëtö bhonswe igho bhano bharëngë hamwë na öni, nkobhakëërya törë, bhëënyu abha mo-makanisa agha Waryobha ghano gharëngë mo-mokowa ughwa Gharatia. 3Örööbhö na omorembe ukurwa ku-Waryobha Taata uwëëtö, na ko-Monene uwëëtö Yëësu Kiristo bhebhe hamwë na bhëënyu. 4Kiristo yaairuusiri öbhöhöru ubhwaye, ko okoghera iya ukuruusya-ho ëbhëbhë ibhyëtö. Yaakörrë igho, okore atötööri turwe mo-mangʼana amaghogho ghonswe igho agha ko-kebhara keno ikya bhoono igho. Ghayö ghonswe igho ngaabhaayë igho, ko okorengʼaana na okohansha ukwa Waryobha Taata uwëëtö. 5Waryobha atöönibhwi amakora na amakora. Amina.
Motakaaitegherra amëëghyö amaghogho
6Öni nkobharoghoora ndë bhököngʼu. Ko bhoora ni-ribhagha ike igho ryaahëtirë, hayö haiki igho, bhëënyu moranga Waryobha ono yaabhabherekera kö rööbhö urwa Kiristo, kasi ni-mighiro ighyëndë igho mokoghoota. Imighiro ghiyö, ngyo abhandë bhakobherekera igha, ngyo Amangʼana Amaiya agha Kiristo. 7Obhoheene ni-igha, teghaaho Amangʼana Amaiya aghandë okokera ghayö hë. Nkoghamba ndë ghayö ko bhoora igha, bhaaho abhantö bhano bhakobhabhurunga. Kora nkutuna bharë igha bhasyöri Amangʼana Amaiya agha Kiristo. 8Kasi ömöntö wowonswe oora, nokaanyoora igha m-bëëtö bhano, handë igha maraika ukurwa mu-ryobha aashe abharaarekere amangʼana ghano gharëngë bhöndë igho, ghano ghatatuubhaini na ghaara öni naabharaarëkëëyë, ömöntö kya uyö, anyoore riragha! 9Nkobhatëëbhya ndë ghwiki kya bhoora naabhatëëbhëri enkaagha eera igha, hano ömöntö wowonswe igho araashe abharaarekere Amangʼana Amaiya agha eteemo iyëndë, ghano ghatatuubhaini na ghaara naabharaarekera, ömöntö kya uyö, anyoore riragha!
10Bhoono bhëënyu nkokanya mörë igha nkutuna ndë okohanshwa na abhantö? Ti-igho hë, keno nkutuna no-kohanshwa na Waryobha umwene igho! Okaanyöörrë igha na-bhantö nkutuna kötëghërya, tenkaabhaayë omoghorwa uwa Yëësu Kiristo hë.
Pauro aratomwa na Waryobha okoraareka Amangʼana Amaiya
11Abhakumya bharikyëtö, nkutuna ndë momanye igha, Amangʼana Amaiya ghano naabharëëtëëyë tenagharuusiri ko-bhantö hë. 12Ko bhoora taaho ömöntö ono yaaghangʼaayë hë, kora të-möntö wowonswe igho yaanyörökërrëëyi hë. Kasi Yëësu Kiristo umwene we yaanhönyörrëëyë.
13Ndamanya mwaighwa bhono naarenga, enkaagha eno naitaneranga idiini iya Ikiyahudi, bhono naanyankëri bhököngʼu abhantö abha ekanisa iya Waryobha, na bhono naatunanga ngisiki këmwë. 14Naakërrë bharikyane abhaaru, abha embaasi iyaane, ku ukwitanera idiini iya ikiyahudi. Naarenga na omotono bhököngʼu, ughwa okoghoota amëëghyö agha abhakörö bhëëtö. 15Kasi Waryobha yaanshaaghööyë kora ntareebhorwa, kö örööbhö urwaye, akamberekera, akamaaha igha, 16anhonyorre amangʼana agha Omoona uwaaye kya bhono arë. Yaakörrë igho, okore ndaareke Amangʼana Amaiya agha Yëësu Kiristo ko-Bhakyaro. Tenatunirë abhantö abha okondaghërrya keno nkaakörrë. 17Tenaaghambirë igha, “Tigha ngende Yërusarëëmu ko bhaara bhaantangatëëyë okobha abhatomwa.” Kasi keno naakörrë kamwë igho, nu-kughya mu-kyaro ikya Arabhia, hano nkomara, nkakyora Damasiko.
18Hano imyoka etatö ghyaahëtirë, nkaghya Yërusarëëmu, okore nsikanere-yo na Peetero.#1:18 Peetero. Iriina iryaye iryëndë ni-igha Keefa. Ensonga iya amariina ghayö ni-igha, Ritare. Nkaikara waaye hayö, sinsikö ikömi na isaano. 19Kasi tenaarööshë abhatomwa abhandë hë, kutigha Yaakobho mura uwaabho Omonene uwëëtö Yëësu. 20No-bhoheene nkobhatëëbhya, kora Waryobha namanyirë igha, amangʼana ghano nkobhandekera te-bhorongo hë.
21Mbe, hano naamarrë, nkaghya mo-mokowa ughwa Siria na ughwa Kirikia. 22Enkaagha iyö abhakumya abha Kiristo abha amakanisa agha mo-mokowa ughwa Yudea, tebhaarenga bhammanyirë hë. 23Ëkëntö keno bhaamanyirë ku-öni ikyene igho, n-keera bhaaighuurë igha, “Ömöntö ono yaatunyankyanga ekembere haara, reero eno nkoraareka arë umukumo ghooraghoora yaashaashëri kusikya.” 24Mbe, bhakatöönia Waryobha ko okoghera iya ghano yaankorra.
Currently Selected:
Abhagharatia 1: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.